Azərbaycandan Şərqi Avropaya açılan pəncərə
Yanvarın 16-da Bakıdan Sofiyaya ilk birbaşa
aviareys açılıb. Aviareysin açılış mərasimində Baş nazir Artur Rasi-zadə və
ölkəmizdə işgüzar səfərdə olan Bolqarıstanın Baş naziri Boyko Borisov iştirak
ediblər.Boyko Borisov Heydər Əliyev Beynəlxalq
Aeroportunun yeni aerovağzal binası ilə tanış olub. "Azərbaycan Hava Yolları”
Qapalı Səhmdar Cəmiyyətinin (AZAL) vitse-prezidenti Eldar Hacıyev məlumat verib
ki, aeroportun yeni aerovağzal kompleksi 2014-cü ilin aprel ayında açılıb.
Ümumi sahəsi 65 min kvadratmetr olan aeroport 2017-ci ildə 4 milyondan çox
sərnişinə, 55 aviaşirkətə xidmət göstərib. Eldar Hacıyev Bakı-Sofiya
aviareysini həyata keçirən "Buta Airways” loukosteri barədə də məlumat verib.Baş nazir Boyko Borisov Bakı-Sofiya marşrutu
üzrə birinci aviareys barədə məlumatlandırılıb. Qeyd olunub ki, bu reys
Azərbaycanın ilk loukosteri "Buta Airways” tərəfindən həyata keçirilir. Uçuşlar
bu ilin qış uçuş cədvəli üzrə həftədə bir dəfə, çərşənbə axşamı günü yerinə
yetiriləcək. Aviabiletin ilkin qiyməti "Büdcə” tarifi ilə bir tərəfə baqajsız
29 avrodur. Sofiya Avropa İttifaqında Azərbaycanın ilk loukosteri "Buta
Airways”in birbaşa uçuşlar həyata keçirəcəyi ilk şəhərdir.Artur Rasi-zadə və Boyko Borisov jurnalistlərə
müsahibələrində Bakıdan Sofiyaya ilk birbaşa aviareysin əhəmiyyətindən
danışıblar. Bildirilib ki, bu, Bolqarıstanla Azərbaycan arasında iqtisadi,
xüsusən də turizm sahəsində əlaqələrin inkişafına, xalqlarımızın əlaqələrinin
daha da möhkəmlənməsinə töhfə verəcək. Baş nazirlər birbaşa
aviareysin uğurlu olacağına əminliklərini ifadə ediblər.
Yeni açılan aviareysin növbəti mərhələdə turizm
sahəsinə və Şərqi Avropa ölkələri ilə Azərbaycan arasındakı əlaqələrə necə
təsir edəcəyini öyrənməyə çalışdıq.
İki ölkə arasında
əlaqələrin genişlənməsinə müsbət təsir göstərəcək
"New ERA Travel” turizm agentliyinin rəhbəri Elçin Rüstəmov bildirir ki, birbaşa aviareysin açılması iki
ölkə arasındakı əlaqələrin genişlənməsinə şərait yaradacaq: "Bolqarıstana olan
birbaşa uçuşun qiymətinin kifayət qədər münasibdir. Belə loukost uçuşların
olması turizmin inkişafına müsbət təsir göstərir. Amma hazırda qoyulan
qiymətlər çox güman ki, ilkin dövrə aiddir. Bundan sonra ola bilsin ki, qiymətlərdə
artım baş versin. İlk uçuş artıq dünən baş verdi. Yeni olduğu üçün hələ ki, elə
də ciddi tələbat yoxdur, amma düşünürəm ki, zaman keçdikcə maraq artacaq. Və
iki ölkə arasında əlaqələrin genişlənməsinə müsbət təsir göstərəcək. Yəni iki ölkə arasında istər turizm, istər də
investisiya qoyuluşunun inkişafı üçün ilk növbədə aviareysin olması vacibdir.
Bu, ölkələr arasında mədəni əlaqələrin də qurulmasında böyük rol oynayacaq.
Əlaqələrin inkişafı mərhələli şəkildə baş verir. Birbaşa uçuşların təşkili bu
mərhələnin ilk addımıdır”.
Şirkət rəhbəri
qeyd edir ki, ikinci mərhələdə isə artıq qarşılıqlı olaraq hər iki
ölkənin görməli yerlərinə tur paketlər təşkil olunmalıdır.
Həmçinin investisiyanın qoyuluşu da ikinci
mərhələdə özünü biruzə verir. Yəni müəyyən araşdırmalar apardıqdan sonra hansı
ölkədə hansı sahəyə investisiya qoymaq olar artıq aydın olacaq. Bu ölkələrin ixrac
və idxal potensialının da artmasına təsir edəcək.
