Antalyanın qış nağılı - Fotolar
Türkiyənin
Aralıq dənizi sahillərinin məşhur istirahət mərkəzləri çoxdan milyonların rəğbətini
qazanıb. "Euromonitor International”
tədqiqat kompaniyasının ən çox ziyarət edilən dünya şəhərləri haqda dərc etdiyi
məlumatda Paris, Roma, Honkkonq, Kuala Lumpur, Seul, Mayami, Məkkə şəhərləri ilə
yanaşı Antalyanın da adı yer alıb. Ölkənin ikinci paytaxtı sayılan Antalyanın
bu siyahıda yer almasının əsas səbəbi həm yay, həm də qış turizminin insanların
istirahətinə imkanlar açmasıdır. Təbiət turistlərin istirahət üçün Antalyadan
heç nəyi əsirgəməyib: şəhəri hər tərəfdən əhatə edən Toros dağları, gözəl çimərliklər,
Aralıq dənizinin mavi suları, qızılı çimərliklər, çeşidli yeməklər təklif edən
kafe və restoranlar, canlı musiqisi ilə ovqatı təzələyən əyləncə məkanları, ətirli
türk qəhvələri, tarixi məkanlar, qədim tramvayların bizim artıq tarixə
qovuşdurduğumuz səsi...
Avropanın,
keçmiş sovet ölkələrinin və Yaxın Şərqin insanları bu bölgədə istirahətə
üstünlük verirlər. Xüsusən Rusiyadan, Ukraynadan, Çindən, ərəb ölkələrindən
olan turistlər çoxluq təşkil edir. Rusiyalı turistlər üçün təkcə yay aylarında
deyil, qış aylarında da Antalya ideal məkan sayılır. Onlar qış aylarından
başlayaraq yaya evlər sifariş edirlər. Hətta Antalyada ev alıb yaşayan, biznes
quran və müxtəlif işlərdə çalışan ruslar da kifayət qədərdir.
Qışda Antalya
körfəzində yerləşən mehmanxanaların əlverişli qiyməti turistləri cəlb edir. Hərçənd
çoxları Antalyanı istirahət üçün yay aylarında seçir, qış fəslində iqlimin nə qədər
gözəl olduğunu fərqinə varmırlar. Amma qış aylarında "İstirahətə hara gedək?”
dilemması ilə üz-üzə qalanlar üçün Antalya təkcə yay turizminin deyil, həmçinin
qış turizminin qapılarını açır. Oktyabrdan başlayıb aprelə qədər davam edən qış
mövsümünün isə burada xüsusi özəllikləri var. Bu müddətdə vaxtını dörd divar
arasında keçirənlərə Antalyanın beşulduzlu otellərində «hər şey daxil» gecəsi cəmi
19 avroya təklif olunur. İnternet axtarışlarında və ya turist agentlərində daha
ucuz qiymətə turpaketlər tapmaq olar. Müştərilər arasındakı güclü seçim rəqabəti
mehmanxanaları qiymətlərdə güzəştə getməyə məcbur edir. Xüsusilə də qış
aylarında. Bu da əlbəttə ki, turistlərin ürəyincədir. Məlumatlara görə, təkcə
yay aylarında 12 milyondan çox turistin səfər etdiyi Antalyada yerləşən
dördulduzlu və beşulduzlu otellərin sayı iki mini keçir, çarpayıların sayı 360
minə çatır. Əgər bura ikiulduzlu və üçulduzlu otelləri də əlavə etsək,
pansionatlarla birlikdə Antalyanın kurortları eyni vaxtda yarım milyon turisti
qəbul edə bilir. Ən üstün cəhət otellərin qiymətinin insanların cibinə görə dəyişməsidir.
Beşulduzlu oteldən tutmuş hostellərə qədər
əlverişli şərtlərlə turistləri cəlb edir. Bu amil də turizmin inkişafında
böyük rol oynayır.
Yağışın əlindən qaçıb...
