Azərbaycanın gələcək inkişafı üçün daha gözəl imkanlar
Prezident İlham Əliyev: "Bizim siyasətimizdə əsas məqsəd
dövlətimizin möhkəmlənməsi, xalqımızın daha yaxşı yaşaması, sabitliyin təmin
edilməsidir”
2003-cü ilin oktyabrında Azərbaycan Prezidenti
seçilən İlham Əliyev ulu öndər Heydər Əliyev siyasi kursunu layiqincə davam
etdirərək, ölkəmizin inkişafında tamamilə yeni mərhələnin əsasını qoyub. Ölkə
başçısının 11 fevral 2004-cü il tarixdə imzaladığı fərmanla təsdiq edilən,
icrasına başlanılan "Regionların sosial-iqtisadi inkişafı Dövlət Proqramı”
(2004-2008-ci illər) regionlarda sahibkarlığın inkişafını sürətləndirməklə,
oradakı əmək ehtiyatlarından, təbii və iqtisadi potensialdan səmərəli istifadə
etməklə iqtisadiyyatın davamlı inkişafına, əhalinin məşğulluğunun artırılmasına
və ölkədə yoxsulluğun səviyyəsinin azaldılmasına səbəb olub. Birinci Dövlət
Proqramının uğurlu icrasından irəli gələrək, eyni zamanda ölkədə iqtisadiyyatın
diversifikasiyasına və onun dünya təsərrüfat sisteminə səmərəli
inteqrasiyasına, infrastruktur və kommunal xidmətlərin səviyyəsinin daha da
yaxşılaşdırılmasına, əhalinin həyat səviyyəsinin davamlı olaraq yüksəldilməsinə
nail olmaq məqsədi ilə 14 aprel 2009-cu ildə "Regionlarının
sosial-iqtisadi inkişafı Dövlət Proqramı” (2009-2013-cü illər) təsdiq edilib.
Azərbaycana
investisiya yatırımı
Prezident İlham Əliyevin rəhbərliyi ilə dövlət
proqramlarının icra olunduğu 10 il ərzində ümumi daxili məhsul 3,2 dəfə, o cümlədən
qeyri-neft sektoru 2,6 dəfə, sənaye 2,7 dəfə, kənd təsərrüfatı 1,5 dəfə,
investisiyalar 6,5 dəfə, əhalinin gəlirləri 6,5 dəfə, orta aylıq əməkhaqqı 5,5
dəfə artıb. Bu müddətdə həyata keçirilmiş məqsədyönlü tədbirlər nəticəsində ölkədə
900 mini daimi olmaqla 1,2 milyondan çox yeni iş yeri açılıb, 55,6 min müəssisə
yaradılıb, işsizlik 5 faizə, yoxsulluq səviyyəsi 5,3 faizə enib. Dövlət
proqramları çərçivəsində görülmüş genişmiqyaslı işlər regionların qarşıdakı illərdə
də inkişafı üçün möhkəm zəmin yaratdığından Prezident İlham Əliyevin 27 fevral
2014-cü il tarixli fərmanı ilə "Regionlarının 2014-2018-ci illərdə
sosial-iqtisadi inkişafı Dövlət Proqramı” da təsdiq olunub.Bu dövlət
proqramlarının reallaşdırılması hesabına 2019-cu ilə qədər ötən 15 il ərzində
Azərbaycan iqtisadiyyatı dünya miqyasında rekord templərlə inkişaf edib, ümumi
daxili məhsul 3,3 dəfə artıb. Sənaye istehsalı 2,6, ixracımız 4,7, valyuta
ehtiyatlarımız 24 dəfə artaraq 45 milyard dollar təşkil edib. Aparılan uğurlu
siyasət ölkəmizə böyük həcmdə vəsaitin, sərmayənin yatırılmasına da səbəb olub.
