Avropa ciddi təlatümlərlə üzləşə bilər
Avropada baş verən son hadisələr, bu qurum daxilində problemlərin yaşandığını
göstərir. Əksəriyyət hesab edir ki, qitə ölkələrinin cəm olduğu Avropa İttifaqı
ciddi sınaqlar qarşısında qalıb. Miqrasiya, vahid ailədə təmsil olunmamaq
məsələsi qitəni çətin bir duruma salıb. Nüfuzlu "Daily Express” qəzetində dərc
edilən məqalədə müəllif Rebekka Perrinq yazır ki, Avropa 2017-ci ildə yaşanan
seçkilərin nəticələrini yavaş-yavaş dərk etməyə başlayıb. Müəllifin qənaətinə
görə, bu il Avropanın altı ölkəsində baş verəcək seçkilərin nəticələri Avropa
İttifaqı liderlərini əməlli-başlı özündən çıxarmaq qabiliyyətinə malikdir.
Məsələn,
bu il İtaliyada qalmaqallı siyasətçi kimi tarixə düşmüş Silvio Berluskoni
yenidən hakimiyyətə dönə bilər, Rusiya prezidenti Vladimir Putin və
Macarıstanın baş naziri Viktor Orban isə böyük ehtimalla, növbəti müddətə
seçiləcəklər. Bundan əlavə, Avropa İttifaqını Çexiyada keçiriləcək seçkilərin
nəticələri narahat edir. Bu ölkənin Mərkəzi Avropanın qiyamçı dövlətlər statusu
almış Macarıstan və Polşaya qoşula biləcəyi, Avropa İttifaqına qarşı çıxacağı
narahatlıq yaradır. Məlumat üçün bildirək ki, Çexiyada seçkilər bu ilin
yanvarın 12-də baş tutmalıdır. Çexiyanın hazırkı prezidenti Miloş Zeman növbəti
müddətə dövlət başçısı seçilməyə iddialı görünür. Çex lider Avropa İttifaqını,
ölkəsinə ediləcək təsirə qarşı çıxmaqla hədələyir. Belə bir təhlükə qismində
baş nazir Andrey Babiş də çıxış edə bilər. Onu, hətta Çexiyanın Donald Trampı
da adlandırırlar. Əgər o, stabil hökumət formalaşdırmağa müvəffəq olarsa, bu
təhlükə reallaşa bilər. Babiş Çexiyanı "ailə firması” kimi idarə edəcəyi vədini
verib. ABŞ prezidenti Donald Trampla onu, keçmişdə sahibkarlıqla məşğul olması
və isteblişmentə qarşı çıxışlar birləşdirir. Onun seçkilərdə qələbəsi Avropa
İttifaqı üçün əsl zərbə oldu. Belə ki, Babiş seçki kampaniyası zamanı Aİ-nin
miqrasiya siyasətinə, eləcə də avrozonaya
qarşı çıxması ilə yadda qalıb. Bu yaxınlarda Zeman Şərqi Avropa
liderləri, daha dəqiq ifadə etsək, Macarıstanın baş naziri Orbanın ardınca
miqrant axınının Avropada terror təhlükəsini gücləndirməyə gətirib çıxardığını
bəyan edib.
Çexiyanın ardınca, martın 4-də İtaliyada parlament seçkiləri
keçirilməlidir. Keçirilən sorğuların nəticələrinə görə, bu ölkədəki "Beş ulduz
Hərəkatı” digər partiyaları sürətlə qabaqlayır. Hərəkatı rəyi soruşulanların 28
faizi dəstəkləyir, Demokratik Partiyanı 24, "İtaliya irəli” partiyasını isə 15
faiz dəstəkləyir. Lakin əksər mərkəzlərin gəldiyi nəticə budur ki, Berluskonin
sağ-mərkəzçi bloku - "İtaliya irəli” seçkilərdə əsas siyasi qüvvə olacaq, lakin
parlament çoxluğunu əldə edə bilməyəcək. Onun bloku Siciliyada keçirilən
regional seçkilərdə dörd dəfə siyasi qələbə qazanıb. Berluskoni bu seçkilərdə
sağ koalisiyadan olan namizəd Nello Muzumeçini dəstəkləyib. Bu şəxs Berluskoninin
qalmaqallı "İtaliya irəli”, partiyası ilə yanaşı, "Şimal liqası” və "İtaliya
qardaşları” partiyaları tərəfindən də dəstək alıb. Berluskoninin namizədinin
qalib gəldiyi Siciliyada keçirilən seçkilərin nəticələri bir çoxları tərəfindən
mayda keçiriləcək parlament seçkilərinə ali məşq kimi dəyərləndirilib.
