“Aprel döyüşləri bizim barışmaz ruhumuzun təzahürüdür”
Ermənistan-Azərbaycan,
Dağlıq Qarabağ münaqişəsinin danışıqlar yolu ilə həllinə məsul olan ATƏT-in
Minsk qrupunun fəaliyyəti heç bir nəticə vermir. Minsk qrupunun həmsədr
dövlətləri Rusiya, ABŞ, Fransa Ermənistanı işğalçılıq siyasətindən çəkindirə
bilmir, Azərbaycanın ərazi bütövlüyünün sülh yolu ilə təmin edilməsi
istiqamətində hər hansı addım atılmır. Belə olan təqdirdə Azərbaycan dövləti indiyə
qədər olduğu kimi, yenə də Silahlı Qüvvələrimizin gücləndirilməsini prioritet
sayır. Düzdür, hələlik rəsmi Bakı sülh danışıqlarından imtina etmir, lakin bu
danışıqların heç bir nəticə verməyəcəyinə tam əminlik olduğu təqdirdə,
Azərbaycan müharibə yolu ilə ərazi bütövlüyünü təmin edəcək. Cari ildə yüz
illiyini qeyd edən, ən müasir silah-sursatla təchiz edilən, yüksək
mənəvi-psixoloji ruha, vətənpərvərliyə, peşəkarlığa sahib olan Azərbaycan
Ordusu Ali Baş Komandan İlham Əliyevin istənilən tapşırığını yerinə yetirməyə
hazırdır. 2016-cı ilin aprel döyüşləri və Lələtəpə yüksəkliyinin və ətraf
ərazilərin, həmçinin bu ilin may ayında Naxçıvanda Günnüt əməliyyatının
keçirilməsi və 11 min hektar ərazinin düşməndən azad edilməsi Silahlı Qüvvələrimizin
gücünün, qüdrətinin göstəricisidir. Bu faktlar bir daha sübut edir ki,
Azərbaycan müharibə yolu ilə öz ərazilərini işğalçı Ermənistanın silahlı
birləşmələrindən təmizləməyə tam qadirdir.
Ağdam rayonuna səfəri
zamanı ictimaiyyət qarşısında çıxış edən Prezident İlham Əliyev bu məsələ
üzərində xüsusilə dayanıb. Qeyd edib ki, Ermənistanın yeni rəhbərliyi işğal
edilmiş torpaqlarımızdan öz işğalçı qüvvələrini tezliklə danışıqlar yolu ilə
çıxarmalıdır: "Aprel döyüşləri bizim barışmaz ruhumuzun təzahürüdür. Azərbaycan
xalqı və dövləti heç vaxt işğalla barışmayacaq. Aprel döyüşləri nəticəsində
Ermənistan tərəfindən uzun illər ərzində yaradılan mif darmadağın edildi. Bu
döyüşlər onu göstərdi ki, Azərbaycan Ordusu istənilən vəzifəni icra etməyə
qadirdir, buna hazırdır və biz bunu sübut etdik... Ermənistanın acı hərbi
məğlubiyyəti onun möhkəm olmayan sütunlarını tam sıradan çıxardı. Bu ilin
yazında Ermənistanda baş vermiş hadisələr bunun bariz nümunəsidir. Məhz 2016-cı
ilin aprel ayında Ermənistanın işğalçı rejiminə çox böyük zərbə vuruldu və
onlar öz işğalçılıq siyasətinin qurbanına çevrildilər”.
