Azərbaycanın mətbuat tarixində rusdilli nəşrlər
XIX əsrin ikinci yarısından
başlayaraq Rusiyanın yürütdüyü siyasət nəticəsində, imperiyanın tərkibinə daxil
edilən əyalətlərdə, o cümlədən Qafqazda çarizmin qanun-qaydalarını, siyasətini,
ona faydalı olan məlumatları yaymaq məqsədi ilə dövri nəşrlərin yaranmasına
şərait yaradılırdı.
II Aleksandrın hakimiyyəti
dövründə (1855-1881) Rusiyanın iqtisadi və siyasi həyatında "böyük islahatlar”
baş verdi. Təhkimçilik hüququ ləğv olundu, yerli özünüidarə tətbiq edildi,
məhkəmə və senzura islahatları hazırlandı və həyata keçirildi. 1865-ci il
aprelin 6-da II Aleksandrın "Ölkə mətbuatına bəzi yüngüllük və rahatlıq
verilməsi haqqında” Fərmanı oldu. Bu hüquqdan, 2,5-5 min rubl çərçivəsində
girov qoyaraq, Daxili İşlər Nazirliyinin razılığı əsasında paytaxt qəzet və
jurnallarında istifadə edə bilərdilər. Lakin əyalət mətbuatı əvvəlki kimi
mərkəzi quberniya və şəhər hakimiyyətinin ikiqat, üçqat nəzarəti altında
qalırdı.
Həmin dövrdə Tiflisdə rus və
gürcü dillərində bir neçə dövrü mətbuat işıq üzü görmüşdü. Erməni vilayətində
də bu proses gedirdi. Belə ki, həftədə iki dəfə "Kavkaz” ədəbi-siyasi qəzeti,
gürcü dilində "Maxarobeli”, "Siskari”, "Sakartvelos Moambe”, erməni dilində isə
üç şöbədən ibarət "Пчела Армении», 1860-cı ildən elmi-ədəbi jurnal olan «Журавль Армении» nəşr edilirdi.
Azərbaycanda XIX əsrin 70-ci
illərindən 1918-ci ilin mayınadək - Azərbaycanda Xalq Cümhuriyyəti qurulanadək
rus dilində 100-dən çox qəzet və jurnal nəşr olunmuşdu. Doğrudur, Azərbaycanda
nəşr edilən rusdilli mətbuat haqqında kifayət qədər ədəbiyyat olsa da, nəşr
olunan dövri mətbuatın sistemləşdirilərək, ümumiləşdirici şəkildə tədqiqata
cəlb edilməsi işi ilk dəfə olaraq məhz Lalə Hacıyeva tərəfindən qələmə alınan
"Azərbaycanın rusdilli vövri mətbuatının tarixindən (1871-1918)” adlı
monoqrafiyasında işıqlandırılmışdır.
Azərbaycanın paytaxtı Bakıda rus dilində çıxan ilk
dövri nəşr 1871-ci ildə işıq üzü gördü. Bu, Bakı Realnı Gimnaziyasının alman
dili müəllimi, alman protestantı, maarifçi, pedaqoq Xristian Sinkin
redaktorluğu ilə həftəlik çıxan "Bakinskiy Listok” (1871-1872) adlı qəzet idi.
Qəzetdə iqtisadi, ədəbi-siyasi mövzulara üstünlük verilirdi. Bu qəzet milli
mətbuat orqanı olmasa da, Azərbaycanda ilk rusdilli dövri mətbuat orqanı idi.
Qəzetin uzunmüddətli çapı üçün
X.Sink dövlətdən maddi yardım və ya ianə istəmək üçün Bakı hərbi qubernatoru
general-leytenant M.P.Kolubyakinə müraciət etsə də o, "qəzetin istiqamətinin
faydalı olacağına tam əmin deyil” deyərək, rədd cavabı vermişdi.
Buna baxmayaraq, "Bakinskiy listok” qəzeti, eləcə
də ən mühüm mövzuları - təhsil, səhiyyə, gəmiçilik, ticarət, ictimai-sosial
problemləri əhatə etməyə çalışırdı. Eyni zamanda qəzetdə diyarın tarixinə, dini
yazılara, rus və dünya ədəbiyyatı, teatr, musiqi, beynəlxalq həyatda baş verən
ən mühüm hadisələrə dair materiallar da işıqlandırılırdı.
Hətta qəzetin ilk sayında redaksiya tərəfindən, Azərbaycan dilində
məqalələr də çap etmək istəyində olduqları bildirilmişdi. Bu niyyət yerli əhali
tərəfindən sevinclə qarşılandı, abunəçilərin sayı gözlənildiyindən də artıq
oldu, hətta ucqar kəndlərdən də abunəçi oldu. Çünki naşir, məlumatında
bildirmişdi ki, onun qəzeti yalnız imtiyazlı təbəqə üçün deyil, cəmiyyətin
az-çox savada malik olan bütün təbəqələrindən olan, geniş oxucu kütləsi üçün
nəzərdə tutulmuşdu.
