Azərbaycan ailə modeli: ənənələr və müasirlik
Müxtəlif peşəli, geniş
dünyagörüşlü insanların, həm də əsl ailə həyatını təcəssüm etdirməsi bu gün də
gənclərə nümunədir. Belə insanların məşhur ailələrin üzvləri olması isə onların
həyatlarının, bir-birinə və övladlarına olan münasibətlərinin hər zaman bir örnək
kimi qəbul edilməsinə səbəb olur. Görkəmli Azərbaycan yazıçısı Cəlil Məmmədquluzadə və
həyat yoldaşı, Qafqazın müsəlman qadınları xeyriyyə cəmiyyətinin təşkilatçısı Həmidə
xanım Cavanşir Məmmədquluzadə çətin zamanlarda bir-birlərinə həmdəm olmuşlar.
Ailəsinə böyük hörməti olan Həmidə xanım, həm də mədəni, xeyirxah övladlar tərbiyə
etmişdir. Mirzə Cəlil ən yaxşı əsərlərini bu alicənab qadınla yaşadığı dövrdə
yazmışdır. O, Qarabağın Kəhrizli kəndində ilk qız məktəbi açdırmış, toxuculuq
emalatxanası yaratmışd. Xalqımızın dahi bəstəkarı
Üzeyir Hacıbəyovla bir yerdə işləmiş, onunla yoldaşlıq etmiş ədəbiyyat və incəsənət
xadimləri yazır ki, o, məşqlərə tək gəlməzdi, həyat yoldaşı Məleykə xanımı da
özü ilə gətirərdi. Məleykə xanım onun bütün yaradıcılığını izləyir, ərinin
sevinci ilə yaşayırdı. Milli sahibkar Hacı Zeynalabdın Tağıyev həyat yoldaşı
Sona xanımla birlikdə Azərbaycanda incəsənətin, mədəniyyətin inkişafına,
qızların təhsil almasına öz əvəzsiz töhfələrini vermişdilər. Bu
misallardan göründüyü kimi, hər bir dövrün özünəməxsus nümunəvi ailə modelləri
mövcud olmuşdur. Və bu modellər daha böyük əhəmiyyətə o zaman malik olur ki, yaradılmış münasibətlər
sistemi bir neçə nəsil davam etsin. Azərbaycan xalqının sadiq oğlu, Ümummilli Lider Heydər Əliyevin
ailəsi də gənclərimizə örnəkdir. Bütün dünyada layiqli hörmət və böyük nüfuz
qazanmış Heydər Əliyev bu uğurun arxasında hər zaman ailəsinin dayandığını
bildirirdi. Böyük şəxsiyyətlərin arxasında böyük qadınlar dayanır. O qeyd
edirdi ki, ".... Gənc yaşlarımdan mənim həyatım dövlət işi ilə bağlı olubdur. Mən
bütün həyatımı buna sərf etmişəm və bu gün də bu yolda çalışıram. Bu yolda mənim
həmişə səmərəli, müvəffəqiyyətlə çalışmağımda, hesab edirəm ki, ailə vəziyyətimin
rolu böyük olub. Zərifə xanım kimi həyat yoldaşım olduğuna və o, ailəmdə çox
yüksək mənəvi mühit yaratdığına görə mən xoşbəxt olmuşam. Həyatımın bütün dövrlərində
işlə məşğul olduğuma görə ailə məsələlərinə fikir verməyə vaxtım olmayıb.
Bunların hamısı Zərifə xanımın üzərinə düşüb və o da bu vəzifəni şərəflə, sədaqətlə,
çox böyük məharətlə yerinə yetirib”.
Müasir dünyanın qlobal problemlərindən biri də sosial-mənəvi mühitin saflığının
qorunmasıdır. Bu baxımdan ailə, istər şəxsiyyət,
istərsə də bütövlükdə cəmiyyət üçün əhəmiyyəti artmaqda olan ümumbəşəri dəyər,
mədəni irsin, əxlaqi norma və qaydalarının ötürücüsü rolunu oynayır. Bəzi alimlər təsdiq edir ki, müasir əhalinin ailəyə
olan tələbatı azalmışdır, ailə sivilizasiyanın təsiri altında birgəyaşayışın
liberal formalarına doğru təkamül edir. Lakin bir çox sosioloji tədqiqatlar göstərir ki, əksinə, müasir insan üçün ailənin,
uşaqların, evin, maddi rifah halının, asudə vaxtın dəyərləri çox artmışdır. Bəşəriyyətin diqqətində
olan bu problemlə bağlı müxtəlif müzakirələr
aparılır, çağırışlar edilir. Elə bu il ərzində İslam Əməkdaşlıq
Təşkilatına (İƏT) üzv dövlətlərin birinci Nazirlərin "İslam Əməkdaşlıq Təşkilatı dövlətlərində
evlilik, ailə institutu və bu dəyərlərin qorunması”, "İslam dünyasında sosial siyasət və ailə: tələblər
və ehtiyaclar” mövzusunda keçirilən
konfranslar bu məsələlərin
dünya ölkələri üçün nə qədər aktual
olduğunu bir daha göstərdi.
