Atambayev opponentlərini zərərsizləşdirir
Qırğızıstan müxalifətinin aparıcı liderlərindən biri olan Omurbek
Tekebaev İstanbuldan gələrkən Bişkek aeroportunda saxlanıb. Tekebaev Vyanada
ATƏT-in Parlament Assambleyasınım iclasında iştirak edirdi. Ölkə rəhbəri Almazbek
Atambayevin keçmiş müttəfiqi olan Tekebayev prezident Konstitusiyaya
dəyişikliklər təklif edəndən sonra ona qarşı müxalifətə keçib.
Onu da qeyd edək ki, hazırkı prezident Almazbek Atambayev seçkilərdə
iştirak edə bilməz. Belə ki, Konstitusiya bir şəxsin ikinci dəfə namizəd
olmasını qadağan edir. Çox güman ki, Atambayev ona yaxın şəxsin prezident
olmasına çalışır. Tekebayev isə ona qarşı müxalifətdədir. Tənqidçilər hesab
edirlər ki, Konstitusiyaya ediləcək düzəlişlər 2017-ci ildə səlahiyyət müddəti
başa çatan Atambayevin müttəfiqlərinin hakimiyyətə yolunu açacaq. Tekebaev
2010-cu ildə baş nazirin müavini olarkən rüşvət və korrupsiya hallarına yol
verməsi ittihamları ilə üzləşib. Həm də "Ata-Meken” Partiyasının sədri olan bu
şəxs ittihamları rədd edir. Onun partiyasının iki deputat üzvünə qarşı da
ittihamlar irəli sürülüb.
Yayılan məlumatlara görə, baş prokurorluq Tekebayevi onda ittiham
edir ki, yeddi il əvvəl rusiyalı biznesmenə yerli "Alfa Telekom” mobil telefon
şirkətini satacağı barədə vəd verib. Bunun əvəzində isə ondan 1 mln. dollar və
sövdələşmənin 15 faizini istəyib. "Ata-Meken”ın lideri o zaman baş nazirin
müavini vəzifəsində çalışıb və özəlləşdirmə məsələlərinə məsul olub. Biznesmen
Leonid Maevsinin sözlərinə görə, o pulları Tekebayevə verib. Lakin sonuncu
sövdələşmənin şərtlərini yerinə yetirməyib. Bu faktla bağlı ölkənin baş
prokurorluğu Cinayət Məcəlləsinin iki maddəsi – dələduzluq və korrupsiya
maddələri üzrə cinayət işinin açılması barədə iddia qaldırıb. Ekspertlər hesab
edirlər ki, baş verənlər prezident Almazbek Atambayevlə onun keçmiş müvəqqəti
hökumət üzrə tərəfdarları arasındakı qarşıdurmanın davamıdır. Son vaxtlar onlar
arasına münasibətlər kəskin şəkildə pisləşib.
Ümumiyyətlə, Qırğızıstanda ictimai narazılıqlar 2016-cı ilin 31
avqustunda başlayıb. Həmin tarixdə ölkənin müstəqilliyi ilə bağlı keçirilən
tədbirdə prezident Atambayev keçmiş tərəfdarlarını kəskin tənqid edərək, onları
quldur hərəkətlərdən əl çəkməyə, separatçıları dəstəkləməməyə və iri məbləğdə
vəsaitləri mənimsəməməyə çağırıb. Son aylarda isə O.Tekebayev prezident və onun
ətrafı barədə kompromatları ictimaiyyətə sızdırmaqla məşğul idi. Atambayev də
ona borclu qalmırdı.
Bu günlərdə Bişkekin mərkəzində Milli Təhlükəsizlik üzrə Dövlət Komitəsinin
önündə bir neçə yüz insan aksiya keçirib. Onlar Tekebayevin dindirilməsi
prosesinə etiraz ediblər. Mitinqə məşhur siyasilər, əvvəllər onunla Kurmanbek
Batıyevə qarşı birgə mübarizə aparanlar da qatılıblar. Onlar üçün bu tək, yoldaşlarının
müdafiəsi yox, həm də özləri barədə ictimaiyyətə xatırlatmaq idi. Ora
toplaşanlar Tekebayevi azadlığa buraxmağı və Milli Təhlükəsizlik üzrə Dövlət Komitəsinin
rəhbəri Abdil Seqizbayevin istefasını tələb ediblər. Aksiyada iştirak edənlər
saxlanılan şəxslə bağlı kompliment söyləməkdə xəsislik də etməyiblər.
"Tekebayev gələcəyin simvoludur” deyə onlar bildiriblər.
Korrupsiya və dələduzluqda ittiham olunmaq – qırğız siyasətçi üçün
ciddi ittihamdır. İndi Tekebayev müxalifət hərəkatına rəhbərlik edib ya sona
kimi gedib uğur qazanmalı, ya da ölkəni tərk etməlidir. Sonuncu variantdan Tekebayev
yararlana bilərdi. Yəni ölkəyə dönməyə bilərdi. Lakin o, barəsində cinayət
işlərinin qaldırılmasına və hətta həbs ediləcəyinə bilməsinə baxmayaraq, ölkəyə
qayıdıb. Görünür, "Ata Meken”in rəhbəri mübarizəni davam etdirmək istəyib.
Qırğızıstan üçün aksiyalar çoxdan bəri idi ki, yaddan çıxmışdı və indi yeni
aksiyaların start götürməsi yaz siyasi mübarizənin başlanması deməkdir. Nəzərə
alaq ki, noyabrda seçkilər keçiriləcək və indidən proqnoz etmək olar ki, proses
gərgin olacaq. Tekebaevin tərəfdarlarının radikal qanadı artıq ölkədə 2005,
2008-ci illər inqilablarına oxşar inqilabların baş verə biləcəyindən
danışırlar. Lakin ekspertlər bunu həddən artıq şişirdilmiş sayırlar. Belə ki,
mitinqlərə qatılanların sayı xeyli azdır, regionlarda isə vəziyyət sabit olaraq qalır. Beləliklə, Özbəkistan
və Türkmənistanın ardınca, Mərkəzi Asiyanın "inqilablar beşiyi” kimi ad
çıxaran ölkəsi gərginlik dövrünə qədəm qoyur. Və ümid etmək olar ki, həmin
ölkələrdə olduğu kimi, burada da proseslər dinc başa çatacaq.
Azər