Azarkeşlər tələb etdi, “Fənərbaxça” hollandı qovdu
Türkiyənin "Fənərbaxça”
klubu baş məşqçisi Filipp Koku ilə yollarını ayırıb.
Kaspi.az xəbər
verir ki, bu barədə İstanbul klubunun rəsmi saytı məlumat yayıb. Türkiyə Super
Liqasının 10-cu turunda "Ankaragücü” ilə ev oyunundakı 1:3 hesablı məğlubiyyətdən
sonra arenanı demək olar ki, doldurmuş yerli fanatlar, baş məşqçi istefa verməyənə
qədər stadionu tərk etməyəcəklərini bəyan ediblər.
Onlar Ərsun
Yanal və Yılmaz Vural lehinə şüarlar da səsləndiriblər və Kokunun bu iki məşqçidən
biri ilə əvəzlənməsini arzuladıqlarını göstəriblər. Klub rəhbərliyi isə oyun
başa çatandan təxminən yarım saat sonra baş məşqçinin istefaya göndərildiyinə
dair rəsmi sayt vasitəsilə məlumat yaymaq məcburiyyətində qalıb.
"Fənərbaxça” tərəfdarları
yalnız bu xəbəri eşitdikdən sonra sevinc içində arenanı tərk ediblər. Qeyd edək
ki, "Fənərbaxça" hazırda Super Liqada 9 xalla 15-ci pillədə qərarlaşıb.
Komanda Avroliqada da qənaətbəxş nəticələr əldə edə bilməyib. Koku İstanbul
klubunu 2018-ci ilin yayından etibarən çalışdırırdı.