Hər bir xalqın, millətin
mövcudluğu onun ana dilinə, adət-ənənələrinə, öz mədəniyyətinə bağlılığından
asılıdır. Azərbaycan xalqının çox gözəl və zəngin ailə ənənələri var. Həmin ailə
ənənələri sədaqət, qarşılıqlı
məhəbbət, dürüstlük, valideynə, böyüyə hörmət,
tolerantlıq kimi zəngin və çoxşaxəli xüsusiyyətlərə malikdir. Ölkəyə başçılıq
etdiyi bütün dövrlərdə millətin gələcəyinə, təhsilin, səhiyyənin,
iqtisadiyyatın, mədəniyyətin hərtərəfli inkişafına həmişə qayğı ilə yanaşan
Ümummilli Lider Heydər Əliyev ailənin cəmiyyətdəki rolunu xüsusi olaraq qeyd
edirdi: "Ailə dəyərləri, ailə ənənələri, milli-mənəvi dəyərlərimizə sədaqət,
uşaqların müasir səviyyədə tərbiyəsi mühüm əhəmiyyət kəsb edir”. O, ailə adətlərimizin ləyaqətlə davam etdirilməsi
üçün hər bir imkan və şəraiti yaradır, bu işdə dəstəyini xalqdan əsirgəmirdi.
Azərbaycana rəhbərlik etdiyi hər bir dövrdə çoxuşaqlı və aztəminatlı ailələrə, əmək
qəhrəmanlarının ailələrinə xüsusi qayğı göstərir, onların övladlarının təhsilini
nəzarətdə saxlayırdı. Ailəni, ailə münasibətlərini son dərəcə yüksək dəyərləndirən
Heydər Əliyev hesab edirdi ki, cəmiyyətdəki qarşılıqlı münasibətlərdə olduğu
kimi, ailədə də hər bir insan özünəməxsus statusa, qayda-qanuna, əlaqələrə və
prinsiplərə riayət etməlidir. Hər bir ailə üzvü öhdəsinə düşən funksiyaları
yerinə yetirməli, ailənin rifahı üçün bacardığını etməli, ailə üzvlərinə hörmət və
qayğı göstərməli, ailənin sevincini və kədərini birgə yaşamalı, bu sahədə
mövcud olan ümumi ənənə və qaydalara sadiq olmalıdır. Çünki ailə olmasa, cəmiyyət
də inkişaf edə bilməz.
Cəmiyyətin inkişafı ailələrin inkişafından asılıdır. Ailə
İnstitutunun möhkəmliyi cəmiyyətin və dövlətin güclənməsinə, inkişaf etməsinə zəmin
yaradır. 90-cı illərdə Ulu Öndər Heydər Əliyevin təşəbbüsü və dəstəyi ilə ailənin
möhkəmləndirilməsi, qadın və uşaq hüquqlarının müdafiəsi sahəsində Azərbaycan
mühüm beynəlxalq Konvensiyalara qoşulmuş və respublikamızda müvafiq qanunlar qəbul
edilmişdir. Azərbaycan Respublikası BƏT-in "Kişi və qadın işçilər — ailə vəzifələri
olan işçilər üçün bərabər imkanlar və bərabər rəftar haqqında” 156 nömrəli,
BMT-nin "Qadınlar barəsində ayrı-seçkiliyin bütün formalarının ləğv edilməsi
haqqında”, "Uşaq Hüquqları haqqında”, "Ölkələrarası övladlığa götürmə ilə bağlı
uşaqların müdafiəsi və əməkdaşlıq haqqında”, "Uşaqların kənd təsərrüfatında işə
buraxılmasının minimum yaşı haqqında”, "Uşaq əməyinin ən pis formalarının
qadağan edilməsinə və onların aradan qaldırılması üçün təcili tədbirlərə dair”
və digər Konvensiyalara qoşulmuşdur. Dövlət tərəfindən ratifikasiya edilmiş
Konvensiyalara əsasən daxili qanunvericilikdə mühüm islahatlar aparılmışdır.
"Ailə kəndli təsərrüfatı haqqında”, "Uşaq hüquqları haqqında”, "Əlilliyin və
uşaqların sağlamlıq imkanları məhdudluğunun qarşısının alınması, əlillərin və
sağlamlıq imkanları məhdud uşaqların reabilitasiyası və sosial müdafiəsi
haqqında”, "Valideynlərini itirmiş və valideyn himayəsindən məhrum olmuş
uşaqların sosial müdafiəsi haqqında”, "Körpələrin və erkən yaşlı uşaqların
qidalanması haqqında”, "Uşaqların icbari dispanserizasiyası haqqında”, BMT-nin
"Transmilli mütəşəkkil cinayətkarlığa qarşı” Konvensiyasının, onu tamamlayan
"İnsan alverinin, xüsusən qadın və uşaq alverinin qarşısının alınması, aradan
qaldırılması və cəzalandırılması haqqında» və "Miqrantların quru, dəniz və hava
ilə sərhəddən qanunsuz keçirilməsinə qarşı” Protokolların təsdiq edilməsi barədə,
"Ərdə olan qadının vətəndaşlığı haqqında”, "Azərbaycan Respublikasında insan
hüquq və azadlıqlarının həyata keçirilməsinin tənzimlənməsi haqqında”,
"Ahıllara sosial xidmət haqqında”, "Nikahdan kənar doğulmuş uşaqların hüquqi
statusu haqqında”,"Uşaqlı ailələrin sosial müdafiəsi haqqında” və digər
Qanunlar qəbul edilmişdir.
