Azərbaycanlı həkimə Nobel medalı verilib - Fotolar

Yüksək mükafat qazanan Azərbaycan alimlərinin sırası genişlənir.

Azadinform xəbər verir ki, hərtərəfli biliyi və peşə təəssübkeşliyi ilə bir çox sahələri fəth edən alimlərimizdən biri də həmyerlimiz, həkim-cərrah Ceyhun Babayevdir.

Belə ki, elm və ixtiraların inkişafına verdiyi töhfələr nəzərə alınaraq, o, Rusiya Akademiyasının Mükafatlar Komissiyası tərəfindən Nobel medalına və Akademiyanın professoru adına layiq görülüb.

Qeyd edək ki, Rusiya Akademiyasının Rəyasət Heyəti qərarına əsasən, həmyerlimizə Nobel medalının təltif edilməsi mərasimi Moskva şəhərində keçirilib.

Xatırladaq ki, Ceyhun Alim oğlu Babayev 1983-cü ildə doğulub. 2002-ci ildən Rusiya Federasiyası Udmurtiya Respublikasının İjevsk şəhərində yaşayıb.

2002-2008-ci illərdə İjevsk Tibb Akademiyasının müalicə-işi fakültəsini bitirərək, 2009-2011-ci illərdə ümumi cərrahiyyə üzrə internatura və ordinatura bölmələrini müvəffəqiyyətlə başa vuraraq, həkim-cərrah peşəsinə yiyələnib.

2012-2016-cı illərdə ümumi cərrahiyyə kafedrasının aspirantı olub. 2012-2017-ci illərdə həkim-cərrahı, mədəaltı vəzinin irinli iltihabı zamanı müalicə taktikası adlı dissertasiya və Patent üzrə Dövlət Komitəsində qeydiyyatdan keçirilərək, 2014-cü il patent hüququ alıb.

27 mart 2017-ci ildən etibarən tibb elmləri namizədi adını qazanıb, onlarla metodik tövsiyələr, məqalələr və tezislərin müəllifidir.

Bundan başqa, 2008-2011-ci illərdə Rusiyadakı Azərbaycanlı Gənclər Birliyinin (Odlar yurdu və Leyla xanım Əliyevanın sədrlik etdiyi AMOR) Udmurtiya bölməsinin sədri olub.

2008-ci ildə "IV Rus millətlər festivalı”nın laureatı adını qazanıb.

2011-ci ildən Ümumrusiya Azərbaycanlıları Konqresinin Udmurtiya regional bölməsinin icraçı direktorudur.

2013-cü ildən Rusiya endoskop Cərrahlar Cəmiyyətinin həqiqi üzvüdür.

2010-2014-cü ildə Udmurtiya dövlət universitetinin beynəlxalq hüquq fakültəsini bitirərək, "hüquqşünas” ixtisasına yiyələnib və hazırda Udmurtiya Respublikasının Sarapul rayon Deputatlar Şurasının deputat köməkçisidir.

Hazırda Bakı şəhərində yaşayır.