“Azərbaycan öz hərbi gücündən istifadə edəcək”
Azərbaycan Silahlı Qüvvələrinin Naxçıvanda həyata
keçirdiyi əməliyyatla işğaldakı ərazilərin böyük bir hissəsini azad etməsi
Ermənistanı ciddi narahat etməyə başlayıb. Bunun ardınca müdafiə naziri
general-polkovnik Zakir Həsənovun Azərbaycan ordusunun hərbi hazırlığı və
müasir silahlarla təminatı ilə bağlı verdiyi açıqlamalar isə düşmən tərəfində
çaşqınlıq yaradıb. Artıq Ermənistan rəhbərliyinin son hadisələrlə bağlı sərsəm
bəyanatları erməni ictimaiyyətinin tənqid hədəfinə tuş gəlib. Lakin Ermənistan
cəmiyyətindən fərqli olaraq, Azərbaycan ictimaiyyəti Z.Həsənovun verdiyi
bəyanatları birmənalı qəbul edərək, tezliklə torpaqlarımızın işğaldan azad
olunacağına inanır.
Mövzu ilə bağlı "Kaspi” qəzetinə açıqlamasında Milli Məclisin deputatı Elman Məmmədovbildirdi ki, müdafiə naziri Zakir Həsənovun dedikləri həqiqətdir, reallıqdır:
"O, əslində bununla düşmənə mesaj verdi ki, Azərbaycan ordusu ötən əsrin 90-cı
illərindəki ordu deyil. Bu gün güclü Azərbaycanın güclü ordusu var. Silahlı
Qüvvələrin arsenalında ən müasir və dağıdıcı zərbəsi böyük olan silahlar yer
alır. Əsas məsələ isə ondan ibarətdir ki, o silahların hamısından güclü və
təsirli Azərbaycan əsgərinin mübariz qələbə ruhu var. Azərbaycan əsgəri bilir
ki, torpaqlarımız işğal altındadır və onun vətəndaş kimi borcu həmin torpaqları
azad eləməkdir. Ona görə də Azərbaycan ordusu həm əsgəri qüvvəsi, həm də hərbi
texnikası, silah-sursatı ilə ən yüksək hazırlığa malikdir. Bunu yaxın günlərdə
Naxçıvan istiqamətində olan əks-həmlə sübut elədi. Bu gün o istiqamətdə
Azərbaycan Silahlı Qüvvələri düşmənin paytaxtından 70-80 kilometr məsafədə
mövqe tutub. Ermənistandan Laçın istiqamətinə gələn magistral şosseyə nəzarət
edir. Bu çox böyük uğur və qələbədir. Müdafiə nazirimiz bəyan edir ki,
Azərbaycan ordusu torpaqlarımızı işğaldan azad eləmək üçün tam hazır
vəziyyətdədir və buna qadirdir. Bunu Azərbaycan xalqı bilir, biz ordumuzla
qürur duyuruq və Ali Baş Komandanın əmri ilə Silahlı Qüvvələr torpaqlarımızı
işğaldan azad etmək əməliyyatlarına başlayacaq”.
E.Məmmədov vurğuladı ki, iyunun 26-da Azərbaycan
ordusunun yaranmasının 100 illiyi ilə bağlı hərbi parad keçiriləcək: "Bu təkcə
yubiley paradı deyil, eyni zamanda ölkəmizin hərbi gücünün nümayişi olacaq.
Gücümüzü bizi, ölkəmizi sevənlər və düşmən olanlar görəcək. Çox arzu edərdik
ki, bizə düşmən olanlar bu gücdən nəticə çıxarsınlar. Onlar istəməsinlər ki,
biz gücümüzü işə salaq. Ancaq təəssüflər olsun ki, onlar başa düşmür,
işğalçılıq siyasətindən əl çəkmir. Belə olan təqdirdə, Azərbaycanın bir yolu
qalır, bu da indiki gücümüzdən istifadə edib torpaqlarımızı işğaldan azad
etməkdir. Bu, müharibə deyil. Biz heç bir dövlətə qarşı müharibə etmək fikrində
deyilik. Bu, 25 ildən artıqdır torpaqlarımızda kök salmış düşmən
qruplaşmalarını, ordularını, terrorçularını Azərbaycan ərazilərindən süpürüb
atmaq üçün keçiriləcək anti-terror əməliyyatı olacaq. Bunun üçün də Azərbaycan
öz hərbi gücündən istifadə edəcək. Bəzən bizi şantaj etmək üçün deyirlər ki,
Azərbaycan müharibə edəcək. Xeyr, Azərbaycan müharibə etməyəcək. Əslində
müharibə hansısa bir dövlətə qarşı olur. Biz öz torpaqlarımızı azad eləmək üçün
hərbi gücümüzdən istifadə edəcəyik və heç kimin də torpağına göz dikməmişik.
Əminəm ki, bu olacaq və indi Bakıda keçirdiyimiz hərbi paradları işğaldan azad
olunmuş ərazilərimizdə, Şuşada, Xankəndində və digər rayonlarımızda
keçirəcəyik. Azərbaycan buna qadirdir, gücü var və biz bunu açıq şəkildə bəyan
edirik”.
Milli Dirçəliş
Hərəkatı Partiyasının sədri, millət vəkili Fərəc Quliyevbildirdi ki, Azərbaycan ordusu son paradını keçirəndə Ermənistan da belə bir
tədbir keçirirdi: "Ermənistan Rusiyaya məxsus texnika və şəxsi heyətlə birgə
parad keçirirdi. Göstərmək istəyirdi ki, guya müstəqil dövlətdir, amma başqa
ölkənin silahı və texnikası, eləcə də əsgəri yer alırdı bu paradda. Ancaq
Azərbaycan öz hərbi texnikası və əlində öz istehsalımız olan "İstiqlal” silahı
tutan əsgəri, bayrağı ilə hərbi parad keçirtdi. Müqayisə etsək, arada bu qədər
fərq var və Azərbaycan ordusunun əzəməti hələ o vaxtdan görünürdü. Daha sonra
2016-cı ilin aprel döyüşlərində Silahlı Qüvvələrimiz ermənilərə dərs verdi”.
F.Quliyev qeyd etdi ki, bu günlərdə Naxçıvan
Əlahiddə Ümumqoşun Ordusu 10 min hektardan çox ərazini düşməndən geri aldı: "Bu
əməliyyat zamanı Azərbaycan ordusu strateji yüksəkliklərdə mövqe tutdu. Eləcə
də ardınca Sədərəkdə şərab zavodu və onun ətrafını geri aldı. Artıq ermənilərin
Naxçıvan istiqamətindəki hərbi hissəsinin bizim bir bölüyümüzə qarşı
dirənişinin olmaması onu göstərir ki, düşmənlə müqayisədə Azərbaycan ordusunun
hazırlığı yüksək səviyyədədir. Biz bilirik ki, Ermənistan Rusiyanın bir
əyalətidir və ona arxalanaraq Azərbaycan ərazilərini işğal altında saxlaya
bilirlər. Hesab edirəm ki, bizim müdafiə nazirinin və digər dövlət
rəhbərlərinin də verdikləri bəyanatların arxasında gerçək reallıq, gücümüz
dayanır. Lakin Ermənistan tərəfinin hərdən etdiyi avantürist davranışların
arxasında ağalarına güvənmək dayanır. Amma günün birində mütləq həqiqət yalana
qalib gələcək və Azərbaycan tərəfi real addımlarla öz ordusu ilə ərazilərini
işğaldan azad edərək suverenliyini təmin edəcək”.
Bəxtiyar MƏMMƏDLİ