"Görüləcək işlərimiz çoxdur" - Fotolar
1990-ci illərdə bizim nəslin uşaqları "Pəncərə”,
"Sehrli güzgü” kimi uşaq verilişlərinə baxırdı. O zamanlar dövlət
televiziyasında yayımlanan uşaq verilişlərində Leyla Ramazanlı və onun bacısı
Xavər Ramazanovanı tez-tez görürdük. Uşaqlarla bağlı keçirilən bütün tədbirlərdə
2 bacı səhnəni ələ alırdı desək, yəqin ki, yanılmarıq. Üzərindən illər keçdi. Uşaqlıqdan səhnədə olan bu bacılardan biri hazırda
sizlərin də yaxşı tanıdığınız ifaçı Leyla Ramazanlıdır. Digəri isə adını
rejissor, stilist kimi daha çox eşitdiyimiz Xavər Ramazanovadır. Onun adını
rejissor kimi daha çox eşidirdik. Belə ki, Xavər bacısı Leyla Ramazanlıya hərdən
kömək edir, onun kliplərini hazırlayırdı. Bacısından fərqli olaraq Xavər efirdən,
mətbuatdan uzaq durmağa çalışır və özünü tamam başqa istiqamətdə görürdü.
Hazırda X.Ramazanova Badamdar qəsəbəsi Mədəniyyət Evinin direktorudur. Bundan əlavə,
10 ildən artıqdır ki, "Uşaq dünyası” cəmiyyətinə rəhbərlik edir.Xavər Ramazanova ilə keçmişdən və hazırda gördüyü
işlərdən danışdıq.
- Çoxdandır
efirlərdə yoxsunuz. Haralardasınız?
- Düzdür, uşaq yaşlarında verilişlərdə çıxışlarımız
çox olub. Ancaq qismət elə gətirdi ki, mən tamam başqa ixtisas üzrə getdim. Belə
ki, Azərbaycan Dövlət İqtisad
Universitetinin "Beynəlxalq iqtisadi münasibətlər” fakültəsinə daxil oldum.
Hazırda isə Azərbaycan Dövlət Mədəniyyət və İncəsənət Universitetində ikinci təhsilimi
alıram. Orada "televiziya rejissorluğu” ixtisasında oxuyuram. Məktəbi bitirdikdən
sonra iqtisadiyyat sahəsinə doğru getdim. Bu yöndə bir çox nailiyyətlərim də
oldu.
- Hazırda isə
klip rejissoru kimi daha çox tanınırsınız.
- Əslində mən klipmeyker deyiləm. Düzdür, bacımın
kliplərini özüm çəkmişəm. Bir müddət Türkiyədə yaşadım və rejissorluqla bağlı
kurslara qatıldım. Mən iqtisadçıyam, ancaq hazırda mədəniyyət sahəsində
çalışıram. Əlbəttə ki, diplom şərt deyil, həvəs, maraq da lazımdır. Mənim
marağım var ki, rejissorluq sahəsinə yönəlmişəm. Ancaq indi tamam başqa bir
istiqamətdə çalışıram. Rejissorluqdan uzaqlaşmışam.
- Uşaqlıqdan
üzdə olan biri olmusunuz. Nə üçün sonra sizi efirlərdə, mətbuatda görə bilmədik?
- Elədir. Uşaqlıqda çox üzdə olan biri olmuşam. O
zamanlar ulu öndər Heydər Əliyev bayramlarda uşaqlarla görüşürdü. Belə ki, Heydər
Əliyev bizim aparıcılıq etdiyimiz tədbirlərə gəlirdi. Ulu öndərlə görüşlərimiz
olurdu. Bu məşhurluq bir müddətə qədər davam etdi, sonra isə bunu dayandırmalı
olduq.
- Buna səbəb
nə oldu?
- Özüm istəmədim. Bacım ifaçılıq sənətini seçdi. Mənim
isə yolum tamam başqa idi. Hazırda bütün planlarımı da o istiqamət üzrə
qurmuşam. Şükürlər olsun ki, indi hər şey qaydasındadır.
- Bəs
televiziyadan ayrılmağınızın səbəbi nə oldu?
- Elə hesab edirəm ki, hər ailədən bir nəfər üzdə
olmalıdır. Əslində Leyla da İqtisad Universitetini bitirdi. Ancaq o öz istiqamətini
başqa sahə üzrə seçdi. Qeyd edim ki, o da ikinci təhsilini aldı. Mən özümü
aparıcı, aktrisa kimi görə bilmədim deyə bu sənətdən getdim. Uşaqlıqdan ən
böyük arzum idi ki, ciddi bir işim olsun, stol arxasında əyləşim, sosial işlərlə
məşğul olum. Elə istədiyim kimi də oldu.
