Azərbaycan Respublikasının dövlət müstəqilliyi dönməz və əbədidir
AMEA Naxçıvan Bölməsində 18 oktyabr-Azərbaycan
Respublikasının dövlət müstəqilliyinin bərpasının 25-ci ildönümünə həsr olunmuş
"Azərbaycan Respublikasının dövlət müstəqilliyi dönməz və əbədidir” mövzusunda
elmi konfrans keçirilib.
AMEA Naxçıvan Bölməsinin sədri,
akademik İsmayıl Hacıyev tədbiri açaraq siyasi tariximizə qurucu və xilaskar
kimi daxil olmuş görkəmli dövlət xadimi, ümummilli lider Heydər Əliyevin
1993-cü ilin iyununda xalqın təkidi, tələbi və xahişi ilə ikinci dəfə hakimiyyətə qayıdmasından, Azərbaycanı
böyük bəlalardan xilas etməsindən, bütün həyatını Azərbaycana həsr etmiş dahi şəxsiyyətin
yorulmaz siyasi fəaliyyətindən və ötən müddət ərzində ölkəmizin əldə etdiyi
naliyyətlərindən ətraflı danışıb.
Dahi öndər Heydər Əliyev müdrikcəsinə
və uzaqgörənliklə Azərbaycanı labüd məhvdən xilas etdi, müstəqilliyimizin və ərazi
bütövlüyümüzün qorunub saxlanmasına real zəmin yaratdı-deyən akademik bu illərdə ulu öndərin
gərgin işi, zəhməti nəticəsində Azərbaycan dövləti bir çox beynəlxalq təşkilatlara
üzv olduğunu, onlarla əməkdaşlıq etdiyini, habelə demokratik inkişaf yolu ilə
irəliləyən ölkəmiz bölgədə iqtisadi tərəqqiyə imkan verən
addımlar atdığını bildirib.
Müstəqilliyimizin bərpasından
sonra Naxçıvan Muxtar Respublikasının bütün sahələrdəki uğurlu inkişafı barəsində
də konfrans iştirakçılarına məlumat verən natiq onu da qeyd edib ki, ulu öndərin
milli maraqlara əsaslanmaqla həyata keçirdiyi çoxşaxəli siyasət strategiyası
ölkəmizdə, o cümlədən də regionumuzda bu gün inamla davam etdirilir.
Konfransda AMEA Naxçıvan Bölməsinin
Tarix, Etnoqrafiya və Arxeologiya İnstitutunun aparıcı elmi işçisi, tarix üzrə
fəlsəfə doktoru Musa Quliyevin "Müstəqilliyə aparan yol”, həmin institutun böyük
elmi işçi, tarix üzrə fəlsəfə doktoru Yaşar Rəhimovun "Dövlət müstəqilliyinin əldə
olunması tarixi naliyyətdir”, şöbə müdiri, AMEA-nın müxbir üzvü Vəli Baxşəliyevin
"Ümummilli lider Heydər Əliyev və dövlət müstəqilliyinin möhkəmləndirilməsi”, şöbə
müdiri, tarix üzrə fəlsəfə doktoru Asəf Orucovun "Naxçıvan Muxtar Respublikası
müstəqillik illərində” mövzusunda məruzələri dinlənilib.
Elmi konfransın sonunda mövzu ilə bağlı məruzəçilərə
verilən suallar ətraflı cavablandırılıb.