Qış tətili
zamanı Antalyaya səfərimdə bölgədəki abı-havanın yaydan heç də az maraqlı
olmadığının şahidi oldum. Hava limanından şəhərin müxtəlif istiqamətlərinə hərəkət
edən avtobuslar gələn qonaqları mütləq taksi xidmətindən istifadə etmək məcburiyyəti
ilə üz-üzə qoymur. 6 lirə ödəyib illik kart almaqla yüklədiyin pul müqabilində
marşrutda hərəkət etmək hüququ qazanırsan. Odur ki, təyyarədən enən sərnişinlər
transferləri olmadığı halda daha çox avtobusla hərəkət etməyə üstünlük verirlər.
Sonra isə yaşıl
palma ağacları, rəngbərəng güllərin, üzərində sapsarı portağalları ilə diqqət çəkən
ağacların sıralandığı yollar turistləri getdikləri məkana yönəldir.
Qış aylarında
Antalyaya gələn turistlər daha çox bölgənin gəzməli yerlərini görməyə üstünlük
verirlər. Çünki yay aylarında dənizin maviliyi və Antalyanın günəşi insanları
tarixi məkanları görməkdən bir qədər məhrum edir. Bəzən yağan yağışlar
insanları qapalı məkanlara çəksə də, bu havaların da öz romantikası var. Qış
aylarında yağış Antalyada adi hal sayılır. Alış-veriş üçün isə havanın yağışlı
olması maneə deyil. Bir çox ticarət mərkəzlərində ilin bütün fəsillərində
vaxtını keçirə bilərsən. Qış aylarında Antalyada alış-veriş alıcıları real
endirimlərlə sevindirir. Tekstil ölkəsi qış kolleksiyalarında əhəmiyyətli
endirimlər edir. Bu baxımdan, qış alış-verişi Antalyada öz qarderobunu yeniləmək
istəyənlər üçün gözəl fürsətdir. Alış-verişdən yorulanda 5D kinoteatrında film
izləyə, boulinq oynaya və ya kafelərdə yemək yeyə, kofe, çay içə bilərsən.
İnsanları cəlb edən tarixi məkanlar
Antalyada iqtisadi həyat böyük miqdarda ticarət, kənd təsərrüfatı və
turizmə əsaslanır. Antalya rayonunun əhatə etdiyi bölgə tarix boyu günümüzə qədər
bir çox mədəniyyətə sahib olmuş və Türkiyədə ən çox antik şəhər olan rayondur.
Antalya qış
aylarında da gözəldir. Burada hətta qışda havanın temperaturu çox az vaxtlarda
15-20 dərəcəyə düşür, dənizin suyu isə 18 dərəcə olur. Həvəsi olan istənilən şəxs
burada günəşdən qarala da bilər. Hətta qapalı hovuzlarda çimmək də olar.
Antalyada insanları cəlb edən təbiətdən savayı, həm
də çoxlu tarixi yerlər var.
Bir neçə gözəl şəlalə, qədim «Aspendos»
amfiteatrı, altından alov çıxan Olimp dağları, Şaxta baba timsalında Müqəddəs Nikolay kilsəsi və s. yerlərə
turistlər axınla gəlir.
Şəhəri gəzdikcə Türkiyənin ayrı-ayrı bölgələrindən gələn turistlərə,
eyni zamanda müxtəlif ölkələrin insanlarına rast gəlmək olur. Turistlər Antalya
limanını ziyarət etməyi çox sevirlər. Ağ dənizin tərtəmiz mavi sularında üzən gəmilər
30 lirə müqabilində bir saat ərzində turistlərə füsunkar anlar yaşadır. Hətta 6
saata qədər davam edən dəniz səyahətləri mövcuddur. Dəniz turizmi Antalyanın turistləri ən çox cəlb edən
növlərindən biridir.