İşsizlik 5 faiz səviyyəsinə
enib
Həmin müddətdə Azərbaycana təxminən 250 milyard
dollar sərmayə qoyulub ki, bunun da yarısını xarici investisiyalar təşkil edib.
Demoqrafik göstəricinin ilbəil artdığı, indiyə qədər əhalimizin sayının 1,6
milyon nəfər çoxaldığı ötən dövrdə Azərbaycanda ümumilikdə 2 milyon yeni iş
yeri yaradılıb. Bu iş yerlərinin böyük hissəsi bölgələrin payına düşüb. Kənd təsərrüfatı
sahəsində 1,7 dəfə artımın müşahidə olunması da yeni iş yerlərinin yaranmasına
təsir edib. Təkcə 2018-ci ildə 118 min yeni iş yeri yaradılıb. Həyata keçirilən
tədbirlər sayəsində 2019-cu ilə qədərki 15 ildə yoxsulluq təxminən 50 faizdən 5,4
faizə düşüb, işsizlik Azərbaycanda 5 faiz səviyyəsinə enib.
Biznes mühitinin
yaxşılaşdırılması
Azərbaycanın inkişafı, vətəndaşların sosial-rifah
halının yaxşılaşdırılması istiqamətində atılan mühüm addımların davamı olaraq,
29 yanvar 2019-cu ildə "Regionların 2019-2023-cü illərdə sosial-iqtisadi
inkişafı Dövlət Proqramı” təsdiq olunub. Cari il fevralın 3-də bu Dövlət
Proqramının icrasının birinci ilinin yekunlarına həsr olunan konfrans
keçirilib. Konfransda çıxış edən Prezident İlham Əliyev dördüncü regional
inkişaf proqramının əvvəlki dövrlərdə qəbul edilmiş proqramların məntiqi davamı
olduğunu diqqətə çatdırıb. Bildirib ki, bundan əvvəlki üç proqram çərçivəsində
böyük işlər görülüb. O qeyd edib ki, dördüncü proqram çərçivəsində ölkə
qarşısında duran əsas infrastruktur vəzifələri icra olunacaq və beləliklə, ölkəmizin
gələcək inkişafı üçün daha gözəl imkanlar yaranacaqdır: "Bizim siyasətimizdə əsas
məqsəd dövlətimizin möhkəmlənməsi, xalqımızın daha yaxşı yaşaması, sabitliyin təmin
edilməsidir. Biz bütün bu məqsədlərə çatırıq. Keçən il əldə edilmiş iqtisadi və
sosial nailiyyətlər bunu bir daha təsdiqləyir. İqtisadiyyatımız 2,2 faiz
artmışdır. Hesab edirəm ki, bu, yaxşı nəticədir. Neftin qiyməti sabitdir, ancaq
Azərbaycanda neft hasilatı bir qədər aşağı düşüb. Ümumi daxili məhsulun 2,2
faiz artması, hesab edirəm ki, yaxşı nəticədir. Xüsusilə nəzərə alsaq ki,
qeyri-neft sektorunda artım 3,5 faizdir. Sənaye istehsalı 1,5 faiz artıb. Bunun
da səbəbi məhz neftin hasilatı ilə bağlıdır. Ancaq bizim əsas prioritetimiz
olan qeyri-neft sektoru 14 faizdən çox artıb. Burada, əlbəttə ki, keçən il
istismara verilmiş nəhəng sənaye müəssisələrinin fəaliyyətə başlaması, eyni
zamanda, kiçik və orta sahibkarlığın inkişafı, biznes mühitinin
yaxşılaşdırılması xüsusi rol oynayıb”.
