Azərbaycan əleyhinə gülünc təxribat cəhdi
Hər zaman ağa qara deməyi
özünə peşə seçən radikal müxalifət, eləcə də xarici dairələrin əlində alətə
çevrilən bəzi sapı özümüzdən olan baltalar prezident seçkilərinin 6 ay önə
çəkilməsində müəyyən "səbəblər” axtarmağa çalışırlar. Azərbaycanın uğurlarına sevinməyən beynəlxalq
güclər, ermənipərəst dairələr də bu fürsətdən yararlanaraq onlara dəstək verir,
müxtəlif bəhanələrlə xaricə sığınan, özlərini "müxalifətçi” hesab edən belə şəxslərdən
əleyhimizə istifadə edirlər. www.ipetition.com saytında xaricdə yaşayan bir
qrup azərbaycanlı tərəfindən Azərbaycanda aprelin 11-də keçiriləcək prezident
seçkilərinin ləğv olunmasını tələb edən petisiyanın yaradılması da bu
qəbildəndir.
Petisiyanın
müəllifi Hollandiyada yaşayan Ataxan Əbilov, Almaniyada yaşayan "Dünya
Azərbaycanlıları Məclisi”nin sədri Rövşən Qəmbər və hüquqşünas Qurban
Məmmədovdur. Təbii ki, petisiya tərtibçilərinin bu addımı gülüncdür. Çünki,
seçkilərin vaxtının dəyişdirilməsi Azərbaycan qanunlarına tam uyğundur. Buna qarşı
çıxmaq, yaxud qanundankənar hesab etmək özü belə, bu işin təşkilatçılarının
hüquqi savadının, dünyagörüşünün məhdudluğunu göstərir. Avropa və müasir dünya
dəyərlərindən danışan sözügedən şəxslərin bu cür addımları ölkə
qanunvericiliyinə, beynəlxalq hüquq normalarına, eləcə də sivil yaşam
qaydalarına zidd olan bir hərəkətdir.
Milli Məclisin deputatı, Yeni Azərbaycan Partiyası (YAP) Qaradağ
Rayon Təşkilatının sədri Aydın Hüseynov bildirib ki,
ölkəmizdəki prezident seçkilərinə kölgə salmağa çalışanlar Azərbaycanın
müstəqilliyini istəməyən, dövlətimizin siyasi nüfuzunu, iqtisadi gücünü gözü
götürməyən mərkəzlərin, erməni lobbisinin maraqlarına xidmət edən dairələrin
təsirinə düşən və onların maliyyəsinə göz dikən təşkilatlardır. Onun sözlərinə
görə, Azərbaycanda seçkilərin tam demokratik və şəffaf keçirilməsi üçün hər cür
şərait var və istənilən şəxs öz namizədliyini irəli sürə bilər. Deputat qeyd
edib ki, heç bir arqumentə əsaslanmayan, məsələnin mahiyyətinə varmayan
petisiya təşkilatçıları və onlara dəstək verən dairələrin başlıca məqsədi
ölkəmizə iftira atmaqdır. A.Hüseynov vurğulayıb ki, prezident seçkilərinin elan
olunması Azərbaycan Konstitusiyasına tam uyğundur və Prezident İlham Əliyev
Konstitusiyaya istinad edərək ölkədə prezident seçkilərinin 11 apreldə
keçirilməsi ilə bağlı sərəncam imzalayıb.
