Avropada gənclərin çoxluq təşkil etdiyi ölkə
Azərbaycan
Avropada 25-29 yaş arası insanların faizinin ən çox olduğu ölkədir. Trend-in məlumatına
görə, bu barədə "Eurostat”ın hesabatında deyilir. Hesabata əsasən, Azərbaycan
əhalisinin 9,4 faizi bu yaş qrupuna aiddir.
Gənc nəslin daha
çox olduğu ölkələr arasında həmçinin Malta (8,4 faiz), Albaniya (8,2 faiz) və
İslandiya (8 faiz) yer alıb. 25-29 yaşlı gənclərin ən aşağı faizi isə İspaniya
və İtaliyada qeydə alınıb. Bu ölkələrdə gənc nəsil əhalinin 5,4 faizini təşkil
edir. Bundan başqa, Almaniyada əhalinin 6,4 faizi, Fransada 5,8 faizi, Böyük
Britaniyada 6,9 faizi, Türkiyədə isə 7,7 faizi 25-29 yaş arası gənclərdir.Gənclərin
çoxluğu, ümumiyyətlə, bir ölkəyə hansı üstünlüklər qazandırır? Bu mövzu ətrafında
gənclər sektorunda fəaliyyət göstərən şəxslərlə söhbətləşdik.
Milli Məclisin Gənclərvəidmankomitəsinin
üzvü, millət vəkili Naqif Həmzəyev "Kaspi”yə açıqlamasında bildirdi ki, hər hansı bir
ölkənin xoşbəxt gələcəyə olan ümidləri ilk növbədə gənclərə bağlıdır, bir millətin
mövcud olması üçün onun sağlam gəncliyinin olması vacib şərtdir: "Azərbaycanın
da gənclər ölkəsi olması, əhalinin yarıdan çoxunu gənclər təşkil etməsi
qürurverici haldır. Çünki hər bir ölkədə dövlətçiliyin, müstəqilliyin daha da
möhkəmləndirilməsi, gələcəyin etibarlı təminatı intellektual gənclərin
yetişdirilməsindən, onların aparıcı qüvvəyə çevrilməsindən çox asılıdır. Bu gün
Azərbaycanın qazandığı ən böyük uğurlardan biri də hər cür innovasiyalara açıq,
ideyalarla dolu zəngin gənclik potensialına malik olmasıdır. Gündən-günə çiçəklən,
inkişaf edən müstəqil Azərbaycanda dövlətin və xalqın gələcəyinə istiqamətlənmiş
siyasət və strategiya bu günün gənclərinin qarşısında böyük imkanlar, şəraitlər
açıb. Sabahını, parlaq gələcəyini düşünən Azərbaycan dövlətinin gənclər siyasəti
ilə bağlı məqsədyönlü fəaliyyət proqramı həmişə olub, indi də var. Bu gün ölkə
başçısı İlham Əliyevin rəhbərliyi ilə ölkəmizdə böyük, vətənpərvər gənclər ordusu
yaranıb. Demək olar, indi ölkədə gedən bütün islahatların mərkəzində gənclər
dayanır. Bu gənclər dövlət müstəqilliyinin möhkəmləndirilməsində, ölkədə uğurlu
islahatların həyata keçirilməsində, dövlət qarşısında duran vacib problemlərin
həllində öz sanballı töhfələri ilə fəallıq göstərirlər”.
Cəmiyyətin aparıcı qüvvəsi
N.Həmzəyevin
sözlərinə görə, müstəqilliyinin 28 yaşını qeyd edən Azərbaycan kimi bir ölkənin
ictimai-siyasi, sosial-iqtisadi, elmi-mədəni və humanitar həyatında gənclər
mühüm rola malik potensial qüvvə kimi mühüm yer tuturlar: "Güclü, aktiv və
avanqard qüvvə kimi gənclər ölkə həyatının bütün sahələrində öncül yer tutmaqla,
yüksək indikatorlara çatmağa zəmin yaradan zəngin bazadır. Gənclər Azərbaycanın
gələcəyidir, inkişafın və modernləşmənin operativ ön cəbhəsidir. Gənclər yeni
potensialdır, gücdür, yeniləşmə, müasirləşmə, inkişaf, tərəqqi və modernləşmə
strategiyasının təməl sütünları deməkdir”.
