Aspirin asılılığı
Bu yazıda
sizə aspirinin ürək-damar xəstəliklərinin
müalicəsindəki yerindən, faydalarından və zərərlərindən bəhs edəcəyəm. Bu yazını yazma səbəbim xəstə
müayinəsi zamanı çox təəssüf ki, gərəksiz yerə aspirin içən xəstələrlə tez -
tez qarşılaşmağımdır.
119 illik
dərman olduğu söylənilsə də, əslində aspirinin tarixi 3500 il öncə başlayıb.
Belə ki yazılı mənbələrdən aydın olur ki
miladdan əvvəl ikiyüzinci ildə revmatizm və bel ağrıları üçün qurudulmuş Mərsin ağacının
yarpaqlarından istifadə edilib. Hipokrat yazılarında artmış bədən
temperaturu və ağrı zamanı istifadə
etdiyi məhlulu söyüd ağacının qabığından istifadə edərək hazırladığını
bəhs edib. Həm söyüd ağacının qabığında həm də mərsin ağacının yarpağında
bol miqdarda aspirin mövcuddur. Müasir aspirini ilk dəfə 1897-ci ildə alman kimyaçı Felix
Hoffmann kəşf edib. Əslində Felix
Hoffmannı aspirini kəşf eləməyə
məcbur edən şey atasının oynaqlarında olan şiddətli revmatizm ağrıları idi.
Aspirin Nobel mükafatı qazandırmış bir dərmandır. Belə ki, aspirinin ağrını
hansı mexanizmlə azaltdığını ilk dəfə müəyyən edən ingilis farmakoloq John R.Vane
1982-ci ildə Nobel tibb mükafatını alıb. Müasir
aspirin kəşf edildikdən sonra əvvəllər ondan sadəcə ağrıkəsici, temperatur düşürücü və iltihab əleyhinə dərman kimi istifadə edilirdi. Daha
sonarsa aspirinin qanın laxtalanma qabiliyyətini
azaltdığı da müəyyən edildi. Kəşf edildiyi gündən bu günə çox vaxt keçsə
də, aspirin həm kardioloqların, həm də ürək-damar cərrahlarının vazkeçilməz
dərmanlarındandır. Aspirin xalq arasında qan durulducu dərman olaraq bilinir.
Aspirin qanın laxtalanma qabiliyyətini azaldaraq damarların içində trombun
əmələ gəlməsinin qarşısını alır. Məhz bu xüsusiyyətindən faydalanaraq
aspirindən ürək-damar xəstəliyinin müalicəsində istifadə edirik. İnfarkt keçirən insanlara aspirin
1985-ci ildən etibarən verilməyə başlanıldı və bu günə qədər həm infarkt, həm
də ürək-damar xəstəliyinin müalicəsində aspirin çox önəmli dərmanlardan
biridir. Aspirin aşağı gəlirli ailələrin də
ala biləcəyi ucuz və çox asan tapılan bir dərmandır.
Kimlər ömür boyu aspirin içməlidir?
Əgər bir
insan infarkt keçirmişsə və ya ürək-damar sistemində stend taxılmışsa və ya
şuntlama əməliyyatı olmuşsa, o insan
ömür boyu aşağı dozada aspirin içməlidir. Yəni bir xəstənin şuntlama
əməliyyatı keçirməsi və ya o xəstənin ürək damarına stend taxılması problemi
birdəfəlik ortadan qaldırmır və buna görə də ömür boyu aspirin içməli olur.
Aparılan araşdırmalar nəticəsində isbatlandı ki, bu cür xəstələrin
aspirin içməsi onlarda infarkt riskini, stend tıxanması riskini və ölüm
riskini önəmli dərəcədə azaldır. Yəni
bu cür xəstələr üçün aspirin "olmazsa olmaz” dediyimiz dərmanlardandır. Aspirin
yemək yedikdən sonra tox qarnına içilməlidir.
Gərəksiz yerə aspirin içən xəstələr də var
Əvvəllər
ürək-damar xəstəliyi olmayan sağlam insanlara, onları infarktdan və ya ürək-damar xəstəliyindən qorusun deyə,
həkimlər tərəfindən müəyyən yaşdan sonra aspirin içilməsi məsləhət görülürdü.
Elə indiki zamanda da bəzən həkimlər ürək-damar xəstəliyi olmayan insanlara
aspirin içməsini məsləhət görürlər. Bəzən də heç həkimin göstərişi olmadan
xəstə internetdən öyrəndiyi məlumatlar əsasında aspirin içməyə başlayırlar. Hər
iki hal da yanlışdır.
