ATƏT təmsilçisi “jurnalist ovu”na çıxıb
ATƏT-in Media Azadlıqları
üzrə nümayəndəsi Harlem Dezir "Amerikanın Səsi” radiosuna bu günlərdə verdiyi
müsahibədə Azərbaycandakı medianın hazırkı durumu və qarşıdan gələn prezident
seçkiləri zamanı azad medianın əhəmiyyəti haqqında qeyri-obyektiv fikirlər
səsləndirib. Onun bu fikirlərinə rəsmi Bakı münasibət açıqlayıb. Azərbaycan
Prezidentinin İctimai-siyasi məsələlər üzrə köməkçisi Əli Həsənov mətbuata bildirib
ki, ATƏT-in Media azadlığı ofisi və onunla həmrəy olan maraqlı dairələr öz
mövqeyində daha balanslı, obyektiv olmalı və Azərbaycana qarşı tendensioz
yanaşmaya yol verməməlidirlər. Administrasiya rəsmisi təəssüf hissi ilə vurğulayıb
ki, bir sıra xarici dairələr və onların nəzarətində olan beynəlxalq QHT və
KİV-lərin Azərbaycanda söz və məlumat azadlığının vəziyyəti ilə bağlı qərəzli
və subyektiv iddiaları ATƏT kimi mötəbər beynəlxalq qurumun rəsmi nümayəndələri
tərəfindən də heç bir araşdırma aparmadan təkrarlanır. O bildirib ki, Azərbaycanda
söz və məlumat azadlığı təmin edilib, bu sahəni tənzimləyən beynəlxalq
standartlara uyğun qanunvericilik bazası formalaşdırılıb, yüzlərlə kütləvi
informasiya vasitəsi sərbəst fəaliyyət göstərir, əhalinin 82 faizinin internetə
çıxışı var.Prezident köməkçisinin qənaətincə, belə olan halda Azərbaycanda
media azadlığının durumundan narahatlıq ifadə etmək, guya KİV-lərin qarşısının
alınması, jurnalistlərin işgəncələrə məruz qalması, hüquq müdafiəçilərinin həbs
edilməsi və cəzasızlıq mühitinin mövcud olması ilə bağlı iddialar irəli sürmək
yanlış mövqedir və mövcud reallıqla tam ziddiyyət təşkil edir.
Əli Həsənov
bildirib ki, ümumiyyətlə, hər hansı bir ölkədə konkret cinayət halının
mahiyyətini təhrif edərək, kontekstdən çıxararaq ümumiləşdirmək və söz və
məlumat azadlığının məhdudlaşdırılması kimi qələmə vermək olmaz. Prezidentin
köməkçisinin sözlərinə görə, Azərbaycan dövləti söz və məlumat azadlığının daha
da inkişaf etdirilməsi, həmçinin jurnalist təhlükəsizliyinin, mediada
şəffaflığın və məsuliyyətli yanaşmanın təmin olunması ilə bağlı ardıcıl
tədbirlər görür, qarşıdan gələn dövrdə səylərini davam etdirmək əzmindədir və
bu məsələlərlə bağlı bütün beynəlxalq qurumlar və yerli təşkilatlarla açıq
dialoqa hazırdır.
Millət
vəkili, Azərbaycan Mətbuat Şurasının sədri Əflatun Amaşov da "Kaspi”yə
açıqlamasında deyib ki, ATƏT-in media azadlıqları üzrə nümayəndəsi H.Dezir bu
institutun zaman-zaman Azərbaycanda söz və ifadə azadlığı ilə bağlı
səsləndirdiyi fikirləri tam şəkildə təkrarlayıb. Onun sözlərinə görə, bu
təkrarçılıq şübhəsiz qərəzçilik mahiyyəti dayanır və təəssüf doğurur:
"Düşünürəm ki, ATƏT-in media ofisinin Azərbaycana yanaşmanı dəyişməsi daha
faydalı olardı. İndiki halda bu ofis sanki bütün körpüləri yandırmaq yolu
tutur. Halbuki Azərbaycanın media cameəsi həm indi, həm də əvvəllər Avropa
təşkilatları ilə sıx əməkdaşlıq müstəvisində kifayət qədər faydalı işlər
görüblər. Görünür, ATƏT bu istiqamətdə kömək göstərməyi deyil, ənənəvi
qərəzçiliyi və inkarçılığı üstün tutur. Belə yanaşma yolverilməzdir. ATƏT
təmsilçisinin fikirlərinə diqqət yetirəndə elə təəssürat yaranır ki, Azərbaycan
bir növ, "jurnalist ovu”nun aparıldığı ölkədir. Əlbəttə, dünyada bu cür yerlər var.
