Allahşükür Paşazadə: "Heydər Əliyev ümummilli lider missiyasında dövlətçiliyimizi xilas etdi"

"Heydər Əliyev ümummilli lider missiyasında ölkəmizi etnik separatçılıq, dini zəmində parçalamaq, mənəvi cəhətdən zəiflətmək, məzhəb ayrıseçkiliyi salmaq istəyənlərin niyyətlərini puç edərək dövlətçiliyimizi xilas etdi. Milli və dini mənsubiyyətindən asılı olmayaraq bütün vətəndaşlarımızı azərbaycançılıq məfkurəsi ətrafında birləşdirərək ulu öndər Azərbaycan dövlətçilyinin sarsılmaz bünövrəsini qoymuş oldu".

"Trend"in məlumatına görə, bunu Qafqaz Müsəlmanları İdarəsinin sədri Allahşükür Paşazadə ulu öndər Heydər Əliyevin 93-cü ildönümünə həsr edilən "Heydər Əliyev irsi və multikultural dəyərlər" adlı konfransda çıxışı zaman deyib.

O qeyd edib ki, Ulu öndərin fəaliyyətində müstəqil Azərbaycanın islam dünyası ilə əlaqələrinin qurulması və inkişaf etdirilməsi böyük önəm kəsb edirdi: "Dinindən, dilindən asılı olmayaraq Azərbaycan vətəndaşlarına eyni münasibət bəsləyən Heydər Əliyev illərin sınağından çıxmış adət-ənənələrə ehtiramla yanaşırdı, müxtəlif icmaların bayramlarında həmvətənləri ilə birgə olub və onları təbrik edirdi. Bunun nəticəsində 1998-ci ildə Rus Provaslav kilsəsinin Bakı yeparxiyası yaradılıb, Jen-Mironosits kilsəsi bərpa olunub".

QMİ sədri deyib: "Azərbaycanda yaşayan yəhudi icması üçün yeni sinaqoq binası, azsaylı katolik icması üçün kilsə də inşa edilib. Bununla yanaşı, Heydər Əliyev digər dinlərin liderlərini Azərbaycana dəvət edib. Bununla da bütün dünyanın diqqətini məhz Azərbaycana yönəldirdi. Azərbaycan milli və bəşəri dəyərlərə ehtiramı ilə seçilən məkandır. Bu dəyərlərə ehtiram Heydər Əliyevin zamanında daha yüksək səviyyəyə qaldırılaraq, ümumdövlət səciyyəli məsələyə çevrildi, tolerantlıq, multikulturalizm dövlət siyasəti qismində həyata keçirilməyə başlandı. Eyni zamanda, ümumbəşəri önəm kəsb edən amili məhz Azərbaycan nümunəsində dünya miqyasında bənzərsiz, analoqu olmayan bir fenomenə çevirməyə müvəffəq oldu".

Allahşükür Paşazadə deyib ki, Vətənimiz Azərbaycan beynəlxalq müstəvidə təkcə enerji layihələri ilə deyil, həm də mədəniyyətləri, dinləri bir araya gətirən qabaqcıl ölkə kimi gündəmdədir: "Təbii ki, burada siyasi iradə, dövlət başçısının lider rolu böyük önəm daşıyır. İlham Əliyevin qlobal miqyasda dəyər kəsb edən təşəbbüsləri bəşəriyyətin ümumi inkişafına, sülh və dinc birgə yaşayış amallarına xidmət edir. Dövlət başçısı dünya miqyasında multikulturalizm ideyasının fəal təbliğatçısıdır. Bu yaxınlarda BMT Sivilizasiyalar Alyansının 7-ci Qlobal Forumunun Azərbaycanda keçirilməsi bu fəaliyyətin məntiqi nəticəsi idi. Bu, eyni zamanda Azərbaycana, onun rəhbərinin siyasətinə verilən dəyərin göstəricisidir".