Azərbaycan vətəndaşları sabaha inamla baxır - Fotolar
Davamlı sabitlik,
xalq-iqtidar birliyi, iqtisadi tərəqqi, xalqımızın tolerantlıq, multikulturalizm
ənənələrini yaşatması Azərbaycanı beynəlxalq əhəmiyyətli tədbirlərin
keçirildiyi məkana çevirib. Prezident İlham Əliyevin rəhbərliyi ilə uğurla icra
edilən regional inkişaf proqramları sayəsində 2004-cü ildən başlayaraq, ölkə iqtisadiyyatı
3 dəfədən çox artıb. Həmin vaxtdan indiyə qədər Azərbaycanda 2 milyona yaxın iş
yeri açılıb. Nəticədə, ölkəmizdə işsizlik dünyada ən aşağı səviyyəyə - cəmi 5
faizə enib. Halbuki, 2003-cü ildə bu göstərici 49 faizə bərabər olub.
Əgər 2004-cü ildə
yoxsulluğun səviyyəsi 40 faizdən artıq idisə, hazırda bu, cəmi 5-6 faizdir.
Nağd valyuta ehtiyatlarımız ölkənin Ümumi Daxili Məhsuluna (ÜDM) bərabərdir.
Xarici dövlət borcu ÜDM-in 20 faizindən azdır. Bu göstəricilər, uğurlar, bütün
sahələr üzrə qazanılan nailiyyətlər sadəcə yerli analitiklər tərəfindən deyil,
beynəlxalq təşkilatlar vasitəsilə də dilə gətirilir, etiraf olunur. Buna misal
olaraq, 2009-cu ildə Dünya Bankının "Doing Business” hesabatında Azərbaycanın "Dünyanın
aparıcı islahatçı ölkəsi” kimi qiymətləndirilməsini göstərmək olar. 2015-ci
ildə Azərbaycan Minilliyin İnkişaf Məqsədlərinin icrasında əldə etdiyi böyük
nailiyyətinə görə həmin ilin "Cənub-Cənub” mükafatını alıb və 2010-cu ildən
etibarən yüksək insan inkişafı kateqoriyalı ölkələr sırasına daxil edilib. Davos
Dünya İqtisadi Forumunun "2016-2017-ci illər üzrə qlobal rəqabətə davamlılıq
hesabatında” Azərbaycan 138 ölkə sırasında 37-ci yer tutub. Son olaraq isə
Ümumdünya Davos İqtisadi Forumu Azərbaycanı ölkələrin iqtisadiyyatlarının
rəqabətqabiliyyətliliyinə görə 35-ci yerə layiq görüb.
Təbii ki, bütün bu uğurlar
Azərbaycan vətəndaşları, həmçinin dünya azərbaycanlıları tərəfindən də müşahidə
edilir. Elə bunun nəticəsidir ki, reallıqları düzgün qiymətləndirməyi bacaran
azərbaycanlılar ümummilli lider Heydər Əliyev siyasi kursunun layiqli davamçısı
İlham Əliyevi dəstəkləyirlər. Azərbaycanda keçirilən seçkilərdə məhz bu siyasi
kurs qalib gəlib. Bu gün də ölkədə xalq-iqtidar birliyi hökm sürməkdədir. Bu
ayın əvvəlində Hollandiyanın ING maliyyə holdinqi analitiklərinin Azərbaycan
barədə hazırladıqları məruzədə də ölkəmizin əldə etdiyi uğurlar, əhalinin
dövlət başçısına etimadı və mövcud iqtisadi inkişaf təfsilatlı şəkildə öz
əksini tapıb. Azərbaycanla bağlı
araşdırmaları bu holdinqin tərəfdaşı olan ACT LLC humanitar tərəfdaşlıq
təşkilatı Avropa İttifaqının "Şərq Tərəfdaşlığı” proqramının sifarişi əsasında
aparıb. Bu məruzəyə görə, Azərbaycan vətəndaşlarının 81 faizi hökumətə etibar
edir. Siyasi partiyalar rəyi soruşulanların 45 faizinin, Milli Məclis 65
faizinin etibarını doğruldur. Vətəndaşların 80 faizə qədəri ölkənin gələcəyini
nikbin qiymətləndirir, şəxsi gələcəyinə isə rəyi soruşulanların 83 faizə yaxını
nikbinliklə baxır. Araşdırma zamanı,
həmçinin Azərbaycanda iqtisadi vəziyyət də təhlil olunub. 2018-ci il üçün
inflyasiyanın səviyyəsi 6,9 faiz proqnozlaşdırılıb. Qeyd edilib ki, 2018-ci
ildə manatın dollara nisbətində orta illik məzənnənin 1,59 (hazırda 1,7) təşkil
edəcəyi gözlənilir. 2018-ci ildə neftin bir barrelinin qiymətinin 51 dollar
olacağı proqnozlaşdırılıb. Analitiklər daxili tələbatın daha da sabitləşəcəyini bildiriblər.
