Azərbaycanlının “qaraladığı” antirekordçu - Portret
Bütün futbol azarkeşləri bu il Rusiyada keçiriləcək
dünya çempionatını səbirsizliklə gözləyirlər. Lakin heç bir futbol fanatı bu
mundialı rus azarkeşlər qədər arzulaya bilməz. Rusiya futbol həvəskarları
keçmiş günlərinin həsrətindədir. SSRİ dağıldıqdan sonra bu nəhəng imperiyanın əsas
ölkəsi olan Rusiya adıçəkilən ölkənin futbol sahəsindəki uğurlarını da mənimsədi.
SSRİ millisinin vaxtilə qazandığı uğurlarda rus futbolçularla yanaşı,
ukraynalı, gürcü və digər millətlərin nümayəndələrinin də böyük rolu var idi.
Lakin ittifaqın ən böyük ölkəsi kimi Rusiya bu uğurların özlərinə şamil edilməsi
qərarına gəldi. Hazırda SSRİ millisinin beynəlxalq arenada qazandığı uğurlar rəsmi
olmasa da, qeyri-rəsmi şəkildə Rusiya yığmasına hesablanır. Lakin şimal
qonşumuz hələ ki, özünü sovetlərin xələfi kimi sübut edə bilməyib. SSRİ yığması
qatıldığı böyük turnirlərdə adətən qrup mərhələsini adlayır, hətta bəzən
iddialı seçmələrə badalaq vuraraq yoluna sədd də çəkirdi. Rusiya yığması isə bu
günə kimi qatıldığı 3 mundialın heç birində (1994, 2002, 2014) uğur qazana bilməyib.
Şimal qonşumuz hər 3 halda mübarizəni qrup mərhələsində başa vurub.
Bu cəhətdən bu il Rusiyada keçiriləcək mundial bu ölkə
üçün əsl sınaq xarakteri daşıyacaq. Ruslar doğma meydanda keçirilən dünya
çempionatında Misir, Səudiyyə Ərəbistanı və Uruqvayla mübarizədə ən azı qrup mərhələsini
keçməklə, təkcə xokkey yox, həm də futbol ölkəsi olduğunu sübut etməli, həmçinin
SSRİ-nin xələfi adına layiq olduğunu isbatlamalıdır.
Ancaq hazırkı Rusiya millisində bu ağır yükün altına
girəcək futbolçu çox azdı. Xüsusən rusların hücum xətti ulduz sarıdan korluq çəkir.
İrəli xətdə yüksək səviyyəli futbolçu qıtlığından əziyyət çəkən millilərdə isə
diqqət daha çox arxa xəttə yönəlir. Rusiya millisində də həmçinin. Bu gün şimal
qonşumuzun heyətində ən diqqətçəkən sima qapıçı İqor Akinfeyevdir. Bu yazıda
sizə DÇ-2018-in ev sahiblərinin kapitanı, "hərbçi” Akinfeyevin karyerasından bəhs
edəcəyik.
4 yaşından "hərbçi”
İqor Akinfeyev 1986-cı il aprelin 8-də Moskva vilayətinin
Vidnoe şəhərində dünyaya gəlib. Onun futbolla tanışlığı çox erkən - cəmi 4
yaşında olub. Atası Vladimir oğlunu ÇSKA-nın futbol məktəbinə yazdırır. Beləcə,
4 yaşlı İqorun futbol həyatı başlayır. Onun ilk məşqçisi Dezideriy Kovaç olur.
Futbol məktəbində 4 yaşlı uşaqlar üçün qrup olmadığından, İqor özündən bir neçə
yaş böyüklərlə məşq etməyə başlayır. O ki qaldı mövqe, bu, onun öz seçimi olub.
"Spartak”ın qapıçısı Stanislav
Çerçesovun pərəstişkarı olan azyaşlı, onun kimi qolkiper olmaq həvəsinə düşür və
artıq ikinci məşqində "çərçivə”yə keçir. Maraqlıdır ki, Akifeyev bir çox
uşaqdan fərqli olaraq, kiçik yaşlarında tez-tez komanda dəyişmir. Məşqlərə eyni
tempdə davam edən İqor, pillə-pillə bütün yaş qruplarını keçir. Sabit çıxış
gec-tez, əsas komandanın qapılarını gənc qolkiperin üzünə açmalı idi, açır da.