Prezident İlham Əliyev
bildirib ki, Azərbaycan tərəfi bundan sonra da Ermənistanı bütün regional
layihələrdən təcrid edəcək, bütün vasitələrdən istifadə olunaraq ərazi
bütövlüyümüz bərpa ediləcək. Dövlət başçısının sözlərinə görə, Ermənistanın
yeni rəhbərliyi əvvəlki kriminal rejimin səhvlərini təkrarlamamalı, işğal
edilmiş torpaqlardan öz işğalçı qüvvələrini tezliklə danışıqlar yolu ilə
çıxarmalı və imkan verməlidir ki, Azərbaycan vətəndaşları öz doğma, tarixi,
əzəli torpağına qayıtsınlar: "Bunu nə qədər tez anlasalar, o qədər də onlar
üçün yaxşı olar, bölgə üçün yaxşı olar. Bir daha demək istəyirəm ki, biz bu
vəziyyətlə barışmaq fikrində deyilik, beynəlxalq hüququn normaları bizim
mövqeyimizi tam dəstəkləyir, tarixi ədalət bizim tərəfimizdədir... Bu gün
Azərbaycan hərbi baxımdan nəinki Ermənistanla müqayisədə, dünya miqyasında
güclü dövlətlər sırasındadır. Biz hərbi qüdrətimizi bundan sonra da artıracağıq
və hesab edirəm ki, bu, danışıqlar üçün ən vacib amillərdən biridir. Çünki,
əfsuslar olsun, beynəlxalq hüququn normaları tamamilə kənara qoyulur. Biz
istədiyimizə nail olacağıq. Biz ədalət tələb edirik. Biz tələb edirik ki,
tarixi torpaqlarımız işğalçılardan azad edilsin və ediləcəkdir... Azərbaycan
dövləti bu müqəddəs məqsədə çatmaq üçün bundan sonra da bütün lazımi tədbirləri
görəcək. Ümid edirəm ki, Ermənistan rəhbərliyi bölgədə yaranmış vəziyyəti
düzgün təhlil edərək, öz işğalçı qüvvələrini tezliklə bizim torpaqlarımızdan
geri çağıracaqdır. Əks təqdirdə, istənilən variant mümkündür və biz istənilən
varianta hazırıq”.
Milli
Məclisin Müdafiə, təhlükəsizlik və korrupsiya ilə mübarizə komitəsinin üzvü,
Milli Dirçəliş Hərəkatı Partiyasının (MDHP) sədri Fərəc Quliyev mövzu ilə
bağlı "Kaspi”y”ə bildirib ki, Azərbaycan Prezidentinin düşmənlə sərhəd
rayonlarda, cəbhə xəttinə yaxın yaşayış məntəqələrində olması, orada yaşayan
insanlarla birbaşa ünsiyyətdə olması, milli iradəni ifadə etməsi, düşmənə açıq
mesajlar verməsi təqdirəlayiq haldır: "Bir çox məmurlar nədənsə ehtiyat edərək
yaxalarını kənara çəkirlər. Lakin ölkə başçısı İlham Əliyev cəsarətlə milli
iradəni ifadə edir, açıq fikirlər bildirir. Ağdam rayonuna səfəri çərçivəsində
Prezident İlham Əliyev bir daha Dağlıq Qarabağ probleminə toxundu, münaqişənin
həlli ilə bağlı mühüm mesajlar verdi. O, Azərbaycanın güclü olduğunu, ədalətə
və öz gücünə güvəndiyini, torpaqlarımızı heç kimə güzəştə getməyəcəyimizi, hər
hansı kompromisə imza atmayacağımızı, mövcud status-kvonun qəbuledilməzliyini
vurğuladı. Bu, həm xaricə və düşmənlərimizə, həm də daxilə verilmiş çox ciddi
mesajdır. Bununla bəyan edilib ki, hər kəs istənilən situasiyaya hazır
olmalıdır. Ümummilli mənafeyi nəzərə alaraq hər bir vətəndaş bu çağırışlara dəstək
olmalı, Prezidentin ətrafında toplanmalıdır. Bizim Ordumuz və diplomatiyamız
kifayət qədər güclüdür. Beynəlxalq hüquq bizim tərəfimizdədir, dünyada haqlı
mövqeyimizi dəstəkləyən dövlətlər artmaqda, strateji müttəfiqlərimizin sayı
çoxalmaqdadır. Artıq bu məsələ də hər kəsə bəllidir ki, ermənilər dinc yolla
torpaqlarımızı azad etmək istəmirlər. Belə olan təqdirdə bizim başqa yolumuz
qalmır, seçim imkanlarımız tükənir, müharibə yolu ilə ərazi bütövlüyümüzü təmin
etmək yeganə vasitəyə çevrilir”.
