AXCP və ReAL arasında “yağ-yaxmac” davası
Müxalifət partiyaları arasında "kimdir müqəssir” sualına cavab
axtarışı davam edir. Son günlər sosial
şəbəkələrdə növbəti dəfə bunun şahidi oluruq. Ayrı-ayrı partiyalara bölünən bu zümrə
demək olar ki, hər ilin yaz ayları bir araya gəlmək üçün müzakirələr aparır,
pafoslu çıxışlarla "güc birlikdədir” söyləyirlər, amma onların bu hay-küyü
taqqıldadılan boş qazan səsindən o yana keçmir. Bu azmış kimi, dünənə qədər
"6-7 aprel mitinqi” davası edənlər indi də öz içərilərində "satqın ovu”na
çıxıblar. Amma maraqlı məqam ondadır ki, bütün "siyasi dava”larda rinqin bir
tərəfində dəyişiklik olsa da, digər tərəfində rəqib yenə də AXCP- Milli Şura olur.
Necə ki, bir neçə gün əvvəl mitinqlə bağlı AXCP və Müsavat partiyası arasında
ciddi şəkildə mübahisələr, qarşılıqlı tənqidlər və hətta təhqirlər oldu. İndi
isə AXCP və ReAL hərəkatı arasında "nənəm sənə yağ-yaxmac vermişdi” mübahisəsi
pik həddə çatıb.
Söhbət ondan gedir ki, ReAL-ın İdarə Heyətinin üzvləri Natiq
Cəfərli və Erkin Qədirli Brüsseldə səfərdə olublar. Hərəkat nümayəndələri
Brüsseldə Avropa diplomatları ilə görüşdə Azərbaycanda son vaxtlar həyata
keçirilən islahatlarla bağlı müsbət fikirlərini ifadə ediblər. ReAL üzvü Erkin
Qədirli bununla əlaqədar özünün sosial şəbəkələrdəki səhifəsində geniş məlumat
verib. Lakin buna baxmayaraq, "keçmiş diplomat” Arif Məmmədov AXCP-çilərə
"intiqam almaq” fürsəti verən bir yazı ilə çıxış edib. O, özəl mənbələrinə
istinadən ReAL-ın Avropadakı görüşlərdə hakimiyyəti müdafiə etdiyini bildirib. Elə
əsl qalmaqal da bundan sonra başlayıb. "Azadlıq” qəzetinin uzun illərdir
Fransada məskunlaşan radikal baş redaktoru Qənimət Zahid "diplomat”ın” adını
açıqlamaq istəməyən mənbəyə əsasən yazdığı məlumatın dəqiqliyini
"araşdırdığını” bildirib və ReAL hərəkatını, eləcə də onun üzvlərinin iqtidarla
"razılaşmada” ittiham edib. O həmçinin, Natiq Cəfərlinin öz statusunda "dünənki
əfv addımı pozitiv xəbər oldu, siyasi açılım işarəsi kimi qəbul edilə bilər”
qeydlərinə, "Bakıda yazırsınızsa, Brüsseldə niyə deməyəsiniz?” sualı ilə cavab
verib. Q.Zahid iddia edir ki, ReALçılar Brüsseldə "Azərbaycanda siyasi
müxalifət düşərgəsində bəzi qüvvələrin taktikası ölkəni Suriyaya çevirə bilər”
kimi fikirlər səsələndiriblər. AXCP funksioneri bu fikrinin ardınca İlqar
Məmmədovun hamının gözü qarşısında Milli Şuranı inqilab etməyə cəhddə qınadığını
bildirib. "Bizim yanımızda olmayan, bizdən deyil” prinsipinə əsaslanan Q.Zahid
ReAL-ın bu proseslərdə özünəməxsus xətt tutduğunu qeyd edərək, onların mitinqlər
və kütləvi aksiyalar yoluna yox, təşkilatlanmaqla seçkilərə qatılmaq xəttini
əsas götürdüyünü vurğulayıb: "Bu fikirləri siz hər gün səsləndirmirsiniz? Sizi
başa düşürəm, Azərbaycandan Brüsselə müxalifət adı ilə səfər etmiş şəxslərin bu
tezisləri səsləndirməsinin ictimaiyyətə açıqlanması sizə diskomfort yaradır,
güzgüdəki rəsmdən bir az sıxılırsınız. Ancaq nə etmək olar, siz xeyli müddətdir
ki, bu yanlış yoldasınız”.
