AMEA-nın tədqiqatçıları və elmi işçiləri İnnovasiya Müsabiqəsi barədə məlumatlandırılıb
Azərbaycan Milli Elmlər
Akademiyasında tədqiqatçıların və elm ictimaiyyətinin nümayəndələrinin
İqtisadiyyat Nazirliyi və BMT-nin Azərbaycan Nümayəndəliyi tərəfindən birgə
keçirilən İnnovasiya Müsabiqəsi barədə məlumatlandırılması məqsədilə tədbir
keçirilib.
Tədbirdə çıxış edən İqtisadiyyat Nazirliyinin
Dayanıqlı inkişaf şöbəsinin müdiri, Dayanıqlı İnkişaf üzrə Milli Əlaqələndirmə
Şurasının katibi Hüseyn Hüseynov dayanıqlı inkişafın təmin edilməsi
istiqamətində həyata keçirilən tədbirlər və qəbul edilmiş strateji sənədlər
barədə məlumat verib, kiçik və orta sahibkarlığın dəstəklənməsi və bu
istiqamətdə innovasiyalara investisiya qoyuluşlarının artırılmasının əsas
strateji istiqamət olduğunu qeyd edib. Bildirilib ki, BMT-nin 2030-cu ilədək
Dayanıqlı İnkişaf üzrə Gündəliyinin məqsədlərinin təşviqi, innovasiyaların
həvəsləndirilməsi, həmçinin "Azərbaycan 2020: Gələcəyə Baxış" İnkişaf
Konsepsiyasının və "Kiçik və orta sahibkarlıq səviyyəsində istehlak
mallarının istehsalına dair Strateji Yol Xəritəsi"nin icrasına dəstək
məqsədilə müsabiqə elan edilib.
Azərbaycan Respublikasının
Prezidenti yanında Vətəndaşlara Xidmət və Sosial İnnovasiyalar üzrə Dövlət
Agentliyinin şöbə müdiri Ceyhun Salmanov, AMEA-nın Yüksək Texnologiyalar
Parkının Biznes inkubator şöbəsinin müdiri Vüsal Suleymanlı innovasiyaların
vacibliyi və innovativ fəaliyyətin əhəmiyyəti, İqtisadiyyat Nazirliyinin Dayanıqlı
inkişaf şöbəsinin əməkdaşı Elnur İbrahimov innovasiya müsabiqəsinin məqsədi və
şərtləri barədə təqdimatla çıxış ediblər.
Vətəndaşlara Xidmət
və Sosial İnnovasiyalar üzrə Dövlət Agentliyinin nümayəndəsi Nigar Hüseynova
ASAN xidmətin layihəsi olan "İdea Bank”ı vasitəsilə layihələrin qəbulu və "İdea
Bank”ın imkanları barədə məlumat verib.
Sonda
iştirakçıların təklifləri dinlənilib, onları
maraqlandıran suallar cavablandırılıb.