Azərbaycanlını əvəzləyərək
gerçəkləşən debüt
O, 2003-cü ildə İsrailə təlim-məşq toplanışına
yollanan ÇSKA-nın əsas komandasına daxil edilir. İlk vaxtlardan artıq onu
Veniakin Mandrıkinin əsas əvəzləyicisi kimi görməyə başlayırlar. "Hərbçilər”in
heyətində debütü isə 2003-cü il martın 29-na təsadüf edir. Akinfeyev Rusiya
kubokunun 1/8 final mərhələsində "Zenit”lə qarşılaşmanın ikinci hissəsində
meydana çıxır. O, həmin vaxt "hərbçilər”in şərəfini qoruyan millimizin sabiq
qolkiperi Dmitri Kramarenkonu əvəz edir. Akinfeyev ÇSKA-nın əsas komandasında
debüt edərkən heç 17 yaşı tamam olmamışdı. Bundan cəmi 2 ay sonra isə İqorun
Premyer Liqada debütü alınır. O, "Krılya Sovetov”la matçda bir penalti dəf edir
və matçın ən yaxşı oyunçusu seçilir. Elə həmin ildə gənc qolkiper
avrokuboklarda da debüt edir. UEFA kubokunda Makedoniya "Vardar”ı ilə matçdakı
debüt Akinfeyev üçün uğursuz alınır. Moskva təmsilçisi 1:2 hesabı ilə uduzaraq, mübarizəni dayandırır. Ancaq Rusiya
futbolunun əfsanəvi qapıçılarından Rinat Dasayev buraxılan qollarda İqoru
günahkar saymır.
Cavadovun "qaraladığı”
qapıçı
2004-cü ildə isə Akifeyev artıq ÇSKA-nın əsas üzvünə
çevrilir. Onun Çempionlar Liqasında debütü isə Bakıya təsadüf edir. 2004-cü il
iyulun 27-də, Çempionlar Liqasının 2-ci təsnifat mərhələsində "Neftçi” ilə matç
gənc İqorun qitənin ən nüfuzlu klub turnirində ilk qarşılaşması olur. Akinfeyev
paytaxtımızdakı debütündə qol buraxmır - 0:0.
Ancaq bu, İqorun Bakıya son səfəri olmur. Belə ki, o,
bundan sonra daha iki dəfə - 2009 və 2013-cü illərdə paytaxtımıza gəlir. Bu dəfə
Rusiya millisinin heyətində. Lakin Bakıya ilk səfərindən fərqli olaraq, İqor sonrakı
səfərlərində qapısında qol görür. Dünya çempionatının seçmə mərhələsi çərçivəsində
keçirilən hər iki oyun 1:1 hesablı bərabərliklə başa çatır. Maraqlıdır ki,
Akinfeyevin qapısından hər iki qolu onun özü kimi ÇSKA-nın yetirməsi olmuş
Vaqif Cavadov keçirir.
Addım-addım rekorda doğru
Millidən söz düşmüşkən, İqor Rusiya millisində də çox
erkən - 18 yaşında debüt edib. Akinfeyev yığmanın "çərçivə”sində ilk oyununu
Norveçə qarşı keçirib (2:3). 32 yaşlı qolkiper geridə qalan 14 il ərzində 104
oyunda yığmanın formasını geyinib.
Bu illər ərzində onun yığma ilə bağlı heç də xoş
olmayan xatirələri də var. Belə ki, 2015-ci ildə AÇ-2016-nın seçmə mərhələsinin
Çernoqoriya ilə səfər matçında azarkeşlərin atdığı petarda qolkiperin başına dəymiş,
İqor xəstəxanaya yerləşdirilmişdi. Xoşbəxtlikdən istedadlı qapıçı ciddi xəsarət
almamışdı.