- İndi
aparıcı kimi necə, işləyərsinizmi?
- Bu haqda hələ ki heç nə düşünmürəm. Hər insanın
bir şeyə marağı var. Uşaq vaxtı efiri, səhnəni o qədər görmüşəm ki, indi onlar
mənə maraqsız gəlir. Düşünürəm ki, öz işimdə irəliləsəm, mənim üçün daha yaxşı
olar. Bir işi yarımçıq qoyub başqa işə keçmək də istəmirəm.
- Hər bir
insanın daxilində məşhurluq sevdası olur. Siz efirlərdə olarkən belə məşhurluqdan
imtina etdiniz.
- Simamın tanınmasını o qədər də istəmirəm. Sakit,
öz işimi görüm - bu mənə kifayət edir. Ancaq nədənsə harada oluramsa-olum, daha
çox diqqət çəkirəm. Misal üçün, məktəbdə, universitetdə tədbir keçirilirdisə, məni
çəkməsinlər deyə qaçıb gizlənirdim. Ancaq etiraz etməyimə baxmayaraq, yenə də məni
ya aparıcı, ya da müsahib kimi seçirdilər. Əslində hər zaman belə şeylərdən
qaçmışam. Heç vaxt tanınmaq, məşhur olmaq arzusunda olmamışam.
- Bildiyimiz
qədəri ilə, indi mədəniyyət evlərinin birində rəhbər kimi çalışırsınız.
- Hazırda Səbayel rayon Badamdar Mədəniyyət Evinin
direktoruyam. Artıq iki ildir ki, mədəniyyət evinə rəhbərlik edirəm. Orada
maraqlı tədbirlər keçiririk. Bundan əlavə, mədəniyyət evində uşaqlar üçün rəssamlıq
kursumuz da fəaliyyət göstərir. Belə ki, uşaqlar məktəbdən sonra səmərəli vaxt
keçirmək üçün mədəniyyət evimizə üz tuturlar. Mədəniyyət evinin yaradıcı
kollektivi ilə konsertlər təşkil edirik. Onlarla bərabər qocalar evinə, kimsəsiz
uşaq evlərinə, hərbi hissələrə gedirik. İndiyə qədər bir çox layihələrə imza
atmışıq. Bundan sonra da görüləcək işlərimiz çoxdur. İnşallah, qismət olsa,
onları da həyata keçirməyi düşünürük.
- Çətin
deyilmi?
- Heç də. İşimi sevirəm. Mən uşaqlıqdan bu sahədə
böyümüşəm. Uşaq vaxtımdan incəsənətin hər növü ilə məşğul olmuşam. Bizim günlük
rejimimiz elə təyin edilmişdi ki, bir dəqiqə belə boş vaxtımız olmurdu. Belə
ki, uşaq vaxtı taekvondo, karate ilə məşğul olurdum. Bal, milli rəqslərə
gedirdim. Bütün bunlarla bərabər, ingilis və rus dillərini öyrənirdik. Asudə
zamanımızı əlverişli keçirirdik. Dərslərimizi də yaxşı oxuyurduq. Onun üçün
indi də gərgin iş rejiminə öyrəşmişəm. İşimin məsuliyyəti o qədər ağırdır ki,
digər sahələrə vaxt çatdıra bilmirəm. Əgər bir işi görürəmsə, çalışıram ki, onu
tam və mükəmməl şəkildə görüm. Üzərimə götürdüyüm hər işin məsuliyyətini
daşıyıram.
- Eşitdiyimizə
görə, həm də uşaqlarla çalışırsınız.
- 10 ildən artıqdır ki. "Uşaq dünyası” cəmiyyətinin
sədriyəm. Burada fiziki qüsurlu uşaqlarla görüşlərimiz olur.
- Yenə də
uşaqlar?
- Uşaqlara sevgim sonsuzdur. Onlar çox safdırlar.
Uşaqların bambaşqa bir dünyası var. Bu dünyada onlara əlimizdən gələn köməkliyi
etməyə çalışırıq. "Uşaq dünyası” cəmiyyətini məhz uşaqlara olan sevgimə görə
işlətmişəm. Artıq bu cəmiyyətin özü də böyüyüb. Bu 10 ildə bir çox uğurlu işlərimiz
oldu.