İş yerlərinin
yaradılması demoqrafik inkişafı daim üstələməlidir
Prezident İlham Əliyev bildirib ki, Azərbaycanda
biznes mühitinin yaxşılaşdırılmasını Dünya Bankı da təsdiq edir. Onun sözlərinə
görə, "Doing Business” hesabatında Azərbaycan keçən il 20 ən islahatçı ölkə
sırasına daxil edilib: "14 faizdən çox artan qeyri-neft sənayemiz yeni iş yerlərinin
yaradılması deməkdir. Qeyd etməliyəm ki, keçən il 98 min yeni iş yeri
yaradılmışdır. Mən bunu dəfələrlə demişəm, bir daha demək istəyirəm ki, bu,
daimi proses olmalıdır. Çünki Azərbaycanda əhali yüksək templərlə artır və
iqtisadiyyat, iqtisadi inkişaf, o cümlədən iş yerlərinin yaradılması demoqrafik
inkişafı daim üstələməlidir. Buna görə biz daim bu məsələyə xüsusi diqqət verməliyik.
Ancaq o da həqiqətdir ki, hər bir iş yerinin yaradılması üçün həm dövlət, həm də
özəl sektor tərəfindən böyük vəsait tələb olunur. Çünki iş yerlərinin
yaradılması elə boş yerə olmur, gərək infrastruktur, şərait, imkanlar olsun. Özəl
sektor, əlbəttə ki, iş yerlərini yaradan əsas sektor olaraq öz sözünü deyir və
deməlidir. Beləliklə, əsas iqtisadi göstəricilər bunlardır. Əgər buraya ölkəmizə
qoyulan sərmayəni əlavə etsək, mənzərə daha gözəl olacaqdır. Keçən il ölkəmizə
13,5 milyard dollar sərmayə qoyulubdur. Azərbaycan həm xarici, həm daxili
investorlar üçün çox cəlbedici məkandır. Bu sərmayələrin bir hissəsi dövlət
investisiyalarıdır. Bu da təbiidir. Çünki hələ ki, iqtisadi artımda dövlət
investisiyaları önəmli rol oynayır. Xüsusilə nəzərə alsaq ki, hələ də
infrastruktur layihələri ilə bağlı görüləsi işlər vardır. Ona görə həm dövlət,
həm yerli, həm də xarici şirkətlər ölkəmizə 13,5 milyard dollar həcmində vəsait
qoyublar. Hesab edirəm ki, bu, çox yüksək nəticədir”.
Vətəndaşların rifah halı yaxşılaşdırılır
Prezident İlham Əliyev vurğulayıb ki, 2003-cü ildən
bu günə qədər bütövlükdə Azərbaycan iqtisadiyyatı 3,4 dəfə artıb və bu, dünyada
rekord göstəricidir: "Bütün statistik məlumatlar araşdırıla bilər, inanmıram
ki, buna bənzər artım tempi olsun. Bu 16 il ərzində sənaye
istehsalı 2,7 dəfə, kənd təsərrüfatı 2 dəfə, xarici ticarət dövriyyəsi 6,4 dəfə,
ixrac 7,6 dəfə, o cümlədən qeyri-neft ixracı 5,2 dəfə artmışdır. Bizim valyuta
ehtiyatlarımız 27 dəfə artmışdır. 2003-cü ildə valyuta ehtiyatlarımız 1,8
milyard dollar idi, keçən ilin yekunlarına görə 51, indi isə 52 milyard dollara
çatmışdır. Yəni, bu, özlüyündə böyük bir göstəricidir. Yoxsulluq təxminən 50
faizdən 4,8 faizə düşmüşdür. Bu da onu göstərir ki, neftdən əldə edilmiş gəlirlər
düşünülmüş şəkildə və ədalətli bölünmüşdür. Biz bu gəlirlərdən istifadə edərək
ölkəmizin bütün əsas infrastruktur problemlərinin böyük hissəsini həll etdik,
eyni zamanda, vətəndaşların rifah halını yaxşılaşdırdıq. Son 16 ildə orta əməkhaqqı
11 dəfə, orta pensiya 8 dəfə artmışdır, 300 mindən çox məcburi köçkünə, 6700 şəhid
ailəsinə evlər, mənzillər verilmişdir. Yəni, bu böyük sosial proqramlar böyük vəsait
tələb edir. Təsəvvür edin, 300 min insan üçün evlər, mənzillər tikilib. Biz bu
illər ərzində təxminən Sumqayıt, yaxud Gəncə boyda şəhər tikmişik. Bunu etmək üçün
həm siyasi iradə, düşünülmüş siyasət, eyni zamanda, imkanlar olmalı idi”.
