“Antimilli qruplaşmalar tam marginallaşıb”
Prezident İlham Əliyev
aprelin 18-də Milli Məclisdəki andiçmə mərasimində geniş nitq söyləyərək,
Azərbaycan reallıqları, daxili və xarici siyasət kursu barədə, həmçinin son 15
ildə əldə edilən uğurlardan, qarşıda duran vəzifələrdən danışıb. Prezident
çıxışında ölkəmizdə siyasi mübarizə mədəniyyəti istiqamətində müsbət meyillərin
müşahidə olunmasına da diqqət çəkib. Bildirib ki, prezident seçkiləri
kampaniyası bunu bir daha nümayiş etdirib. Namizədlərin çıxışlarında kifayət
qədər kəskin tənqidi fikirlər səsləndiyini xatırladan dövlət başçısı bunu alqışladığını,
müsbət hal kimi qiymətləndirdiyini vurğulayıb. Qeyd edib ki, bu, siyasi mübarizənin
düzgün istiqamətdə inkişaf etməsindən xəbər verir. O, prezident seçkiləri
kampaniyası zamanı namizədlər tərəfindən qaldırılmış məsələlərə diqqətlə
baxılacağını və dəyərli təkliflərin nəzərə alınacağını söyləyib.
Son 15 ildə Azərbaycanda
siyasi mübarizənin sivil qaydada təmin olunduğunu dilə gətirən prezident İlham
Əliyev antimilli qruplaşmaları sərt tənqid edib. Deyib ki, həmin qruplaşmalar
tam marginallaşıb: "Bu seçkilər bir daha göstərdi ki, onların Azərbaycanın
siyasi səhnəsində yeri yoxdur. Onların yerini Azərbaycan xalqı çoxdan müəyyən
edib, bu da tarixin zibilxanasıdır. Xarici qrant, ianə hesabına fəaliyyət
göstərən, öz dövlətinə qarşı çıxış edən, bir çox hallarda milli satqınlıq
nümayiş etdirən ünsürlərə Azərbaycan xalqı bir daha öz yerini göstərdi.
Seçkilərdən əvvəl və seçkilərdən sonra onların təşkil etdikləri yığıncaqlar bir
daha onu göstərir ki, Azərbaycan xalqı heç vaxt imkan verməz ki, xaricdən idarə
olunan qruplaşma Azərbaycanda hansısa mövqeyə sahib olsun. Biz bundan sonra da
demokratik inkişafla bağlı səylərimizi artıracağıq, gələcək fəaliyyətimizdə də
bu istiqamət önəmli yer tutacaqdır”.
Bütöv
Azərbaycan Xalq Cəbhəsi Partiyası (BAXCP) sədrinin müavini, siyasi şərhçi Elçin
Mirzəbəyli hesab edir ki, Prezident İlham Əliyev indiyə qədər Azərbaycanda
ayrı-ayrı dövlətlərin maraqlarını ifadə etməyə çalışan, müxtəlif xarici
kəşfiyyat strukturlarının nüfuz müvəkkilliyini yerinə yetirən qüvvələr haqqında
danışıb. Bildirib ki, həmin insanlara Azərbaycan xalqı çoxdan "qırmızı kart”
göstərib: "Bu gün onların ölkənin ictimai rəyinə, bütövlükdə siyasi proseslərə
hər hansı təsir etmək imkanı yoxdur. Azərbaycan dövləti uzun illərdir ki,
siyasi partiyaları, qeyri hökumət təşkilatlarını, kütləvi informasiya
vasitələrini dəstəkləmək, müdafiə etmək istiqamətində konseptual addımlar atıb.
Çoxpartiyalı sistemin inkişaf etdirilməsi üçün qanunvericiliyə müvafiq
dəyişikliklər edilib. Bu gün siyasi partiyalar fərqli baxışlarından asılı
olmayaraq dövlət büdcəsindən maliyyələşdirilir. Eyni yanaşma qeyri-hökumət
təşkilatlarına və kütləvi informasiya vasitələrinə də tətbiq edilir. Bütün
bunlar onu deməyə əsas verir ki, Azərbaycanda vətəndaş cəmiyyəti quruculuğu
istiqamətində mühüm işlər görülüb və bu işin arxasında bilavasitə Azərbaycan
dövləti dayanır. Ona görə də hazırda ümumilikdə ölkə vətəndaşının, o cümlədən
aktiv təbəqənin hər hansı formada xaricdən asılılığı yoxdur”.
Müxalif partiya funksioneri
deyib ki, dövlətinə, xalqına xəyanət edən istənilən şəxs tarixin zibilxanasına
atılır: "Biz yaxın tariximizdə də bu prosesin necə baş verdiyinin şahidi
olmuşuq. Bu gün Azərbaycan tarixində əliheydər qarayevlərin adları necə
çəkilirsə, yaxın-uzaq tariximizdə, eləcə də müasir dövrümüzdə eyni əməli
törədənlərin adları indi də, gələcəkdə də elə o cür xatırlanacaq. Dövlətə,
millətə, xalqa xəyanət edənlər heç zaman bağışlanmır. Heç bir xalq belə
adamları sevmir, qəbul etmir. Heç bir dövlətin, ölkənin tarixində belə
insanların adı qalmır”.
Prezident İlham Əliyevin
səsləndirdiyi fikirlərlə bağlı mövqeyini "Kaspi”yə bölüşən Vəhdət Partiyasının sədri, millət vəkili Tahir Kərimli qeyd edib
ki, dövlət başçısı çıxışı zamanı Azərbaycanda radikal müxalifətə də tutarlı
cavab verib və onlara olmayan yerlərini göstərib: "Dövlət başçısının
çıxışı çox əhəmiyyətlidir və hesab edirəm ki, növbəti 7 il Azərbaycan üçün daha
böyük inkişaf erası olacaq. Cənab Prezidentin and içərək yenidən prezidentlik
fəaliyyətinə başlayan kimi şəhid ailələrinə birdəfəlik müəvinətlərin verilməsi
barədə fərman imzalaması yüksək səviyyədə qiymətləndirilməlidir”.
Millət
vəkili, Demokratik İslahatlar Partiyasının sədri Asim Mollazadə bildirib ki,
Azərbaycan qanunvericiliyinə görə siyasi partiyaların xaricdən maliyyələşməsi
qadağandır. Onun fikrincə, məhz qanun çərçivəsində hərəkət edərək, xaricdən
maliyyə yardımı almağa cəhd edən siyasi partiyaların qarşısını almaq olar.
Partiya sədri deyib ki, paralel olaraq, siyasi təşkilatlara dövlət tərəfindən
verilən dəstək daha da artırıla bilər: "Azərbaycan dövlətinin ən əsas amili
onun müstəqilliyidir. Müstəqil dövlətin müstəqil xarici siyasət həyata
keçirməsi üçün güclü iqtisadiyyata sahib olması da əsas şərtdir. Müstəqil
dövlətin siyasi sisteminin formalaşmasında xarici qüvvələrin və ölkələrin heç
bir rolu ola bilməz. Əminəm ki, Azərbaycan daha da inkişaf etdikcə bu istiqamətdə
zəruri addımlar atılacaq. Fikrimcə, Azərbaycanda çoxrəngli siyasi palitranın
yaradılması üçün ölkənin sosial-iqtisadi həyatında bir sıra tədbirlər həyata
keçirilməlidir”.
Rufik
İSMAYILOV