Azərbaycanlı şair “Böyük qarın kəraməti” poeziya festivalında
Dünya Gənc Türk Yazarlar
Birliyinin Məsləhət Şurasının başqanı,
şair Əkbər Qoşalı oktyabrın 19-u
Yakutiyada keçirilən "Böyük qarın kəraməti” beynəlxalq poeziya festivalında
iştirak edir. Onun sözlərinə görə, poeziya bayramı çərçivəsində festivalda tanınmış yakut yazarlarla yanaşı, müxtəlif
ölkələrdən olan yazarlar, ədəbiyyat nümayəndələri iştirak edirlər. Festivalın
açılış mərasimi Yakutsk şəhərində yerləşən Şimal Şərqi Federal Universitetinin
Mədəniyyət Mərkəzində keçiriləcək.
Festival günlərində tanınmış yakut yazarların və eləcə də digər ədəbiyyat nümayəndələrinin "Canlı avtoqraf” mərasimi təşkil ediləcək.
"Festivalda müəlliflərdən
biri Rifat Salaxın olduğu və yakut dilində nəşr edilmiş "Müasir tatar poeziyası
antologiyası” kitabı onun imzası ilə oxuculara
təqdim ediləcək. Qeyd edim ki, Rifat Salax Bakıda DGTYB-nin təşkil etdiyi gənc
yazarların görüşlərində iştirak edib. Festival çərçivəsində oktyabrın 20-i poeziya axşamının keçirilməsi nəzərdə
tutulur. İnanıram ki, bu cür mədəni, ədəbi tədbirlər ədəbi sahədə Azərbaycan və Yakutiya
əlaqələrinin daha da canlanmasına öz töhfəsini verəcək.”
Qeyd edək ki, festivalın
digər qonaqları Udmurtiyanın xalq yazıçısı Vyaçeslav Arserqi,
Sloveniyanın tanınmış şairi Andrey Xoçevar, "Literaturnaya qazeta” mətbu
orqanında "Rusiyanın çoxdilli lirikası" ("Многоязыкая лира России”) layihəsinin şef-redaktoru Anastasiya Yermakova, hərbi
münaqişələr sahəsində Novorusiyada ədəbi desantların təşkilatçısı, şair Aleksey
Polubota və başqalarıdır.