Amerika Azərbaycanla hərbi sahədə əməkdaşlığı genişləndirir
ABŞ-ın Müdafiə katibinin
Rusiya, Ukrayna və Avrasiya üzrə köməkçisinin müavini Maykl Karpenter rəhbərlik
etdiyi nümayəndə heyəti ilə birlikdə Azərbaycanda səfərdə olub. Səfər
çərçivəsində o, müdafiə naziri, general-polkovnikZakir Həsənov, xarici
işlər naziriElmar Məmmədyarovla görüşüb. Amerikalı qonaqlara
Ermənistan-Azərbaycan münaqişəsinin həlli üzrə aparılan danışıqlar prosesi
haqqında ətraflı məlumat verilib. Bildirilib ki, Ermənistan Dağlıq Qarabağ münaqişəsinin
həllinə mane olur, Cənubi Qafqazda sabitliyə təhlükə yaradır, beynəlxalq
hüququn norma və prinsiplərinə məhəl qoymayaraq Azərbaycan torpaqlarını hələ də
işğal altında saxlayır, destruktiv siyasət yürüdərək müxtəlif təxribatlara əl
atır. M.Karpenter isə ABŞ hökumətinin Azərbaycanla təhlükəsizlik, hərbi sahədə
əməkdaşlığın genişləndirilməsi və gücləndirilməsində maraqlı olduğunu, bu
istiqamətdə fəaliyyətlərin davam etdiriləcəyinə əminliyini bildirib. Azərbaycan
Ordusunun döyüş hazırlığına yüksək qiymət verən qonaq şəxsi heyətin müasir və
yeni silahlarla təchiz edildiyini, istənilən təhdidə çevik cavab vermək
imkanına malik olduğunu xüsusi qeyd edib. Hər iki görüşdə Azərbaycan-ABŞ
əlaqələrinin gələcək perspektivləri və regional məsələlər də müzakirə olunub.
Rəsmi görüşlərdən sonra
mətbuata açıqlama verən M.Karpenter ABŞ-ın Azərbaycanla
mövcud əməkdaşlığı yüksək qiymətləndirdiyini söyləyib. O, ABŞ Müdafiə
Departamenti və Azərbaycanın təhlükəsizlik institutlarının uzunmüddətli
əməkdaşlığını müzakirə etdiyini, Azərbaycan hökuməti ilə təhlükəsizlik
sahəsində uzunmüddətli əməkdaşlıq əlaqələrinin olduğunu vurğulayıb. Deyib ki, bu,
iki ölkə arasında əsas əməkdaşlıq sahələrindən biridir. M.Karpenter
Azərbaycanla terrorizmə, zorakı ekstremizmə qarşı mübarizədə, həmçinin kibertəhlükəsizlik
sahəsində əməkdaşlıq edildiyini də dilə gətirib. O, Azərbaycanın dəstək məqsədi
ilə sülhməramlılarını Əfqanıstana göndərməsinə görə minnətdarlığını da ifadə
edib. Bildirib ki, Azərbaycan 11 sentyabr hadisəsi zamanı ABŞ-a dəstək verən
ilk ölkələrdən olub və həmin vaxtdan etibarlı tərəfdaş olaraq qalır. M.Karpenter
onu da əlavə edib ki, ABŞ regionda təhlükəsizlik və sülhün təminatında
maraqlıdır. Onun sözlərinə görə, bu, ABŞ-ın uzunmüddətli marağıdır.
Milli Məclisin Azərbaycan-ABŞ parlamentlərarası əlaqələr üzrə işçi qrupunun üzvü, parlamentin Gənclər və
idman komitəsinin sədri Fuad Muradov mövzu ilə bağlı
"Kaspi”yə açıqlamasında bildirib ki, antiterror əməliyyatlarının başladığı
gündən indiyə qədər Azərbaycan antiterror koalisiyası ilə sıx əlaqədə olub, bu
koalisiyaya imkanları daxilində hərtərəfli dəstək nümayiş etdirib. Millət
vəkili qeyd edib ki, belə yanaşma Azərbaycanın strateji mövqeyindən irəli
gəlir. Onun fikrincə, Azərbaycan qarşılıqlı maraqlar çərçivəsində,
bərabərhüquqlu müstəvidə əməkdaşlıq etdiyi bütün ölkələrlə münasibətlərdə hər
zaman öz üzərinə götürdüyü öhdəlikləri yerinə yetirib: "Əgər hər hansı
əməkdaşlıq varsa, ölkəmiz tərəfindən bu əməkdaşlıq yüksək səviyyədə həyata
keçirilib. ABŞ eyni zamanda, ATƏT-in həmsədr ölkələrindən biridir. Bizim üçün
onların fikri, mövqeyi önəmlidir bu baxımdan ki, onlar Azərbaycan ərazilərinin
Ermənistan tərəfindən işğal faktını bəyan edir, ölkəmizin ərazi bütövlüyünü
dəstəkləyirlər. ABŞ Dağlıq Qarabağ probleminin danışıqlar vasitəsilə ilə, sülh
çərçivəsində həllinə tərəfdardır. Ona görə də ABŞ-ın Müdafiə katibinin
Rusiya, Ukrayna və Avrasiya üzrə köməkçisinin müavini Maykl Karpenterin
Azərbaycanda səfərdə olarkən səsləndirdiyi fikirləri müsbət dəyərləndirirəm.
