Ankara və Bakının Tehrana əvəzolunmaz dəstəyi
Qonşu İran İslam Respublikasında qiymət artımına etiraz əlaməti
olaraq baş verən kütləvi iğtişaşlar səngiyib. Birləşmiş Ştatlar və onun
müttəfiqlərinin böyük ümid bəslədikləri antihökumət qiyamı reallaşmadı. Düzdür,
2018-ci ilin əvvəlində yaşanan bu hadisə İran hakimiyyət orqanları üçün sözün
əsl mənasında qəfil, gözlənilməz oldu. Formal olaraq, bu hadisələrə səbəb
qiymətlərin artımından irəli gələn narazılıq olsa da, sonradan iqtisadi
tələblər siyasi xarakter almağa başladı.
2017-ci il dekabrın 28-də küçələrə
çıxan insanlar hərbi və polis obyektlərini ələ keçirməyə başladılar. Vəziyyət
yanvarın 2-də pik həddə çatdı - Daxili İşlər Nazirliyinin yaydığı məlumata görə,
Tehran, Məşhəd, Rəşt və İsfahan kimi iri şəhərlərdə baş verən etiraz
aksiyalarına 42 min insan qatılıb.
Etiraz aksiyaların baş verməsini etiraf edən
və bunun, insanların hüququ olduğunu, hətta səslənən tələblərin bir qismini
haqlı sayan İran hökuməti vəziyyətin gərginləşməsində Birləşmiş Ştatlar və onun
müttəfiqlərini - Səudiyyə Ərəbistanı və İsraili ittiham etməyə başladı. Rəsmi
Tehran bu bəyanatın ardınca nümayişləri yatırmaq qərarı verdi və hazırda 500-ə
yaxın insan saxlanılıb. Nüfuzlu "Vestnik Kafkaza” nəşri İran İslam Respublikasında
baş verən hadisələrin analizini apararaq, xüsusən etnik azərbaycanlıların
yaşadığı əyalətlərinin özlərini necə aparmalarına diqqət çəkib. Qeyd edilir ki,
əgər azərbaycanlılar aksiyaları dəstəkləsəydilər, (onlar ölkə əhalisinin 40
faizini təşkil edirlər) onda Tehran rəhbərliyi bunun qarşısında aciz qalardı.
Azərbaycanlıların üstünlük təşkil etdiyi ərazilərdə həyat şəraitinin aşağı
olmasına, sosial problemlərin, xüsusən də işsizliyin yüksək həddə olmasına
baxmayaraq, soydaşlarımız qərbyönlü
təxribata getməməyə üstünlük verdilər. Onlar anladılar ki, aksiyaçıların böyük
bir qismi "dünyəvi” millətçilərdən ibarətdir. Və onlar müvəffəqiyyət
qazanacaqları təqdirdə, daha sərt türkofoba çevriləcəklər. Etiraz aksiyasını
"İrana qarşı türk qəsdi” kimi qələmə verməyə çalışan millətçi qruplar, baş
verənlərdə Türkiyənin barmağının olduğunu iddia etməyə çalışdılar. Lakin ABŞ-ın
təzyiqlərinə baxmayaraq, Ankara aksiya iştirakçılarını dəstəkləməkdən imtina
etdi.
Türkiyə prezidenti Rəcəb Tayyib
Ərdoğan bəyan etdi ki, İrandakı indiki rejim çatışmayan cəhətlərinə baxmayaraq,
regionda sabitlik faktorudur və onun yerini qərbyönlü avantürist qüvvələr tuta
bilər. Bu isə İranı vətəndaş müharibəsinə sürükləyə, gələcəkdə daha da irəli
gedərək Suriya ssenarisinin təkrarlanmasına gətirib çıxara bilər. Aksiyaların
baş verdiyi günlərdə Türkiyə və İran prezidentlərinin telefon danışıqları baş
tutdu və bu danışıqlarda Ərdoğan Həsən Ruhanini dəstəklədiyini, dinc
aksiyaların keçirilməsi hüququnun pozulmasının yolverilməz olduğunu bildirdi.
İran prezidenti də bu sözlərə görə türkiyəli həmkarına təşəkkürünü bildirdi.
Qiyamçıları dəstəkləməkdən Azərbaycan da imtina etdi. Xarici İşlər Nazirliyinin
mətbuat xidmətinin rəhbəri Hikmət Hacıyev bəyan edib ki, rəsmi Bakı hadisələrin
İran qanunvericiliyinə uyğun olaraq dinc yola inkişafını dəstəkləyir. Türkiyə
və Azərbaycanın belə bir mövqe nümayiş etdirməsindən və qanuni hakimiyyəti
müdafiə etməsindən sonra İranın güc strukturları ölkəni xaos və davamlı
vətəndaş müharibəsinə aparıb çıxaracaq hadisələrin qarşısını almağa müvəffəq
oldu.
Nəticədə, İran İslam Respublikası İslam İnqilabı Keşikçiləri Korpusunun
komandanı Məhəmməd Əli Cəfəri qarışıqlığa son qoyulduğunu bəyan etdi. İranda
sülh və əmin-amanlığın bərqərar olmasında Türkiyə və Azərbaycanın, eləcə də,
qanunpərəst İran azərbaycanlılarının əvəzsiz rolu oldu. Cavab addımı İran
rəhbərliyinindir. Və inanmaq istərdik ki, yaddaşlarda hələ təzə olan bu
hadisələrdən nəticə çıxarmaq, kimin dost, kimin düşmən olduğunu anlamaq mümkündür.
Azər
Azər