Müstəqil
dövlətimizin ali sənədinin- Konstitusiyanın müəllifi olan Heydər Əliyev burada
ailənin mahiyyətini, ailə üzvlərinin vəzifə və hüquqlarını da xüsusi maddələrlə
müəyyən etmişdir. Eləcə də 2000-ci ildə Ailə Məcəlləsinin qəbul olunması nəticəsində
ailə üzvlərinin digər hüquq və vəzifələri ilə yanaşı, mülki hüquqları da təsbit
olunmuşdur. Ailə üzvlərinin sağlamlığı, xüsusilə ana və uşaqların sağlamlığının
mühafizəsi çox önəmli məsələlərdir. Heydər Əliyev ailədə sağlam uşaqların
doğulması, eləcə də, narahatlıq doğuran məsələlərdən biri olan, qan
qohumluğunun qarşısının alınması istiqamətində xüsusi fəallıq göstərir, tibb işçilərinə göstərişlər verir və ən müxtəlif
səviyyələrdə müzakirələr aparırdı. O, 1995-ci ildə "Respublika Ailə-Sağlamlıq Mərkəzi”nin
açılışında çıxış edərkən qan qohumluğu evliliyi və onun fəsadları barədə
deyirdi : ".... bizim xalqımızın, millətimizin sağlamlığı üçün, həm fiziki, həm
zehni cəhətdən sağlamlığı üçün yaranan problem qohumların bir-biri ilə ailə
qurmasıdır. Təəssüf ki, bu, bizim millətimizin, xalqımızın qədimlərdən qalmış ənənəsidir.
Biz ənənə və adətlərimizin çoxuna hörmət bəsləyirik, onları inkişaf etdiririk və
inkişaf etdirməliyik. Amma o adətlər, o ənənələr insan üçün, cəmiyyət üçün zərərlidirsə
biz onlardan xilas olmalıyıq, imtina etməliyik. Bax, bu adət-ənənələrdən biri də
keçmişdən bizə miras qalmış, millətimizə xas olan adət-qohumların evlənməsi,
ailə qurmasıdır. Siz, tibb işçiləri və alimləri bunun həm ailələr üçün, həm də
ümumiyyətlə millətimizin gələcəyi üçün nə qədər zərərli olduğunu bilirsiniz.
Amma nədənsə, bu sahədə ciddi tədbirlər görülmür. Belə bir adət-ənənələrin zərərli
olduğu insanlara çatdırılmır, izah edilmir, bu sahədə lazımi profilaktik işlər,
yəni izahat işləri aparılmır. Məhz bunların nəticəsində, - yəqin ki, siz bu sahədə
tədqiqatlar aparmısınız, bilirsiniz, - çox adamlar anadangəlmə şikəst olur,
yaxud əqli cəhətdən inkişaf etmir. Belələri yaşasalar da, fiziki cəhətdən
çatışmazlıq onları həmişə incidir”. Bu bir həqiqətdir ki, sağlam ailə sağlam nəsil,
sağlam millət deməkdir. Bu baxımdan, Ulu Öndərin imzaladığı "Əhalinin
sağlamlığının qorunması haqqında” Qanunu xüsusilə qeyd etmək lazımdır. Məhz bu
xidmətin və qayğının nəticəsidir ki, ildən-ilə ailələrin sayı çoxalaraq,
hazırda iki milyonu ötmüşdür. Azərbaycan ailəsi dünyada ən yaxşı ailə modeli
kimi qiymətləndirilir.
Ümummilli Lider Heydər
Əliyevin siyasi kursunu şərəflə davam etdirən, artıq dünya siyasi xadimləri
sırasında öz layiqli yerini tutan Cənab Prezident İlham Əliyev tərəfindən bu
sahədə islahatlar aparılmışdır. Xüsusilə, ailə, qadın və uşaq hüquqlarının
müdafiəsinin reallaşdırılması üçün 1998-ci ildən fəaliyyət göstərən Azərbaycan Respublikasının
Qadın Problemləri üzrə Dövlət Komitəsinin əsasında, Möhtərəm Prezident İlham
Əliyevin Sərəncamı ilə, 2006-cı ildə bu sahədə vahid dövlət siyasətini həyata
keçirən Ailə, Qadın və Uşaq Problemləri üzrə Dövlət Komitəsi yaradılmışdı. Ailənin
möhkəmləndirilməsi, qadın və uşaq hüquqlarının müdafiəsi istiqamətində hüquqi
islahatlar aparılmışdır. Azərbaycan Respublikasının "Gender (kişi və
qadınların) bərabərliyinin təminatları”, "Məişət zorakılığının qarşısının
alınması haqqında” Qanunları hüquqların bərabərliyi istiqamətində atılmış ən
uğurlu addımlardandır. Ailələrin sosial
rifahını yüksəltmək, xüsusilə qadın və uşaqların sosial-iqtisadi vəziyyətini
yaxşılaşdırmaq üçün Hökumət mütəmadi zəruri
tədbirlər həyata keçirir. Qaçqın və məcburi
köçkün, həmçinin aztəminatlı və çoxuşaqlı ailələrə dövlət başçımızın diqqəti
sayəsində həmin ailələrin bir çox problemləri artıq həll olunmuşdur. Burada əsas
məqsəd belə həssas qruplardan olan ailələrə sadəcə yardım göstərmək deyil, eyni
zamanda, onları sosial və iqtisadi həyatda
iştiraka cəlb etməkdir.