Həmçinin qeyd olunub ki, ötən il pərakəndə satışların artımı 2 faiz ətrafında
dəyişib, əməkhaqqı və gəlirlərin artması istiqamətində ilk dönüş əlamətləri
qeydə alınıb.
Göründüyü kimi, Hollandiyaya
məxsus maliyyə təşkilatının məruzəsində yer alan bu məlumatlar son illərdə
Azərbaycanda yeni iqtisadi şəraitə uyğun olaraq aparılan islahatlar və görülən
işlərin məntiqi nəticəsidir. Burada diqqət çəkən başlıca məqamlardan biri də Azərbaycan
vətəndaşlarının böyük qisminin gələcəyə nikbin baxmasıdır. Sorğunun bu nəticəsi
təsadüfən yaranmayıb. Təkcə son bir ildə Azərbaycan iqtisadiyyatında, xüsusən
də qeyri-neft sektorunda müşahidə olunan inkişaf insanların yaşayışına müsbət
təsir edib. Kənd təsərrüfatında olan canlanmanı da bura daxil etmək olar. Bu
mənada bölgələrin inkişafı istiqamətində görülən işlər də təqdirəlayiq hal kimi
dəyərləndirilməlidir. İlin ən əlamətdar hadisələri sayılan "Azəri-Çıraq-Günəşli”
yataqları üzrə yeni sazişin – "Yeni Əsrin Müqaviləsi”nin imzalanması və Bakı-Tbilisi-Qars
dəmir yolunun açılış mərasiminin keçirilməsi də ölkəmizin iqtisadi inkişafında,
vətəndaşlarımızın sosial rifahının yaxşılaşdırılmasında mühüm rol oynayır. Azərbaycanın
gələcək inkişafı, maliyyə imkanlarının genişləndirilməsi üçün "Yeni Əsrin
Müqaviləsi”nin çox böyük əhəmiyyəti var. Avropa ilə Asiyanı birləşdirən və
dünyanın 100 böyük layihəsi siyahısına daxil olan Bakı-Tbilisi-Qars dəmir yolu
xəttinin inşası da xüsusi strateji əhəmiyyət daşıyır. Çünki bu xəttin işə
düşməsi Azərbaycanın dövlət müstəqilliyinin daha da gücləndirilməsində,
iqtisadi qüdrətinin artırılmasında mühüm strateji amildir.Tam əminliklə
qeyd etmək olar ki, 2017-ci ildə reallaşan nəhəng enerji layihələri, o cümlədən
40 milyard dollar dəyəri olan "Cənub Qaz Dəhlizi” də ölkəmizin uzunmüddətli
uğurlu, dayanıqlı inkişafını dəstəkləyəcək.
Əlbəttə ki, sadalanan bu
faktlar Azərbaycan vətəndaşlarının sabaha inamını daha da artırır, onların öz
gələcəklərinə nikbinliklə yanaşmasına səbəb olur. Bundan irəli gələrək, xalq
iqtidarın siyasətini, Prezident İlham Əliyevin rəhbərliyi ilə həyata keçirilən
islahatları dəstəkləyir. Xalq-iqtidar birliyi, böyük uzaqgörənliklə
reallaşdırılan siyasət isə Azərbaycanın regionun lider dövləti statusunu
qoruyub saxlaması ilə nəticələnir.
Alpər
TURAN