Antalya limanı hissədəki
evlərin çoxu mehmanxana və restoranlara çevrilib. Yivli minarəsi isə Antalyanın
simvolu hesab olunur. 39 metr hündürlüyə malik abidə 1230-cu ildə sultanƏləddin
Keyqubadtərəfindən inşa edilib. Abidə məhz arxitekturasına görə Yivli
adlandırılır. Bu sözün mənası isə kələ-kötür deməkdir. Əsası19-cu əsrdə
qoyulan Saat Qülləsi, Xıdırlıq qalası, Adrianın qapıları, Atatürk və Mərmərli
parkları da hamının sevimli istirahət yerləridir. Antalyanın şimal-qərbində
yerləşən vəMakedoniyalı İsgəndərinfəth edə bilmədiyi Termessos şəhəri
diqqətəlayiq məkanlardandır.Türkiyəninən zəngin muzeylərindən biri
də məhz Antalyadadır. Burada Osmanlı imperiyasına qədərki dövrün tapıntıları,
romalılara aid heykəllərlə işlənmiş sarkofaqlar və s. vardır.
Turist axınının daha çox qeydə alındığı məkan Qala içi, yəni qədim şəhərdir. Antalyanın maraqlı yerlərinin əksəriyyəti
də demək olar ki, bu ərazidə yerləşir. Burda əski dövrlərdən qalan dar küçələri,
suvenir dükanlarını gəzdikcə insan özünü ayrı bir dövrdə hiss edir. Hər addımda təbii portağal və nar şirələri satılır.
Restoranlar axşamlar canlı musiqilər, diskotekalar təklif edir. Qala içi tarixi
simasını qoruyub saxlamaqla turistlərə müxtəlif dövrlərin abı-havasını bəxş
edir.
Qış aylarında
Avropa ölkələrindən futbolçular və onların pərəstişkarları da Antalyaya gəlirlər.
Yanvar-mart aylarında müxtəlif mili çempionatlara hazırlıq üçün Antalya ən gözəl
yer sayılır. Futbol pərəstişkarları isə öz komandalarının arxasınca gələrək
onların məşqlərini izləyirlər. Bu baxımdan, Antalya Avropa futbolçularının əsas
"məşq paytaxtı” hesab edilir.
Antalyada konqres turizmi də inkişaf edib. Belə
ki, müxtəlif beynəlxalq tədbirlər, konfranslar üçün seçilən şəhər qonaqlarına
unudulmaz anlar yaşadır. Dağ turizmi də artıq bölgədə inkişaf səviyyəsindədir.
Turizm agentlikləri turizmin bu növündən istifadə üçün müxtəlif paketlər təklif
edirlər. Xizəksürmə ilə məşğul olmaq istəyən, kanatdan ağappaq qarlı dağları
seyr etmək arzusunda olan turistlər də az deyil.
Antalya sahilində
yerləşdiyi dənizdən, ətəyinə büründüyü dağdan turizm məqsədi ilə istifadə edərək
turistlərə gözəl anlar bəxş edir. Endirimli qiymətlər, xidmət səviyyəsinin yüksəkliyi,
insanların üzügülərliyi, yerli məhsulların çeşidliliyi, turizm növlərinin fərqliliyi
və s. turistlərin bu bölgəyə can atmasına imkan yaradır. Bölgə turizmin
inkişafı üçün dəridən-qabıqdan çıxıb təkcə turistləri cəlb etməklə kifayətlənmir,
həmçinin xidmət səviyyəsini yüksəltməyə və turizmin çeşidliliyini artırmağa can
atır. Nəticədə turistlər onlara lazım olan hər şeyi burada tapa bilir, həm də
yüksək səviyyədə və ciblərinə uyğun qiymətə. Bölgədə hər bir xidmətin turizmin
inkişafına hesablandığını müşahidə etmək çətin deyil. Yəni Antalya təkcə təbiətin
bölgəyə bəxş etdiyi nemətlərlə kifayətlənmir, həmçinin turizm infrastrukturunu
müasir və fərqli səviyyədə formalaşdırmağa çalışır. Ona görə bu bölgəni seçənlər
yenidən qayıdır. Bölgəni görməyənlər səfər etməyə tələsir. Yay aylarında dənizin,
günəşin, çimərliklərin füsunkarlığını, qış aylarında isə qış nağılını yaşamaq üçün...
Təranə Məhərrəmova
Antalya