Millət vəkili
deyir ki, dövlətin və cəmiyyətin birgə fəaliyyət göstərdiyi müstəqil ölkəmizin
bütün sahələrində - dövlət strukturlarında, təhsildə, səhiyyədə, orduda, sənayenin,
kənd təsərrüfatının bütün sahələrində aparıcı qüvvə kimi gənclər öndə
dayanırlar: "Gənclərin sosial müdafiəsi, məşğulluğunun təmin olunması, hərbi-vətənpərvərlik
tərbiyəsinin gücləndirilməsi, yaradıcılıq axtarışlarının stimullaşdırılması,
milli-ədəbi irsə bağlılığının, asudə vaxtlarının təmin edilməsi, bu sahədə
görülən işlər, həyata keçirilən çoxşaxəli tədbirlər ümummilli lider Heydər Əliyev
tərəfindən əsası qoyulan gənclər siyasətinin məntiqi davamı kimi uğurla həyata
keçirilir. Qürurverici haldır ki, bu günün gəncləri Azərbaycanın ictimai-siyasi
həyatında daim fəallıqları ilə seçilir, öz düşüncə və baxışları ilə dünyada,
ölkədə baş verən hadisələrə münasibətlərini bildirir, cəmiyyətin aparıcı qüvvəsinə
çevrilirlər”.
Müstəqil, bilikli və bacarıqlı
N.Həmzəyev qeyd
etdi ki, bugünkü gənclərin ən böyük xoşbəxtliyi ondadır ki, onlar müstəqil ölkədə
yaşayırlar. Müstəqillik Azərbaycan gəncliyinin önündə böyük qapılar, yollar
açdı, onların çoxşaxəli inkişafına, azad və dinamik düşüncə tərzinin
formalaşmasına təkan verdi: "Azərbaycan gənclərinin günümüzün müasir, inkişaf
etmiş, yüksək intellektli aparıcı qüvvə kimi formalaşmasında, gənclər siyasəti
həmişə dövlət siyasətinin əsas tərkib hissəsi kimi xüsusi yer tutub. Ulu öndər
Heydər Əliyev "Bizim bugünkü gəncliyimiz sağlam düşüncəli gənclikdir, vətənpərvər
gənclikdir, xalqını, millətini sevən gənclikdir…” deyərək həmişə gənclərə güvənib,
onlara böyük etimad göstərib. Azərbaycan gəncliyi dövlətin diqqət və qayğısını
hər zaman öz üzərində hiss edib. Azərbaycanın tərəqqisində, onun iqtisadi,
siyasi və mədəni həyatında, demokratik dövlət və cəmiyyətin qurulmasında gənclərin
rolu əvəzsizdir. Gənclik cəmiyyətin aparıcı qüvvəsi olmaqla yanaşı, daim
axtarışda olan, yeniliyi sevən bir qüvvədir. Bu gün ölkəmizdə yüksək
intellektual səviyyəyə, vətənpərvərlik hissinə, milli düşüncəyə malik gənclər
formalaşıb. Bu günün gəncləri daha müstəqildirlər, daha bilikli və
bacarıqlıdırlar. Azərbaycan gəncləri müxtəlif sahələrdə qazandıqları uğurları
ilə ölkəmizi mötəbər tribunalardan yüksək səviyyədə təmsil edirlər. Onlar
siyasi, ictimai, mədəni və idman sahələrindəki nailiyyətləri ilə xalqımızın əsl
qürur və iftixarına çevriliblər. Bir gəncin uğuru isə müstəqil Azərbaycan dövlətinin
uğuru, bir gəncin güclənməsi, müstəqil Azərbaycanın güclənməsi deməkdir”.