Onu da qeyd etmək lazımdır ki,
"Bakinskiy Listok” özünü daha çox sosial-iqtisadi qəzet kimi təqdim edirdi.
Lakin dünyada baş verən siyasi və ədəbi hadisələr haqqında məlumatları da oxuculara
çatdırmaqdan yan keçmirdi.
Lalə Hacıyeva monoqrafiyasında
təəssüflə qeyd edir ki, Bakının və bütövlükdə Azərbaycanın ilk rusdilli dövri
nəşri demək olar ki, tədqiq edilməyib (Hacıyeva L. Azərbaycanın Rusdilli Dövri
Mətbuatı Tarixindən (1871-1918), s.83-84). Akademik Heydər Hüseynovun
Azərbaycanda XIX əsr ictimai və fəlsəfi fikir tarixindən” adlı əsərində (Bakı,
"Elmlər Akademiyasının nəşri”, 1949, s.501) "Bakinskiy Listok” haqqında ötəri
qeyd edilmişdir.
Professor Nazim Axundovun "Sənədlərin dili ilə
monoqrafiyasında isə qəzet haqqında kiçik məlumat verilmişdir. L.Hacıyevanın
yazdığına görə, Azərbaycanda "Bakinskiy Listok” qəzetinin heç bir nömrəsi
tapılmamışdır. Odur ki, araşdırıcı müəllif qəzetin nüsxələrini
Sankt-Peterburqda yerləşən Saltıkov Şedrin adına Rusiya Milli Kitabxanasının
fondunda aşkar edərək, onu tədqiq etmişdir.
"Bakinskiy Listok” qəzetini
tədqiq edərkən, L.Hacıyeva görkəmli ziyalı, maarifçi, pedaqoq H.B.Zərdabinin
qəzetdə dərc etdiyi məlumat xarakterli yeganə bir məqaləsini aşkar edir.
1869-cu ildən Bakı Realnı Gimnaziyada "Təbiyyət tarixi” fənnini tədris edən
H.Zərdabi, gimnaziyada oxuyan aztəminatlı şagirdlərin təhsil haqqını ödəməkdə,
dəftər-kitab, geyim almaqda, mənzil kirayə etməkdə çətinlik çəkdiklərini
gördüyü üçün 1871-ci ildə onlara kömək məqsədilə "Cəmiyyəti Xeyriyyə” təşkil
edir. Onun məqsəd və vəzifəsini, nizamnaməsini yazaraq hökumət dairələri
tərəfindən təsdiqlədir. H.Zərdabinin təşkil etdiyi xeyriyyə cəmiyyətinə
milliyyəti və dinindən asılı olmayaraq hər iki cinsdən olan şəxslər üzv ola
bilərdilər. Bu məqsədlə, xeyriyyəçi ziyalı "Cəmiyyəti Xeyriyyə”yə üzv toplamaq
üçün gimnaziyada yay vaxtı dərslər qurtardıqdan sonra, vərəqləri səhifələnmiş,
notariusda təsdiqlənmiş, möhürlənmiş xüsusi bir dəftər götürərək Azərbaycanın
əksər şəhər və kəndlərini gəzir, cəmiyyətə üzv olmaq istəyənlərin siyahısını
tutur, imzalarını götürür, vəd elədiyi məbləği dəftərdə qeyd edir. Ancaq Bakıya
qayıtdıqdan sonra adları siyahıda olanlardan cəmisi bir nəfər istisna olmaqla,
heç kim vədini yerinə yetirmir, cəmiyyətə yardım etmir.
H.Zərdabi cəmiyyətə kömək məqsədilə "Cəmiyyəti
xeyriyyə” haqqında "Bakinskiy listok” qəzetinin 1872-ci il 26 fevral tarixli
nömrəsində məlumat xarakterli bir məqalə çap edir. Onun bu məqaləsinə də
münasibət göstərən olmur. Odur ki, "Cəmiyyəti Xeyriyyə” H.Zərdabinin şəxsi
vəsaiti hesabına yalnız 2 il fəaliyyət göstərdikdən sonra bağlanılır.
1876-cı ildə Bakıda rus dilində ikinci bir qəzet - Bakı Quberniya
İdarəsinin rəsmi orqanı olan "Bakinskiye İzvestiya” nəşrə başlamışdır. Onun təsisçisi Bakının
qubernatoru D.S. Sfaroselski idi. Onun quberniyasının nəzdində mətbəəsi,
çapçıları da var idi.
