Anonim etiraz
Yerevanda hakimiyyətə qarşı "anonim etiraz aksiyası keçirilib”. Ermənilərə
məxsus "Epress.am” yazır ki, etiraz aksiyası şəhərin müxtəlif yerlərində divara
eyni şüarı yazmaqdan ibarətdir. Şüarda deyilir ki, "oğlum ölüb. Borcumu ödədim.
1000 dram”. Bu aksiya hər işləyən Ermənistan vətəndaşından ayda 1000 dram, yəni
təxminən 2 dollar tutulmasına etirazdır. Həmin pullar ölən və əlil olan əsgər
və zabitlərə yardım fonduna getməlidir.
"Epress.am” yazır ki, etiraz qraffitisinə mətn də əlavə olunub. Mətn
sosial mediada da yayılıb. Həmin mətndə deyilir ki, "bizim hesabımıza
varlanırlar. Bizim hesabımıza siyasətlə məşğuldurlar. Bizim hesabımıza bizi
idarə edirlər. Və növbəti dəfə bizim hesabımıza "xeyirxah iş” görürlər. Min
dramdan qoyun, ona görə yox ki, qırılmayaq, ona görə ki, sakit ölək, Serj,
Rusiya və Amerika, ən müxtəlif varlılar və hakimiyyətdə olanlar üçün ölməyimizi
bilməyək. Min dram verin ki, onların bizi aldatmağı asan olsun. Müharibənin
ölümcül olduğundan uzun müddət danışmaq olar. Müharibəyə tərəfdar olan insan
tapmaq çətindir. Müharibə hakimiyyətlərə sərfəlidir. Müharibə qurtarana qədər
onlar tox olacaq. Buna görə də onlar müharibəni əbədiləşdirmək, problemi həll
etməmək üçün güclərini əsirgəmirlər. Bu, yeni-yeni qurbanlar tələb edən
millətçilik xəstəliyidir”.
Mətndə daha sonra deyilir ki, Ermənistanda hakimiyyət etibar olunan
heç nə təklif eləmir: "Necə inanmaq olar ki, yığılan pullardan ölən və əlil
olanların ailələrinə nəsə düşəcək? Əgər hər 2 dramdan biri Sarkisyanlardan
birinin cibinə gedirsə? Necə inanmaq olar ki, zabitlərin əlindən intihar,
əlillik və ölüm hallarının hamısı Azərbaycan gülləsinin qurbanı kimi təqdim
olunur. Bu ailələrə bir az pul çatacaq ki, ağızlarını kilidləsinlər”. Sosial
mediada yayılan mətndə daha sonra deyilir ki, "ordu heç vaxt yaxşı yer olmayıb,
yəqin ki, olmayacaq da. Bizim ölkədə adamlar orduya getməmək üçün ölkədən
getməyə də hazırdırlar. Onlar orduya getməmək üçün iki illik orta maaşdan da çox
pul ödəməyə, damarlarını kəsməyə hazırdırlar. Deyirlər, ordu ölkənin fəxridir.
Yox, ordu xalqın dəhşətidir. Deyirlər ki, apreldən sonra milli şüur və milli
birlik artıb. Hakimiyyət öz yalanına özü inanmır, basır-bağlayır və gəncləri
zorla orduya aparır. Bu min dram da eyni nağıldır, yəni bu, guya orduya
lazımdır, ancaq yenə zorla alırlar. Sənin buna imkanın var, ya yox, vermək
istəyirsən, ya yox - heç kimi maraqlandırmır. Hətta qarşılıqlı yardım da artıq
könüllü deyil. Xalqın iradəsinə bunun dəxli yoxdur, ancaq hakimiyyətin nə qədər
çürük olduğunu göstərir”.
Məlumat üçün bildirək ki, qanun Ermənistan parlamentində Müdafiə Nazirliyinin
təklifi ilə gündəmə gətirilib. "Ermənistan Respublikasının müdafiəsi zamanı
həyatı və sağlamlığına dəyən zərərin ödənilməsi haqqında” qanun parlamentdə
ciddi narazılıqlarla müşayiət olunub. Qanuna görə, hər bir işləyən vətəndaşın
məvacibindən, vergilərdən başqa, ayda 1000 dram pul tutulacaq. Xüsusi fondda
toplanan bu vəsaitdən 2017-ci il yanvarın 28-dən sonra ölən və birinci dərəcəli
əlil olan hərbçilərin ailələrinə 10 milyon dram (təxminən 21 min dollar)
məbləğində birdəfəlik ödəmələr ediləcək, ikinci qrup əlillərin ailələrinə - 5
milyon dram ödənəcək. Bundan başqa, hərbçilər aylıq ödəmələr alacaqlar. 102
deputat sənədin lehinə, 3 nəfərsə əleyhinə səs verib. Bunlar müxalifətdə olan
"Ermənistan Milli Konqresi” partiyası fraksiyasının lideri Levon Zurabyan,
həmin partiyanın katibi Aram Manukyan və "İrs” partiyasından deputat Zaruhi
Postancyandır.