Həm vaxt, həm də
maliyyə baxımından sərfəli
"Luna Travel” turizm agentliyinin direktoru Rəhman Quliyev qeyd edir ki, ümumiyyətlə imkan daxilində
bəzi ölkələr birbaşa uçuşların sayını artırmaq lazımdır: "Bu ikitərəfli uğur
gətirəcək bir addımdır. Bu gün nəinki təkcə Sofiya şəhərinə Avropanın digər
şəhərlərinə də, birbaşa uçuşlar həyata keçirilərsə, ciddi turist axını olacaq.
Bundan başqa hansısa bir ölkəyə Azərbaycandan birbaşa uçuşun olması həmin
ölkənin vətəndaşları üçün çox faydalıdır. Çünki onlar 3-cü ölkəyə uçmaq üçün
Azərbaycandan tranzit rolunu oynayacaq. Məncə, bu çox yerində atılmış bir
addımdır”.
Müsahibimiz bildirir ki, birbaşa uçuş olan ölkələrə
həmişə böyük maraq olur: "Əslində insan psixologiyası eynidir. İstər
azərbaycanlı olsun, istər avropalı olsun. Səyahət vaxtı rahat və ucuz yerə
getmək istəyir. Və harasa səyahət zamanı nəqliyyat dəyişimi onları yorur. Bunun
üçün də seçim edərkən birbaşa uçuş olan ölkələrə üstünlük verirlər. Bu həm
vaxt, həm də maliyyə baxımından sərfəli olur. Bir misal çəkim. Bir neçə il
əvvəl Macarıstana getmək istəyən yox idi. Amma birbaşa reys açılan və qiymətlər
münasib olan kimi insanların marağı artdı. Mən bunu həmişə vurğulayıram ki,
birbaşa reysi, münasib qiymətə bileti və ucuz otelləri olan ölkələr turizm
baxımından öndə olub. Bu üç faktor ölkəyə turist axınını təmin edir”.
R. Quliyev hansı ölkələrə birbaşa reyslərin açılmağı
gərəkdiyindən də danışdı: "Polşa və Çexiyaya elə də maraq yoxdur. Amma Bürusseldən birbaşa uçuş olsa çox yaxşı
olardı. Həmçinin Avstriyaya da birbaşa
reyslər açılmalıdır. Çünki bu ölkədə mühüm beynəlxalq təşkilatlar yerləşir. Və
həmin ölkədən gələn çox olur”.
Loukost uçuş olan
ölkələrinin sayı nə qədər çox olsa...
Səyahətçi video-bloqqer
Vaqif Hüseynovunaçılan reysə yanaşması birmənalı deyil. Səyahətçi bildirir ki, təəssüflər olsun
ki, Qərbi Avropa ilə müqayisədə Şərqi Avropadan elə də ciddi turist axını
olmur: "Bakıdan Sofiyaya açılan birbaşa reys çox güman ki, ölkələr arasında
ticarət əlaqələrinin daha da genişlənməsinə səbəb olacaq. Düşünmürəm ki, Qərbi
Avropa ölkələrindən olan turist axını bu ölkələrdə də baş versin. Azərbaycana
gələn turistlərin son illərdəki statistikasına baxsaq, görərik ki, Şərqi Avropa
ölkələri ilk onluğa düşənlər içərisində deyil. Ola bilər ki, belə ucuz büdcəli
uçuşların təşkilindən sonra Azərbaycana həmin ölkələrin insanlarında maraq
artsın. Loukost uçuş olan ölkələrinin sayı nə qədər çox olsa daha yaxşı olar.
Hər halda həmin ölkələrə getmək istəyən insanlar üçün əlverişli olacaq”.
Turizm üzrə ekspert
Rüfət Məmmədov
bildirir ki, bu reysin açılması nəticəsində daha çox gedən turistlərin sayı
artacaq: "Bildiyimiz kimi, turizmin iki- aktiv(gəlmə) və passiv(getmə) növləri var. Düşünmürəm ki, Bakıdan Sofiyaya
açılan birbaşa reys aktiv turizmə ciddi təsir göstərsin. Amma passiv turizmin
inkişafında rolu böyük olacaq. Çünki Avropaya olan reyslərimizin bir çoxu
bahalı idi. Amma Bolqarıstana olan bu reys ucuz qiymətə olduğundan insanların
marağını cəlb edəcəyini düşünürəm. Gəlmə turizm haqqında hələ ki, bir şey demək
üçün tezdir. Bir müddət keçdikdən sonra statistik araşdırma aparıb bu
aviareysin aktiv turizmə necə təsir etdiyini bilmək olar”.
Günel Azadə