Azərbaycan məhsullarının ixrac potensialı və prioritet hədəflər
2017-ci ilin
yanvar-noyabr aylarında Azərbaycanın hüquqi və fiziki şəxsləri dünyanın 183 ölkəsindəki
tərəfdaşları ilə ticarət əməliyyatları həyata keçirib, 114 ölkəyə məhsul ixrac
olunub, 176 ölkədən idxal olunub.
Dövlət Gömrük Komitəsinin
məlumatlarına əsasən, ixracın 31,4 faizini İtaliyaya, 10,5 faizini Türkiyəyə,
4,5 faizini İsrailə, 4,2 faizini Rusiyaya, 3,9 faizini Kanadaya, 3,8 faizini
Çexiyaya, 3,6 faizini Almaniyaya, 3,5 faizini Çinə, 3,4 faizini Gürcüstana, 3,2
faizini İndoneziyaya, 3,0 faizini Portuqaliyaya, 2,9 faizini Hindistana, 2,7
faizini Fransaya, 2,4 faizini Ukraynaya, qalan 17,0 faizini isə digər ölkələrə
göndərilmiş məhsulların dəyəri təşkil edib.
Azərbaycan ixrac imkanları daha hansı ölkələr və məhsullar hesabına
genişləndirə bilər? Hansı ölkələr ixrac məsələsində Azərbaycan üçün prioritet
sayılmalıdır? Məsələ
ilə bağlı ekspertlərin fikrini öyrəndik.
İqtisadçı
ekspert Vüqar Bayramov deyir ki, 2017-ci ildə Azərbaycanın ixrac potensialının və həcminin
artması iki əsas faktorla bağlı idi: "Bunlardan biri bazarda neftin qiymətində
proqnozlaşdırılandan daha çox qiymət artımlarının qeydə alınmasıdır. Bunun nəticəsi
olaraq ölkəmizin netf satışından əldə etdiyi gəlirin həcmi artdı. İkincisi isə
qeyri-neft ixracatında artım müşahidə olundu. Azərbaycanın qeyri-neft məhsullarının
ixracı 2017-ci ildə 24% yüksəldi. Bu da qeyri-neft sektorundan əldə olunan gəlirin
artmasına şərait yaratdı. 2017-ci ilin yekunları göstərir ki, bu potensialımızdan istifadə etməklə, ölkəyə
daha çox valyutanın cəlb edilməsinə nail ola bilərik. Sözsüz ki, qeyri-neft
sektoru məhsullarının ixracında yeni bazarlara çıxış imkanın genişləndirilməsinə
ehtiyac var. Əbəs yerə deyil ki, ölkə
prezidenti həmişə məhsulların ənənəvi
bazarlarla yanaşı, yeni bazarlara da çıxarılması ilə bağlı göstərişlər verir”.
Müsahibimiz hansı bazarların daha
perspektivli ola biləcəyi ilə də bağlı fikirlərini bölüşdü: "Avropa Birliyi və
Yaxın Şərq bazarı ölkəmiz üçün daha çox potensiallı və gəlir gətirən
bazarlardandır. Avropa Birliyinə ixrac imkanlarımız xüsusilə də,
sertifikatlaşdırmanın və məhsul standartlarının genişlənməsi hesabına həyata
keçirilir. Avropa Birliyi Azərbaycan üçün potensial yeni bazarlardan biridir. Bu,
500 milyon istehlakçısı və alıcılıq qabiliyyəti kifayət qədər yüksək olan bir
bazardır. Bundan başqa, Körfəz ölkələri, xüsusilə aqrar məhsullarımızın ixracı üçün əlverişli
bazarlardandır”.
"Azərbaycan hazırda qida və aqrar məhsulların
ixracını daha çox həyata keçirir” deyən
iqtisadçı ekspert bildirir ki, sənaye məhsullarının ixracının da artırılması hədəfdir:
"Sənaye məhsullarının ixracının artırılması qeyri-neft sektoru məhsullarının
ixracının həm əmtəə olaraq, həm də keyfiyyət baxımından delifikasiyasının əldə
olunmasına imkan yarada bilər. Bu baxımından düşünürəm ki, qida məhsulları ilə
yanaşı, xüsusən də sənaye məhsullarının ixracının artırılması prioritet olmalıdır”.
İqtisadçı
Samir Əliyevdeyir ki, ixrac potensialımızı artırmaqla ölkəyə valyuta axınını da təmin etmiş
oluruq: "Hansı ölkələrə ixracın artırılması baxımından bir söz deyə bilmərəm,
çünki bunun üçün ciddi araşdırma işi aparmaq lazımdır. Amma reallıq budur ki,
Azərbaycanda qeyri-neft sektorunu inkişaf etdirmək lazımdır. Bu inkişafa gedən
yol da ixracı genişləndirməkdən keçir. Çünki Azərbaycan bazarı çox kiçikdir.