Müstəqilliyin bəhrəsi
"İrəli”İctimai Birliyinin sədri Mirhəsən
Seyidov bildirdi ki, gənclərin
faizinin çox olması əmək qabiliyyəti olan əhalinin daha çox olması deməkdir:
"Eyni zamanda da gənc beyinlərin daha dinamik, inkişafa meyilli olması da əsas
göstəricilərdən biridir. Ölkədə gənclərə cənab Prezident tərəfindən böyük diqqət
ayrılıb. Gənclərin bütün istiqamətlərdə əsas strukturlarda yer alması, onların inkişafı
üçün addımlar atılır. Biz burada mədəniyyət, incəsənət, elm, təhsil və idman
sahələrində parlaq nailiyyətlər qazanan gənclərimizi və onların zəngin tarixi-mədəni
irsimizin qorunub saxlanması, inkişaf etdirilməsi üçün atdığı addımları qeyd edə
bilərik. Vətənpərvər ruhda yetişən və Azərbaycan həqiqətlərinin dünya
miqyasında tanınması üçün çalışan gənclərimizin olması qürurverici hisdir.
Çünki gənclər atılan hər bir addımın vətən üçün olduğunun fərqindədir. Hazırkı gənclər
müstəqil Azərbaycanın yetirmələridir. Nəzərə alsaq ki, 1991-ci ildə dünyaya gələn
bir gəncin hazırda 28 yaşı var, bu o deməkdir ki, ölkədəki bütün gənclər müstəqilliyimizin
bəhrəsidir. Bu da onu deməyə əsas verir ki, daha müstəqil, daha yenilikçi bir gənclik
Azərbaycanı irəli aparacaq”.
M.Seyidovun sözlərinə
görə, ölkə gəncliyi Azərbaycanın sürətli inkişafı üçün lazım olan biliyə,
savada və intellektə sahibdir: "Bu gün beynəlxalq arenada Azərbaycanı layiqincə
təmsil edən, idmanda uğurları olan, intellektual yarışlarda ilk sırada yer alan
gəncliyin olması onu deməyə əsas verir ki, ölkəmizdə gənclərin inkişafı var və
bunun inkişafı üçün də addımlar atılır”.
Azərbaycan
diasporunun ən mühüm hissəsi
"İslahatçı Gənclər” İctimai
Birliyinin sədriFərid Şahbazlı bildirdi ki, ölkədə gənclərin
çox olması üstünlük hesab edilir. Çünki gənclər bütün dünyada dinamika,
aktivlik rəmzi hesab edilir: "Gənclərin çox olması ölkədəki iş əmsalından,
demoqrafik vəziyyətdən başlayaraq, bir çox sahələrdə yaxşı nəticələrə gətirib
çıxarır. Bu gün Azərbaycan gəncləri ölkəmizin inkişafında, dövlətin idarəçiliyində
yaxından iştirak edirlər. Gənclərimiz dövlətin çox mühüm postlarında ölkəmizin
inkişafı naminə çalışırlar. Hesab edirəm ki, bu mənada gənclərimizin çox böyük
potensialı var. Gənclərimizin səsini dünyanın nüfuzlu elm olimpiadalarından,
musiqi yarışlarından, idman meydanlarından eşidirik. Bu gün Azərbaycanda çox
uğurlu gənclər siyasəti həyata keçirilir. Bunun nəticəsidir ki, gənclərimiz
bütün sahələrində özlərini yaxşı mənada fərqləndirirlər. Azərbaycan gəncləri
Avropada da, dünyada da intellektuallıqları, dil və müasir dünyanın
çağırışlarına cavab verəcək elmi bilikləri ilə fərqlənməyi bacarırlar. Eyni
zamanda Azərbaycan gəncləri vətənpərvərdirlər, olduqları hər yerdə bayrağımızı
uca tuturlar, ölkəmizin maraqlarını müdafiə edirlər. Gənclərimiz Azərbaycan
diasporunun ən mühüm hissəsidir”.
Aygün Asimqızı