Valyuta
ehtiyatlarımız 30 dəfəyə yaxın artıb
İqtisadçı ekspert Pərviz
Heydərov indiyə qədər həyata
keçirilən regional inkişaf proqramlarının əhəmiyyətini, həmçinin sayca dördüncü
proqramın icrasından gözləntiləri "Kaspi” qəzetinə şərh edərək bildirib ki,
2003-cü ildən indiyə qədər ölkə iqtisadiyyatında əldə edilən nailiyyətlər icra
olunan proqramların nə dərəcədə mühüm olduğunu nümayiş etdirir. Onun sözlərinə
görə, ötən 16 il ərzində ölkə iqtisadiyyatında bütün göstəricilər üzrə dəfələrlə
artımlar müşahidə edilib: "Ümumi daxili məhsul 3,4 dəfə artıb. Dünənki iclasda
cənab Prezident özü də qeyd etdi ki, bu, dünyada çox az rast gəlinən bir göstəricidir.
Əgər son 16 ildə digər ölkələrin əldə etdiyi uğurlara, onlardakı ÜDM-ə diqqət
yetirsək, bu, alternativi olmayan bir göstəricidir ki, 16 ildə 3,4 dəfə artım
qeyd olunub. Bundan əlavə, sənaye istehsalı 2,7, kənd təsərrüfatı 2, xarici
ticarət dövriyyəsi 7 dəfəyə yaxın artıb. İxracımız genişlənib qeyri-neft
sektorumuz təşəkkül tapıb və hal-hazırda inkişafdadır. Valyuta ehtiyatlarımız
hardasa 30 dəfəyə yaxın artıb. Hansı ki, əgər 2014-15-16-cı illərdə neftin qiyməti
ilə əlaqədar böhran baş verməsəydi, indi bizim valyuta ehtiyatlarımız indikindən
qat-qat yüksək idi. Bəlkə də bu rəqəm 70 milyarda yaxın idi. Nəzərə almaq
lazımdır ki, Mərkəzi Bank 2015-ci ildə devalvasiya ilə bağlı 11 milyarddan çox
valyuta ehtiyatını itirməyə məcbur olub”.
Müstəqillik əldə edəndən
bəri ən böyük büdcə
İqtisadçı ekspert bildirib ki, regional inkişaf
proqramlarının icrası nəticəsində regionlardan böyük infrastruktur yaranıb, ölkə
üzrə avtomobil yolları genişləndirilib, yenidən qurulub, bir çox istiqamətlər
üzrə tamamilə yeni yollar salınıb. Bununla yanaşı, dəmir yolları çəkilib,
modernləşdirilib, yeni-yeni xətlər salnıb, hava limanları tikilib: "Bu gün Azərbaycanın
6 beynəlxalq hava limanı var. Əhalinin gəlirləri də artıb. Bu nədə görünür? Əgər
16 il bundan əvvəl yoxsulluq səviyyəsi 50 faizə yaxın idisə, indi bu beş faiz səviyyəsinə
qədər enib. Bizim builki dövlət büdcəmiz müstəqillik əldə edəndən bəri ən böyük
büdcədir. Minimum əməkhaqqı ilk dəfə olaraq keçən il yaşayış minimumunu keçib.
