Azərbaycan məhsulları Körfəz ölkələrinə ixrac ediləcək - Fotolar
"Ərzaq məhsullarının tədarükü və təchizatı” Açıq Səhmdar
Cəmiyyətinin (ASC) nümayəndə heyəti Bəhreyn Krallığına işgüzar səfərdə olub. Səhmdar Cəmiyyətin mətbuat xidmətindən "Kaspi"yə bildirilib ki, nümayəndə
heyətində İdarə Heyətinin sədri Əbülfət Qocayev, İdarə Heyətinin sədr müavini
Elşən Əsədov və qida sektorunda fəaliyyət göstərən şirkət
nümayəndələri daxil idi. Səfərdə məqsəd Azərbaycan məhsullarının Körfəz ölkələrinə
ixracı, alternativ bazarların araşdırılması və ölkəmızın aqrar sektoruna
xarici investisiyaların cəlb edilməsidir.
İlk işgüzar görüş "Mumtalakat Holding”-in prezidenti
Mahmud Alkhocayi ilə keçirilib. Səmərəli keçən görüşdə Holdinqlə Səhmdar
Cəmiyyət arasında tərəfdaşlıq münasibətlərinin yaradılması, kənd təsərrüfatı
istehsalının bir sıra sahələrinə investisiyanın qoyulması, Azərbaycan məhsullarının
Körfəz ölkələrinə daşınması üçün Nəqliyyat Logistika Layihəsinın hazırlanması qərara
alınıb.
Növbəti işgüzar görüş "Arcapita” İnvestisiya
Fondunun baş icraçı direktoru Atif Əbdülmaliklə keçirilib. İcraçı direktor
bildirib ki, Fond 70 müəssisəyə təxminən 30 milyard dollar həcmində investisiya
yönəldib, bu istiqamətdə Azərbaycan şirkətləri ilə birgə əməkdaşlıq qurula bilər. Azərbaycanın iqtisadi potensialı haqda Səhmdar
Cəmiyyət nümayəndələri geniş təqdimatla çıxış ediblər. Cənab Atif
Əbdülmalik Azərbaycanda tikintisi nəzərdə
tutulan Logistika Mərkəzi Layihəsində iştirak etməkdə maraqlı olduqlarını
bildirilib və bu barədə ətraflı müzakirə aparılıb.
Daha sonra "Bəhreyn İqtisadi İnkişaf Şurası”nın
icraçı direktoru Simon Qalpin ilə görüş keçirilib. Cənab Qalpin bildirib ki,
Şura maliyyə xidmətləri, istehsal, turizm, logistika və nəqliyyat sahələrində
böyük həcmli investisiyalara malikdir. Şura Azərbayan Respublikasından ərzaq məhsullarının
ixracı, habelə logistika imkanlarının genişləndirilməsi ilə əlaqədar olaraq bu
sahələrə dövlət dəstəyinin göstərilməsində maraqlıdır.
Görüşün sonunda qarşılıqlı hədiyyələr təqdim
olunub.
Proqram çərçivəsində Səhmdar Cəmiyyətin nümayəndə
heyəti Bəhreyn Kral ailəsinin üzvü, "Riyada Şirkətlər Qrupu”nun prezidenti
xanım Şeyxa Dheya Bin İbrahim Əl Xəlifə ilə də görüşüb.
"Ərzaq məhsullarının tədarükü və təchizatı” ASC
İH-nin sədri Əbülfət Qocayev Azərbaycanın kənd təsərrüfatı potensialı, ölkədə həyata
keçirilən iqtisadi islahatlar haqda geniş məlumat verib.
Xanım Şeyxa bildirib ki, Azərbaycan məhsullarının
keyfiyyəti ilə bağlı zəngin məlumatlara malikdir və Bəhreyndə Azərbaycan məhsullarının
satış şəbəkəsinin yaradılmasına dəstək verməyə hazırdır.
Görüşün sonunda xanım Şeyxaya Azərbaycan xalçası və
kəlağayısı hədiyyə edilib.
İşgüzar görüşlərin sonuncu günü "Ərzaq məhsullarının
tədarükü və təchizatı” ASC-nin dəstəyi ilə Bəhreyn şirkətləri üçün Azərbaycan məhsullarının
təqdimat sərgisi keçirilib. "Riyada Group”un mərkəzi binasında keçirilmiş sərgidə
"Meyvəli”, "Balxurma”,” Gilan”, "Azərsun”, "Ballı”, "Veysəloğlu”, "Milla”,
"AzQranata”, "GlobalFoodService”, " AhmedTodor”, "AstaraÇay”, "Qoç Ət” və "Tovuz-Baltiya” şirkətlərinin məhsulları
geniş təqdim olunub, dequstasiya keçirilib. Məhsullarımız bəhrenyli iş adamları
tərəfindən həm görünüşünə, həm də dadına görə yüksək qiymətləndirilib.
Sərgidə Azərbaycan məhsullarının Bəhreyn Krallığına
ixracı ilə bağlı çoxsaylı təkliflər səsləndirilib, fikir mübadiləsi aparılıb.
"Riyada Group”-un vitse-prezidenti Sergey Tsektov müzakirədə Bəhreyndə Azərbaycan məhsullarının satış bazarının
açılmasını təklif edib və bu istiqamətdə əməkdaşlığa hazır olduqlarını
bildirib. Əməkdaşlıq memorondumunun imzalanması qərara alınıb.
"Ərzaq məhsullarının tədarükü və təchizatı” ASC-nin
nümayəndə heyəti və azərbaycanlı sahibkarlar səfər çərçivəsində Bəhreyn
Krallığının paytaxtı Manama şəhərinin market şəbəkələrinə baş çəkərək ərzaq məhsullarının
daxili bazar qiymətlərini araşdırıblar. "Carrefur” və digər satış şəbəkəsində aparılan araşdırmalar nəticəsində
məlum olub ki, daxili bazarda meyvə və tərəvəz,
habelə digər ərzaq məhsullarının qiyməti Azərbaycanla müqayisədə dəfələrlə baha
olması ilə bərabər keyfiyyət baxımından da qənaətbəxş deyildir. Bu məqsədlə də,
Azərbaycan Respublikasından kənd təsərrüfatı məhsullarının ixracı
mümkündür.Logistika imkanları formalaşarsa Bəhreyn bazarlarında Azərbaycan məhsulları
yüksək qiymətə satıla və tez bir zamanda keyfiyyət göstəricilərinə görə bazarda
rəqabət yarada bilər.
"Ərzaq məhsullarının
tədarükü və təchizatı” ASC Azərbaycan məhsullarının ixracı məqsədi ilə xarici
bazarların araşdırılmasını davam etdirir.