Qəzetin redaktoru S.T.Qulişambarov (1849-1915) təyin edilir. Qəzet
həftədə iki dəfə çıxırdı. Qəzetin əsas məqsədi Bakı quberniyası haqqında
oxuculara geniş məlumat vermək idi. Qəzetin oxucuları əsasən şəhərin rusdilli
əhalisi, həmçinin neft sənayesində işləyən iş adamları idi. Qəzetin əsas
məqalələri Bakıda və dünyada neft hasilatına aid olan materiallardan, sənaye və
fabriklərin işi haqqında müxtəlif məlumatlardan, xarici ədəbiyyata dair
nümunələrdən, Bakıda teatrın təşkili, Bakı və Abşeronun su təchizatı
məsələlərilə bağlı yazılardan ibarət idi. Qəzet dövrünə görə ilk rəsmi mətbu
orqanı olmaqla, çox peşəkar şəkildə tərtib olunurdu. 15 oktyabr 1888-ci ildə
"Bakinskiye İzvestiya” nın adı dəyişdirilərək "Bakinski Torqovo-Promışlennıy
Listok” adlanıb. "Bakinskiye İzvestiya” qəzetində əsasən neft məsələləri ilə
bağlı məqalələr dərc edilirdisə, adı dəyişdirilən qəzet isə yerli ticarət və
sənayeyə aid hökumət sərəncamlarını, inzibati və şəhər idarələrinin
sərəncamlarını, şəhər həyatına dair Şəhər İdarəsinin hesabatlarını, Bakı Birja
Komitəsinin fəaliyyəti haqqında hesabatları, yerli və xarici bazarların
ticarət-sənaye icmalını verməyi, mədənlərin, fabrik və zavodların, dəmir
yolunun işi, diyara gətirilən və diyardan çıxarılan mallar haqqında məlumatları
dərc etməyi qarşısına məqsəd qoymuşdu. Həmin ildən başlayaraq hər il Bakıda
keçirilən yarmarkanı əks etdirən "Bakinski Torqovo-promışlennıy listok”
qəzetinə əlavə olaraq kiçik həcmli "Yarmaroçnıy Listok” vərəqi çıxırdı. Hər iki
nəşrin naşir və redaktorları S.T.Qulişambarov, V.Neruçev və N.Sokolovski idi.
1888-ci ildən qəzet gündəlik çıxırdı, onun nəşrinə icazə isə Əlimərdan bəy
Topçubaşovun adına verilmişdi. Bakıda nəşr olunan "Bakinskiye Obyavleniya” qəzetində
(1894-1901; 1903-1905), "Neftyanoe delo” (1899-1920) adlı jurnalda əsasən çar
hökumətinin tutduğu yol, dövlətin qəbul etdiyi qanun, qərar və göstərişləri,
çarizmin xarici və daxili siyasəti təbliğ olunurdu. Bakı neft sənayeçiləri
qurultayının Şurası tərəfindən nəşr olunurdu. Redaktorları neft sənayeçiləri
P.Qukasov və A.Paronian idilər.
Bakıda 1881-1919-cu illərdə rus
dilində çıxan qəzetlərin içərisində "Kaspi” qəzeti daha çox uzun ömürlü olmuş,
cəmiyyətin həyat tərzinə, onun formalaşmasına böyük müsbət təsir edə bilmişdir.
Qəzetin fəaliyyət göstərdiyi 38 il ərzində onun 10 min 65 nömrəsi çıxmışdır.
İlk illər qəzet yarım çap vərəqi həcmində, sonra gündəlik çıxırdı. Qəzetin ilk
redaktoru V.V.Kuzmin olmuşdur. 1881-1897-ci ilə qədər qəzetin müxtəlif
redaktorları olmuşdur: başda V.Kuzmin olmaqla Y.Starsev, N.Svinkin,
P.Qordiyevski, Y.Boldıreva, N.Sokolinski, K.M.Karyagin, S.K.Mixaylov,
M.A.Şahtaxtinski, M.A.Uspenski və b.
