Bakı 23°C
Azərbaycanın dəmir yolu sektorunun inkişafı üçün böyük potensialı var
Asiya İnkişaf Bankı (AİB) Azərbaycanda dəmir yolu sektorunun inkişafı üçün böyük potensial görür.
Bunu Trend və "Azernews"a müsahibəsində AİB-in Azərbaycandakı nümayəndəliyinin rəhbəri Nəriman Mannapbekov deyib.
N.Mannapbekov bildirib ki, Azərbaycan tərəfindən nəzarət-buraxılış məntəqələrində, karbohidrogen hasilatının aparıldığı və kənd təsərrüfatının inkişaf etdiyi rayonlarda dəmir yolu infrastrukturunun təkmilləşdirilməsi dəmir yolu sektorunun rəqabətqabiliyyətliliyini artırmağa imkan verəcək: "Bu, öz növbəsində, istehsalın, ticarətin inkişafına və kənd təsərrüfatı məhsullarının və digər malların tədarükünə xidmət edəcək”.
AİB nümayəndəliyinin rəhbəri, həmçinin Azərbaycan və regionun digər ölkələri tərəfindən reallaşdırılan "Şimal-Cənub” nəqliyyat dəhlizinin əhəmiyyətini qeyd edib:"AİB "Şimal-Cənub” dəmir yolu dəhlizi layihəsini perspektivli hesab edir. Bu layihənin səmərəsi Azərbaycanın şimal sərhədindəki Yalamadan cənub sərhədindəki Astarayadək olan hissənin və Rəşt-Astara (İran) hissəsinin modernləşdirilməsinin başa çatmasından sonra daha aydın görünəcək. Biz inanırıq ki, "Şərq-Qərb” və "Şimal-Cənub” nəqliyyat dəhlizləri "Azərbaycan Dəmir Yolları”na öz coğrafi mövqeyindən daha səmərəli istifadə etməyə və daha təhlükəsiz, ucuz, enerji baxımından səmərəli və operativ sərnişin və yük daşımaları xidməti təklif etməyə imkan yaradacaq”.
