Arıçını bal tutmağa vadar edəcək qərar
Balı sağlamlığımız üçün
olduqca faydalı, dadlı məhsullardandır. Hətta, bir çox xəstəliklərin
müalicəsində də baldan istifadə edilir. Bu qədər xeyirli bir məhsulun necə
ərsəyə gəldiyini, hansı çətinliklərdən keçərək bizim ağzımızı dadlandırdığını
bilmək maraqlı olardı. Bu işdə arıçıların rolu böyükdür. Arıçılıq xalqımızın
lap qədimdən məşğul olduğu peşə sahələrindən biridir. Hazırda bölgələrdə bu
işlə məşğul olan, ailəsini, sırf bu işdən qazandığı vəsaitlə dolandıranlar
çoxdur. Əlbəttə, bu iş necə çətin və əziyyətli olduğu da şəksizdir. Çünki bütün
günü arıların içərisində olmaq, onlara qulluq etmək, bal hazır olduqdan sonra
onu süzmək asan deyil. Çox təəssüf ki, bu sahəyə də haram qatanlar var. Bəzi
işbazlar bazara saxta bal çıxardaraq, əsl zəhmətkeşlərin əməyini heçə endirir.
Bala olan inamı öldürürlər. Belələri ilə mübarizə aparmaq və arıçılıq sahəsini
inkişaf etdirmək üçün dövlət səviyyəsində tədbirlər görülür. Belə ki, Azərbaycanda noyabrın ortalarından
etibarən arıçılıq təsərrüfatı olan şəxslərə, arı ailələrinin sayına görə dövlət
tərəfindən subsidiyaların verilməsinə başlanılacaq. Bunu Trend-ə Kənd
Təsərrüfatı Nazirliyinin ictimaiyyətlə əlaqələr və informasiya təminatı
şöbəsinin müdir müavini Vüqar Hüseynov deyib.
Onun sözlərinə görə, Nazirlər
Kabinetinin təsdiqlədiyi "Arıçılıqla məşğul olan fiziki və hüquqi şəxslərə
saxladıqları hər arı ailəsinə (pətəyə) görə subsidiya verilməsi qaydası"na
əsasən, arıçıya hər arı ailəsinə görə illik 10 manat subsidiya veriləcək: "Əgər
arıçının təsərrüfatında 100 arı ailəsi identifikasiya kodu ilə qeydiyyata
götürülübsə, onda ona illik 1000 manat subsidiya veriləcək. Arıçıların
təsərrüfatlarındakı arı ailələrinin sayı dəqiqləşəndən sonra Dövlət Aqrar
İnkişaf Mərkəzi nazirliyin komissiyası ilə birlikdə şəxsə arayış verəcək.
Arayış nazirliyin subsidiya komissiyasına təqdim ediləcək və vəsait arıçının
hesabına köçürüləcək”.
Nazirlik rəsmisi əlavə edib
ki, subsidiyalar bu ildən başlayaraq, 5 il ərzində veriləcək. Bu müddət daha
sonra artırıla da bilər. V.Hüseynov əlavə edib ki, oktyabrın ortalarından
başlayaraq, Kənd Təsərrüfatı Nazirliyində yaradılmış xüsusi komissiya bölgələr
üzrə arı ailələrinin pasportlaşdırılmasına başlayacaq və hər arı ailəsinə
identifikasiya kodu veriləcək. Bunun əsasında ilk dəfə olaraq, Azərbaycandakı
arı ailələrinin dəqiq statistikası aparılacaq: "İndi arı ailələrinin sayı ilə
bağlı müxtəlif rəqəmlər var. Bəziləri Azərbaycanda 300 min, bəziləri isə 360 min
arı ailəsinin olduğunu deyirlər. Amma tam qeydiyyat aparıldıqdan sonra onların
sayı dəqiqləşdiriləcək”. V.Hüseynov qeyd edib ki, subsidiyanın verilməsinin əsas məqsədi arıçılığın inkişafına dövlət dəstəyi göstərmək, arı ailələrinin genofondunu qorumaqdır: "Arıçılar məhsul yığımında arının balını tam olaraq götürürlər. Bu halda, arılar qida problemi ilə üzləşdiyindən, mart-aprel ayında artıq arı ailələrinin çoxu məhv olur. Buna görə də, dövlət subsidiya verir ki, arının balını özünə saxlasınlar, arı ailələri ölməsin”.
V.Hüseynov əlavə edib ki, subsidiyaların verilməsi arıçılıq məhsullarının ixrac imkanlarını genişləndirə bilər. Bu sahədə fəaliyyət göstərən mütəxəssislərlə həmsöhbət olub, atılan addımın növbəti mərhələdə arıçılığın inkişafına necə təsir edəcəyini, hansı effektlərin əldə olunacağını öyrənməyə çalışdıq.