AXCP-nin mətbuat xidmətinin mühacirətdəki rəhbəri Natiq Ədilov da gecikmədən ReAL sədri İlqar Məmmədov haqqında "ürək sözlərini” yazıb. O, fikirlərini indi qələmə almasını "hörmət əlaməti” olaraq, ReAL sədrinin bir müddət əvvələ qədər həbsxanada olması ilə əlaqələndirib: "Hökumət 2013-cü ildə İlqar Məmmədovdan qorxdu, ona görə onu həbs etdi söhbəti gülünc idi. Bizlər də bunu eşidəndə gülümsəyib, keçirdik və həbsdə olan adamın işinə ziyan vuracaq açıqlamalardan çəkinirdik. İndi İlqar bəy özü məcbur edir. Beləliklə, İlqar bəyin 20 ildən artıq siyasi yolu kifayət qədər ziqzaqlı olub. Burada Etibar Məmmədova müavinlik və həbs dövrünü çıxsaq İlqar Məmmədov indi özü də xatırlatdığı kimi hər zaman müxalifətə müxalifət vəzifəsində işləyib. İndi də işinin başındadır”.
Bütün bunlara ReAL hərəkatının İdarə Heyətinin üzvü Erkin Qədirlinin
cavabı gecikməyib. O, Q.Zahidə və digər AXCP üzvlərinə "həsr etdiyi” statusunda
qeyd edir ki, cəbhəçilər ReAl-ı dediklərinin nə anlama gəldiyini düşünmədən
satqınlıqda ittiham edirlər: "Belə şeylərə o qədər alışıblar ki, bu söhbətin
ReAl-a ən azı texniki baxımdan aid oluna bilməyəcəyini anlamırlar. Bir neçə
yerə (AXCP, KXCP, BXCP və s.) bölündüklərini, aralarından YAP-a keçmiş olanları
və s. nəzərə alsaq, cəbhəçilərin "satqınlıq" mövzusuna bu qədər
həssas yanaşmalarını anlamaq olar. Hərçənd, o biri yandan, cəbhəçilərin başqaları
ilə yaxşı münasibətdə olduğunu da demək olmur. Hamı ilə münasibətlərini
pozurlar, ünsiyyət qura bilmirlər. Bir partiya adı çəkə bilərsinizmi AXCP ilə
yaxşı münasibətdə olduğunu açıq və əminliklə söyləyə bilsin? Hamını
damğalayırlar”.
E.Qədirli əlavə edib ki, Müsavat, AMİP və başqaları vaxtı ilə AXCP
ilə bir yerdə olublar, bir hərəkatdan çıxıblar, dəfələrlə ittifaq qurmağa
çalışıblar, sonra sözləri düz gəlməyib, aralanıblar: "Bəs ReAl bunları necə
sata bilər? ReAl-ın AXCP qarşısında heç bir öhdəliyi yoxdur, olmayıb da”.
Bütün bunlar bir daha onu göstərir ki, radikal müxalifət düşərgəsində
siyasi proseslərə heç vaxt normal yanaşma, şəxslərin fikirlərinə hörmət
olmayıb. Bir-birini satqınlıqda, xəyanətdə günahlandıran və hətta şəxsi
ambisiyaları naminə təhqirlər səsləndirən bu cür qüvvənin arxasınca hansı
elektorat gedəcək? Təbii ki, bu səviyyədə olan siyasi qüvvələrin iqtidara
gələcəyi ilə bağlı iddialar sadəcə, gülüş doğurur. AZAD