Amma nədənsə nə ATƏT-in, nə digər mötəbər birliklərin, o cümlədən beynəlxalq
media qurumlarının və hüquq müdafiə təşkilatlarının hesabatlarında onlardan
danışılmır. Ancaq həmin ölkələrə xas xüsusiyyətlər çox asanlıqla Azərbaycana
"uyğunlaşdırılır”. Bu mənada Harlem Dezir özündən əvvəlkilərin xəttini davam
etdirir. Görünür, ən asan yol elə budur. Heç şübhəsiz ki, bu yol siyasi
məqsədlərə söykənir. Məsələnin başqa izahı yoxdur”.
MŞ sədri Ə.Amaşov bildirib
ki, Azərbaycanda söz və ifadə azadlığı ilə bağlı problemlər var və bu, inkar
olunmur: "Media iqtisadi cəhətdən özünü təmin etməyi bacarmalıdır.
Redaksiyaların maddi-texniki səviyyəsi yüksəlməlidir, jurnalistlər daha peşəkar
olmalıdırlar. Ümumən bir çox məsələlərdən söz açmaq mümkündür. Ancaq ölkəmizdə
problemlərin həlli ilə bağlı formalaşmış siyasi iradə var. Azərbaycan dövləti
mediaya həssas yanaşır, ona diqqət və qayğı göstərir. Ölkəmizdə kütləvi
informasiya vasitələri sahəsində mükəmməl qanunvericilik bazası var.
Jurnalistlər bütün mövzularda yaradıcılıq sərbəstliyinə malikdirlər. Bu cəhət
dövlət siyasətinin mühüm tərkib hissəsidir. Azərbaycan Prezidenti də
çıxışlarında media fəaliyyəti ilə əlaqədar konseptual məqamlara toxunub. Onu da
unutmaq olmaz ki, dünyada söz və ifadə azadlığı ilə əlaqədar kifayət qədər
ciddi problemlər mövcuddur. Bəzən inkişaf etmiş ölkələrdə daha acınacaqlı
mənzərənin şahidi oluruq. Yaxşı olardı ki, ATƏT kimi mötəbər təşkilat bütün
bunları da diqqətdə saxlasın”.
Ə.Amaşov Azərbaycanda bu il
prezident seçkisinin keçiriləcəyinə də diqqət çəkib. Qeyd edib ki, seçki
yaxınlaşdıqca Azərbaycanla bağlı mənfi fikirlərin daha çox qabardılacağı hər
kəsə aydındır: "Mövcud xüsusda söz və ifadə azadlıqları ilə bağlı
spekulyasiyalar da artacaq. Harlem Dezirin timsalında bu prosesə start verilir.
Hər bir halda, belə qərəzli münasibətin Azərbaycan cəmiyyətinə təsiri ola
bilməz”.
Milli
Məclisin deputatı, "Yeni Azərbaycan” qəzetinin baş redaktoru Hikmət Məmmədov da qəzetimizə
açıqlamasında deyib ki, ATƏT-in media azadlığı üzrə nümayəndəsi H.Dezirin Azərbaycanın
ünvanına səsləndirdiyi fikirlər cəfəngiyatdan başqa bir şey deyil və siyasi
şantaj xarakteri daşıyır. Onun sözlərinə görə, ölkəmizdə söz və mətbuat
azadlığı təmin olunub və ölkəmizdəki söz və mətbuat azadlığının təminatçısı
Azərbaycan Prezidentidir: "Azərbaycan o ölkələrdəndir ki, burada jurnalistlər
və media azaddır, heç bir senzura yoxdur. Üstəlik, bütün internet resursları
Azərbaycan vətəndaşlarının və internet istifadəçilərinin üzünə açıqdır. Heç bir
şəkildə, heç bir internet resursu jurnalistlər üçün və yaxud informasiya
istehlakçıları üçün əlçatmaz deyil. Belə olan halda, hər hansı bir şəkildə söz
azadlığının məhdudlaşdırılmasından söhbət belə gedə bilməz. Azərbaycanda
informasiya cəmiyyəti mövcuddur. Bu informasiya cəmiyyəti informasiya istehsal
etməkdə və informasiya istehlak etməkdə tamamilə sərbəstdir. Prezident İlham
Əliyev Azərbaycan jurnalistlərini özünün köməkçisi adlandırır. Azərbaycan
jurnalistləri də Prezident İlham Əliyevi özlərinin böyük hamisi və dostu hesab
edirlər. Bu, Azərbaycan reallığıdır”.