Biz ixracyönlü siyasət yeritməliyik. Belə ki, xarici bazara çıxış əldə etməklə həm
ölkəni valyuta ilə təmin edirik, həm də yeni texnologiyaları gətiririk. İxrac
potensialını artırmaq üçün ilk olaraq rəqabətədavamlı məhsul istehsal etmək
lazımdır”.
İqtisadçı qeyd edir ki, məhsul ixracında iki
amil əsas rol oynayır: "Birinci qiymət, ikinci isə keyfiyyət amilidir. Keyfiyyətin yüksək olması çox vacibdir. Bir
qayda olaraq, keyfiyyət yüksək olanda, bu zaman məhsulun qiyməti də bahalaşır.
Misal üçün Avropa məhsullarına nəzər salsaq, görərik ki, həm keyfiyyət, həm də
qiymət baxımından göstəricilər yüksəkdir. Amma Asiya ölkələrinin məhsulları
üçün bunu demək mümkün deyil. Həmin məhsulların qiyməti istehlakçılar üçün əlverişli
olsa da, Avropa ölkələri ilə müqayisədə keyfiyyət baxımdan aşağıdır. Bazarda
daimiliyi qorumaq üçün yüksək keyfiyyət vacibdir”.
İqtisadiyyat Nazirliyinin İqtisadi İslahatlar Elmi-Tədqiqat
İnstitutunun aparıcı elmi işçisi Pərviz Heydərov bildirdi ki,
ölkə iqtisadiyyatı 2017-ci ildə genişlənib və buna müvafiq olaraq ixracımız da
genişlənib. Xarici ticarət əlaqələrimizdə əvvəlki 2 ildən - 2015 və 2016-cı ildən
fərqli olaraq, müsbət dəyişikliklər baş verib: "Məlumdur ki, makroiqtisadi
sabitlik üçün tələb olunan əsas şərtlərdən biri məhz xarici ticarət dövriyyəsinin
müsbət saldoya malik olmasıdır, yəni
ixracın idxalı üstələməsidir. Bu, ölkəyə valyuta axını deməkdir. Başqa
sözlə desəm, xərclədiyindən çox qazanırsan deməkdir”.
Müsahibimiz deyir ki, ixracı bir anda dəfələrlə
qaldırmaq əsla mümkün deyil. Bu mexanizmə kompleks tədbirlərin bir hissəsi kimi
yanaşmaq lazımdır: "İxrac yetərincə mürəkkəb prosesdir. Buraya istehsal, daxili
bazarın ehtiyaclarının ödənilməsi, keyfiyyət-kəmiyyət kimi məsələlər daxildir.
Eyni zamanda, xarici bazarlardakı durum, müştərilərin alıcılıq qabiliyyəti, tələbatın
dəyişməsi kimi amillər də nəzərə alınmalıdır. Bu mənada, fikrimizcə, Azərbaycan
ixracını hələ ki, sırf xammal tədarükü üzərində qursa, daha məsləhətlidir.
Bununla yanaşı, emal məhsullarına, xüsusən də, kənd təsərrüfatı məhsullarının
emalına diqqət yetirmək vacibdir”.
"Ekonomiks”
Beynəlxalq İqtisadi Araşdırmalar Mərkəzinin rəhbəri Fikrət Yusifov deyir ki, Dövlət Statistika Komitəsinin rəsmi saytında idxal
ixrac əməliyyatlarının həcminə dair 2017-ci ilin 10 aylıq göstəricilərinə əsasən,
ötən ilin yanvar-oktyabr aylarında idxalın həcmi müəyyən qədər azalıb, ixracın
həcminin isə əksinə, 2016-cı ilin 10 ayı ilə müqayisədə artdığı məlum olur:
"İxracda daha böyük artım ölkə iqtisadiyyatının real sektorunda baş verib. Bu,
müsbət haldır və onu qeyri-neft sektorunun inkişafı istiqamətində hökumətin
atdığı addımların məntiqi nəticəsi kimi dəyərləndirmək lazımdır. Lakin unutmaq
olmaz ki, real sektordan bugünkü ixracın həcmi ümumi ixracımızın 13,5 faizindən
çox deyil. Ona görə də bu sahədə hələ çox işlər görülməli və real sektordan
ixracın həcmini yaxın 2-3 il ərzində ən azından 6-7 dəfə artırmaq prioritet hədəf
olmalıdır. Belə olan halda, ölkə iqtisadiyyatının, onun maliyyə durumunun neftdən
asılılıq səviyyəsini optimallaşdıra bilərik”.
Günel Azadə