Hesab edirəm ki, Amerikanın Azərbaycanla hərbi sahədə əməkdaşlığı daha da
genişləndirmək niyyətində olması vacib məsələlərdən biridir. Bu niyyətin
praktiki olaraq hansı səviyyədə həyata keçiriləcəyini isə zaman göstərəcək”.
F.Muradov xüsusi olaraq
vurğulayıb ki, ümumiyyətlə, Azərbaycan hər hansı ölkə ilə əməkdaşlıq edən zaman
məhz ikitərəfli əməkdaşlığı nəzərdən keçirir, bu zaman milli və dövlətçilik
maraqlarını düşünür. Deputatın sözlərinə görə, Azərbaycanın regionda bir neçə
dövlətlə strateji əməkdaşlığı mövcuddur ki, ABŞ da belə ölkələrdən biridir: "Düzdür,
son dövrlərdə baş verənlər, o cümlədən ABŞ Dövlət katibi Con Kerri tərəfindən
irəli sürülən fəlsəfə, xüsusən də Dağlıq Qarabağ münaqişəsi barədə
səsləndirilən fikirlər bizə uyğun deyil, lakin ümumilikdə Amerikada praqmatik,
Azərbaycanla əlaqələri yüksək dəyərləndirən və əməkdaşlıq etmək istəyən siyasi
qruplar var. Zaman-zaman erməni lobbisi tərəfindən irəli sürülən strategiyaya
uyğun olaraq Azərbaycana qarşı mənfi fikirlər səsləndirilir. Amma buna
baxmayaraq, ölkələrimiz arasında əməkdaşlıq əlaqələri inkişaf edir. Bu inkişaf
tempini daha da artırmaq olar. Bu baxımdan, ABŞ-ı təmsil edən şəxslərin, o
cümlədən Maykl Karpenterin səfəri əhəmiyyətlidir və belə səfərlər Amerikanın
Azərbaycanı dayanıqlı və stabil tərəfdaş kimi qəbul etməsi istiqamətində
işlərini davamlı edəcək”.
Milli Məclisin Azərbaycan-ABŞparlamentlərarası əlaqələr üzrə işçi qrupunun digər üzvü, Demokratik İslahatlar
Partiyasının (DİP) sədri Asim Mollazadə də qəzetimizə
açıqlamasında deyib ki, Azərbaycan ABŞ ilə uzun illərdir əməkdaşlıq edir.
Deputat bildirib ki, Azərbaycan antiterror koalisiyasının ən fəal üzvlərindən
biridir: "Azərbaycan özü də terrordan əziyyət çəkdiyinə, dəfələrlə ölkəmizə
qarşı terror aktlarının həyata keçirilməsinə görə rəsmi Bakı terrorla
mübarizədə əməkdaşlığını bilavasitə ortaya qoyub. Azərbaycan Silahlı
Qüvvələrinin nümayəndələri Əfqanıstanda hal-hazırda da antiterror
əməliyyatlarında iştirak edirlər. Bundan başqa, Azərbaycan ABŞ ilə NATO-nun
hərbi qüvvələrinə çox ciddi logistik dəstək verir. Bu dəstək həm Amerika, həm
də NATO qüvvələri tərəfindən yüksək dəyərləndirilir. Azərbaycan bilavasitə
Amerika və NATO ilə əməkdaşlığı çərçivəsində ölkəmizin Silahlı Qüvvələrinin
müasir istiqamətdə inkişafı üçün də çalışır. Bu istiqamətdə də əməkdaşlıq
əlaqələri davam etdirilir. Bu çərçivədə bir uğurlu layihə barədə də fikrimi
çatdırmaq istəyirəm. Amerikanın Oklahoma ştatının Milli Qvardiyasının
Azərbaycanın Dövlət Sərhəd Xidməti ilə əməkdaşlığı da öz müsbət nəticəsini
verməkdədir. Düşünürəm ki, bütün sahələrdə ölkələrimiz arasında əməkdaşlıq
əlaqələri daha da güclənməlidir. Əvvəla bunun üçün böyük potensial var. Digər
tərəfdən, bu, Azərbaycan dövlətinin də maraqlarına xidmət edir”.
Rufik İSMAYILOV