Azərbaycan özünü kərə yağı ilə təmin edəcək
"2019-cu ildə Azərbaycanda
kərə yağı idxalından asılılığı, demək olar ki, tam aradan qaldırmaq
planlaşdırılır”. Bunu Trend-ə "Azərbaycan Süd və Süd Məhsulları İstehsalçıları
və İxracatçıları” İctimai Birliyinin icraçı direktoru Samir Eyyubov deyib: "Azərbaycanın
kərə yağının idxalından çox ciddi asılılığı var. Dövlət bu məsələni həll etmək
niyyətindədir. Bu məqsədlə 2019-cu ilin ortasına qədər ölkədə fəaliyyət
göstərən müəssisələr əsasında iki yeni müəssisə yaradılacaq. Bunun üçün əlavə
istehsal xətləri alınır. Hər bir müəssisənin emal gücü sutkada 200 ton süd
təşkil edəcək. Bu da təxminən 10 ton kərə yağı deməkdir". İcraçı
direktorun sözlərinə görə, layihələrin maliyyələşdirilməsi Azərbaycan
Respublikasının Sahibkarlığa Kömək Milli Fondu xətti üzrə aparılacaq. O
bildirib ki, hələlik layihəyə sərf olunacaq məbləğ açıqlanmır. Qeyd edək ki, 2018-ci ilin ilk
rübündə Azərbaycan 20,69 milyon dollar məbləğində kərə və süddən hazırlanan
digər növ yağlar idxal edib. Bu göstərici 2017-ci illə müqayisədə 53 faiz
çoxdur. Kərə yağının idxaldan asılılığının aradan qaldırılmasının bazardakı
mövcud vəziyyətə və qiymətlərə, həmçinin bu sahədə yeni müəssisələrin açılmasının
kənd təsərrüfatının inkişafına necə təsir edəcəyini öyrənməyə çalışdıq.
İqtisadçı Vüqar Bayramov idxalı
aradan qaldırmaq üçün yerli istehsalın genişləndirilməsinə ehtiyac olduğunu
qeyd edir: "Kərə yağı gündəlik istifadə edilən mallar siyahısına daxildir. Bu
baxımdan, ölkəyə kərə yağı idxalının aradan qaldırılması vacib məsələlərdən
biridir. Kərə yağının idxalının aradan qaldırılması yeri istehsalın təşviqi
baxımından lazımdır. İdxalın minimuma endirilməsi hansı hallarda mümkündür
məsələsinə gəlincə isə qeyd etmək istəyirəm ki, burada yeri istehsalın
genişləndirilməsinə xüsusi fikir vermək lazımdır. Çünki hazırda ölkəmizin aqrar sektorunun kərə yağı istehsalı
potensialını gücləndirmək imkanı var. Mövcud imkanlar ölkəyə yağ idxalının
aradan qaldırılmasına şərait yaradır. Xüsusən də son illər kərə yağı
istehsalına marağın artması müşahidə olunur. Çünki bazardakı qiymətlərin
optimal olması fermerlərin bu məhsulun istehsalını genişləndirməsinə səbəb
olub. Eyni zamanda istehsalın genişləndirilməsi aqrar sahədə yeni iş yerlərinin
yaradılmasına imkan verir. Bu da nəticə etibarı ilə məşğulluğun təmin edilməsi
baxımından vacib məsələlərdən biridir”.
Ekspert idxalın aradan qaldırılmasının müsbət
tərəflərinin də olacağını vurğuladı: "İlk olaraq valyutanın ölkədə qalmasını
təmin edəcək. Çünki idxal olunan məhsul ölkədən valyutanın getməsinə səbəb
olur. Digər tərəfdən, məhsulun bazardakı qiymətinə təsir edir. Qiymətlər daha
da optimallaşar, hətta ucuzlaşma ilə müşahidə oluna bilər. Belə ki, idxaldan
asılılığın aradan qaldırılması praktik olaraq məhsulun daha uyğun qiymətə
satılmasına imkan yaradır. Həmçinin
idxalın aradan qaldırılması daha keyfiyyətli məhsulların bazara çıxarılmasını təmin edəcək. Hazırda Azərbaycana
gətirilən kərə yağı inkişaf etmiş ölkələrdən idxal edilsə də, bəzi məqamlarda
onların keyfiyyətinin elə də yüksək olmadığının şahidi oluruq. Bu da bazarda
keyfiyyətsiz məhsulların sayının artmasına səbəb olub. Amma idxalın minimuma
endirilməsi bazara yerli və keyfiyyətli məhsul çıxarılmasına imkan yaradacaq.
Həmçinin bu, aqrar sahənin də inkişafına təkan verəcək. Yəni idxalın aradan
qaldırılması qiymətlərin aşağı salınmasına və bəzi bu kimi sahələrin inkişafına
şərait yaradacaq”.
Kənd təsərrüfatı eksperti Qadir Bayramlı bildirdi ki, açılacaq
yeni yağ zavodlarını südlə təmin etmək üçün böyük heyvandarlıq komplekslərinə
ehtiyac var: "Kərə yağı istehsal edən müəssisələrin artırılması təqdirəlayiq
haldır. Çünki ölkəmiz böyük miqdarda kərə yağı idxal edir, həm də bazarda
mənşəyi bəlli olmayan, kifayət qədər keyfiyyətsiz məhsula var. Təbii ki, idxalı
aradan qaldırmaq üçün ilk növbədə istehsalın artırılması istiqamətində bir sıra
işlərin görülməsi zəruridir. Açılacaq yeni yağ zavodlarını südlə təmin etmək
üçün böyük heyvandarlıq komplekslərinə ehtiyac duyulur. Bu heyvandarlıq
kompleksləri isə yüksək məhsuldarlığa malik südlü heyvan cinsləri, keyfiyyətli
yem, müasir standartlara uyğun texnika və ixtisaslı kadrlarla, o cümlədən
baytarlarla təmin olunmalıdırlar. Bundan əlavə, fermerlərin fəaliyyətini
stimullaşdırmaq üçün həm aqrar sığortanın, həm də digər təşviq vasitələrinin
tətbiqi bu işdə böyük əhəmiyyətə malikdir”. Müsahibimiz bildirdi ki, bu sahədə olan
problemlərdən biri də fərdi təsərrüfatlarda olan südün yağ zavodlarına
çatdırılması ilə bağlıdır: "Yağ ən çox istehlak edilən məhsullardan olduğu üçün
keyfiyyətli kərə yağı ölkənin qida təhlükəsizliyi baxımından da önəmlidir.
Ölkədə yağla bağlı olan digər ciddi bir məsələ isə fərdi təsərrüfatlarda olan
südün yağ zavodlarına çatdırılması ilə bağlıdır. Rayonlarımızda bu işlə məşğul
olan və öz laboratoriyaları olan tədarük məntəqələrinin qurulması yerli
istehsalın artımına kömək edə bilər. Amma bütövlükdə kənd təsərrüfatında
intensiv iştirak edə bilsək, həm bitkiçiliyin, həm də heyvandarlıq
məhsullarının artırılmasına nail olmaq mümkündür. Beləcə, ümumilikdə aqrar
sahədə inkişafın baş verməsini təmin etmiş olarıq”.
Günel Azadə