- Ən son nə
kimi layihələr etmisiniz?
- Ötən ay
daun sindromlu uşaqlarla görüşdük. Həmin uşaqların rəsm sərgisini təşkil etdik.
O qədər çox işlərimiz var ki, buna vaxt çatdırmırıq. Qüsurlu uşaqların
bacardığı çox şeylər var. Sadəcə olaraq onlar öz istedadlarını üzə çıxarmağa utanırlar.
Elə fiziki qüsurlu uşaqlar var ki, onların idmana böyük həvəsi var. Biz onların
tədbirlərini keçiririk, yanlarında oluruq. O uşaqlara dəstək olmağa çalışırıq.
"Uşaq dünyası” cəmiyyətində dünyaya məhz onların gözü ilə baxmağa çalışırıq.
- Çox zaman
Leyla Ramazanlıya "rejissora pul verməmək üçün bacısına klip çəkdirməyi” ilə
bağlı suallar verirlər...
- Leylanın kliplərini təmənnasız çəkmişəm. Son iki
ildə heç Leylayla da işləyə bilmirəm. Çünki ikimizin də vaxtı yoxdur. Vaxtım
olan kimi ona klip çəkəcəyəm, söz vermişəm. O da dediyim kimi, ancaq vaxtım
olanda. Hazırda o qədər işlərimiz var ki...
- Xavər
xanım, bildiyimiz qədəri ilə, atanız da mədəniyyət sahəsində çalışıb.
- Elədir. Atam tanınmış arxitektor olub. Ancaq təəssüf
ki, biz onun yolunu davam etdirmədik. Valideynlərimiz elə uşaqlıqdan bizə sərbəstlik
verdilər. Dedilər ki, kim nə olmaq istəyir, hansı sənətin dalınca getmək istəyirsə,
ona mane olmayacağıq. Bizim qarşımıza heç zaman məhdudiyyət qoyulmayıb. Atam Mədəniyyət
və Turizm Nazirliyində çalışıb.
- Bəzən kimlərsə valideynlərinin, qohumlarının şəhid statusundan istifadə edirlər.
Ancaq siz bacılarda belə hallarla rastlaşmadıq.
- Bir insanın qanında vətənpərvərlik ruhu varsa,
onu heç kim saxlaya bilməz. Heç kim atamı cəbhəyə çağırmayıb, özü istəyərək
könüllü şəkildə döyüşə gedib və vətən uğrunda həlak olub. Bu addan istifadə etmək
düzgün deyil. Allah yerini cənnət eləsin. Mən fəxr edirəm ki, atam vətən
uğrunda şəhid olub. Biz heç zaman o şəhidlik statusundan istifadə etməmişik. Bu
status heç zaman bizə yaşıl işıq olmayıb. O, bizim kədərimizdir və biz onu ürəyimizdə
yaşayırıq.
- Xavər
xanım, gələcəyə doğru hədəfləriniz nələrdir?
- Gələcəyə doğru heç nə düşünmürəm. Hər şeyi zaman
göstərəcək. Özümü sevən insanam. Hər gün səhər yuxudan duranda bu günü mənə
yaşatdığına görə Allahıma şükürlər edirəm. Əslində qocalmaqdan qorxuram. Gələcək
haqqında düşünəndə yalnız onu deyə bilərəm ki, hər zaman işgüzar biri olacağam.
Yerimdə qalan, passiv biri deyiləm. Gələcəkdə hər şeyin yaxşı olacağını düşünürəm.
Ən böyük arzularımdan biri odur ki, yaxın gələcəkdə maraqlı bir film çəkim.
- Hansı
mövzuda?
- Mövzunun elə bir əhəmiyyəti yoxdur. Yəqin ki,
yaşadığımız həyat, insanların başına gələn maraqlı hadisələrlə bağlı bir mövzu
olacaq.
- İndi daha
çox komediya janrında filmlər çəkilir.
- Elədir. Ancaq mən komediya çəkmək niyyətində
deyiləm. İnsanların o qədər qayğıları, problemləri var ki... Gündəlik məişət
qayğıları ilə yüklənmiş insanlar ekran qarşısında əyləşib, iki saat gülmək və
maraqlı vaxt keçirmək istəyirlər. Əslində komediya janrına bu qədər marağın
olması da pis hal deyil. Sevindirici haldır ki, son dövrlər milli filmlərimiz
inkişaf etməkdədir. Çəkilən filmlərimizi izləyir və çox bəyənirəm.
Xəyalə Rəis