1891-ci ildə "Kaspi”qəzetinin müvəqqəti redaktoru olmuş, çox geniş
biliyə, mükəmməl təhsilə malik olan M.A.Şahtaxtlı çalışırdı ki, Azərbaycan
tarixi və mədəniyyəti haqqında qəzetdə məqalələr getsin. Lakin Azərbaycan xalqı
və azərbaycanlılar haqqında yazan müəlliflər nədənsə məqalələrində tarixi
faktları araşdırmadan azərbaycanlıları "tuzemsı” (туземцы-Е.Cavadova) və ya
yerli əhalini "tatar” adlandırırdılar. Azərbaycanlılara qarşı belə münasibət
Sahtaxtlını narahat etdiyinə görə, "Kaspi” qəzetində azərbaycanlılar üçün mühüm
əhəmiyyət kəsb edən "Zaqafqaziya müsəlmanları necə adlandırılmalı?” başlıqlı məqalə
dərc edir və sualına cavabı da belə verir: "Zaqafqaziya müsəlmanlarını
azərbaycanlı, onların danışıq dilini isə Azərbaycan dili adlandırsaq daha
düzgün olar!” Azərbaycanlıların öz adı ilə çağırılmasına xeyli vaxt getsə də, nəhayət,
Bakı mətbuatında Azərbaycan dili sözü işlənməyə başladı, azərbaycanlılar isə
mətbuatda artıq "aderbaycanlı”, daha sonralar "azərbaycanlı” kimi təqdim
edildi. M.A.Sahtaxtlının qəzetdə fəaliyyəti dövründə onun tirajı 400-420 nüsxə
olmuşdur.
Dövrünün böyük ziyalısı M.A.Şahtaxtlının həmin
dövrdə azərbaycanlılar haqqında söylədiyi tarixi faktlar öz qiymətini yalnız
bir əsrdən də çox vaxt keçəndən sonra Ulu Öndər Heydər Əliyev tərəfindən aldı.
Azərbaycan Konstitusiyasında rəsmi dövlət dilimiz Azərbaycan dili adlandırıldı.
1897-ci ildə qəzet nəşrinin xalqının maariflənməsi
üçün vacib olduğunu bilən Z.A.Tağıyev, "Əkinçi”, "Ziyayi-Qafqaziya” və "Kəşkül”
nəşrləri bağlanıldığı üçün hələlik Azərbaycan dilində qəzet nəşr etməyin
mümkün olmadığını görür. Odur ki, işıqlı dünyagörüşə malik olan biznesmen
Bakıda və bütün Cənubi Qafqazda populyar olan "Kaspi” qəzetini mətbəəsi ilə
birlikdə satın alaraq, qəzetin nəşrini də öz öhdəsinə götürür. Onu
H.B.Zərdabiyə, Ə.M.Topçubaşova, Ə.B.Ağayevə, Ə.B.Hüseynzadə kimi layiqli
yazarlara, jurnalistlərə həvalə edir.
1898-ci il iyunun 24-dən is tanınmış ictimai-siyasi xadim Əlimərdan
bəy Topçubaşovu qəzetin redaktoru təyin edir. Ə.B.Topçubaşov bu illərdə artıq
savadlı jurnalist, qərəzsiz hüquqşünas kimi tanınırdı, mətbuata böyük qiymət
verirdi. O, mətbuata ictimai fikrin ifadəçisi, hər bir cəmiyyət üçün
əhəmiyyətli olan, cəmiyyəti ruhlandıran, həyat hadisələrinə real münasibət
göstərən, onun yaxşılaşdırılmasına xidmət edən bir orqan kimi baxırdı. Görkəmli
ziyalının fikrincə, qəzetin ən başlıca vəzifəsi xalqın maariflənməsinə xidmət
etməsidir. Bunun üçün qəzet ibtidai, ümumtəhsil və xüsusi texniki məktəblərin
açılmasına təkan verməlidir. Çünki, zülmət, nadanlıq və yoxsulluqdan azad
olmağın yeganə yolu xalqın maariflənməsidir. Yalnız məktəbin verdiyi zənginlik,
açdığı yol ilə bu məqsədə nail olmaq olar.
"Kaspi” qəzetində gedən məqalələr çoxşaxəli, müxtəlif məzmunlu idi.
"Kaspi” qəzetinin rus dilində çıxmasına baxmayaraq, onun ətrafında Azərbaycan
ziyalıları toplaşaraq çoxluq təşkil edirdi. A.Mahmudbəyov, N.Nərimanov,
S.Sidqi, H.Zərdabi, T.Bayraməlibəyov, Ə.Ağayev, Ə.Hüseynzadə, N.Minasazov,
E.Sultanov, R.Məlikov, F.Köçərli, M.Mahmudbəyov, N.Nəzirov, S.Qənizadə,
Ü.Hacıbəyli, C.Hacıbəyli və başqalarının qəzetin fəaliyyətində yaxından
iştirakı nəticəsində, nəşr get-gedə milli düşüncəli bir mətbuat orqanına
çevrilirdi. Qəzeti Azərbaycanın ən ucqar əyalətinə belə çatdırmağa
çalışırdılar. Müəlliflər çalışırdılar ki, yazdıqları məqalələrdə qəzetin
nüfuzuna xələl gətirən, siyasətə qatışan fikirlər olmasın. Odur ki,
Ə.Topçubaşovun qəzetə redaktorluq etdiyi dövrdə tiraj 1800-dən 2400-ə
qalxmışdı. Peterburq, Moskva və Tiflisdə nəşr olunan dövri nəşrlər, "Kaspi” qəzetində
gedən ən maraqlı materialları yenidən dərc edirdilər (Mövlayeva S.M. "Kaspi”
qəzetinin səhifələrində Azərbaycan və rus mədəniyyətinin təbliği (1881-1917-ci
illər). Bakı, "Elm”, 1983, s.19).
