Azərbaycanın nüfuzunu artıran hesabat
Bu
günlərdə "Standard & Poor's” (S&P) beynəlxalq reytinq agentliyi 2018-ci
ildə Azərbaycan dövlət büdcəsinin profisitlə icra olunacağına dair məlumat
yayıb. Belə ki, bu barədə "Standard
& Poor’s" (S&P) beynəlxalq reytinq agentliyinin yaydığı hesabatda
qeyd olunur: "Biz cari ildə dövlətin büdcə mövqeyinin 2014-cü ildən etibarən
ilk dəfə müsbət saldoya qayıdacağını düşünürük”.
Agentlik
Azərbaycan dövlət büdcəsinin 2018-ci ildə ÜDM-in 1,5 faizi həcmində, 2019-cu il
- 0,6 faiz, 2020-ci il - 1,1 faiz, 2021-ci ildə isə ÜDM-in 1,7 faizi həcmində
profisitini ehtimal edir: "Biz Azərbaycan dövlət büdcəsinin orta illik
profisitinin növbəti 4 ildə ÜDM-in 1,1 faizi həcmində olacağını
proqnozlaşdırırıq”.
Son illər
həyata keçirilən iqtisadi islahatlar, görülən işlər və dövlətin bu sahəyə
göstərdiyi diqqət və qayğı artıq öz bəhrəsini verməkdədir. Xeyli sayda beynəlxalq
maliyyə qurumları və reytinq təşkilatları ölkəmiz haqqında müsbət rəylər
verirlər. İqtisadiyyatın şaxələndirilməsi, rəqabət mühitinin formalaşdırılması,
kiçik, orta və eləcə də böyük sahibkarlar üçün yaradılan yeni iş imkanları nəticə
etibarilə beynəlxalq qurumların hesabatında özünü büruzə verir.
İqtisadçı-alim Vüqar Bayramovdeyir ki, 2018-ci il üçün nəzərdə tutulan büdcə gəlirləri
proqnozlaşdırıldığından çox olacağı gözlənilir: "Əsas səbəblərdən biri neftin
büdcə qiymətinin 45 dollarla hesablanmasıdır. Hazırda Azərbaycan neftinin bir
bareli 70 dollardan baha qiymətə satılır. Yəni, neftin büdcə qiyməti ilə real
qiyməti arasında 25 dollardan artıq fərq var. Ümumilikdə götürsək, büdcə
gəlirlərinin neft sektoru üzrə daxilolmaları proqnoz edilən məbləğin həyata
keçirilməsinə imkan verir. Təbii ki, neftin mövcud qiyməti ilə dövlət büdcəsinə
daha çox vəsaitin daxil olmasına şərait yaranır. Həmçinin, bu il qeyri neft
sektorundan da daxilolmaların həcmində artımın olacağı gözlənilir. Çünki büdcə
xərclərində də 3 milyard manata yaxın artım qeydə alınıb. Büdcədən qeyri-neft
xüsusilə, inşaat sektoruna yönəldilən vəsaitin həcmində artım var. İnşaat
sektoru və ümumilikdə qeyri-neft sektoruna yönəldilən vəsaitin həcminin artması
həm də həmin vəsaitlərin hesabına dövlət büdcəsinə daha çox verginin cəlb
edilməsi deməkdir. Nəzərə alsaq ki, 2018-ci il üçün prioritet məqsəd qeyri-neft
sektorunun inkişafıdır. Bu sahənin inkişafı nəticəsində büdcəyə daha çox vergi
ödəniləcək. Bütün bu proseslərin fonunda isə büdcəyə daxilolmaların ümumi həcmi
artacaq. Əgər büdcə xərclərində dəyişiklik olmazsa, mövcud xərclər artıq
2018-ci ilin dövlət büdcəsində profisitin əldə olunacağı gözlənilir. Neftin
qiyməti indiki kimi yüksək olarsa 2018-ci ilin büdcəsinə yenidən baxılıb və
əlavə dəyişikliklərin edilməsi də istisna deyil. Belə beynəlxalq agentliklərin
verdikləri proqnozlar bizim üçün mühüm əhəmiyyət kəsb edir. Sözügedən təşkilat
həm qiymətləndirmə aparır, həm də beynəlxalq reytinqləri qeyd edir. Ölkənin
şirkətlər və banklar üzrə qiymətləndirilmə üzrə
reytinq göstəricilərinin yaxşı olması və müsbət saldonun əldə edilməsi nəticə etibarı ilə Azərbaycanın
gələcəkdə kredit limitinə təsir göstərəcək faktorlardandır. Belə agentliklərin
ölkəmiz ərazisində verdikləri müsbət proqnozlar indiki dövrdə daha vacibdir. Çünki
xarici sərmayədarlar bu amillərə diqqət edirlər. Bu mənada verilən proqnozlar ölkəyə
cəlb ediləcək investisiya həcmlərinə birbaşa təsir göstərir”.
İqtisadç-ekspert Rəşad Həsənovbildirdi ki, bunun bir neçə səbəbi var: "Büdcənin icrası zamanı gəlirlərin və
xərclərin həcmində müəyyən korrektələr oldu. Bu da də öz növbəsində profisitə
gətirib çıxarır. Bütün hallarda əsas məqam neftin qiyməti ilə bağlıdır. 2018-ci
ilin dövlət büdcəsində neftin qiyməti 45 dollar nəzərdə tutulub. Amma indi neftin
qiyməti 70 dollar ətrafında var-gəl edir.
Bu isə əlavə olaraq neft sektorundan dövlət büdcəsinə vergi daxilolmalarının
həcmini əhəmiyyətli dərəcədə artırır. Əgər xərclərə nəzarət olunarsa, 2018-ci
ildə dövlət büdcəsində profisitin olacağı gözlənilir. Amma büdcənin profisitlə
icra olunması qeyri-neft iqtisadiyyatının inkişafı və daxil olan vergilərin
həcminin artması nəticəsində baş verməsi daha əhəmiyyətlidir. Çünki bu halda dövlət
büdcəsində qeyri-neft bölməsinin gəlirləri əhəmiyyətli səviyyədə artmaqla
nəzərdə tutulan defisitin kompensasiyası üçün müəyyən qədər şərait yarana
bilər. Bu halda iqtisadi inkişafın göstəricisi olaraq profisit ortaya çıxır.
Ümumiyyətlə götürdükdə bu gün Azərbaycan ölkəyə investisiya həcmini artırmaq
istəyirsə və xarici investorların ölkədə fəaliyyət göstərməsinə çalışırsa,
beynəlxalq maliyyə qurumlarının və reytinq agentliklərinin proqnozlarında və
hesabatlarında ölkənin mövqeyinin irəli çəkilməsində maraqlı olmalıdır. Çünki
investorlar ilkin mərhələdə pul hesabatlarını gözdən keçirir və bu hesabatlar
əsasında öz qərarlarını verirlər. Ölkənin reputasiyasının artması həm də eyni
zamanda investorun marağının təşviq olunması baxımından vacibdir”.
Şəbnəm Mehdizadə