Millət vəkili H.Məmmədov
deyib ki, Dünya İqtisadi Forumunun "2017-2018 Qlobal Rəqabətlilik” reytinqində
Azərbaycan ölkəni idarə edən siyasətçilərə ictimai etimad məsələsində birinci
20-likdə yer alıb: "Nəzərə almaq lazımdır ki, Azərbaycan jurnalistləri də hər
şeydən öncə Azərbaycan vətəndaşıdırlar. Əslində bu münasibət dolayısı ilə həm
də Azərbaycan jurnalistlərinin mövqeyidir. Bir müddət öncə ATƏT-in "Şərq
tərəfdaşlığı” proqramı çərçivəsində Hollandiya şirkətinin Azərbaycanda
keçirdiyi, - prezident seçkiləri keçirilsəydi kimə səs verərdiniz, - sorğusunda
yenə 82 faizdən yuxarı Azərbaycan vətəndaşları Prezident İlham Əliyevə səs verəcəklərini
bildirmişdilər. Əgər real rəqəmlər bunlardırsa və dediyimiz məsələlər ən
müxtəlif və fərqli rəy sorğusu keçirən şirkətlər tərəfindən təsdiq olunursa, o
zaman hansı məhdudlaşdırmadan danışmaq olar? Bu rəy Azərbaycan xalqının ümumi
rəyidir. Media institutu da Azərbaycan cəmiyyətinin digər aparıcı institutları
kimi Azərbaycan xalqının azad iradəsini təmsil edir. Görünür, bəzi şəxslərə
Azərbaycanı şantaj etmək üçün yeni vasitələr lazımdır. Çünki milli
maraqlarımıza zərbə vuran və onların himayə etdiyi bəzi şəxslər konkret
əməllərinə görə Azərbaycan qanunları qarşısında cavab verirlər və bundan sonra
da cavab verəcəklər. Ona görə də bu münasibət qərəzlidir və heç bir obyektiv
əsasa söykənmir”.
Yeni Azərbaycan Partiyası (YAP) Siyasi Şurasının üzvü, "İki sahil” qəzetinin baş redaktoru Vüqar Rəhimzadə isə bildirib
ki, müstəqilliyinin bərpasından ötən dövr ərzində Azərbaycanda hüquqi, dünyəvi,
demokratik dövlət quruculuğu istiqamətində mühüm addımlar atılıb. Onun
sözlərinə görə, bu islahatlardan ən önəmlisi fikir və söz azadlığı ilə
bağlıdır: "İnsan hüquq və azadlıqlarının mühüm tərkib hissəsi olan söz və
mətbuat azadlığının ən yüksək səviyyədə təmin edilməsi hər zaman ölkə
rəhbərliyinin diqqət mərkəzində olub. Elə son illərdə möhtərəm Prezidentimiz
İlham Əliyevin rəhbərliyi ilə KİV-in inkişafı istiqamətində həyata keçirilən
tədbirləri qeyd etmək kifayətdir. Təəssüf ki, bəzi xarici dairələr ölkəmizin bu
sahədə əldə etdiyi uğurlara kölgə salmağa cəhd edirlər. Ancaq unudurlar ki,
onların bu cəhdləri hər zaman olduğu kimi, bu dəfə də uğursuz alındı. Təəssüf
ki, ATƏT kimi nüfuzlu beynəlxalq təşkilatın nümayəndəsi öz müsahibəsində bəzi
qərəzli dairələrin qeyri-dəqiq informasiyalarını əsas götürüb. Azərbaycanda söz
və mətbuat azadlığı ən yüksək səviyyədə təmin edilib. Hər kəs açıq şəkildə öz
fikirlərini ifadə edə bilər. Təbii ki, qanun çərçivəsində. Cəmiyyətdəki
vəzifəsindən, statusundan asılı olmayaq hər kəs qanun qarşısında məsuliyyət
daşıyır. Hətta həmin şəxs, jurnalist olsa belə. Hesab
edirəm ki, bu cür dezinformasiyalar yaymaqla ölkəmizin əldə etdiyi uğurlara
qara yaxmaq mümkün deyil. Yaxşısı budur, onlar öz ölkələrindəki vəziyyəti
təhlil edib, hesabatlar hazırlasınlar”.
Rufik
İSMAYILOV