Qəzetin rus dilində çıxması azərbaycanlı oxucular üçün çətinlik
törədirdisə, digər tərəfdən Cənubi Qafqaz, Orta Asiya, Yaxın Şərq
müsəlmanlarına Azərbaycandan göndərilən ilk rusdilli qəzet kimi yüksək
qiymətləndirilirdi. 1898-ci ildən 1907-ci ilin oktyabrınadək qəzetin redaktoru
Ə.B.Topçubaşovun olmasına baxmayaraq, Əlimərdan bəy ictimai-siyasi xadim kimi
Bakıda olmadığı müddətdə "Kaspi” qəzetinin 608 sayı H.B. (Məlikov) Zərdabinin
redaktor imzası ilə nəşr olunmuşdur (Mövlayeva S.A "Kaspi” qəzetinin birinci
tədqiqatçısı; məqalə rus dilindədir), ("Üç əsrin qəzeti”. Bakı, "Qanun”, 2011,
s.19).
1907-ci ilin oktyabrında
ictimai-siyasi fəaliyyəti ilə əlaqədar, Ə.B.Topçubaşov "Kaspi” qəzetinin
redaktor vəzifəsindən azad edilmişdir.
Nəticə olaraq
deyə bilərik ki, Ə.B.Topçubaşovun redaktorluq etdiyi dövrdə "Kaspi” qəzeti
siyasi məsələlərə qarışmadan, siyasi hadisələri düzgün şərh etməyi, oxucularını
məlumatlandırmağı, əhalinin məişət və sosial yüklü problemlərini işıqlandırmağı,
Azərbaycançılıq ideyasını vətən, torpaq, bayraq düşüncəsini xalqa aşılamağı
bacardı.
Sevindirici
haldır ki, böyük fasilədən sonra Azərbaycan xalqının həyatında böyük rol
oynayan, gözünün açılmasında, qəflət yuxusundan oyanmasında xidmətləri olan Həsən
bəy Zərdabinin təhsil, maarif, mədəniyyət, səhiyyə sahələrinə dair yazdığı
fikirlərini layiqincə davam etdirən "Kaspi” qəzeti 1999-cu ildən öz
fəaliyyətini yenidən bərpa etdi. Rusdilli nəşrlərin arasında "Kaspi” qəzeti ilə
yanaşı, ictimai-siyasi qəzet olan "Baku” qəzeti ermənilər tərəfindən nəşr
edilirdi. Qəzet 1902-ci il oktyabrın 18-dən çıxmağa başladı. Qəzetin redaktoru
V.A.Arutçev, naşiri A.N.Lavrov idi. Lakin qəzetin sahibi neft maqnatı K.Xatisov
idi. Qəzetin məqsəd və vəzifəsi haqqında Bakı Mətbuat İşləri Üzrə Baş İdarəyə
təqdim edilən proqramda göstərilirdi ki, siyasi, iqtisadi və ədəbi "Baku”
qəzeti əsasən, hökumətin Qafqaza aid ən mühüm qanun və sərəncamlarını, öz
müxbirlərinin məktublarını, həmçinin Bakının və diyarın ehtiyaclarına həsr
edilən baş məqalələr və s. dərc edəcək. L.Hacıyeva monoqrafiyasında qeyd edir
ki, elə ilk sayında çıxan baş məqaləsində "Baku” qəzeti hansı məqsədlərlə nəşrə
başladığını büruzə vermişdi. "Baku” "Kavkaz”
qəzetinin sabiq redaktoru V.Veliçkonu tənqid edərək, onu "millətçi”
adlandırmışdı. Səbəb o idi ki, Veliçko ermənilərin Qafqazda məskunlaşması
tarixinə dair yazdığı "Qafqaz rus hökmranlığı və tayfalar arası məsələlər”
kitabında (1904) erməniləri gəlmə xalq hesab etmiş və "onlar yerli deyillər,
bura XIX əsrin birinci yarısında Türkiyədən çox sayda qaçqın kimi gəlmişlər”
yazmışdı. Daha sonra kitabda "ermənilər hətta Türkiyədə yaşadıqları ərazini belə,
"Türkiyə Ermənistanı” adlandırmışlar” fikri də yazılmışdı. "Baku” qəzeti
V.Veliçkonu bu məqaləsinə görə tənqid atəşinə tutmuş və çəkinmədən ona nifrət
etdiyini yazmışdı.