Qəbul olunmuş bir sıra dövlət proqramları, o cümlədən, "Azərbaycan Respublikasında yoxsulluğun
azaldılması və davamlı inkişaf”, "Azərbaycan Respublikasının Məşğulluq
Strategiyasının həyata keçirilməsi”, "Azərbaycan gəncliyi”, "Azərbaycan
Respublikası regionlarının sosial-iqtisadi inkişafı” Dövlət Proqramları, Azərbaycan
Respublikasında insan hüquq və azadlıqlarının müdafiəsinin səmərəliliyini
artırmaq sahəsində Milli Fəaliyyət Proqramı və digər Sərəncamlar hər bir vətəndaşımızın
hüquq və azadlıqlarının təmin edilməsi, xüsusilə, qadın və uşaq hüquqlarının
müdafiəsinin reallaşdırılması üçün bütün imkanlar yaradır. Ailə Məcəlləsinə
edilən dəyişiklik əsasında qızlar və oğlanlar üçün nikah yaşı 18-ə
qaldırılmışdır. Azərbaycan Respublikası Cinayət Məcəlləsində yetkinlik yaşına
çatmayan qızları nikaha daxil olmağa məcbur etməyə görə xüsusi maddə ilə məsuliyyət
müəyyən edilmişdir. "Uşaqların icbari
dispanserizasiyadan keçirilməsinə”,
"Ana və uşaqların
sağlamlığının yaxşılaşdırılmasına” və bir sıra digər Dövlət Proqramları təsdiq edilmiş, eyni zamanda, tərəflərin nikahdan əvvəl
məcburi tibbi müayinədən keçməsi ilə bağlı Ailə Məcəlləsinə edilən dəyişiklik
isə həm ailələrimizin, həm də gələcək nəsillərin sağlamlığına xidmət edir.
Ölkəmizin bu sahədə uğurlarının davam etdirilməsi üçün yeni qanunvericilik
aktlarının, milli fəaliyyət planlarının qəbul edilməsi vacibdir. Qeyd edim ki, ölkə başçısının Sərəncamları ilə təsdiq
edilən Gələcəyə Baxış İnkişaf Konsepsiyası və 2016-2030-cu illər üçün Dayanıqlı
İnkişaf Məqsədlərindən irəli gələrək, ailə institutunun möhkəmləndirilməsi,
gender bərabərliyinin təmin edilməsi, bütün sahələrdə qadınların və qızların
imkanlarının genişləndirilməsi, uşaqların bütün sahələrdə hüquqlarının müdafiəsi üçün hədəflər müəyyən
edilmişdir. Onlardan ən vacibləri ailə institutunun gücləndirilməsi, qadın və
uşaq hüquq və imkanlarının artırılması, reproduktiv sağlamlıq, məişət
zorakılığı və s. göstərmək olar.
Qeyd etmək lazımdır ki,
Аzərbаycаnın Respublikasının Birinci vitse-prezidenti, Hеydər Əliyev Fondunun
Prеzidеnti Mеhribаn хаnım Əliyevа qаdınlаrın problеmlərinə, onlаrın ictimаi həyаtdа
аktiv rolunun təmin еdilməsinə böyük qаyğı ilə yаnаşır. Məhz "Məişət
zorakılığının qarşısının alınması haqqında” Qanunun qəbul olunmasında Mehriban
xanım Əliyevanın xüsusi təşəbbüsü olmuşdur. Azərbaycanın tərəqqisi və
xalqımızın rifahı naminə Ümummilli Lider Heydər Əliyevin zəngin irsindən bəhrələnərək,
genişmiqyaslı proqram və layihələrin reallaşmasına dəstək üçün yaradılan Heydər
Əliyev Fondu bu missiyanı şərəflə həyata keçirir. Artıq 10 ildən çox fəaliyyət
göstərən Heydər Əliyev Fondu təhsil, səhiyyə, mədəniyyət, idman, elm və
texnologiya, ekologiya, sosial və digər sahələrdə müxtəlif layihələri
reallaşdıraraq yeni cəmiyyət quruculuğunda fəal iştirak edir, ölkənin
sosial-iqtisadi inkişafına öz töhfəsini verir. Mehriban xanım Əliyevanın rəhbərliyi
ilə tikilən xəstəxanalar, məktəblər, internat evləri qadınların və uşaqların
sağlamlığının müdafiəsinə, onların daha keyfiyyətli təhsil almasına şərait
yaratmışdır. Bir məsələni xüsusilə vurğulamaq lazımdır ki, bu gün Heydər Əliyev
Fondunun prezidenti Mehriban xanım Əliyevanın təşəbbüsü və Fondun maliyyə dəstəyi
ilə yalnız Azərbaycanda deyil, Amerikada, Avropanın bir çox ölkələrində, Müstəqil
Dövlətlər Birliyi respublikalarında, müsəlman ölkələrində bir sıra sosial, elm
və mədəniyyət sahələrində layihələr həyata keçirilir. Azərbaycan mədəniyyətinin,
müsiqisinin, incəsənətinin, ədəbiyyatının, tarixinin dünyada tanınmasında bu
Fondun rolu danılmazdır. Heydər Əliyev Fondunun Prezidenti Mehriban xanım
Əliyevanın şəxsi dəstəyi və köməyi nəticəsində reallaşan genişmiqyaslı tədbirlər
ana və uşaq ölümünün qarşısının alınması, hemofiliya, talassemiya və şəkərli
diabet xəstəliklərinin azalması istiqamətində profilaktik və müalicəvi işlərin
aparılmasına müsbət təsir göstərir. Azərbaycanın ən ağrılı problemi olan
Qarabağ münaqişəsi, azərbaycanlılara qarşı törədilən genosid haqqında məlumatların
dünyaya yayılmasında və təbliğ olunmasında Heydər Əliyev Fondunun və onun
vitse- prezidenti Leyla xanım Əliyevanın rolu çox böyükdür. Artıq neçə illərdir
ki, Azərbaycan həqiqətləri "Xocalıya Ədalət” kampaniyası çərçivəsində dünya
dövlətləri tərəfindən tanınır. Ulu Öndərin əziz xatirəsinə ehtiram olaraq
yaradılmış Fond onun arzu və ideyalarının yaşaması və gerçəkləşməsində mühüm
yer tutur.