Müxalifət deputatları hökumətin "ordu üçün” vətəndaşlardan hər ay
1000 dram tutmaq təşəbbüsünü kəskin pisləyiblər. Zaruhi Postancyan hökumətin bu
addımını vergi yükünün artırılması kimi səciyyələndirib: "İctimaiyyət vergi
yükünün 1000 dram artırılması ilə razı deyil. Bəsdir dilənçiliklə məşğul olmaq,
xalqımızdan 1000 dram diləmək”. O, bildirib ki, 1000 dram böyük məbləğ olmasa
da, ölkə əhalisinin 35 faizi yoxsulluq səviyyəsindən aşağı yaşadığı halda, bir
çox ailə üçün bu, az pul deyil. Levon Zurabyanın sözlərinə görə, hökumətin bu
addımı "sadəcə, insanların hissləri ilə oynamaq və bu pərdə altında müxtəlif
cür əlavə vergilər qoymaqdır”.
Publisist Hranuş Xaratyan hakimiyyətin təşəbbüsünün kökündən
qeyri-qanuni olduğunu bildirir. O, deyir ki, hər bir vətəndaşın maaşı onun
xüsusi maliyyə mülkiyyətidir və mülkiyyət sahibindən başqa heç kəsin onu sərf
etməyə haqqı yoxdur: "Tutulan məbləğin ölçüsü və onun hansı məqsədlə istifadə
olunacağından asılı olmayaraq, əgər dövlətin yardıma ehtiyacı varsa, əhaliyə
müraciət etsəydi, bu daha məntiqi və anlaşılan olardı. Hökumət isə zor gücünə
vətəndaşların xüsusi mülkiyyətini idarə etmək istəyir”.
Öz növbəsində, Ermənistan Helsinki Komitəsinin sədri Avetik İşxanyan
deyir ki, ordu, zərər çəkən hərbçilərə yardım məsələləri "elə həssas məsələdir
ki, bu qanun layihəsinin əleyhinə danışana qarşı böyük bir vətənpərvərlik
yürüşü” qalxa bilər, lakin o məsələyə qanunilik nöqteyi-nəzərindən baxmaq
lazımdır: "Ermənistan vətəndaşının iki borcu var. Biri - vergi və rüsumları
ödəmək, ikincisi - orduda xidmət etmək. Qalanı vətəndaşın şəxsi haqlarıdır. Bu
kontekstdə, sözügedən qanun layihəsinin mənası nədir? Ermənistan vətəndaşını
xeyriyyəçilik etməyə məcbur etmək? Dövlət vətəndaşı xeyriyyəçilik etməyə məcbur
edə bilməz”.
Sosial şəbəkələrdə erməni məmurlarının şəxsi imarətləri və bahalı
avtomaşınlarının şəkilləri yerləşdirilib. İnternet istifadəçiləri yazırlar ki,
keçmiş və hazırkı məmurların taladığı pullar büdcəyə qaytarılsa, əhalinin
boynuna əlavə vergi yükünü qoymaq lazım olmazdı.
Qanunun əleyhinə parlament binası önündə "100 dəfə ayıbdır” şüarı
altında etiraz aksiyasında iştirak edən Helsinki Vətəndaş Assambleyası Vanadzor
ofisinin rəhbəri Artur Sakunts hesablayıb ki, qeyri-hərbi şəraitdə yaralanan və
ölən hərbçilərə yardım üçün ildə təxminən 2 milyard dram gərəkdir. Bu isə hüquq
müdafiəçinin sözlərinə görə, Ermənistanda ödənilməmiş vergilərin cüzi hissəsini
təşkil edir. "100 dəfə ayıbdır” təşəbbüsünün üzvü Artur Sakunts hesab edir ki,
hakimiyyət növbəti dəfə camaatın cibinə girməməkdənsə, sadəcə korrupsiya ilə
mübarizəni gücləndirməli və orduya kömək etmək üçün kölgədəki pulları üzə
çıxarmalıdır. Müxalif Erməni Milli Konqresi fraksiyasının üzvü Nikol Paşinyan
qanuna etiraz olaraq yaxın günlərdə irimiqyaslı müzakirələrə başlayacaqlarını
bildirib.
Azər