II Nikolayın
imzaladığı "Manifest”dən (1905, 17 oktyabr) sonra Bakıda fəhlə qəzetləri nəşr
olunmağa başlayır. Heç bir hazırlıq işləri görülmədən nəşrə başlayan qəzetlər
tezliklə də "zərərli istiqamətinə” görə bağlanılır. Qəzetlərin təsisçisi olan
fəhlələr qeyd edirlər ki, qəzetlərdə fəhlə sinfinin həyatı, onun ehtiyacları
yaxşı işıqlandırılmadığı, redaktorları isə "müqəddəs iş” üçün toplanan vəsaiti
israf etdikləri, ümumiyyətlə, qəzetdə gedən məqalələrin məzmunundan narazı
qaldıqlarına görə və qəzet vaxtlı-vaxtında maliyyələşdirilmədiyi üçün bağlanır.
1906-cı ilin
aprelində Azərbaycan partiya mətbuatını işıqlandıran "Bakinskiy Raboçiy” qəzeti
çap olunur. Qəzet gizli şəraitdə Rusiya Sosial-Demokrat Fəhlə partiyasının Bakı
təşkilatının mətbəəsində çap edilirdi. Qəzet P.Caparidze, V.Nogin, İ.Sonjur
("Tixon”), V.Redus-Zenkoviç, N.Flerov və b. redaktorluğu ilə çıxırdı. Qəzet
Azərbaycanda dövrün tələbatlarına cavab verən sosialist yönümlü nəşr idi. İki
ildən sonra "Bakinskiy Raboçiy” qəzeti leqal çap olunmağa başlayır. 1908-ci
ildə redaksiya tərkibinə İ.V. Stalin, S.Q.Şaumyan, S.S.Spandaryan, V. Yefim
(Saratovets) və başqaları daxil idilər. Qəzetin redaktoru və naşiri S.T.Yakuşev
idi.
Rusiyanın hər
yerində olduğu kimi, Azərbaycanda da 1905-ci il 17 oktyabr "Manifest”i böyük
ruh yüksəkliyi ilə qarşılandı. Bu münasibətlə tədqiqatçı, monoqrafiyasında Əli
Mərdan bəy Topşubaşovun "Kaspi” qəzetinin 1905-ci il, 221-ci sayında
"Müsəlmanların dirçəliş dövrü” adlı məqaləsini təhlil edərək, bu sözləri iqtibas edir: "17 oktyabrda bəyan
edilən azadlıqlar uzun illər tam hüquqsuzluq şəraitində olan müsəlmanlar üçün
çox əzizdir... bu səbəbdən azad həyat təmin edən zəmanətlərin alınmasında digər
xalqlar kimi, onlar da maraqlıdır”.
1907-ci il
fevralın 17-dən Əhməd bəy Ağaoğlunun (Ağayev) redaktorluğu ilə rus dilində
"Proqress” adlı gündəlik, ictimai-siyasi-ədəbi qəzet çıxmağa başlayır. Elə ilk
sayında redaktor qəzetin qarşısına qoyduğu məqsəd və vəzifələri haqqında
oxucusuna məlumat verməyi özünə borc bilərək yazdı ki, qəzet əsasən müsəlman
xalqının əmək fəaliyyətini, fəhlə məişətini, baş vermiş siyasi hadisələri
işıqlandırmağı nəzərdə tutur. Qəzetin 17-ci sayının birinci səhifəsində "Qəzet
şəhər və mədən proletariatının maraqlarının müdafiəsini özünün birinci və ümdə
vəzifəsi hesab edir” şüarı verilmişdi. Bu şüardan məlum olur ki, qəzet fəhlə
qəzeti kimi çıxmağa başlayır. L.Hacıyeva qeyd edir ki, bu şüar altında qəzet
cəmi iki nömrə nəşr edilmiş, sonra müstəqil ictimai-siyasi nəşr kimi
fəaliyyətini davam etdirmiş və bütün saylarında məzlumların maraqları müdafiə
edilmiş, onların əqli və hüquqi səviyyəsini qaldırmağa çalışan məqalələr
verilmiş, cəhalət və avamlıqdan qurtarmağın yeganə yolu kimi maariflənməyin
vacibliyi göstərilmişdir. Ə.b.Ağaoğlunun fikrincə, Azərbaycan xalqının
maariflənməsi üçün onun əlifbası kökündən dəyişdirilməli, övladlarının
tərbiyəçisi olan müsəlman qadını isə köləlikdən azad olmalıdır.
