AXCP-də “yarpaq tökümü” yaşanır - Fotolar
Azərbaycanda özlərini
"demokrat” elan edənlərin mahiyyət etibarilə antidemokrat, alternativ fikrə
qarşı dözümsüz olduqları hər kəsə gün kimi bəllidir. Əgər belə olmasaydı
radikal müxalifət partiyaları daxilində ciddi fikir ayrılığı, qarşılıqlı
ittihamlar baş verməz, ard-arda istefalar yaşanmazdı. Eyni mənzərə Əli
Kərimlinin diktatorsayağı idarə etdiyi AXCP-də də müşahidə olunur. Bu partiyada
Ə.Kərimlidən fərqli düşünən, onun sözünün üstünə söz deyən, əks arqumentlə
çıxış edən hər kəs dərhal hədəfə alınır, cəbhəçilərdən ibarət söyüş
batalyonunun mənəvi terroruna məruz qalır, satqın, xəyanətkar adlandırılır. Ona
görə də zamanla keçmiş silahdaşları AXCP sədrini tərk edirlər.
Bu günlərdə Namiq Sadiqli
ad-soyadlı daha bir cəbhəçi də Ə.Kərimli ilə yollarını ayırıb. O, bu barədə
"Facebook”dakı şəxsi profilində status yazaraq, istefa verdiyini açıqlayıb:
"Dostlar çox düşündükdən sonra Əli Kərimlinin özəl şəxsi partiyasından İSTEFA
addımını atdım. Bir neçə səbəbləri yazacağam ki cəbhədə qalan hörmətimi
saxlayan və dəyər verdiyim kifayət qədər cəbhəçi dostlarım məndən inciməsinlər.
Əksinə bu addımı əvvəldən atmışdım, bəlkə düzələr deyə gözləyirdim”.
Sabiq cəbhəçi istefa
səbəblərini də bəyan edib: "Səbəblər aşağıdakılardır. Siyasi rəqiblərinə qarşı
öz əlaltıları vasitəsilə iyrənc söyüşlü kompaniya apardığını qəbul edə
bilmədiyim üçün. Azad fərqli düşüncəli, onu tərifləməyən, tənqid edənlərə hücum
etdiyi üçün. Özünü demokrat lider adlandırıb əksinə diktatorluğa daha çox
meyllik göstərdiyi üçün. Neçə illərdir 50-dən çox pariya sədrindən heç birinin
adını çəkərək birliyə çağırmadığı üçün. Neçə illərdir hakimiyyəti dəyişmək
deyil, yalnız ana müxalifət kürsüsünü qoruyub saxladığı və təkəbbürlülükdən əl
çəkmədiyi üçün. Hər üç aydan bir 2 saatlıq mitinqlər keçirməklə işini bitmiş
hesab etmək, partiyadaşlarını günahsız yerə həbsxanalara doldurmaqla özünə
müəyyən dvident qazanmağı xoşladığı üçün. Şəxsinə yazdığım məktublarımı
oxuyaraq, cavab verməməklə hörmətsizlik etdiyini gördüyüm üçün. Yeni nəfəs,
yeni siyasi simalar ortaya çıxan kimi onlara qarşı "hakimiyyətə işləyirsən”
damğası vurmaq, onları cəmiyyətdə gözdən salmaq üçün sosial şəbəkələr üzərindən
min cür qarayaxmalar hazırladığı üçün”.
N.Sadiqli qeyd edib ki, dildə
demokratiyadan danışan Ə.Kərimli "mənim yanımda deyilsənsə, bizdən deyilsən”
deməklə, yalnız tərifləri qəbul edib, tənqid edənləri isə agent adlandırıb: "Elçi
TV youtube kanalı vasitəsilə Əli Kərimliylə yanaşı, digər siyasi xadimlərin
video çıxışlarını yayımladığımı həzm edə bilmədiyi üçün istefa verdim. Daha nə
yazım, dostlar. Çox gözlədim ki, özünü lider kimi cəmiyyətə məcburi sırımaq
istəyən bu partiya sədri bəlkə düzələr, bəlkə hakimiyyətə gəlmək üçün siyasi
mübarizə adamları ilə isti münasibətlər qurub birləşməyə başlayar. Əksinə,
yanıldığımı tam olaraq hiss etdiyim üçün İSTEFA verdim”.
N.Sadiqlinin AXCP sədrinin
ifşasına yönəlik statusunun altında Ə.Kərimlinin sifarişi ilə cəbhəçilərdən ibarət
söyüş batalyonu dərhal hərəkətə keçib, keçmiş cəbhəçiyə "satqın”, "xəyanətkar”
və sair bu kimi damğalar vuraraq, ünvanına təhqirlər səsləndirərək onun
şəxsiyyətini alçaltmağa çalışıblar.
Rufik
İSMAYILOV