Azərbaycanın sabitləşdirici amil kimi rolu artır
Xalqımızın müsəlman Şərqində qurduğu ilk demokratik
cümhuriyyətin bugünkü varisi müstəqil Azərbaycan təmsil olunduğu coğrafi məkanın
inkişaf etmiş, güclü dövlətidir. Öz təbii sərvətlərindən, resurslarından səmərəli
istifadə edən, "qara qızıl”ı zamanında insan kapitalına çevirən ölkəmiz indi də
bu inkişaf yolunda irəliləməkdədir. Təsadüfi deyil ki, dünya dövlətləri, beynəlxalq
təşkilatlar da Azərbaycanın uğurlarını daim qeyd edir, ölkəmizi sabitliyin,
tolerantlığın, multikulturalizmin məkanı, Cənubi Qafqazın lider dövləti, beynəlxalq
əhəmiyyətli tədbirlərin ən yüksək səviyyədə keçirildiyi diyar kimi səciyyələndirirlər.
Bütün bunlar Azərbaycanın beynəlxalq aləmdə nüfuzunun daha da artmasına,
dünyada söz sahibinə çevrilməsinə səbəb olur. Bu kontekstdə dövlət başçısı
İlham Əliyev xarici ölkələrdə keçirilən mühüm tədbirlərə dəvət edilir, onun
fikirləri dinlənilir, Azərbaycanın qısa zamanda keçdiyi inkişaf yolu, qazandığı
təcrübə öyrənilir. Elə bu günlərdə prezidentİlham Əliyev 53-cü Münhen Təhlükəsizlik
Konfransında iştirak etmək üçün Almaniya Federativ Respublikasında işgüzar səfərdə
olub. Səfər çərçivəsində dövlətimizin başçısı Xorvatiya Respublikasının
Prezidenti Kolinda Qrabar-Kitaroviç, Əfqanıstan İslam Respublikasının
Prezidenti Məhəmməd Əşrəf Qani, Türkiyə Respublikasının Baş naziri Binəli
Yıldırım, İsrail Dövlətinin müdafiə naziri Aviqdor Liberman, BMT-nin baş katibi
Antonio Quterreş, Kiyev şəhərinin meri, Ukrayna İslahatlar naminə Demokratik
Alyansının sədri Vitali Kliçko, "MAN SE” şirkətinin baş icraçı direktoru Yoaxim
Dris, "Kaspersky Lab” şirkətinin sahibi və baş icraçı direktoru Yevgeni
Kasperski, "Leonardo” şirkətinin baş icraçı direktoru və baş meneceri Mauro
Moretti ilə görüşlər keçirib.
Yeni regional
əməkdaşlıq formatı
Münxen Təhlükəsizlik Konfransı çərçivəsində "Qiymətlərin
sabitləşməsinə doğru? OPEC-in qayıdışı və neft geosiyasəti” mövzusunda "dəyirmi
masa”da iştirak edən dövlət başçısı qlobal əhəmiyyətə malik olan bir tədbirdə
iştirak etməkdən məmnunluq duyduğunu diqqətə çatdırıb. Deyib ki, enerji təhlükəsizliyini
ölkənin milli təhlükəsizliyindən ayırmaq mümkün deyil. Ölkə başçısı bildirib
ki, bu baxımdan Azərbaycan region üçün enerji təhlükəsizliyini təmin etməklə öz
vacib rolunu oynayır. Hazırda irimiqyaslı qaz təchizatı layihəsinin həyata
keçirilməsinə gəldikdə, Azərbaycan prezidenti qeyd edib ki, ölkəmiz Avropanın
enerji təhlükəsizliyinin təmin olunmasında da vacib rolunu oynayacaq. Prezident
İ.Əliyev bildirib ki, Azərbaycan Xəzər dənizinin şərq sahillərindən neft və
neft məhsullarının çatdırılması üçün tranzit ölkəyə çevrilib. Onun fikrincə,
ölkəmiz müxtəlif vasitələrlə, dəmir yolu və neft kəməri ilə neftin nəqlində öz
vacib rolunu oynayır. Dövlət başçısı vurğulayıb ki, Azərbaycan Xəzər dənizinin
şərq sahilində yerləşən tərəfdaşlarının təchizat marşrutlarını şaxələndirməyə də
kömək edir. Prezident İ.Əliyev deyib ki, Cənub Qaz Dəhlizi Azərbaycanı Avropa
bazarları və Avropa bazarlarına aparan marşrut boyunca yerləşən ölkələrlə birləşdirən
üç fərqli boru kəmərindən ibarət inteqrasiya olunmuş sistemidir. Onun sözlərinə
görə, bu layihə tamamilə yeni bir regional əməkdaşlıq formatını yaradıb.
Sivilizasiyalar,
mədəniyyətlər arasında dialoqa töhfə
Münhen Təhlükəsizlik Konfransı çərçivəsində
Avrasiyada əməkdaşlıq və problemlər məsələlərinə həsr olunan panel-müzakirədə
iştirak edən dövlət başçısı İ.Əliyev Azərbaycanda həyata keçirilən
islahatlardan, əldə edilən nailiyyətlərdən söhbət açıb. Qeyd edib ki, 20 il
bundan öncə Azərbaycanın təşəbbüskar qismində çıxış etdiyi enerji və nəqliyyat
layihələri bu gün nəinki təkcə ölkəmiz üçün, həmçinin region üçün də yaxşı nəticələr
verir. Ölkə başçısı bildirib ki, Azərbaycanın siyasətinin məqsədi ilk növbədə
qonşularla, eyni zamanda, müsəlman dünyası və Avropa ilə əməkdaşlığın gücləndirilməsidir:
"Biz çox nadir ölkələrdən biriyik ki, eyni zamanda, həm İslam Əməkdaşlıq Təşkilatının,
həm də Avropa Şurasının üzvüyük. 2015-ci ildə biz ilk Avropa Oyunlarını təşkil
etdik. Bu il biz IV İslam Həmrəyliyi Oyunlarına ev sahibliyi edəcəyik. Beləliklə,
bu, bizim niyyətlərimizi göstərir və biz sivilizasiyalar, mədəniyyətlər
arasında dialoqa çoxlu töhfə veririk”.
