Ankara ilə Berlin arasında qalmaqal
Türkiyə ilə Almaniya arasında münasibətlər yenidən gərginləşib. Türkiyənin
ədliyyə naziri Bəkir Bozdağın iştirakı ilə Almaniyada yaşayan türklərlə görüşün
ləğv edilməsi iki ölkə arasında ciddi diplomatik qalmaqal yaradıb. Bu barədə
Fransada açıqlama verən nazir Bəkir Bozdağ bildirib ki, Almaniya görüşə az
qalmış gözlənilmədən toplantıya icazə verilməyib. Səbəb isə çox bəsit
göstərilib:"Toplantının keçiriləcəyi məkanda yeraltı qaraj yoxdur”.
Ankara isə bunu bəhanə adlandırıb və Almaniyanın birmənalı şəkildə
Türkiyəyə qarşı addım atdığını bəyan edib. Nazir 15 iyuldakı çevriliş cəhdində
iştirak edən, Cümburbaşqanlığı İqamətgahını bombalayan, vətəndaşları şəhid
edən, dövlətə zərər verən, dövlət başçısının canına qəsd edənlərin Qərb
dünyasında himayə edildiyini və bu kəslərə sığınacaq haqqı verilməyə cəhd
göstərildiyini qeyd edərək, bu mövqeyin demokratiya və hüquq dövləti anlayışı
ilə üst-üstə düşmədiyini vurğulayıb.
Terror təşkilatı PKK-nın da Avropada himayə edildiyini dilə gətirən
nazir deyib ki, "PKK-nın terror təşkilatı olduğunu Avropa Şurası və Avropa
ölkələrinin hamısı qəbul edir. Amma buna baxmayaraq, hər gün qadın, uşaq fərqi
qoymadan günahsız insanları öldürən PKK-nın Brüsseldə sərgi açmasına icazə verilir”.
Bozdağ "İŞİD, yaxud da başqa terror təşkilatı Avropada sərgi aça bilərmi?
Təbliğat apara bilərmi?” - deyərək terror təşkilatları arasında ayrı-seçkilik
edən Qərb ölkələrinə sərt etiraz edib.
Qeyd edək ki, Almaniyada yaşayan 3 milyon türkdən 1,4 milyonunun
Türkiyə səsvermələrində iştirak etmək hüququ var.
Yeri gəlmişkən, ədliyyə naziri ilə yanaşı, iqtisadiyyat naziri Nihat
Zeybekçinin də Almaniyada keçirməyi planlaşdırdığı toplantının ləğv
edilməsindən sonra Almaniyanın Türkiyədəki səfiri Martin Erdmann Xarici
İşlər Nazirliyinə çağırılıb. Nazirlik rəsmisi Mehmet Kemal Bozay tərəfindən
qəbul edilən Martin Erdmanna Türkiyənin keçirdiyi narahatlıqçatdırılıb.
İki nazirin keçirəcəyi toplantıya icazə verilməməsinin demokratik və
hüquqi dövlət prinsiplərinə uyğun gəlməyən fakt kimi ifadə azadlığına zidd bir
davranış olduğu bildirilib.
Avropa ittifaqı naziri Ömər Çəlik də sosial media vasitəsilə
göstərdiyi reaksiyada bildirib ki, "Almaniya ilə demokratiya, hüquq dövləti
kimi ortaq dəyərləri bölüşürük. Bu dəyərlərə hörmətlə yanaşılmasını gözləyirik.
Vətəndaşların məlumatlandırılması demokratik haqdır, buna mane olunması qəbul
və izah edilə bilməz. Almaniya hökuməti bu addımı atmaqla demokratlar
arasındakı körpüləri zədələyir. İnsanları biri-birindən qopararaq, ideoloji
Berlin divarları inşa edir”.
Türkiyə Prezident Administrasiyasının sözçüsü İbrahim Kalın da
Almaniyanın davranışını pisləyib: "Bu qalmaqallı qərarın PKK və FETÖ kimi təşkilatlara
qucaq açan bir ölkədə qəbul edilməsi Avropanın gələcəyi üçün olduqca narahatlıq
doğurur”. Öz növbəsində CHP lideri Kamal Kılıçdaroğlu da Almaniyanın Ədliyyə
Nazirliyinin Bəkir Bozdağın toplantısını ləğv etməsinə münasibət bildirib.
İstanbulda qatıldığı bir tədbirdə mövzuya toxunan Kılıçdaroğlu Almaniyanın
yanlış qərar verdiyini bildirib: "Ədalət və İnkişaf Partiyasından 2 millət
vəkili Almaniyada danışacaqdı, danışmaları ləğv edilib. Əsla doğru deyil. Həm
dünyaya demokratiya dərsi verirsiniz, həm də bir partiyanın 2 naziri danışmaq
istəyərkən bunu hansısa bir səbəblə qadağan edirsiniz. Qəti şəkildə birmənalı
qarşılamırıq. Onlar da çıxış etməli, öz fikirlərini bildirməlidirlər. Hər kəs
öz fikrini azad ifadə etməlidir”.
Ekspertlər diqqəti ona yönəldirlər ki, bundan əvvəl Türkiyədə
almaniyalı jurnalist həbs edilib. Onların qənaətincə, nazirə qadağa qoyulması
da bununla bağlıdır. Özü də bu həbslə əlaqədar Almaniyanın bir çox
siyasətçiləri Merkel hökumətini Türkiyəyə təzyiqləri artırmağa çağırmışdılar.
"Die Welt” qəzetinin müxbiri Dəniz Yücel "terrorçu təbliğatda və Türkiyə
hökumətini gözdən salmaqda” ittiham edilərək həbs olunub.
Ədliyyə naziri B.Bozdağ Dəniz Yücelinhəbs olunmasına dair
siyasi olmayan qərarımüstəqil türk məhkəməsinin qəbul etdiyini söyləyib.
Britaniyanın "The Teleqraf” qəzetinin yazdığına görə, jurnalistin həbsi
onun kürdlərin terrorçu təşkilatı – PKK komandanından müsahibəsi, həm də
Türkiyənin enerji nazirinin elektron məktublarına (e-mail) haker hücumları
haqda xəbəriylə bağlı ola bilər. Enerji və təbii ehtiyatlar naziri Berat
Albayrak həm də Türkiyə prezidentin kürəkənidir. Hakerlər onun e-mail-lərindən
bəzilərini "Wikileaks”ə ötürüblər. Mətbuatın yazdığına görə, D.Yüceli
dindirərkən onun hakerlərlə əlaqəsi olub-olmadığını soruşublar. Jurnalisti
həmçinin, Türkiyənin kürd siyasəti, PKK komandanı Cemil Bayıkla bağlı
sorğu-sual ediblər. D.Yücel C.Bayıkdan müsahibəni iki il əvvəl alıb.
Azər