Rus dilində
çıxan və çox qısa ömür sürmüş proletar qəzetlərindən biri də "Qudok”
(1907-1909) idi. Qəzet neft sənayesi fəhlələrinin maraqlarının öyrənilməsi və
müdafiəsinə həsr olunaraq nəşr edilirdi. Qəzetin redaktoru və naşiri A.Samarsev
olmuşdur. Qəzet əsasən abunədən gələn gəlirlər və neft sənayesi fəhlələri
həmkarlar təşkilatı üzvlərinin üzvlük haqları hesabına maliyyələşirdi. Qəzetdə
dərc olunan məqalələr əsasən neft sənayesi fəhlələrinin problemlərinə, onların
həmkarlar ittifaqında birləşməsi yollarına həsr edilirdi. "Qudok” qəzeti bütün
Bakı fəhlə hərəkatının təmsilçisinə çevrilmişdi.
1907-ci il, 8
sentyabrdan fəaliyyətə başlayan "Bakines” qəzeti fasilələrlə də olsa, 1920-ci
il aprel çevrilişinədək nəşr olundu. Bakı Jurnalistlər Cəmiyyətinin təşəbbüsü
ilə yaradılan "Bakines” qəzetinin redaktoru, mənşəyinə görə dvoryan olan
görkəmli jurnalist Q.Cinoridze idi. Yarandığı gündən qəzetin ətrafına dövrünün
görkəmli yazarları toplaşmışdı. Odur ki, bu qəzeti "qələm əhlinin çap orqanı” sayırdılar.
Qeyd etmək
yerinə düşər ki, C.Məmmədquluzadənin yaratdığı milli satirik jurnalı olan
"Molla Nəsrəddin”də (1906) və eləcə də "Kaspi” qəzetinin (1881-1917-ci illərdə)
səhifələrində çap olunan inqilabi olaylarla əlaqəli karikaturalar, rusdilli
satirik mətbuatın yaranmasına zəmin yaratmışdır. (Axundov N. Azərbaycan satira
jurnalları 1906-1920. Bakı, Azərb. SSR EA Nəşriyyatı, 1968, s.1).
L.Hacıyevanın
monoqrafiyasında Bakıda nəşrə başlamış ilk rusdilliu satira mətbuatı araşdırılır.
Bakı taciri K.A. Karqanovun təşəbbüsü ilə 1907-ci il oktyabrın 27-də Bakıda rus
dilində "Cigit” adlı ilk satirik jurnal nəşr olunur. Jurnal A-3 formatında 6-8
səhifə həcmində 2.000 tirajla nəşr olunurdu. Onun səhifələrində daxili və
beynəlxalq həyatın ən mühüm hadisələri satirik formada oxuculara çatdırılırdı.
"Cigit”in iti qələminə şəhər başçısından tutmuş Bakı Dumasının qlasnıları,
hətta Dövlət Dumasının üzvləri, Bakı cəmiyyətinin müxtəlif təbəqələrinin
nümayəndələri - istər varlı olsun, istər yoxsul, istər vəzifəli olsun, istər
fəhlə, fərqi yoxdur, düşürdü. Jurnalda Bakı şəhərinin ən aktual problemlərinə
toxunulur, çəkinmədən kəskin satirik formada oxuculara çatdırılırdı. Onun
səhifələrində əhalinin ağır həyat tərzi, gündəlik qarşılaşdığı get-gəllər,
aldadılması, rüşvətxorluğun baş alıb getməsi, karikaturalar vasitəsilə təsvir
edilərək ifşa olunurdu. Jurnalda həmin dövrdə cərəyan edən siyasi proseslər də
öz əksini tapırdı. Odur ki, jurnalda gedən kəskin ifşalara görə Tiflis Mətbuat
İşləri Üzrə Komitənin tələbi ilə jurnal dəfələrlə bağlanıb. Tədqiqatçı
L.Hacıyeva mənbələrə əsaslanaraq bildirmişdir ki, fasilələrlə də olsa, jurnal
1918-ci ilə qədər nəşr olunmuşdur. K.Karganov jurnala olan münasibəti duyaraq
onun bağlanılmasını gözləmədən, 1913-cü il aprelin 14-dən "Biç” adlı jurnal da
buraxır. Bu jurnal sələfi olan "Cigit” kimi həyatın bütün sahələrini əhatə
edərək, yeri gəldikcə onu tənqid atəşinə tutmaqdan yan keçmirdi. Dövlət təhsil
müəssisələrinin fəaliyyətini tənqid etdiyi üçün günahkar bilinən K.Karqanov
cəzalandırılır və jurnal bağlanır.