Azərbaycan Demokratiya və İnsan Haqları İnstitutunun rəhbəri, hüquq
müdafiəçisi Əhməd Şahidov qəzetimizə açıqlamasında deyib ki, Azərbaycan
dövlətinə və dövlətçiliyinə qarşı bu kimi təxribatlar hər zaman olub. Onun
fikrincə, xüsusən də seçkilərin, beynəlxalq əhəmiyyətli tədbirlərin keçirildiyi
ərəfədə, həssas məqamlarda Azərbaycanın uğurlarına sevinməyən qüvvələr bu kimi
yollara əl atır, ölkəmiz əleyhinə çirkin kampaniyaya başlayırlar: "Təəssüf ki,
özlərini siyasi mühacir kimi qələmə verərək Avropaya sığınan bəzi
azərbaycanlılar da bu sırada yer alırlar. Həmin şəxslər yaşadıqları ölkələrin
cəmiyyətlərinə inteqrasiya oluna bilmədikləri üçün bu kimi çirkin
kampaniyalarda rol alırlar. Özlərini haqq-ədalət carçısı, demokrat, hüquq
müdafiəçisi kimi göstərməyə çalışan bu şəxslər əsil həqiqətdə bəlli dairələrin
maşalarıdır. Çünki Azərbaycan üçün mühüm məsələlərlə bağlı beynəlxalq
təşkilatlarda, platformalarda, hətta yaşadıqları ölkələrdə hər hansı iş
görməyən, milli-dövlətçilik naminə heç bir yaxşı əmələ imza atmayan bu şəxslər
bütün enerji və resurslarını anti-Azərbaycan təbliğata yönəldiblər. Bu da
onların Avropa ölkələrində yaşamasını təmin edən, həmçinin onlara maddi
ödənişlər edən donor təşkilatların, hətta ermənipərəst qurumların tələblərindən
irəli gəlir. Onların planları hər zaman olduğu kimi, bu dəfə də iflasa
uğrayacaqdır. Prezident İlham Əliyevin də dəfələrlə vurğuladığı kimi,
iqtisadi-siyasi müstəqilliyi olan, milli-dövlətçilik maraqlarına köklənən
müstəqil siyasət yürüdən Azərbaycanla heç kim şərtlə, diktə ilə danışa bilməz,
heç bir qüvvə ölkəmizi öz yolundan döndərə bilməz”.
Hüquq müdafiəçisi Sahib Məmmədov antimilli
ünsürlər tərəfindən təşkil olunan bu petisiyanın təşkilatçılarının
savadsızlığına diqqət çəkib: "Mətn çox savadsız tərtib olunub. Üstəlik,
beynəlxalq təşkilatlardan tələb edirlər ki, Azərbaycanda seçki keçirsin və
sair. Bundan əvvəl də absurd iddialar səsləndirirdilər ki, Azərbaycanda
seçkiləri BMT keçirsin və daha nələr. Azərbaycanın 100 illik dövlət ənənəsi
var. Hətta SSRİ dönəmində də Azərbaycanın dövlət atributları qorunub saxlanıb.
O dövlətlərdə seçkini başqaları keçirir ki, orada dövlət ənənələri olmur. Ona
görə də qeyd edilən petisiya sadəcə gülüş doğurur, təşkilatçıları da gülünc
vəziyyətinə qoyur. Digər tərəfdən, referendum yolu ilə Azərbaycan
Konstitusiyasına dəyişikliklərdən sonra hazırda petisiyanı təşkil edənlər,
həmçinin onlarla eyni mövqedə dayananlar da proqnozlaşdırırdılar ki, tezliklə
prezident seçkiləri olacaq. Yəni, bu, gözlənilən idi. Şəxsən mənim üçün
maraqlıdır, prezident seçkilərinin 2 ay sonra, yaxud 6 ay sonra keçirilməsi
nəyi dəyişəcək? Cavab sadədir, antimilli ünsürlərin də yer aldığı anti-Azərbaycan
təbliğat maşını hansısa qüvvələrdən təlimat almağı gözləyirdi, bütün
fəaliyyətlərini oktyabr ayına hesablayırdılar. Lakin seçkinin iki ay sonraya təyin
edilməsi bir növ onları hazırlıqsız yaxalayıb... Onların özünə bəllidir ki, bu
petisiya Azərbaycandakı seçkilərə hər hansı formada təsir etməyəcək”.
Rufik İSMAYILOV