AXCP-nin zombi dəstəsi media azadlığına qarşı
Demokratiya libasına bürünən radikal müxalifət
"liderləri” əsl gerçəklikdə alternativ fikrə qarşı dözümsüz yanaşan,
qaragüruhçu, demokratik prinsiplərdən çox-çox uzaq şəxslərdir. Bu gerçəkliyi
Əli Kərimlinin, eləcə də digərlərinin rəhbərlik etdiyi təşkilatlar daxilində
baş verənlər, həmin hadisələrə "liderlərin” qərəzli münasibəti daha çılpaq şəkildə
göstərir. Xalqa demokratiya dərsi keçən, söz-mətbuat azadlığından dəm vuran, fərqli
fikrə qarşı dözümlü olmağı tövsiyə edən belə adamlar hətta öz müavinlərini,
uzun müddət bir cəbhədə mübarizə apardıqları, çörək kəsdikləri həmfikirlərini də
"linç” etməkdən çəkinməzlər. Bunun üçün həmin kəslərin azacıq cəsarət nümayiş
etdirib qatığın qara deyil, ağ olmasını söyləməsi kifayətdir. Yaxud, ən sıravi
partiya üzvlərindən kimsə durub desə ki, ay başqan, sənin söylədiklərin
nağıldır, reallıqla səsləşmir, dərhal həmin müxalifətçinin "qələmi qırılacaq”.
Onu nəinki partiya sıralarından kənarlaşdıracaqlar, eləcə də nəzarətlərində
olan media qurumları, cəbhəçilərin sosial şəbəkələrdəki profilləri vasitəsilə təhqir
edəcək, şəxsiyyətini alçaldacaqlar.
Bu günlərdə sosial şəbəkədə müşahidə etdiyimiz daha
bir hadisə Əli Kərimli və dəstəsinin nə dərəcədə demokrat, fərqli fikrə dözümlü
yanaşmalarını, media təmsilçilərinə münasibətlərini növbəti dəfə ortaya qoyub.
Belə ki, tanınmış jurnalist Aygün Muradxanlı metroda gedərkən diqqətini 3 gənc çəkib.
Onların xarici görünüşündən, saç-saqqalından, hərbçilərə məxsus xaki rəngdə
çanta, həmçinin digər əşyalar daşımasından şübhələnib və onları terrorçulara bənzədib.
Sırf təhlükəsizlik və insanları daha da ayıq-sayıq olmağa dəvət etmək məqsədilə
həmin gənclərin şəklini çəkib, bu barədə sosial şəbəkədə status paylaşıb. Eyni
zamanda sual formasında müraciət edib ki, görəsən metro stansiyasının girişindəki
mühafizə polisi bu şəxsləri ciddi-ciddi yoxlayıbmı? Bu statusun yazılmasından
heç 5 dəqiqə keçməmiş A.Muradxanlının Facebook dostlarından bir nəfər ona yazıb
ki, şəkildəki həmin gənclər tanış adamlardır, terrorçu-filan deyillər. Xanım
jurnalist dərhal həmin statusu silib. Lakin şəkli çəkilən 2 Türkiyə və 1 Azərbaycan
vətəndaşı A.Muradxanlını bu hərəkətinə görə məhkəməyə verəcəklərini bildiriblər.
Daha acınacaqlısı isə cəbhəçi gənclərlə bağlılığı olan həmin 1 nəfər Azərbaycan
vətəndaşı daha da ifrata vararaq, şərəf-ləyaqətinin alçaldığı və sair bu kimi
iddialar irəli sürüb, bununla bağlı ayrıca status yazıb. Cəbhəçi dostlar da dərhal
hadisəyə reaksiya verərək, xanım jurnalistin ünvanına ən müxtəlif təhqir, təhdid,
ittihamlar səsləndirməyə başlayıblar.
Ölkədə təhlükəsizlik tədbirlərinə diqqət çəkmək məqsədi
daşıyan və qısa zaman sonra sildiyi statusu ilə bağlı üzləşdiyi hadisədən
dolayı narahatlıq yaşayan A.Muradxanlıya dəstək olmaq məqsədilə jurnalist həmkarları
AXCP sədri Əli Kərimliyə müraciət də ünvanlayıblar. Müraciətdə təəssüflə
bildirilib ki, Əbülfəz Elçibəydən miras qalmış təşkilatın gənc üzvləri tanınmış
jurnalisti məhkəməyə verməklə hədələyirlər. Hadisənin təfərrüatlarının da qeyd
olunduğu müraciətdə daha sonra qeyd edilib ki, AXCP Gənclər Komitəsinin bir
qrup üzvü bu paylaşıma görə A.Muradxanlıdan üzr tələb edib, qarşı tərəfi məsələni
məhkəmədə çözməyə çağırır. Eyni zamanda, Facebookda davam edən müzakirələrdə həmin
gənclər bu təhdidlə qalmayıb, jurnalisti və onu müdafiə edənləri təhqir də ediblər.
Müraciət müəllifləri vurğulayıblar ki, A.Muradxanlının AXCP funksionerlərinə
müraciətindən sonra "demokrat gənclər” susmayıb. Qeyd edilib ki, həmin təhdid və
təhqir dolu rəyləri yazan şəxslər AXCP-də kifayət qədər tanınan insanlardır. O
gənclərdən biri AXCP sədrinin həbsdə olan müşavirinin oğlu, digəri AXCP GK-nin
İdarə Heyətinin üzvü, başqa biri "Azadlıq" qəzetinin işçisidir.
Müraciət müəllifləri AXCP sədrindən tələb ediblər ki, jurnalistləri hədəf alan
gəncləri siyasi mübarizəyə yönəltsin. Bildirilib ki, siyasi mübarizə həmin gənclərin
anladığı kimi, mətbuat təmsilçilərini təhdid və təhqir etmək deyil.
Lakin bir qədər əvvəl də təsvir edildiyi kimi, AXCP
sədrinə ünvanlanan müraciətdən sonra cəbhəçi gənclər daha da "qızışıb”, xanım
jurnalistə qarşı təhdid və təhqirlərin miqyasını bir qədər də genişləndiriblər.
Hətta A.Muradxanlıya dəstək olan şəxslər də cəbhəçi gənclərin "səlib yürüşünə”
məruz qalıblar. Misal üçün, A.Muradxanlının profilində bu mövzuda açılmış
müzakirələrdə Ruslan Məmmədzadə, Azər Həsrət, Zaur Bayramlı və digərləri xanım
jurnalistə dəstək ifadə ediblər. Cəbhəçilər isə dərhal onların ünvanına ən müxtəlif
ittihamlar, hətta təhqirlər səsləndirməkdən belə çəkinməyiblər. Bütün bunlar
bir daha onu nümayiş etdirir ki, AXCP sədri Ə.Kərimli və onun zonbiləşmiş dəstəsi
heç bir demokratik prinsiplərə, o cümlədən söz-mətbuat azadlığına, fərqli
fikirlərə hörmətlə yanaşmırlar. Dövlət və milli maraqlardan uzaqlaşan bu
antimilli dəstə yalnız öz çıxarlarını düşünür, bu yolda mətbuat nümayəndəsini,
hətta xanım jurnalisti də "linç” etməkdən çəkinmirlər.
F.Qəhrəmanlı