Bakı 14°C
Avropanın miqrant problemi səngiyib
Bir müddət öncə Avropanın bütövlüyünü təhlükə altına alan miqrant
problemi, deyəsən həllini tapıb. 2015-2016-cı illərdə Avropanın bir nömrəli
probleminə çevrilən miqrant gərginliyi artıq səngimək üzrədir. "Vestnik
Kafkaza” nəşri yazır ki, Avropa İttifaqına üzv dövlətlərin bir neçəsi artıq
miqrant axınının qarşısını almaq üçün tədbirlər görürlər. İlk növbədə
köçkünlərə gəldikləri ölkələrə geri dönmələri ilə bağlı xərcləri ödəmək, eləcə
də, tarixi vətənlərində maliyyə yardımı kimi təkliflər verirlər. Polşa,
Macarıstan, Slovakiya və Çexiya kimi ölkələr isə mühacirlərlə bağlı məsələni
qulaqardına vurmaqda davam edir və Avropa İttifaqının müəyyən edilmiş kvota
üzrə bölgüsünə əməl etməkdən boyun qaçırırlar. Miqrantlar iki-üç il bundan
əvvəl deyildiyi kimi, artıq Avropa İttifaqının varlığına təhlükə törətmirlər.
Lakin onların Avropa ailəsinə inteqrasiyası avropalı siyasətçilərin başlıca
başağrılarından biri kimi qalır. Ötən ayın 19-da Macarıstanın baş naziri Viktor
Orban Avropa qitəsinin miqrantlar tərəfindən "işğalı” təhlükəsi barədə bəyanat
səsləndirib və Avropanın islamlaşdırılmasının qarşısının alınmasının
zəruriliyini bildirib. O, bir növ "xristian alyansı” yaratmağı da təklif edib.
Məlumat üçün bildirək ki, Şengen və Dublin razılaşmaları miqrantlara Avropa
İttifaqı ərazisində sığınacaq alınması hüququnu verir. Bundan əlavə, bu
razılaşma onlara daxili sərhədlər daxilində hərəkət etməyə imkan verir. Bundan
da qaçqınların böyük bir hissəsi istifadə edir, daha çox Almaniyaya keçməyə
çalışırlar. Almaniya kansleri Angela Merkel də miqrant axınının nizamlanmasının
zəruriliyini bildirir. Lakin miqrant axının Avropaya daha böyük mənfəət
gətirəcəyi fikrindən də vaz keçmir. 2016-cı ildə Merkel bildirirdi ki,
miqrantlara qarşı kin və küdurət bəsləyənlərin ardınca getmək gərək deyil. Onun
sözlərinə görə, Almaniya güclü ölkədir və qaçqınlara kömək göstərilməsi
məsələsini tam şəkildə həll etmək mümkündür. Təsadüfi deyil ki, bu ölkədə
könüllülərdən ibarət böyük hərəkat da fəaliyyət göstərir.
Aİ-yə daxil olan Macarıstan, Polşa, Avstriya, Slovakiya və digər
Şərqi Avropa ölkələri bir vaxtlar öz unikal istehsallarını qurban verməklə
quruma üzv qəbul oldular. Bununla da özlərinin həyat tərzi, artmaqda olan
inflyasiya və işsizlik problemlərini həll edəcəklərinə ümid edirdilər. Lakin bu
gün Aİ-nin miqrasiya siyasəti onları vəsaitlərinin bir qismini qaçqınların
yerləşdirilməsinə sərf etməyə məcbur edir. Bu da onların narazılığına səbəb
olur. Litva prezidenti Dalya Qribauskayte hesab edir ki, miqrasiya axınını
azaltmaq üçün sırf həyatı təhlükəsi olan və müharibələrdən qaçan insanlara
sığınacaq verilməlidir. V.Orban isə Aİ-nin radikal qanadını təmsil edir, bu
xətt də Avropanı xristian mədəniyyətinin daşıyıcısı olmasından ibarətdir. Hələ
2015-ci ildə Aİ Slovakiya baş naziri Robert Fiçonun sözlərindən həyəcan
keçirmişdi. O bildirmişdi ki, respublika yalnız və yalnız xristian suriyalıları
qəbul edəcək. Az sonra Çexiya prezidenti Miloş Zeman dəqiqləşdirmə apararaq
bildirib ki, parlament daha çox ukraynalı qaçqınları qəbul etməyə hazırlaşır.
Onun qənaətincə, ukraynalılar Avropa cəmiyyətinə daha sürətlə inteqrasiya
olunurlar. Avstriya XİN-in keçmiş rəhbəri, hazırda federal kansler Sebastyan
Kurç isə kəskin şəkildə məktəbəqədər müəssisələrin üstünə düşərək bildirib ki,
Vyanadakı müsəlman uşaq bağçalarını bağlamaq gərəkdir. Səbəb kimi də göstərib
ki, onlar uşaqların inteqrasiyası ilə uyğunlaşmırlar. Yaddan çıxarmaq gərək
deyil ki, müasir Avropa 16 mln-dan artıq müsəlmanın vətənidir. Bu səbəbdən də "Avropa
İttifaqının Avropada xristianlığın forpostuna çevrilməsi” fikri mənfi risklər
doğurur. Bu, sosial sıçrayışlar, narazılıqlara meydan aça bilər.
Azər