Sərhədlər güc
yolu ilə dəyişdirilə bilməz
Prezident İ.Əliyev bütün beynəlxalq tədbirlərdə,
xarici səfərlərdə olduğu kimi bu dəfə də diqqəti Ermənistan-Azərbaycan, Dağlıq
Qarabağ münaqişəsinə yönəldib. Qeyd edib ki, üzləşdiyimiz problemlərdən ən
böyüyü Ermənistan tərəfindən Azərbaycan ərazisinin davamlı işğalıdır.
Prezidentin sözlərinə görə, bu, Ermənistan tərəfindən etnik təmizləmə və ərazimizin
20 faizinin işğalı ilə nəticələnib. Ölkə başçısı deyib ki, ATƏT-in Minsk
qrupunun həmsədr ölkələri olan Rusiya, ABŞ və Fransa BMT Təhlükəsizlik
Şurasının daimi üzvləri kimi təcavüzkara təzyiq göstərməli, onların iştirakı ilə
münaqişənin həllinə dair Təhlükəsizlik Şurası tərəfindən qəbul olunan 4 qətnamə
yerinə yetirilməlidir. "Ermənistan təkcə Dağlıq Qarabağı yox, həmçinin erməni əhalisinin
heç vaxt yaşamadığı ətraf yeddi rayonu da işğal edib”, - deyən dövlətimizin
başçısı qondarma "Dağlıq Qarabağ rejimi”nin keçirəcəyi "referendum”un tamamilə
qanunsuz olduğunu və dünyanın heç bir ölkəsi tərəfindən tanınmadığını bildirib:
"Hər bir ölkənin ərazi bütövlüyünə hörmət edilməlidir, onu pozmaq olmaz. Beynəlxalq
səviyyədə tanınan sərhədlər güc yolu ilə dəyişdirilə bilməz. Ermənistan və Azərbaycan
arasında münaqişə həmçinin region üçün ən böyük təhlükədir. Bizim konstruktiv
siyasətimiz münaqişənin BMT Təhlükəsizlik Şurasının və digər vacib təşkilatların
qəbul etdiyi qətnamələr əsasında sülh yolu ilə ən tez nizamlanması məqsədini
daşıyır”.
Milli
iqtisadiyyata müsbət təsir
Azərbaycanın təşəbbüsü ilə iri enerji və nəqliyyat
layihələrinin icra olunduğunu diqqətə çatdıran Prezident İ.Əliyev hazırda ölkəmizin
qədim "İpək Yolu”nun bərpasında yaxından iştirak etdiyini, Bakı-Tbilisi-Qars dəmir
yolunun çəkildiyini, bu yolun fəaliyyətə başladığı təqdirdə Azərbaycan ərazisindən
daşınmaların artacağını, bunun da milli iqtisadiyyatımıza müsbət təsir göstərəcəyini
vurğulayıb. Azərbaycanın öz qonşuları olan İran, Türkiyə və Rusiya ilə yaxşı
münasibətlərinin olduğunu xatırladan ölkə başçısı bildirib ki, bu münasibətlər
qarşılıqlı hörmətə əsaslanır. Qonşularımız arasında baş verən gərginliklərin Azərbaycanı
da narahat etdiyini və bu cür halların regional sabitliyə təhlükə yaratdığını
söyləyən dövlətimizin başçısı Azərbaycanın təyyarə insidentindən sonra Türkiyə-Rusiya
münasibətlərinin normallaşmasında fəal iştirak etdiyini diqqətə çatdırıb. Deyib
ki, bu məqsədlə həm Türkiyə Prezidenti Rəcəb Tayyib Ərdoğan, həm də Rusiya
Prezidenti Vladimir Putinlə danışıb. Qazaxıstan Prezidenti Nursultan
Nazarbayevin də vasitəçilik prosesində iştirak etdiyini xatırladan Prezident
İ.Əliyev Türkiyə və Rusiya dövlət başçılarının vəziyyəti qiymətləndirib düzgün
qərar verdiklərini vurğulayıb. O, artıq Azərbaycanın sabitləşdirici amil kimi
rolunun artdığını və bunun getdikcə beynəlxalq ictimaiyyət tərəfindən daha çox
tanındığını qeyd edib.
Beynəlxalq aləmin
hörmət bəslədiyi ölkə
Bir neçə gün bundan əvvəl ABŞ və Rusiya Baş qərargah
rəislərinin Bakıda keçirilən görüşünü şərh edən Prezident İ.Əliyev bildirib ki,
Azərbaycan güclü beynəlxalq nüfuza malik, ABŞ, Avropa və qonşularımız, o cümlədən
Rusiya ilə çox yaxşı münasibətləri olan, onların hörmət bəslədiyi ölkədir. Onun
sözlərinə görə, artıq nəinki təkcə regionda, həm də daha geniş miqyasda Azərbaycanın
sabitləşdirici amil kimi rolu artacaqdır.
Alpər TURAN