Azərbaycana dönük çıxanlar
Azərbaycan həqiqətlərinin dünya ictimaiyyətinə çatdırılması üçün
illərdir iş aparılır. Bir sıra mötəbər beynəlxalq təşkilatların tribunalarından
20 yanvar faciəsi, torpaqlarımızın işğalı, Ermənistanın xalqımıza qarşı
törətdiyi soyqırımı ilə bağlı həqiqətlər səsləndirilib. Artıq dünyanın bir çox
ölkələri tərəfindən bu həqiqətlərin qəbul edilməsinə nail olmaqdayıq. Bu işdə
xaricdə yaşayan soydaşlarımız da zaman-zaman dövlətimizə öz dəstəyini verib.
Amma son dövrlər xarici ölkələrə sığınan bəzi "azərbaycanlılar” yeri
gəldi-gəlmədi Azərbaycan əleyhinə fəaliyyət göstərməyə başlayıb. Avropa Şurası
Parlament Assambleyasının qış sessiyası öncəsi bir qrup adını hüquq müdafiəçisi
qoyan şəxsin ölkəmizin bu qurumdakı nümayəndə heyətinin səsvermə hüququnun
dayandırılması ilə bağlı müraciət edib. Azərbaycanın inkişafını istəməyən,
Avropa İttifaqı ilə ölkəmiz arasında başlanmış yeni danışıqları pozmaq istəyən
həmin qüvvələr öz havadarlarının dəstəyi ilə yenidən fəaliyyətə keçib. AŞPA
üzvlərinə göndərilən, heç bir fakta söykənməyən şantaj və böhtan xarakterli
müraciətin ardından isə Azərbaycanın Almaniyadakı səfirliyi önündə etiraz
aksiyası keçirməyə cəhd ediblər. Azərbaycanın Almaniyadakı səfirliyinin
qarşısına toplaşan aksiya iştirakçıları "siyasi məhbus”ların azad edilməsini
tələb ediblər.
Bundan bir ay öncə də həmin şəxslər Almaniyanın Münster
şəhərində eyni tələblə aksiya keçiriblər. 20 Yanvar faciəsinin 27-ci il dönümü
ərəfəsində dünyadakı əksər soydaşlarımız Azərbaycan həqiqətlərinin dünyaya
çatdırılması üçün dəstək aksiyaları keçirdiyi ərəfədə Almaniyada təşkil edilən
aksiya ölkəmiz əleyhinə təşkil olunmuş kampaniyanın tərkib hissəsi sayıla
bilər. Yayılan fotolardan görünür ki, hər iki aksiyada 5-10 nəfər eyni insan
iştirak edir. Aksiyadan sonra da sosial şəbəkələrdə canfəşanlıq edən Ceyhun
Əlizadə, Raiz Zeynalov, Kəmalə Seyidova, Ələsgər Vəliyev, Cavid Təhməzli,
Fəridə Hüseynova, Musa Məmmədov, Könül Əmirova, Şirzad Babalar, Zöhrə Həsən, Zaur Məmmədov, Ayaz Məmmədov, Xədicə Eyvazova və digər 3-4
nəfərdən başqa, səfirlik qarşısına çıxan olmayıb. Bu insanlar hazırda ölkəmizin
beynəlxalq nüfuzunun yüksəldiyi bir vaxtda ermənipərəst qüvvələrin təkidi ilə
guya respublikamızda insan haqlarının tapdalandığı, "siyasi məhbus"
probleminin olduğunu ilə bağlı hay-küy salmaqla ölkəmiz haqda qeyri-demokratik
imic yaratmağa cəhd edirlər. Halbuki son illər Azərbaycanda demokratik təsisatların
daha da möhkəmlənməsi istiqamətində ciddi nailiyyətlər əldə edilərək, insan
hüquq və azadlıqlarının təmin olunması sahəsində nəzərəçarpan addımlar atılıb.
Bu insanlar anlamalıdırlar ki, torpaqlarımızın 20 faizini işğal edən,
minlərlə soydaşımızı doğma torpaqlarından didərgin salan, azərbaycanlılara
qarşı Xocalıda soyqırımı törədən Ermənistanın beynəlxalq hüquq çərçivəsində
cəzalandırılması bütün dünya azərbaycanlılarının əsas problemi olmalıdır. Bunu
nəzərə almadan Azərbaycan əleyhinə çıxan, ölkəmizin inkişafını əngəlləməklə
məşğul olan belələrinin Azərbaycan xalqı adından danışmağa heç bir mənəvi haqqı
yoxdur.
Artıq bu kimi aksiyalara etiraz edənlərin də sayı artır. Dünya
Azərbaycanlıları Assambleyasının yaydığı müraciətdə də bildirilir ki, belə aksiyaların
keçirilməsi üçün hər hansı bir ciddi əsas yoxdur və bunu həmin tədbirin
təşkilatçıları da anlayırlar: "Bu gün qonşu işğalçı dövlət hər vəchlə
Azərbaycana qarşı təbliğatda istifadə etmək üçün əsaslar hazırlamağa cəhdlər
göstərir. Bu cür addımlar yalnız işğalçı ölkənin diaspor təşkilatları və
lobbiçiləri üçün "əlverişli” fürsət hesab oluna bilər. Çox böyük təəssüf hissi
ilə bildiririk ki, bəzi həmvətənlilərimiz də hansısa səbəblərdən həmin
ermənipərəst çevrələrin dəyirmanına su tökərək, ölkəmizdə insan hüquq və
azadlıqlarının məhdudlaşdırıldığını bəyan edirlər. Bu cür aksiyaların əleyhinə
olduğumuzu bəyan edərək, soydaşlarımızı belə tədbirlərdə iştirak etməməyə,
Azərbaycanın haqlı mövqeyini dəstəkləməyə və haqq səsimizi dünyaya çatdırmağa,
Qarabağ probleminin xalqımızın maraqları və beynəlxalq qanunlar çərçivəsində,
ədalətli həllinə nail olunmasına çalışmağa çağırırıq”.
F.ABASOĞLU