Avropa İttifaqı ilə Azərbaycan arasında viza rejimi ləğv edilərsə...
"Avropa
İttifaqı (Aİ) ilə Azərbaycan arasında viza rejiminin yumşaldılması, yaxud ləğv
edilməsinin iqtisadiyyatımız üçün çox böyük əhəmiyyəti var. Çünki bizim Avropa
dövlətləri ilə böyük ticarət əlaqələrimiz var. Əgər viza rejimi yumşaldıla,
yaxud ləğv edilərsə, bu əlaqələr daha da genişlənə və iqtisadiyyatımız daha çox
gəlir əldə edə bilər”.Bu sözləri
bizimlə söhbətində iqtisadçı, millət vəkili Vahid Əhmədov bildirdi.
Qeyd edək
ki, Xarici işlər nazirinin müavini Mahmud Məmmədquliyev "Trend”ə açıqlamasında
bildirib ki, Aİ ilə viza rejiminin sadələşdirilməsi barədə sazişin uğurla icra
olunmasından sonra Azərbaycan Avropa ilə viza prosedurunun tamamilə aradan
qaldırılması üçün fəaliyyət planı tələb edəcək: "Azərbaycan və Aİ viza
rejiminin sadələşdirilməsi və readmissiya barədə iki saziş imzalayıb. Mənə məlum
olduğu qədər Azərbaycan tərəfindən ciddi qayda pozuntusu qeydə alınmayıb. Ölkəmizdən
Avropaya gedən miqrantların sayı azdır. Əgər hər şey yaxşı davam etsə, Aİ və Azərbaycan
arasında vizasız rejimin icra olunmasının növbəti mərhələsi başlayacaq.
Prosedur belədir: əvvəlcə viza rejimi sadələşdirilir, sonra tamamilə aradan
qalxır”.
Nazir
müavini bildirib ki, hazırda Azərbaycanla Aİ arasında vizasız rejim yalnız
diplomatik pasport sahiblərinə şamil olunur.
"Azərbaycan Aİ ilə əlaqədar bütün öhdəliklərini
yerinə yetirib”
Vahid
Əhmədov deyir ki, bizim sahibkarlar, yaxud Avropa İttifaqı ölkələrindəki
sahibkarlar hər dəfə viza almağa məcburdurlar: "Bu da təbii ki, vaxt tələb
edir: Düzdür, bizdə viza rejimi müəyyən
qədər sadələşdirilib. Amma bunun tam sadələşdirilməsinə, ləğvinə ehtiyac var.
Ümumiyyətlə, iqtisadiyyatı inkişaf etdirmək, işgüzar adamların gediş-gəlişini
intensivləşdirmək, yaxud turizm səfərlərinin çoxalması üçün bu təklifin gerçəkləşdirilməsi
yaxşı olardı. Viza rejimi sadələşdirilərsə, iş adamları rahat şəkildə daha
tez-tez səfərlər edər, bizneslərini daha da inkişaf etdirərlər. Ümumiyyətlə,
Avropa İttifaqı ilə Azərbaycan arasında viza rejiminin sadələşdirilməsi ilə
bağlı xeyli müddətdir ki, danışıqlar gedir. İnanıram ki, bu proses çox keçmədən
öz müsbət həllini tapacaq. Çünki Azərbaycan Aİ ilə əlaqədar bütün öhdəliklərini
yerinə yetirib. Buna görə də Azərbaycanla bağlı elə bir ciddi problem görmürəm”.
Millət vəkilinin
fikrincə, sözügedən məsələ həllini tapsa, iki Aİ ilə Azərbaycan arasında
turistlərin də sayı durmadan çoxalacaq: "Həm Azərbaycandan Avropa ölkələrinə
gedənlər, həm də bizim ölkəyə gələn avropalı turistlər çoxalacaq. Bu da
iqtisadiyyatımız üçün təbii ki, qazancdır. Azərbaycan son vaxtlar turizm
baxımından çox önəmli dövlətlərdən birinə çevrilib və ölkəmizə maraq həddən
artıq çoxdur. Bunun da səbəbi ölkəmizdə turizmlə bağlı işlərin görülməsi,
inkişafın getməsidir. Düzdür, etiraf edək ki, müəyyən xidmətlərdə hələlik
problemlər var. Amma bu da yavaş-yavaş aradan qaldırılacaq”.
"Avropalı viza almaq üçün çox vaxt xərcləmək istəmir”
Turizm
üzrə mütəxəssis Rəvan Rəsulov deyir ki, Avropa ölkələri ilə viza rejimi ləğv
edilsə, Azərbaycana böyük turist axını gözlənilir: "Düzdür, Azərbaycandan da
turist axını olacaq. Ancaq bütün hallarda Avropa ölkələrindən gələn turistlərin
hesabına ölkəmizdə turizm daha da inkişaf edəcək. Çünki heç bir avropalı viza
almaq üçün çox vaxt xərcləmək istəmir. Buna görə də Avropa ölkələri ilə vizasız
gediş-gəlişi olan ölkələrə getməyə üstünlük verirlər. Bildiyiniz kimi, turizmin
ölkəmizdə inkişafı üçün böyük işlər görülür. Sözügedən addım atılsa,
iqtisadiyyatımız Türkiyə kimi turizmdən xeyli gəlir əldə edər”.
Dəniz