“Avtovağzal” metrostansiyasının tikintisi ilin sonuna yekunlaşacaq

Bakı Metropoliteni xətlərinin konseptual inkişaf sxeminə uyğun olaraq “Bənövşəyi xətt” çərçivəsində şərti olaraq “Avtovağzal” və “Memar Əcəmi-2” adlanan yeni stansiyaların tikintisinin bu ilin sonunadək yekunlaşdırılması nəzərdə tutulur. Lent.az-ın məlumatına görə, bu barədə “Bakı Metropoliteni” Qapalı Səhmdar Cəmiyyətinin mətbuat xidmətindən “AzərTAc”-a bildirilib.
“Bənövşəyi xətt”in davamı olaraq paytaxtın “Papanin” adlanan ərazisində və Heydər Əliyev adına İdman Kompleksinin yaxınlığında yeni stansiyaların tikintisinə başlanılıb.
“Dərnəgül” stansiyasından “Xətai” stansiyasınadək uzanan “Yaşıl xətt”in davamı olaraq isə bir sıra yeni stansiyalar inşa ediləcək. Bu stansiyalar Nobel prospekti boyunca uzanaraq, “Ağ şəhər” layihəsini və Neft Emalı Zavodunun qarşısındakı ərazini əhatə edəcək. “Yaşıl xətt”in sonuncu stansiyası isə hələlik şərti olaraq “Həzi Aslanov-2” adlandırılan stansiya olacaq. Daha sonra bu stansiyadan “Dərnəgül” stansiyasına yeni xətt çəkilməsi planlaşdırılır.