Görkəmli ictimai -
siyasi xadim Heydər Əliyev ailədaxili münasibətləri cəmiyyətdaxili münasibətlərin
güzgüsü hesab edir, bu prinsipləri özünün siyasi təcrübəsində də tətbiq etməyə
çalışırdı. Bu baxımdan o, ailədə və cəmiyyətdə xüsusi yeri olan qadın və
uşaqların hüquqlarının müdafiə olunmasını zəruri hesab edirdi. O deyirdi ki:
"Qadınlar dövlətimizin, dövlətçiliyimizin, müstəqilliyimizin, bu günümüzün, gələcəyimizin
dayağıdır”. Qürurla qeyd edə bilərik ki, Azərbaycan ailəsində qadının yeri və
rolu xüsusi əhəmiyyət daşıyır. Azərbaycan qadını yeni nəsli dünyaya gətirmək,
onu tərbiyə etmək, vətənə layiq böyütmək kimi çox vacib bir vəzifəni yerinə
yetirməklə bərabər, ailənin möhkəmliyi və bütövlüyünün qorunması məsuliyyətini
də könüllü surətdə daşıyır. Bizim qadınlarımız istənilən sahədə uğur qazanmaqla
yanaşı, çox gözəl ailə sahibi olmağı və vətənə layiqli vətəndaşlar yetişdirməyi
bacarırlar. Azərbaycan qadını öz fəaliyyətini maarifçilik və xeyriyyəçilik
ideyalarının yayılmasından başlayaraq, mədəni, dini, milli-mənəvi dəyər və ənənələri
də nəzərə almaqla davam etdirir. Bu qadınlar bütün tarixi dövrlərdə ictimai həyatda
fəal iştirak edərək, cəmiyyətimizin inkişafına öz töhfələrini vermişlər.
Onların arasında görkəmli dövlət, elm, mədəniyyət və ictimai-siyasi xadimlər
vardır. Qadınların cəmiyyətdəki yeri və rolunun mühüm göstəricisi onların müxtəlif
dövlət vəzifələri tutmaları və ümumiyyətlə, aktiv əmək fəaliyyəti ilə məşğul
olmalarıdır. Hal-hazırda qadınlarımız dövlətin yaratdığı bütün imkanlardan
istifadə edirlər. Sərbəst təhsil almaqla, fiziki hazırlıqlarını inkişaf etdirməklə,
peşəkarlıq səviyyələrini artırmaqla yanaşı qadınlar həm də, ictimai-siyasi
proseslərdə fəal iştirak edərək cəmiyyətin qurucusuna çevrilirlər. Xüsusilə, savadlı, yüksək səviyyəsi və
dünyagörüşü olan qadın həm də sağlam cəmiyyət, gələcək deməkdir. Ulu Öndər hər zaman qadınlarımızın, gənc qızlarımızın,
xüsusilə də kəndlərdə yaşayan qadınlarımızın təhsili, ictimai fəallığının yüksəldilməsi məsələlərini nəzərdə saxlamışdır. Hələ 70-ci
illərin ortalarında, rəsmi iclaslarda çəkinmədən qızların təhsildən yayınması, erkən nikah,
qadına qarşı zorakılıq halları ilə bağlı problemləri qeyd edirdi. Mən sizə
Ümummilli Liderin bir neçə fikirlərini
nümunə çəkmək istərdim: "Təəssüf ki, bizdə azərbaycanlı qızların yuxarı siniflərindən
yayınması, tez nişanlanması, hədd-buluğa çatmayan qızların ərə verilməsi
faktları hələ də vardır”. " Bu gün böyük kədər hissi ilə qeyd etmək lazımdır gəlir
ki, respublikanın bəzi rayon və kəndlərində qadına hörmətsizlik hallarına, geri
qalmış baxışların təzahürlərinə, köhnəlmiş patriarxal adətlərin icrasına hələ də
təsadüf edilir”. O, qadınların kəndin ictimai həyatında çox az iştirak etdiyini bildirirdi. Buna səbəb isə
onların peşə biliklərini və mədəni səviyyələrini artırmaq üçün məktəb və
kurslara az cəlb olunmasını göstərirdi. Hakimiyyətinin bütün dövrlərində
qadınlarımızın, gənc qızlarımızın savadlı, bilikli olması üçün mühüm addımlar
atmışdır.
Ailənin bütövlüyünün
qorunmasında Azərbaycan qadınının özünəməxsus yeri vardır. Böyük mədəni irsə
malik olan Azərbaycan xalqı qadının ailədə və cəmiyyətdəki roluna daim böyük
ehtiramla yanaşmışdır. Ümummilli Lider Heydər Əliyev ailədə ananın rolunu yüksək
qiymətləndirirdi: ".... Amma ən əziz amil odur ki, hər bir insan dünyada həyatına
görə, bütün varlığına görə anaya borcludur. "Ana” sözü müqəddəsdir. Təsadüfi
deyil ki, biz Vətənə də "Ana Vətən” deyirik, torpağa da "Ana torpaq” deyirik.