Qalmaqallı baş nazir indiyə qədər bir neçə dəfə problemlə üzləşib - 2014-cü
ildə boşandı, ardınca bir neçə seks-qalmaqal yaşadı. Sonra isə Avropa məhkəməsi
onun vergi dələduzluğuna yol verdiyi barədə qərar çıxarıb. Hazırda Berluskoni
bu qərarın ləğvinə çalışır. Əgər qərar ləğv olunarsa, onda o, seçkilərdə
namizədliyini irəli sürə biləcək. Bundan əlavə, sabiq baş nazir şahidləri pulla
ələ almaqda ittiham olunur.
Avropanın sanksiyaları altında inləyən Rusiya da seçkilərə
hazırlaşır. Martın 18-də bu ölkədə seçkilər keçiriləcək. Artıq 18 ildir ki,
hakimiyyətdə olan Putinin bu seçkilərdə də səslərin böyük əksəriyyətini qazanacağı
şübhə doğurmur. Müstəqil sosioloji seçki mərkəzi –"Levada-Mərkəz”in
nəticələrinə görə, onun reytinqi 80 faizi keçir. Onun əsas rəqibi Aleksey
Navalnıya isə seçkilərdə iştirak etmək qadağan edilib. Bir çoxları ehtiyat
edirlər ki, Rusiya lideri ona qarşı çıxan namizədlərə qarşı repressiv addımlar
ata bilər.
Bu ilin ən önəmli seçkilərindən biri Macarıstanda keçiriləcək. Eksentrik
siyasətçi kimi ad çıxarmış Orban Avropanın bir sıra nüfuzlu liderlərinə, xüsusən
də Angela Merkel kimi liderlərə problem yaratmaqda davam edir. Onun bu
seçkilərdə qələbə qazanacağı gözlənilir. Lakin Orban sağ mərkəzçi "Yobbik”
partiyası, eləcə də, "Fides” hərəkatının lideri ilə də mübarizə aparmalı
olacaq. Məsələ ondadır ki, "Yobbik” liderini seçki kampaniyasını qeyri-qanuni
maliyyələşdirdiyinə görə, seçkilərdən uzaqlaşdıra bilərlər.
Avropanın başqa bir nüfuzlu dövləti İsveçdə də seçkilər keçiriləcək.
Sentyabrın 9-da bu ölkədə keçiriləcək parlament seçkilərində kimin qalib
gələcəyi sual doğurur. Stefan Leven ümidvardır ki, onun rəhbərlik etdiyi
Sosial-Demokrat Partiyası qalib gələcək və bu da ona növbəti dəfə baş nazir
postunda qalmağa imkan verəcək. Lakin sosioloji sorğuların nəticələrinə görə,
onun koalisiya üzrə müttəfiqi Yaşıllar Partiyası populyarlığa malik deyil. Bu
isə o deməkdir ki, Leven ola bilsin, mühafizəkarlarla ittifaqa girsin. Bununla
yanaşı, antimiqrant partiyası - "İsveç demokratları” seçicilər arasında
dəstəyini artırmaqda davam edir. Bu partiya 2014-cü ildən sürətlə
tərəfdarlarının sayını artırmaqda davam edir. Keçirilən rəy sorğularının
nəticələrinə görə, bu partiya seçkilərdə 14 faiz səs toplaya bilər.
İsveçlə yanaşı, Polşa da bu il seçkilərə hazırlaşır. Avropa
Komissiyası bu ölkəni, məhkəmə sistemində həyata keçirdiyi islahatlardan sonra
səsvermə hüququndan məhrum etməklə hədələyib. Hazırda Polşa Brüssellə münaqişə
vəziyyətindədir. Avropa Komissiyası hesab edir ki, elektoral islahatlar Polşa
hökumətinin məhkəmə sistemi üzərində nəzarətinin gücləndirir. Avropa Məhkəməsi
Polşanın "Ədalət və hüquq” partiyasına islahatları ləğv etməklə bağlı üç ay
vaxt verib. Lakin Polşa da geri çəkilmək niyyətində deyil. Hesab edir ki, qurum
daxilindəki müttəfiqləri və tərəfdarları bu qərara veto qoyacaq və ölkənin səsvermə
hüququndan məhrum edilməsinə imkan yaratmayacaqlar.
Azər NURİYEV