1909-1910-cu
illərdə V.A.Paramanov adlı jurnalist Bakıda yenə "Biç” adı ilə yeni jurnal nəşr
edir. Onun eyni vaxtda "Bakinskoye qore” adlı jurnalı da işıq üzü görür. Lakin
bu jurnalların ömrü çox qısa olur.
1908-ci il
martın 9-da Bakıda Aleksandr Yulyeviç Olenski tərəfindən rusdilli
yumoristik-satirik həftəlik jurnal nəşr olunur. Jurnalın səhifələrində gedən
karikatura və mətnlərə görə, jurnalist Olenski cəzalandırılmışdı. Jurnalda dərc
etdirdiyi "Puç olmuş arzu” adlı felyetonu onun gələcək taleyindən xəbər
verirdi. O, həbsə məhkum edilmişdi.
10 may 1910-cu
ildən P.Polyusukunin redaktorluğu ilə "Bakinskiye streli” satirik qəzeti və
"Adskaya poçta” jurnalı nəşr olunur. Hər iki mətbu orqan çox qısa ömürlü olmuş
və Azərbaycanın rusdilli mətbuat tarixində heç bir iz qoymadan bağlanmışdı.
Bu dövrdə
tanınmış sima, Bakı milyonçusu, Bakı Şəhər Dumasının üzvü, xeyriyyəçilik və
maarifçiliklə məşğul olan İsa bəy Aşurbəyli 18 yanvar 1912-ci ildən rus dilində
"Baraban” adlı həftəlik satirik jurnal nəşr etdirir. Jurnal görkəmli ziyalı,
siyasi və dövlət xadimi Behbud Ağa Sahtaxtlının redaktorluğu ilə çıxırdı.
1912-1913-cü illər ərzində jurnalın 46 sayı nəşr olmuşdu. Jurnalın əsas məqsədi
xalqı maarifləndirmək, neqativ hallara göz yummamaq, gərdişi-dövrandan baş
çıxarmaqda xalqın gözünü açmağa çalışmaq idi. Jurnalda dərc olunan felyeton və
məqalələr, çəkilən karikaturalar həyatın müxtəlif sahələrini, müxtəlif
mövzularını əhatə edirdi. "Baraban” jurnalında qaldırılan mövzular, bəzi
rubrikalar, Ə.Əzimzadənin çəkdiyi karikaturalar onun "Molla Nəsrəddin”
ideyalarının davamçısı kimi nəşr olduğunu deməyə əsas verir. Çünki jurnalda
işıqlandırılan mövzulara yanaşmada B.A. Şahtaxtlının milli ruhu, milli yanaşma
tərzi özünü göstərirdi.
1918-ci il
fevral inqilabından sonra bu dövrdə "Kaspi” qəzetinin altıncı səhifəsində "Bakı
Müsəlman İctimai Təşkilatları Komitəsinin
Məlumatları” qəzeti çıxmağa başladı. Ehtimal olunur ki, H.Z.A.Tağıyev
adı çəkilən müsəlman "Xəbərləri”nin naşiri olub. Qəzetin ətrafında dövrün
qabaqcıl ziyalıları toplaşmışdı.
Beləliklə,
tədqiq olunan dövr üzrə (1871-1918) Azərbaycanda nəşr olunan rusdilli mətbuatla
tanış olduqda, onu deyə bilərik ki, bu nəşrlərin hər biri dövrü öyrənmək,
təhlil etmək baxımından çox əhəmiyyətlidir. Belə ki, tədqiqatçı Lalə Hacıyeva
monoqrafiyada Azərbaycanda rusdilli dövri mətbuatın tarixindən danışarkən, onun
siyasi mənzərəsini xarakterizə etməklə yanaşı, bu dövri nəşrlərin səhifələrində
gedən məqalələri açıqlayaraq onlar haqqında ətraflı məlumat vermişdir.
Monoqrafiyada
tədqiq edilən dövr üzrə Azərbaycanda rus dilində çıxan satirik jurnallar ilk
dəfə olaraq elmi səpkidə tədqiq edilərək işıqlandırılmışdır.
Monoqrafiyada,
eləcə də rusdilli mətbuatla əlaqədar dövrün görkəmli ziyalıları, şəxsiyyətləri,
yazarları, naşirləri, jurnalistləri haqqında mənbələr göstərilməklə, onların
məqalələrindən, əsərlərindən nümunələr gətirilmiş, həyat və fəaliyyətləri ilə
bağlı tutarlı faktlar göstərilmişdir. Kitab ensiklopedik xarakterli
məlumatlarla zəngindir.
Esmira Cavadova,
AMEA Məhəmməd Füzuli adına
Əlyazmalar
İnstitutu, tarix üzrə fəlsəfə doktoru