AŞ PA qətnamələri Azərbaycandakı reallığa uyğun deyil
Ekspertlər təəssüf edirlər ki, ölkəmizə qarşı qərəzli mövqedə dayanan
qruplar bu dəfə də assambleyaya təsir göstərə biliblər
Müstəqil xarici siyasət yürüdən,
inkişaf səviyyəsinə görə Cənubi Qafqazın lider dövlətinə çevrilən Azərbaycanda
hər hansı beynəlxalq səviyyəli tədbir, həmçinin parlament, bələdiyyə və
prezident seçkiləri keçirilməsi ərəfəsində bəzi maraqlı dairələr məqsədli şəkildə
ölkəmizi hədəfə alır. Xüsusən də xaricdəki erməni diaspor təşkilatlarının təsiri
altında olan beynəlxalq təşkilatlar, bir sıra siyasətçilər, deputatlar Azərbaycan
haqqında qərəzli, qeyri-obyektiv rəy formalaşdırmağa çalışır, ölkəmizin
dünyadakı nüfuzuna xələl gətirməyə müxtəlif cəhdlər edirlər. Avropa Şurası
Parlament Assambleyasının (AŞPA) qış sessiyasında yanvarın 28-də və 30-da qəbul
olunan iki qətnamə və orada yer alan qərəzli məlumatlar da bu qəbildəndir.
Britaniyalı deputat Corc Fulkesin müəlliflik etdiyi "Avropada media azadlığına
və jurnalistlərin təhlükəsizliyinə təhdidlər” adlı qətnamə, həmçinin
islandiyalı deputat Torhildur Sunna Evarsdottirin hesabatı əsasında hazırlanan
"Azərbaycanda siyasi məhbuslarla bağlı məlumatlar haqqında iş” üzrə qətnamədə əks
olunanlar, o cümlədən fransalı deputat Bernard Furnyenin əsassız ittihamları
heç bir halda Azərbaycan reallığı kimi qiymətləndirilə bilməz. Məhz buna görə də
AŞPA-nın qış sessiyasında hər iki sənədin müzakirəsi zamanı çıxış edən Azərbaycan
nümayəndə heyətinin rəhbəri Səməd Seyidov, üzvlər Sevinc Fətəliyeva, Naqif Həmzəyev,
Sahibə Qafarova, Asim Mollazadə sənədlərdəki müddəalar ilə qəti şəkildə
razılaşmayıblar. Rusiya, Türkiyə və bir sıra digər ölkələrin deputatları Azərbaycan
nümayəndə heyətini dəstəkləyib.
Azərbaycan
Mətbuat Şurasının sədri, millət vəkili Əflatun Amaşov mövzu ilə bağlı açıqlamasında bildirib
ki, AŞPA-nın "Avropada media azadlığına və jurnalistlərin təhlükəsizliyinə təhdidlər”
adlı qətnaməsində Azərbaycan mediası ilə bağlı əks olunmuş fikirlər reallıqdan
uzaqdır, qərəzli mahiyyət daşıyır: "Qətnamədə bildirilir ki, Azərbaycan
hakimiyyəti jurnalistlərə qarşı repressiyaları dərhal dayandırmalı, söz və
media azadlığını təmin etməli, mətbuat azadlığı və təhlükəsizliyi sahəsində Avropa
Şurası qarşısında götürdüyü öhdəlikləri yerinə yetirməsi üçün real addımlar
atmalıdır. Yaxşı olardı ki, belə bir mötəbər qurum tərəfindən Azərbaycanla
bağlı fikir bildirilərkən reallıq nəzərə alınaydı. Reallıq isə bundan ibarətdir
ki, ölkəmizdə cənab Prezident İlham Əliyevin rəhbərliyi ilə genişmiqyaslı
islahatlar aparılır. Ötən 2019-cu il islahatlar ili kimi yadda qalıb. Media bu
prosesin hərərkətverici qüvvəsi, böyük dəstəkçisi kimi çıxış edib və etməkdədir.
Biz hər gün ən müxtəlif kütləvi informasiya vasitələrində islahatçı baxışların
bölüşüldüyünü görürük. Ən əsası isə islahata qarşı çıxan meyllər də medianın sərt
tənqidinə məruz qalmaqdadır. Ümumən tənqid etmək Azərbaycan mediasının ruhundan
irəli gələn xüsusiyyətdir. Heç bir qüvvə onun azadlığını məhdudlaşdıra bilməz.
AŞPA-nın məlum qətnaməsində isə hansısa təqiblərdən, təhdidlərdən söz açılır.