Anaya hörmət, ana qarşısında borcunu yerinə yetirmək hər kəsin ən ali vəzifəsi
olmalıdır. Ana cəmiyyətimizə yararlı olan zəkalı, istedadlı insanlar böyüdərək,
onları vətənə bəxş edir. Ana ailənin dayağıdır. Hər bir ailənin səadəti, əmin-amanlığı
birinci növbədə ananın rolundan və onun fəaliyyətindən asılıdır. Hər birimiz
anaya borcluyuq və hər bir qadın da ana olmaqla xoşbəxt olur. Müharibələrdə
vuruşan qəhrəman, cəsur Azərbaycan övladlarını boya-başa çatdıran bütün analar,
qadınlar cəmiyyətimizdə xüsusi yer tuturlar. Bir məsələni xüsusilə qeyd etmək
lazımdır ki, Ümummilli Lider Heydər Əliyevin ən böyük xidmətlərindən biri də
1994-cü ildə atəşkəslə bağlı sənədi imzalaması olmuşdur. Bu atəşkəs ana və
bacıların axan göz yaşlarını dayandırdı.
Komitə tərəfindən min yeddi
yüz altmış (1760) nəfəri əhatə edən online sosioloji sorğu həyata keçirilmişdir. Tədqiqat
zamanı boşanmanın səbəbləri, prosessual tərəfləri və ictimai rəydə boşanmalara olan münasibət öyrənilmişdir.
Təhlillər göstərir ki, müasir dövrdə ailələrin
dağılmasının əsas səbəbi heç də maddi durum deyil, digər vacib məqamlardır ki,
bunlar da özündə tərbiyə, mənəviyyat, davranış və əxlaqi dəyərləri birləşdirir. Müasir dövrdə nikaha daxil olanlar sadəcə toya qədər olan prosesi fikirləşir,
ondan sonrakı proses sanki ailə həyatına daxil deyil. Elə bu yanaşma bəzi ailələrdə
problemlərin yaranmasına səbəb olur. Qeyd etmək lazımdır ki, erkən və
qeyri-rəsmi nikahlar, kişinin məsuliyyəti aşağı olan, ailəyə ciddi münasibət göstərməyən, qüsurlu uşaq doğulanda, uşaqsız
ailələrdə boşanma halları daha çoxdur. Belə ailələrdə köməksiz qalan qadınların
müdafiə olunması məsələsi aktuallaşır. Komitəmiz tərəfindən yaranan Qadın
Resurs Mərkəzlərində gənc, xüsusilə həssas qrupa daxil olan qadınların cəmiyyətə
inteqrasiyası, müxtəlif peşələrə yiyələnməsi
üçün təlimlər təkil olunur. Bəzi boşanan qadınlar yaşayış yeri və mülkiyyət
hüququndan məhrum olur, iqtisadi çətinliklərlə üzləşirlər, uşaqlar üçün nəzərdə
tutulmuş aliment ödənilmir. Boşanma zamanı ən çox uşaqlar zərər çəkirlər, daha
çox psixoloji problemlərə məruz qalırlar. Uşaqların təhsildən yayınması,
əməyə cəlb edilməsi və onların məruz qaldığı digər sosial-psixoloji problemlər
valideyn məsuliyyətinin artırılmasını zəruri edir. İndiki halda artan boşanmalar,
ailədaxili münasibətlərin pozulması, ailə münaqişəsi zəminində baş verən cinayətlər
onu göstərir ki, ailəni qurmaq nə qədər məsuliyyətlidirsə, onu qoruyub saxlamaq
bir o qədər də çətindir. Statistik məlumatlara
görə, məhkəmələrdə baxılan mülki mübahisələrin böyük qismi ailə münaqişəsi nəticəsində
yaranır və əmlak xarakterlidir. Vətəndaşlıq Vəziyyəti Aktlarının Qeydiyyatı (VVAQ) orqanlarında nikaha girən tərəflərə müqavilənin
üstünlükləri izah olunmalıdır.
Qanunvericiliyə
bununla bağlı müddəaların daxil edilməsini məqsədəuyğun hesab edirik. Boşanma səbəbləri sırasında ən çox boşanma halları ər və
arvadın xasiyyətlərinin tutmadığı nəticəsində baş verdiyi qeyd edilir. İnsanlar
ailənin fundamenti olan güzəşt, səbr,
qarşılıqlı anlayış kimi amilləri nəzərə almayaraq dərhal nikahlarının ləğv
edilməsinə cəhd edirlər. Sadələşdirilmiş boşanma prosesi Azərbaycanda
boşanmaların say artımına təsir edən faktorlardan biridir. Ailənin qorunub
saxlanılması cəmiyyət üçün və gələcək nəsil üçün vacibdir. Lakin qanunvericilik
çərçivəsində məhkəmələrin ailəni qorumaq üçün səlahiyyətləri yetərli deyil. Bu
məsələ ilə bağlı qanunvericiliyə dəyişikliklər edilərsə, məhkəmələrdə ailəni qorumaq imkanı da artar.