O, millinin kapitanıdır. İqor hər keçən gün millidə
oyun sayına görə rekordçu olmağa bir az da yaxınlaşır. Hazırda Rusiya
millisinin bu cəhətdən rekordçusu Sergey İqnaşeviçdir (120 oyun). Yeri gəlmişkən,
hazırda Akinfeyev üçün yığmada çıxış etmək ikiqat şərəfli olmalıdır. Axı
hazırda Rusiya millisini İqorun uşaqlıq kumiri Stanislav Çerçesov çalışdırır...
Antirekordçu
Akinfeyev artıq 28 ildir ki, ÇSKA-nın üzvüdür. Onun "hərbçi”
həyatı cəmi 4 yaşından başlayıb. Bu illər ərzində heç vaxt dəyişiklik etmək,
başqa kluba üz tutmaq barədə düşünmür. Akinfeyev bu illər ərzində ÇSKA ilə bir
çox uğurlar qazanıb. Onun kolleksiyasında 6 Premyer Liqa, 6 ölkə kuboku və 6
ölkə superkubokunun qızıl medalları var. Şəxsi kolleksiyasındakı ən dəyərli
mükafat isə şübhəsiz, 2004-cü ildəki UEFA kubokunun qızıl medalıdır.
Lakin hər bir idmançıda olduğu kimi, İqorun da uğursuz
dövrləri olub. Akinfeyevin ən böyük uğursuzluğu isə Çempionlar Liqası ilə
bağlıdır. Daha doğrusu, buna uğursuzluqdan daha çox, bəxtsizlik də demək olar.
Belə ki, Akinfeyev ÇL-də ən uzun müddət qol buraxan qapıçıdır. O, nə az, nə
çox, düz 43 matçda ardıcıl qol buraxmaqla, bu sahədə yeni antirekord müəyyənləşdirib.
Xaç atası
Akinfeyevin sevimli qrupu "Ruki Verx”dir. İqor bu
qrupun mahnılarını dinləyərək böyüyüb. Taleyin işinə bax ki, o, sonradan bu
qrupun solisti Sergey Jukovla yaxın dost olur. Onlar birlikdə "Letniy veçer”
mahnısını da yazırlar. Akinfeyev "Ruki Verx”in "Otkroy mne dver” klipində də
yer alıb. İqor 2009-cu ildə Jukovun oğlunun xaç atası olub. Akinfeyev kitab da
yazıb. O, "Oxuculardan 100 penalti” kitabının müəllifidir. İqor Yekateria
Qerunla evlidir. Cütlüyün Danil adında bir oğlu və Yevgeniya adında bir qızı var.
Qolkiper ali təhsillidir. O, 2008-ci ildə Moskva Dövlət Akademiyasının bədən tərbiyəsi
fakültəsini bitirib.
İqorun uşaqlıq kumiri Rusiyada Çerçesov, xaricdə isə
"Valensiya” və İspaniya millisinin sabiq qapıçısı Santyaqo Kanisares olub.
Portret
Çoxları Akinfeyevi ÇL-in antirekordçusu kimi
xatırlayır. Ancaq fərqli düşünən, onun oyununu yüksək dəyərləndirənlər də var.
Beynəlxalq Futbol Tarixi və Statistikası Federasiyası 21-ci əsrin ən yaxşı
qolkiperləri siyahısında ona ilk "20-lik”də (15-ci yer) yer verib. "Qapıçı
komandanın yarısıdır” - bu ifadə futbolda ən çox yayılmış terminlərdəndir.
Ruslar bunu daha yaxşı anlayar. Axı bu ölkə, Lev Yaşın, Renat Dasayev kimi əfsanəvi
qolkiperlər yetişdirib. Düzü, bu cür əfsanələrin çıxış etdiyi ölkədə yaddaşlarda
qalmaq çox çətindir. Lakin Akinfeyevin bunun üçün yaxşı şansı var - DÇ-2018.
İqor mundialda təkcə yığanın qapısını yox, həm də, ölkə futbolunun nüfuzunu
qoruyacaq. O, Rusiyada keçiriləcək dördilliyin ən möhtəşəm futbol turnirində
uğura ac millini irəli aparmaqla, ölkə futbol tarixində özünəməxsus yer
tutmalıdır. Bax, onda bəlkə, gələcəkdə Yaşin, Dasayevlə yanaşı, Akinfeyev
soyadını da eşidəcəyik...
Elnur