Bakı 25°C
Azərbaycanlı dünya çempionu oldu, Ərdoğan təbrik etdi
Azərbaycanlı atlet Ramil Quliyev tarixi uğura imza atıb.
Kaspi.az xəbər verir ki, Türkiyə millisinin şərəfini qoruyan
həmyerlimiz Londonda keçirilən yüngül atletika üzrə dünya çempionatında qızıl
medal qazanıb. O, 200 metr məsafəyə yarışda 20.09 saniyə nəticə göstərərək,
fəxri kürsünün birinci pilləsinə qalxıb.
"Fənərbaxça” klubunun şərəfini qoruyan həmyerlimiz qardaş ölkəyə bu
sahədə ilk dünya çempionluğunu qazandıraraq, tarix yazıb.
Çempionluğunu rəsmiləşdirən Ramil göz yaşlarına əngəl ola bilməyib.
O, çempionluğun ardından Türkiyə ilə yanaşı, Azərbaycanın da bayrağını nümayiş
etdirərək, doğma vətənini unutmadığını göstərib.
Həmyerlimizin tarixi uğuru Türkiyə Respublikasının prezidenti Rəcəb
Tayyip Ərdoğanın da diqqətindən yayınmayıb. Prezident rəsmi "tvitter”
səhifəsində azərbaycanlı idmançını təbrik edib:
"Atletika üzrə dünya çempionatında kişilər arasında 200 metr məsafəyə
yarışda qızıl medal qazanaraq hamımızı qürurlandıran Ramil Quliyevi könüldən
təbrik edirəm”.
Xatırladaq ki, Ramildən öncə bu məsafəyə yarışda qızıl medalı
əfsanəvi atlet Useyn Bolt əldə etmişdi. Yamaykalı atlet 4 dəfə ardıcıl 200 metr
məsafəyə yarışı qızıl medalla başa vurmuşdu.