Ailələrin
dağılmasının səbəblərindən biri də məişət zorakılığıdır. Komitə tərəfindən bütün yerli icra
hakimiyyətlərində müvafiq yerli icra orqanlarının nümayəndələrindən ibarət Gender zorakılığı və uşaqlara qarşı zorakılıq üzrə
monitorinq qrupları yaradılmışdır. Onların əsas fəaliyyəti rayon ərazisində baş
vermiş məişət zorakılığı hallarının baş verməsi səbəblərinin öyrənilməsi,
zorakılıq törətmiş şəxsə qarşı müvafiq tədbirlərin görülməsi, həmçinin zərərçəkmiş
şəxslə profilaktiki işin təşkili, psixoloji və hüquqi yardımların göstərilməsindən
ibarətdir. Qarşımızda dayanan məsələlərdən
biri də yanlış dini təsəvvürlərin,
stereotiplərin aradan qaldırılması üçün dövlət orqanları və vətəndaş cəmiyyətinin
bu sahədə fəaliyyətinin gücləndirilməsi, insanların problemi daha düzgün dərk
etməsi üçün davamlı layihələrin keçirilməsidir.
Eyni zamanda, "Ailə psixoloqu”
institutunun yaradılması, mövcud "məktəb
psixoloqu”, " ağsaqqal - ağbirçək” institutlarının fəaliyyətinin gücləndirilməsi də bu istiqamətdə yaranmış
problemlərin qarşısının alınmasında mühüm vəzifələrdəndir. Xüsusilə, vətəndaş cəmiyyəti
bu sahədə vacib rola malikdir. Yerlərdə
fəaliyyət göstərən Qadınlar Şurası aktiv olmalıdır. Kütləvi İnformasiya
Vasitələrində mütəmadi olaraq düzgün məlumatlar
verilməli, bu sahədə maarifləndirici və məlumatlandırıcı televiziya və radio
verilişləri daha da gücləndirilməlidir.
Qeyd edim ki, bu mövzular xüsusi yanaşma tələb etdiyi üçün jurnalistlərin bilik
və təcrübələrinin artırılması ehtiyacı yaranmışdır.Bunu nəzərə alaraq Komitə
vaxtaşırı təlimlər keçirir. Bu günlərdə Avropa İttifaqının TAİEX proqramının birgə əməkdaşlığı
çərçivəsində "Gender problemləri və Media” mövzusunda beynəlxalq seminar keçirilib. Yerli və beynəlxalq
ekspertlərin təlimçi qismində iştirakı ilə keçirilən seminarın əsas məqsədi
media tərəfindən gender problemlərinin, məişət zorakılığı məsələlərinin
işıqlandırılması və bu sahələr üzrə Avropa İttifaqı təcrübəsinin öyrənilməsi
istiqamətində təcrübə mübadiləsinin aparılmasından ibarətdir.
Bir məsələni
də qeyd etmək istərdim ki, ailədə münasibətlər sisteminin düzgün olması da zəruridir.
Əgər ailədə münasibətlər normal olarsa,
o zaman insanlar da cəmiyyətdə müəyyən
mövqe tuta bilərlər. Əgər tarazlıq pozularsa, həm problemi törədən, həm də
yaranmış problemdən əziyyət çəkən insan (istər qadın, istər kişi, istərsə də
uşaq olsun), cəmiyyətdə özünü təsdiq etmək üçün çətinliklərlə üzləşir. Məhz bu
baxımdan qadınların iqtisadi cəhətdən gücləndirilməsi, onların iqtisadi
asılılıqdan azad olmasına gətirib çıxarır. İqtisadi cəhətdən güclü olan
qadın yoxsul və ya işsiz
qadına nisbətdə daha az zorkılığa məruz qalır. Buna görə də qadınların
iqtisadi cəhətdən güclü olması onları həm də bu və ya digər formada zorakılığa
məruz qalmaqdan da qoruyur. Boşanmaların, məişət zorakılığının sayı şəhərə nisbətən
kənd və rayon yerlərində daha çoxdur. Buna görə də, kənd
və rayonlarda yaşayan qadınların iqtisadi və sosial həyatda iştirakçılığının
artırılması aktual məsələ kimi qarşımızda dayanan məsələlərdən biridir. Bu məqsədlə
Komitəmiz tərəfindən "Kənd və rayon yerlərində yaşayan qadınların iqtisadi və
sosial həyatda iştirakının təşviqatı” texniki yardım layihəsi həyata keçirilir.
