ATƏT Ermənistandakı ofisini bağlayır
Rəsmi Yerevan qondarma seçkilər keçirməklə, eləcə də, işğalçı siyasət
yeritməklə ümid edirdi ki, hər dəfə olduğu kimi, bu dəfə də beynəlxalq ictimaiyyət
onun bu hərəkətinə hər hansı təpgi göstərməyəcək. Lakin son hadisələr göstərir
ki, heç də belə deyil. Birləşmiş Ştatların ardınca, ATƏT də bu ölkə ilə bağlı
sərt qərar qəbul etməyə hazırlaşır. ATƏT Baş katibinin ofisindən daxil olan
məlumata görə, təşkilatın Yerevan ofisinin bağlanması planlaşdırılır. ATƏT-in
mərkəzi mənzil-qərargahından mənbəyə verilmiş cavabda deyilir: "Almaniyanın
sədrliyi dövründə 2016-cı ildə ATƏT-in Yerevan ofisinin bağlanması ilə bağlı
dalana dirənmiş vəziyyətin həlli ilə bağlı səyləri izləyərək, Avstriyanın
sədrliyi də bütün müvafiq tərəflərlə məsləhətləşmələrlə məşğuldur. Bildiyiniz
kimi, aprelin 21-22-də Avstriyanın keçmiş prezidenti Haynts Fişer Yerevanda
olub, vəziyyətdən çıxış yollarını öyrənib. Bu səfərdən sonra daha bir güzəşt
mətni ümid etməyə əsas verirdi ki, bütün açıq problemlər həll edilə bilər.
Lakin çoxsaylı görüşlər və qeyri-rəsmi müşavirələr, iştirakçı ölkələrin səyləri
heç bir nəticə vermədi. Sədrlik hazırda Baş katibliyə müraciət edib ki,
yaranmış status-kvo ilə əlaqədar bütün təfərrüatları nəzərə alsın. Cənubi
Qafqazda təhlükəsizliyin bütün istiqamətləri üzrə dəstəyi və əməkdaşlığı davam
etdirmək üçün ATƏT-in iştirakının bütün alternativ variantları öyrəniləcək”.
Ermənistan tərəfi bununla bağlı rəsmi Bakını ittiham etməyə çalışıb.
Ermənistan Xarici İşlər Nazirliyinin mətbuat xidmətinin rəhbəri Tiqran Balayan
bildirib ki, Azərbaycan bununla bağlı destruktiv fəaliyyət göstərir. Yeri
gəlmişkən, Azərbaycanın ATƏT yanında Daimi Nümayəndəliyinin rəhbəri Qalib
İsrafilov isə "Trend”ə müsahibəsində bildirib ki, erməni tərəfinin belə bir
açıqlama verməsinə əsas yoxdur. "Bildiyiniz kimi, ATƏT Azərbaycan və
Ermənistanda 2000-ci illərin əvvəllərində eyni vaxtda yerli missiyalarını təsis
edib. Ermənistan-Azərbaycan münaqişəsi ilə əlaqədar olan məsələlərlə ATƏT-in
Minsk Qrupu məşğul olduğu üçün əldə olunan anlaşma ondan ibarət idi ki ATƏT-in
Bakı və Yerevan ofisləri bu məsələlərə cəlb olunmayacaqlar”, - deyə o bildirib.
Diplomat əlavə edib ki, "ATƏT-in Yerevan ofisinin birdən-birə minalardan
təmizləmə fəaliyyəti ilə məşğul olmağa başlaması şifahi razılaşmanı şübhə
altına qoydu. Yeri gəlmişkən, bu gün Ermənistanın ATƏT yanında nümayəndəliyi
təsdiq etdi ki, artıq sabiq Yerevan ofisi bu razılaşma ilə məhdudlaşmırdı.
Azərbaycan tərəfindən bu fəaliyyət xüsusilə mahiyyət və coğrafi məhdudiyyət
baxımdan onun miqyasına görə sual altına qoyuldu. Biz məxsusi olaraq
Ermənistanda belə layihəyə ehtiyac məsələsi barədə sorğu-suallar qaldırdıq.