Sanki Azərbaycan hansısa "üçüncü dünya” ölkəsidir. Belə yanaşma yolverilməzdir”.
Ə.Amaşov Azərbaycanın parlament seçkisi
ərəfəsində olmasına diqqət çəkərək vurğulayıb ki, mediamızın taleyüklü prosesdə
iştirak faizi olduqca yüksəkdir: "AŞPA-nın bunu görməsi lazım idi. Bəli, biz də
hər zaman bildirmişik ki, mediamız problemsiz deyil və çatışmazlıqları konkret
şəkildə göstərmişik. Əgər həqiqətən də söz və ifadə azadlığını, azad media dəyərlərini
düşünmək istəyi varsa, daha real məsələlərdən söz açılmalıydı. Görünür, kimlərsə
parlament seçkisi öncəsi Azərbaycanla bağlı mənfi rəy yaratmaq, cəmiyyəti bürüyən
demokratik ab-havanı, islahatçılıq əzmini gözdən salmaq niyyəti güdürlər.
AŞPA-nın məlum qətnaməsinin Azərbaycanla bağlı hissəsində jurnalistlərin dövlət
tərəfindən mənzillə təmin edilmələri kimi nəcib təşəbbüs onların guya ələ
alınması tədbiri kimi qiymətləndirilir. Ancaq hər kəs yaxşı bilir ki, indiyədək
jurnalistlər üçün inşa edilmiş iki binanın sakinlərindən heç biri bu dövlət təminatına
görə kimisə tənqid etməkdən uzaq dayanma diskonfortunu yaşamayıb. Əlbəttə, biz
jurnalistlərimizin öz əmək haqlarına özləri üçün mənzil ala bilmələrini, belə
bir mühitin yaranmasını arzulayırıq. Biz eyni zamanda KİV-lərimizin hər cür
dövlət dəstəyindən imtina edib sərbəst şəkildə işlərini quracaqları şəraitin
formalaşmasını istəyirik. Əslində dövlətin media siyasətinin məğzini də təşkil
edən bu məqamdır. AŞPA-nın "Avropada media azadlığına və jurnalistlərin təhlükəsizliyinə
təhdidlər” adlı qətnaməsinin Azərbaycan mediası ilə bağlı hissəsi ölkəmizin
media ictimaiyyətinin baxış və düşüncələrinə adekvat deyil. Ola da bilməz. Təəssüf
ki, Azərbaycana qarşı qərəzli mövqedə dayanan qruplar bir daha öz niyyətlərini
həyata keçirmək üçün AŞPA kimi nüfuzlu bir quruma təsir göstərə biliblər”.
Millət vəkili
Elman Məmmədov hesab edir ki, AŞPA-nın Azərbaycana qarşı növbəti dəfə qərəz nümayiş
etdirməsi başlıca olaraq ölkəmizdə olan tolerantlığı, inkişaf səviyyəsini həzm
edə bilməməsi ilə bağlıdır. Deputatın fikrincə, onların istəyi odur ki, Azərbaycana
qarşı təzyiqləri artırsınlar və ölkəmiz müəyyən məsələlərdə həmin dairələrin
dediyi ilə oturub-dursun: "İstəyirlər ki, Azərbaycan bilavasitə onların iradəsinə
tabe olsun. Ancaq cənab Prezidentimizin dediyi kimi, bu belə olmayıb və
olmayacaqdır da. Biz 2001-ci ildən Avropa Şurasına üzv olandan bu günə qədər
müxtəlif dövrlərdə Azərbaycana qarşı həmişə bu cür təzyiq vasitələrindən
istifadə olunub. Bu heç də təəccüblü deyil əksinə məqsədlidir. Hər bir şər-böhtan
kampaniyasının başlamağının bir səbəbi olur. Bu dəfə də ölkəmizdə davam edən
parlament seçkiləri ərəfəsində bu baş verir. 20 ildən çoxdur ki, onlar "siyasi
məhbus” məsələsi ilə məşğuldurlar”.
E.Məmmədov deyib ki, faktiki olaraq
"siyasi məhbus”ların özü, siyasi əxlaqsızlıq, insanlara qarşı cürbəcür təzyiqlər
və təhdidlər bu gün Avropada baş alıb gedir: "Avropada həbslər, dinlərdən, mədəniyyətlərdən
insanlara qarşı olan münasibət məhz Avropanın özünün böyük qüsurlarını göstərir.