Bütövlükdə isə, biz həmişə
Azərbaycan ailələrinin möhkəmliyi ilə fəxr etmişik. Bu, əsasən milli
mentalitetimizdən irəli gəlir. Ailə üzvləri arasında səmimi, mədəni münasibət,
böyük-kiçik yerinin bilinməsi, valideyn-övlad münasibətlərinin düzgün qurulması
bizim ailələrə xas olan keyfiyyətlərdir. Əgər ölkəmizdə yüzlərlə, minlərlə
insan qurduqları ailələrin brilyant, qızıl, gümüş yubileylərini keçirirlərsə,
bu o deməkdir ki, Azərbaycanda ailə modeli qorunur və nəsildən – nəslə
yaşadılır. Qeyd etmək istərdim ki, ölkəmizdə xüsusi istedadı, bədii və musiqi
yaradıcılığı, yüksək idman göstəriciləri, digər qabiliyyət və maraqları ilə
seçilən ailələrimiz çoxdur. Çalışırıq ki, hər il Beynəlxalq Ailə günü ərəfəsində
həmin ailələrin təcrübəsini, nümunə olmaq üçün, hamıya çatdıraq. Komitənin təşəbbüsü
ilə 2008-ci ildən etibarən Ailə bayramı Şamaxı, Qax, Xaçmaz, İsmayıllı,
Abşeron, Şəmkir rayonlarında Lənkəran, Şəki şəhərlərində təşkil edilmişdir. Hər
il "Ailə bayramında” Azərbaycanın bütün rayonlarından 100-dən çox ailələr
iştirak edir. Bu gün ölkəmizdə xüsusi fərqlənən,
nümunəvi və uzunömürlüyü ilə seçilən ailələrimiz çoxdur. Həmin ailələrin təcrübəsi
hamıya, xüsusən də gənclərə nümunədir. Və elə yeri gəlmişkən, qeyd edim ki,
Komitə tərəfindən belə ailələrin, ümümiyyətlə, ailə dəyərlərimizin təbliği ilə bağlı "Azərbaycan ailəsi” kitabı çap
olunmuşdur. Artıq 9 ildir ki Azərbaycan Respublikasının Ailə, Qadın və Uşaq
Problemləri üzrə Dövlət Komitəsi, Heydər Əliyev Fondu və BMT-nin Əhali Fondunun
birgə təşkilatçılığı ilə, "Azərbaycan ailəsi” adlı film festivalı uğurla həyata
keçirilir. Film festivalının keçirilməsinin əsas məqsədi, kinomatoqrafiyanın
imkanlarından istifadə etməklə, ailə dəyərlərinin, milli-mənəvi dəyərlərin gənclər
arasında təbliği, cəmiyyətdə bu istiqamətdə mövcud olan problemlərin
işıqlandırılaraq həlli yollarının axtarılması və ailə institutunun inkişafına
nail olunmasıdır.
Ulu Öndər deyirdi: "Bir
hadisənin qarşısını almaq, o hadisə baş verəndən sonra onun nəticələrini aradan
götürməkdən daha asandır”. Biz bu fikri əsas tutaraq, daha çox preventiv və
profilaktik tədbirlər keçiririk.
Əfsuslar olsun ki,
son illər ailələr bir sıra müvəqqəti və daimi xarakterli problemlərlə
qarşılaşırlar. Bunlarэn sэrasэnda məişət zorakılığı, selektiv abortlar, erkən nikah və təhsildən
yayınma, intihar halları var. Bəzi boşanan qadınlar yaşayış yeri və
mülkiyyət hüququndan məhrum olur, iqtisadi çətinliklərlə üzləşirlər, uşaqlar
üçün nəzərdə tutulmuş aliment ödənilmir. Ailə institutunun möhkəmləndirilməsi məqsədi ilə ildə-ilə
qanunvericilik bazasının daha da güclənməsi
ilə yanaşı, mövcud qanunların düzgün dərk edilməsi sahəsində ardıcıl və
sistemli maarifləndirici işlərin aparılması
çox vacibdir. Bunun üçün məktəblərdə,
ali təhsil müəssisələrində, ailələrdə, hərbi hissələrdə ailə münasibətlərinin formalaşması, yeni
keyfiyyətlərin müsbət və mənfi təsiri haqqında seminarlar keçirir, yaşlı nəsillə
gənc nəslin dialoqunu təşkil edirik.
Sağlam həyat tərzinin və nikahdan əvvəl tibbi müayinənin təbliği, əhalinin,
xüsusilə yeniyetmə və gənclərin reproduktiv sağlamlıq, ailə planlaşdırılması,
erkən nikah və ziyanlı vərdişlərin (narkomaniya, alkoqolizm, siqaret, QİÇS)
yaratdığı fəsadlar barəsində maarifləndirilməsi məqsədilə 2016-cı ildən etibarən
"Mən həyatı seçirəm” , "İnsan alveri və uşaq
əməyinin istismarı ilə bağlı təhlükələrdən müdafiəsi”, "Yerli özünüidarəetmədə gender bərabərliyinin
təmin edilməsi” adlı maarifləndirmə layihələri həyata keçirilir. Müasir dövrdə dünyada baş verən
qlobal dəyişikliklər və çağırışlar ailə institutuna nəzərəçarpacaq təsir göstərməkdədir.
Dövlət ailə siyasətinin dəstəklənməsi
istiqamətində ailə institutunun təbliği, milli-mənəvi dəyərlərin gənc nəslə
aşılanması, eləcə də gənclərin xüsusilə də gənc qızların və qadınların cəmiyyətdə
fəallığının və iştirakçılığının artırılması məqsədilə Komitə bələdiyyə
orqanları ilə birgə "Ailə Akademiyası” layihəsinə start verilmişdir.
İnsanın
mənəviyyatını hər şeydən uca tutan, daxili zənginliyini yüksək qiymətləndirən
Ümummilli Lider Heydər Əliyev hesab edirdi ki, insan yalnız oxuyub təhsil
aldığı məktəbdə, çalışdığı kollektivdə deyil, həmçinin böyüyüb boya-başa
çatdığı ailədə formalaşır. Hər bir ailədə böyüyən və tərbiyə alan insan,
bütövlükdə dünyaya təsir edə bilir və onun təməlini təşkil edir. Ona görə də bu
sosial təsisatın qorunması və müdafiə edilməsi hamımızın vəzifə borcudur. Biz
bu vəzifəni yerinə yetirməklə, həm də bəşəriyyətin daha mütərəqqi inkişafına təsir
edə bilərik.
Hicran Hüseynova,
Azərbaycan Respublikasının Ailə, Qadın və UşaqProblemləri üzrə Dövlət Komitəsinin sədri,siyasi
elmləri doktoru, professor