Hansı ki, biz bunu illər uzunu idi ki, hədəf götürmüşdük. Nəhayət ki, keçən il
buna nail ola bildik. Dövlət proqramlarının ən mühüm və möhtəşəm nəticəsi
bundan ibarət olub ki, zəngin infrastruktur yaranıb. Bu gün Azərbaycan kənara
elektrik enerjisi ixrac edir, Azərbaycan rayonları 90 faizdən yuxarı
qazlaşdırılmış vəziyyətdədir. Bütün bu nəticələrə həmin o 3 dövlət proqramının
icrası nəticəsində nail olunub”.
İnkişaf etmiş ölkələr
üçün başlıca hədəf
Dördüncü dövlət proqramın hədəfindən danşan P.Heydərov
deyib ki, qeyd edilən infrastruktur yaradılandan sonra artıq regionlarda müəyyən
iş yerlərinin açılmasına nail olmaq, hər il heç olmasa 70-80 mindən çox iş yeri
açmaq qarşıda duran əsas vəzifələrdən biridir: "Prezident İlham Əliyevin
iştirakı ilə keçirilən dünənki iclasda deyildi ki, rəsmi statistikaya əsasən ötən
il 90 mindən çox iş yeri açılıb. Nəyə görə 70-80 mindən artıq deyirəm, çünki əhalinin
demoqrafik vəziyyəti, artım bizdə kifayət qədər yüksəkdir. Bu o deməkdir ki, hər
il əmək bazarına 100 mindən çox işçi qüvvəsi daxil olur. Əgər qeyri-neft
sektorunu inkişaf etdirməsəydik, iqtisadiyyatımızı yalnız xammal sektoru üzərində
köklətsəydik, belə bir fonda hər il 100 min işçi qüvvəsi bazara daxil olsaydı,
onu yerləşdirə bilməyəcəkdik. Bu isə işsizliyin artmasına gətirib çıxaracaqdı.
Ümumiyyətlə, iqtisadiyyat elə bir şeydir ki, o əhalinin artım səviyyəsinə uyğun
olaraq durmadan inkişaf etməli, genişlənməli, artmalıdır. Bu da özünü hər il
yeni iş yerlərinin açılmasında göstərməlidir. Biz inkişaf etmiş ölkələrə diqqət
yetirsək, başda ABŞ olmaqla, hamısında hökumətin, dövlətin bu və ya digər şəxsin
platformasında qarşıya qoyduğu siyasətdə əsas məqsəd ölkədə işsizliyin
artmamasına nail olmaq, yeni iş yerlərinin açılmasına çatmaqdır. Elə bil ki,
bu, bütün dünya ölkələri üçün ümumi bir qanundur”.
Aqrar sahədə məşğulluq
artırılmalıdır
İqtisadçı ekspert bildirib ki, kiçik bir dövlət
olmasına baxmayaraq, Azərbaycanın da qarşısına qoyduğu əsas hədəf
iqtisadiyyatını inkişaf etdirmək, yeni iş yerlərinin açılmasına nail olmaqdır:
"Mən demirəm bu, hər il 100 min olsun, amma heç olmasa 70 min yeni iş yeri açılsın.
Bu da o deməkdir ki, sən ÜDM-i hər il artırmağa nail olmalısan. Onu da xammal
resursları hesabına deyil, qeyri-neft sektorunun inkişafı hesabına artırmaq
daha düzgün yoldur. Regionlarda məhsuldarlıq genişləndirilməlidir. Yəni, əhali
iş yeri üçün paytaxta doğru gəlməməlidir. Aqrar sahədə məşğulluq
artırılmalıdır. Çünki bizim əmək qabiliyyətli əhalinin 40 faizə yaxın hissəsi
regionlarda yerləşir. Bilavasitə kənd təsərrüfatı ilə bağlı bölgələrdə. Deməli,
həm əkin-biçinin genişləndirilməsi qayğısına qalmalısan, həm də emal müəssisələri
yaratmalısan ki, əhalinin məşğulluğu təmin olsunsun”.
Ərturan İSMAYIL