"Şəfa” bal markasının yaradıcısı Osman Kazımov özü mühəndis olsa da, babasının və atasının peşəsini davam etdirir. Hazırda istehsal etdikləri balın satış işi ilə məşğul olur. Osman deyir ki, arıçılara subsidiyaların verilməsi bu sahənin inkişafı üçün olduqca yaxşıdır: "Subsidiyaların verilməsi ilk növbədə, arıçılara maddi olaraq dəstək deməkdir. Bu addım arıçıların işə olan sevgisini artıracaq. Çünki hazırda bu işlə məşğul olan sahibkarların bir çoxu mənfəət əldə etmək üçün arıları saxlayır. Bundan başqa, daha çox qazanc üçün arı pətəklərinin sayı artırılacaqdır. Həmçinin, bu addım bazarda saxta balın azalmasına da səbəb olacaq. Çünki bəzi dələduzlar pətəkləri az olduğundan, məhsulu da az istehsal edirlər, amma tərkibinə başqa maddələr qataraq, satışa çıxarırlar. Bu da insanlarda bala olan inamı qırır. Onlara, hətta, təmiz bal da təklif etsək, almırlar. Düşünürəm ki, arı ailələrinin pasportlaşması bu problemin həlli üçün əhəmiyyətli olacaq”. Həmsöhbətim bildirdi ki, atılan addım iqtisadi baxımdan da əlverişlidir: "Səhv etmirəmsə, hazırda bala olan ehtiyacımız 180 tondur, yerli istehsal bunun yalnız 150 tonunu təmin edə bilir. Qalan 30 tonu xaricdən alırıq. Bu da valyutanın ölkədən çıxmasına səbəb olur. Amma qeyd edilən bu addımlar atıldığı zaman, yerli istehsal nəinki özünü təmin etməklə kifayətlənər, hətta, ixrac potensialını da genişləndirər. Yəni subsidiyaların verilməsi ilə arıçılar saxladıqların arı ailələrinin sayını artırmaqda maraqlı olacaqlar ki, bu da növbəti il üçün daha çox bal istehsalı deməkdir. Bazarda məhsulun çox olması, onun aşağı qiymətə satılmasına da şərait yaradacaq”.
"Ballı”
bal brendinin yaradıcı Rəşad Rəşidov deyir ki,
bu addım ilk növbə balın maya dəyərinin aşağı düşməsinə səbəb olacaq:
"Subsidiyaların verilməsi ilə arıçılar müəyyən xərclərini həmin vəsait hesabına
ödəyəcəklər. Bu da bazarda balın qiymətinin ucuzlaşmasına təsir edəcək. Arı
ailələrinin qeydiyyatının aparılmasının çox böyük üstünlükləri var. Bu
qeydiyyat, gələcəkdə regionların statistikası aparılarkən hansı bölgənin daha
məhsuldar olmasından xəbər verəcək. Düşünürəm ki, dövlətin arıçılara olan bu
dəstəyi onları daha da stimullaşdıracaq və növbəti mərhələlərdə bu sahənin
ciddi şəkildə inkişafına və coğrafi olaraq genişlənməsinə imkan yaradacaq. Bu
da yerli istehsalın həcminin artmasında, idxalın azalmasında böyük rol oynayacaq”.
Məlumat üçün qeyd edək ki,
8 oktyabr tarixində Bakıda Arıçılıq
Məhsullarının 19-cu Respublika Sərgi-Satış Yarmarkasının rəsmi açılış mərasimi
olub. Yarmarka Bakı şəhəri, Nərimanov rayonu, Fətəli xan Xoyski
prospekti, 10 ünvanında (Tofiq Bəhramov adına Respublika Stadionunun ərazisi)
keçirilir.
Kənd Təsərrüfatı Nazirliyinin
mətbuat katibi Anar Hüseynov bildirib ki, yarmarkada dünən sınaq satışı
həyata keçirilib: "Əsas məqsədimiz yarmarkada təqdim olunan arıçılıq
məhsullarının satışını təmin etməkdir. Havanın temperaturunun kəskin dəyişməsi
ilə əlaqədar yarmarka bir-iki gün yubandı. Buna görə də zərurət yaranarsa və
arıçılar satışın bir neçə gün də davam etməsini istəyərlərsə, sərgi-satış
yarmarkası üçün göstərilən vaxt uzadıla bilər”.
Nazirliyin rəsmisi onu da
bildirib ki, yarmarkanın təxirə salınması arıçılıq məhsullarının
saxlanılmasında heç bir problem yaratmayıb: "Dövlət Aqrar İnkişaf
Mərkəzlərimizə müraciət etdik ki, 5-28 oktyabr tarixlərində bal yarmarkası
keçiriləcək və yarmarkada iştirak etmək istəyən şəxslər öz adlarını iqtisadi
zonalarına, vaxtlarına uyğun olaraq, təqdim edə bilərlər. Təqdim edilən siyahı
əsasında da sentyabrın 30-na kimi Tofiq Bəhramov adına Respublika Stadionunda
xüsusi anbarda məhsulların təhvili prosesi həyata keçirilib. Məhsulun hansı
regionun və kimə məxsus olmasını aydınlaşdırmaq üçün anbarda rəqəmlərlə
kodlaşdırma aparılıb. Qida Təhlükəsizliyi Agentliyi tərəfindən 3974 bal
nümunəsi ekspertizadan keçirilib və təqribən 900 nümunənin keyfiyyətsiz olduğu
aşkar edilib. Nəticədə 30 tona yaxın keyfiyyətsiz hesab edilən bal məhsulları
xüsusi anbara yığılaraq satışdan çıxarılıb. Yarmarkanın təxirə salınması isə
anbardakı balların keyfiyyətinə mənfi təsir etməyib”. Günel Azadə