Millət
vəkili, politoloq Elman Nəsirov da hesab edir ki, Prezident İlham Əliyev
Ağdam rayonunda ictimaiyyət qarşısında çıxış edərkən Dağlıq Qarabağ
münaqişəsinin həlli ilə əlaqədar mühüm mesajlar verib. Politoloqun fikrincə,
aprel döyüşlərini xatırladan dövlət başçısı bu hadisə ilə Ermənistan
hakimiyyətinin sütunlarının sarsılmasına, ardınca düşmən ölkədə baş
verənlərə diqqət çəkib: "Prezident İlham
Əliyev işğalçı Ermənistanın yürütdüyü siyasətin iflasa uğradığını dilə gətirdi.
Əgər işğalçılıq siyasəti Ermənistana xeyir gətirsəydi, düşmən ölkədə böhran
yaşanmasını, inqilabi proseslərin baş verməsini müşahidə etməzdik. Bizim
işğalçı dövlətə münasibətdə tətbiq etdiyimiz siyasətimiz, yəni təcridetmə
siyasətimiz öz bəhrəsini verib. Prezidentimiz bu amili də xüsusi olaraq qeyd
etdi. İşğal altındakı torpaqlarımızın dinc yolla geri qaytarılmasına
çalışdığımız növbəti dəfə bəyan edildi. Ancaq aprel döyüşlərini xatırlayan
dövlət başçısı bildirdi ki, Azərbaycan hərbi yolla da torpaqlarını işğaldan
azad etməyə qadirdir. Buna bizim gücümüz və potensialımız var. Bu kimi çoxsaylı
həqiqətləri dövlət başçısı bir daha dilə gətirdi. Bütün bunlar Ermənistan
siyasi rəhbərliyi üçün ciddi mesajdır. İşğalçı dövlətin yeni hakimiyyəti
olanlardan nəticə çıxarmalı, özündən əvvəlkilərin qeyri-konstruktiv, işğalçı
siyasətini təkrarlamamalıdır. Əks təqdirdə Azərbaycan istənilən varianta
hazırdır. Prezidentin fikirləri bir daha dünyaya göstərdi ki, Dağlıq Qarabağ
münaqişəsi Azərbaycanın ərazi bütövlüyü çərçivəsində həll olunmalıdır. Bunun
alternativi yoxdur”.
Milli
Məclisin Gənclər və idman komitəsinin üzvü Naqif Həmzəyev də bildirib
ki, Prezident İlham Əliyevin Ağdam
Muğam Mərkəzinin açılışı zamanı dilə gətirdiyi fikirlər Azərbaycan xalqının nəyin bahasına olursa-olsun, doğma
torpaqlarımızı azad etmək əzmində olduğundan xəbər verir. Millət vəkilinin
sözlərinə görə, dövlət başçısının
düşmənlə təmas xəttinə yaxın ərazidə səsləndirdiyi hər bir bəyanat yağı düşmənin caynaqları arasında çırpınan Qarabağın
tezliklə xilasının müjdəsidir: "Bu gün Azərbaycanın güclü, ən müasir
texnologiyaya əsaslanan peşəkar Silahlı Qüvvələri var. Ordumuz düşməni əzəli
torpaqlarımızdan qovub çıxarmağa tam qadirdir. Heç şübhəsiz, tezliklə
Azərbaycan Prezidenti, Ali Baş Komandan İlham Əliyevin rəhbərliyi altında
hərtərəfli inkişafımız, mənəvi intibahımız Dağlıq Qarabağ və işğal altındakı
digər ərazilərimizin xilası ilə davam edəcək. Dağlıq Qarabağ bizim yeni, böyük
zəfərlərimiz kimi tarixə yazılacaq. Həsrətlə doğmalarının yolunu gözləyən
Şuşada, Laçında, Kəlbəcərdə, Qubadlıda, Xocalıda, Zəngilanda, bütünlüklə Qarabağda
üçrəngli bayrağımız dalğalanacaq”.
Rufik
İSMAYILOV