Belə ki, Ermənistan-Azərbaycan müharibəsi dövründə Ermənistan ərazisi hərbi əməliyyatlar
meydanı olmayıb. Biz davamlı şəkildə öz narahatlığımızı ifadə etmişdik ki,
ofisin minalardan təmizləmə fəaliyyəti Ermənistanın müvafiq qurumlarının imkan
və qabiliyyətlərini artıracaq və bunlar da asanlıqla Azərbaycanın işğal olunmuş
ərazilərində istifadə oluna bilər”.
Onun sözlərinə görə, Ermənistanın
mediasının, eləcə də ATƏT-in Yerevan ofisinin məlumatı təsdiq edir ki, Ofisin
minalardan təmizləmə üzrə fəaliyyəti birbaşa Ermənistan-Azərbaycan münaqişəsi
ilə bağlıdır və ofisdən yardım alan tərəflərin fəaliyyətinin coğrafi dairəsi
Azərbaycanın işğal olunmuş ərazilərini də əhatə edir: "Beləliklə, Ermənistan
tərəfi ATƏT-in Yerevan ofisinin mandatının qeyri-müəyyənliyindən sui-istifadə
edirdi. Vəziyyəti düzəltmək və ofisin mandatının uzadılmasının yeganə yolu
qeyri-müəyyənliyə son qoymaq və mandata aydınlıq gətirməkdən ibarət idi. Bir
neçə məsləhətləşmələrdən sonra Azərbaycan tərəfi prinsip etibarilə qərar
layihəsində Avstriyanın sədrliyi tərəfindən irəli sürülən mandatın
aydınlaşdırılmasına dair məqamları dəstəklədi. Qəbul olunduğu təqdirdə, bu
qərar ATƏT-in Yerevan ofisinin fəaliyyətinin yalnız Ermənistanın ərazisi ilə
məhdudlaşdırılmasını təsdiq edəcəkdi və heç bir halda Minsk konfransının məşğul
olduğu münaqişə və tənzimləmə prosesinə aid olan məsələyə cəlb olunmayacaqdı.
Azərbaycanın ərazilərinin Ermənistan tərəfindən işğalının davam etməsi faktını
nəzərə alaraq, sədrlik tərəfindən təklif olunan qərarın dəstəklənməsinə
münasibətdə Azərbaycanın hazırlığı xoş niyyətin göstəricisi idi.
Amma
Ermənistanın ATƏT yanındakı nümayəndəliyinin mövqeyi aydın şəkildə göstərdi ki,
onlar məsələnin həllində maraqlı deyil və sədrliyin kompromis xarakterli
təklifini dəstəkləməkdən imtina etdilər”. Azərbaycan diplomatı əlavə edib ki,
ATƏT-in Ermənistan ofisinin bağlanmasına təəssüflənir. "Amma bu, Ermənistanın
hər bir mümkün vasitədən istifadə edərək status-kvonu saxlamaq və Azərbaycan
ərazilərinin işğalını gücləndirmək üçün məqsədli cəhdlərinin nəticəsidir. Yerevan
ofisi ətrafında olan vəziyyət bir daha göstərdi ki, Azərbaycan konstruktiv,
amma prinsipial mövqe sərgiləyir və öz legitim maraqlarını qoruyacaq və
suverenliyi və ərazi bütövlüyünə xələl gətirəcək hər hansı cəhdə qarşı qəti
şəkildə çıxış edəcəkdir”,- deyə diplomat fikrini tamamlayıb.
Öz növbəsində ATƏT PA-da Yerevandakı ATƏT ofisinin bağlanması ilə
bağlı yayılan xəbərlərə münasibət bildirib. Qurumun rəhbəri Kristin Muttonen
bununla bağlı təəssüf hissi keçirdiyini bildirib.
Beləliklə, görünən odur ki, erməni tərəfinin yürütdüyü çirkin və
barışmaz siyasət elə onun öz başında çatlayır.
Kamran