“Azərbaycanın ərazi bütövlüyünü dəstəkləyirik”

Nazir müavini bildirib ki, İran dövlətlərin beynəlxalq səviyyədə tanınan rəsmi sərhədlərinin dəyişdirilməsinin əleyhinədir.

"BMTTŞ-nin qərarlarının tam şəkildə həyata keçirilməsini dəstəkləyirik. Biz İslam Əməkdaşlıq Təşkilatı çərçivəsində yaradılan təmas qrupunun işində fəal iştirak edirik. Minsk qrupunu üzvü deyilik, amma inanırıq ki, həmsədrlərin münaqişənin sülh yolu ilə tənzimlənməsi səyləri dəstəklənməlidir. Bunlar əsas elementlərdir”.

H. Süleymanpur qeyd edib ki, İranın Azərbaycanla strateji tərəfdaşlıq münasibətləri var.
"Beynəlxalq siyasi mühit getdikcə daha çox qütbləşməyə məruz alır. ABŞ-dakı seçki prosesini izləyirsinizsə, bu ölkədə bunun daha bariz nümunəsini görmək mümkündür. Düşünürəm ki, bu qütbləşmə davam edəcək və regionumuza da təsir edəcək”.APA-nın xəbərinə görə, bunu İran xarici işlər nazirinin müavini Hadi Süleymanpur ADA universitetində keçirilən "İran İslam Respublikasının xarici siyasət prioritetləri” mövzusundakı mühazirə zamanı bəyan edib.

H. Süleymanpur oxşar halların Avropada da baş verməsinin narahatlıq doğurduğunu bildirib: "Avropa hazırda sosial-iqtisadi, təhlükəsizlik məsələləri ilə bağlı həll yollarını axtarır. Avropaya radikalizm və populizmin qayıtmasından narahatıq”.

ABŞ-la Rusiya arasında regional və qlobal məsələlər üzrə məsafələrin getdikcə böyüyəcəyini deyən nazir müavini bildirib ki, regiondakı yaxın qonşular arasında harmonik münasibətlərin qurulması İranın başlıca siyasi xətti olub:"İran prezidentinin müəyyənləşdirdiyi vacib xətlərdən biri də radikallaşma və terrora qarşı mübarizə, qarşılıqlı dialoq olub. Azərbaycan və İran bu problemlərə qarşı mübarizədə vacib rol oynaya bilər”.

H. Süleymanpur onu da qeyd edib ki, Yaxın Şərq regionu ölkələri bəzi ittihamları kənara qoyaraq əməkdaşlıq etməlidir: "Regionun ən çox ehtiyac duyduğu məsələ əməkdaşlıqdır”.