Azərbaycan bunların hamısına bu günə qədər sinə gəlib, qələbə qazanıb və
inkişaf edir. 2001-ci ildə Avropa Şurası ilə bağlı dediyim bir fikri qeyd etmək
istərdim. Orada dedim ki, Avropa Şurası bir xristian klubu olaraq Ermənistan və
başqaları üçün bir müdafiə sistemi rolunu oynayacaq, ancaq Azərbaycan və Türkiyə
üçün həmişə boyunduruq rolunu oynayacaq. Dediklərim bu illər ərzində vaxtaşırı
öz təsdiqini tapır. Azərbaycan öz yolu ilə gedir və ölkəmizin öz siyasəti,
istiqaməti var. Azərbaycan bir çox məsələlərdə Avropa Şurasında təmsil olunan və
ölkəmizə qarşı qərəzli mövqe tutan o dövlətlərə nümunədir”.
Siyasi şərhçi
Aydın Quliyev də
bildirib ki, AŞPA-nın Azərbaycanda siyasi məhbuslar məsələsı ilə bağlı qətnaməsi
bu qurumun ölkəmizə qərəzli münasibətdə olan qüvvələrin təsiri altında işlədiyini
bir daha sübut edir. Onun sözlərinə görə, ermənipərəst dairələrin güclü olduğu
AŞPA-da belə qətnamənin qəbul edilməsi Azərbaycandakı real vəziyyətə uyğun
deyil və qətnamənin məhz qış sessiyası dövrünə düşməsi təsadüfi xarakter
daşımır: "AŞPA rəhbərliyi və məlum təsir altında olan deputatlar belə qətnamələr
üçün informasiyaları Azərbaycandakı radikal müxalifət çevrələrindən aldıqlarını
və onlarla əlbir işlədiklərini bir daha sübut etmiş olurlar. AŞPA
strukturlarının Azərbaycanın rəsmi dövlət orqanları, ictimaiyyətin tanıdığı
qeyri-hökumət sektoru və tərəfsiz media ilə mötəbər əməkdaşlıq münasibətləri
qurmaqda maraqlı olmadıqları özünü davamlı olaraq göstərir. Eyni zamanda,
AŞPA-nın qətnaməsi və Almaniyada hansısa deputatının guya Azərbaycanla qeyri-şəffaf
lobbiçilik əməkdaşlığında olduğu barədə işin düzülüb-qoşulması eyni prosesin tərkib
hissələridir və onların vahid anti-Azərbaycan mərkəzlərdən idarə olunduğu şübhəsizdir.
Azərbaycanda siyasi məhbus adı altında manipulyasiya edilən şəxslərin əslində
konkret kriminal əməllərlə bağlı olduğunu görməmək AŞPA üçün Azərbaycana qətiyyən
obyektiv münasibət göstəricisi sayıla bilməz. Tək son iki ildə Fransada 100-ə
yaxın, Almaniyada 30-dan çox jurnalistin xəsarətli zorakılıqlara məruz qalması
faktlarına AŞPA-nın artıq dərəcədə "dözümlü" yanaşması faktdır və Azərbaycanda
olmayan məsələni siyasi məhbus problemi kimi qətnamə altına salmağın arxasında
başqa mətləblərin olduğu qənaətinə gəlməyə əsas verir".
Ekspert bildirib ki, dünyada Azərbaycanın
möhkəmlənən mövqeyi və Dağlıq Qarabağ məsələsinin həlli prosesində pozitiv tərpənişlər
özünü göstərən kimi Avropadakı bəzi pərdəarxası qüvvələr fəallaşır: "Bu
motivin təsiri altında isə insan hüquqları, demokratiya və siyasi məhbuslar
mövzusu həmin qüvvələrin əlində dəyişməyən daimi manipulyasiya və təzyiq
üsuluna çevrilir. Avropa parlamentinin bu yaxınlarda Azərbaycanın ərazi
bütövlüyünü dəstəkləyən qətnamə qəbul etməsini və Cenevrədə Qarabağ
danışıqlarının Ermənistan üçün çox gərgin keçəcəyinin əvvəldən məlum olmasını
görünür bəzi qüvvələr qəbul edə bilmədilər. Həqiqətən də yaxın həftələrdə
Avroparlamentin tanınmış sərhədlər daxilində Azərbaycanın ərazi bütövlüyünü dəstəkləyən
sənədi qəbul etməsinə qarşı erməni lobbisinin səyləri nəticəsiz qaldı. Cenevrədə
isə XİN rəhbərlərinin tarixdə Ermənistan üçün ən gərgin keçmiş görüşünü baş
nazir Paşinyanın öncədən pozmağa yönəlmiş səyləri də iflasa uğradı. Bütün
bunlar beynəlxalq miqyasda Ermənistan üçün getdikcə daha əlverişsiz mövqenin
yarandığını sübut edən faktlardır".
Alpər
TURAN