Məsələn, müayinə üçün poliklinikaya müraciət edən 50 yaşlı Cavid bəy 15 ildir siqaret çəkdiyini və daha öncə
onu müayinə edən həkimin hər gün 100 milliqram aspirin içməsini məsləhət
gördüyünü söylədi. O da hər gün aspirin içib. Poliklinikada bir başqa müayinə günlərimdən birində müayinə
olunan xəstəmiz 42 yaşlı Nailə xanım "Həkim, heç bir şikayətim yoxdur. İllər
öncə atam 40 yaşında infarkt keçirdi və dünyasını dəyişdi. Sadəcə olaraq, mən
də infarkt keçirməkdən qorxuram. İnternetdən araşdırdım və mənim də infarkt
keçirə biləcəyimi öyrəndim. Başqa bir həkim mənə aspirin içməyimi məsləhət
gördü” dedi.Başqa müayinə günümdə ürək-damar
xəstəliyi olmayan ancaq hipertoniya xəstəliyi olan 65 yaşlı Fidan xanım ürək-damar xəstəliyindən qorunmaq üçün hər gün aspirin içdiyini söylədi.
Əslində Cavid bəy siqaret çəkdiyi,
Nailə xanımın atası
cavan yaşda infarkt keçirdiyi və Fidan xanımın həm yaşı yuxarı olduğu, həm də hipertoniya xəstəliyi olduğu üçün onlarda belə
risk (infarkt keçirmə və ya ürək-damar xəstəliyinin ortaya çıxma riski) var.
Ancaq, həm Cavid bəyin, həm Nailə xanımın, həm də Fidan xanımın aspirin içməsi gərəksizdir. Ürək-damar
xəstəliyi olmayan sağlam insanlar
bəzi risk faktorlarını (hipertoniya, diabet, qanda xolesterinin normadan çox
olması) nəzarət altında tutarlarsa, siqaret çəkməyib düzgün şəkildə
qidalanarlarsa, mütəmadi idmanla məşğul olarlarsa və ideal çəkidə qalarlarsa, ürək-damar
xəstəliyinə tutulma riskləri azalar və uzun yaşama ehtimalları artar. Təbabət sübuta yetirilmiş əsaslara
dayanmalıdır. Bir dərmanın, müalicə metodunun, həyat tərzinin və ya qidanın
faydalı olub-olmadığını söyləmək üçün insanlar üzərində böyük və ətraflı
araşdırmalar aparılmalıdır.
Onların
aspirin içməsi niyə gərəksizdir?
Ürək-damar xəstəliyi olmayan 95000 sağlam insan üzərində aparılan böyük bir araşdırma nəticəsində
məlum olub ki, ürək-damar xəstəliyi olmayan (infarkt keçirməyən və ya
ürək-damarlarına və ya damarlarına stend taxılmayan və ya şuntlama əməliyyatı olmayan) insanlar
aspirin içdikləri zaman infarkt riski çox az azalır, ancaq bu insanlarda xüsusi
ilə də ciddi mədə-bağırsaq qanaxmaları riski yaranır. Ayrıca aspirin içənlərdə
beyin qanaxması riskinin də çox artdığı müəyyən edilib. Yəni aspirin içildiyi
zaman aspirinin zərəri, faydasıdan daha çox olur. Ürək-damar xəstəliyi olmayan
102000 sağlam insan üzərində yeddi il boyunca aparılan daha yeni bir araşdırma nəticəsində məlum olub ki, aspirin
içmək infarkt riskini 10 % azaldır, ancaq beyin qanaxması riskini 35 % ,
bədənimizin digər bölgələrində ciddi qanaxma riskini isə 62 % artırır. Nəticə
olaraq infarktdan və ya ürək-damar
xəstəliyindən qorusun deyə, sağlam insanların içdiyi aspirinin zərəri faydasından
çoxdur.
Son söz: Nəticə
olaraq bizə məlum olan son
araşdırmalara əsasən, ürək-damar xəstəliyi olmayan sağlam insanlar aspirin
içdikləri bunun faydası (infarkt keçirməkdən və ya ürək-damar xəstəliyindən qoruması) zərərindən (yəni
qanaxmalardan) daha azdır. Bir insan infarkt keçirmədiyi, ona stend
taxılmadığı, şuntlama əməliyyatı olmadığı və ya anjioqrafiyada ürək
damarlarında daralmalar müəyyən edilmədiyi, bir sözlə, ürək-damar xəstəliyi
olmadığı müddətcə aspirin içilməməlidir.
Uzm.
Dr. Yalçın Velibey
Kardiologiya
uzmanı