Düşünür ki, startap
bazarına var-dövlət qazanmaq məqsədi ilə gəlmək düzgün deyil. Həmsöhbətimizə
görə, bu yolun yolçusu olmaq üçün dünyaya hamı kimi deyil, tamamilə yeni bucaqdan
baxmalı, ətrafında olan resurslardan maksimum şəkildə istifadə etməli və daim
risklərə getməyi bacarmalısan. Müsahibimiz "BazarDash” layihəsinin rəhbəri, gənc
startapçı Azad Abdulladır.
Azad 1994-cü ildə Bakıda
anadan olub. 2001-ci ildən 2005-ci ilə kimi İsveçdə yaşayıb və ibtidai təhsilini
orada alıb. 2012-ci ildə TQDK-nın qəbul imtahanında 602 bal toplayaraq Bakı Ali
Neft Məktəbinin "Neft-qaz mühəndisliyi” ixtisasına qəbul olub. Hazırda 5-ci
kursda təhsil alır.
"BazarDash”
nədir?
Layihə rəhbəri deyir ki,
"BazarDash”-ın məqsədi gündəlik alış-verişimizi maraqlı etmək və buna sərf
etdiyimiz vaxtı azaltmaqdır: "BazarDash insanların bazarlıq yoldaşına çevrilmək
üçün yaradılan startapdır. Layihənin məqsədi istifadəçilərin gündəlik
alış-verişini maraqlı etmək, ona sərf etdiyi zamanı azaltmaq və adından da
göründüyü kimi, məhsul seçimi üzrə "bazarlıq yoldaşı”na çevrilməkdir. Beləliklə,
bizim istifadəçilər supermarketlərdə təklif olunmayan xidmətlərdən yararlanacaq
və bu onları digər alıcılardan fərqləndirəcək. İnanırıq ki, innovativ
ideyalarımız insanların alış-veriş ənənəsini yeniləyəcək və təklif etdiyimiz
xidmətlər həm alıcılara, həm mağaza şəbəkələrinə, həm də istehsalçılara fayda gətirəcək”.
Alıcıların
işini asanlaşdıran tətbiq
Müsahibimiz deyir ki, bu
startap vasitəsilə "BazarDash” istifadəçiləri marketlərə əvvəlcədən istədikləri
malı sifariş edə biləcəklər: "Layihədə bir çox xidmətlər təklif etməyi
planlaşdırmışıq. İstifadəçilər üçün ən cəlbedici təkliflərimizdən biri "Click
& Collect” xidmətidir. Bu xidmət sayəsində bizim istifadəçilər (alıcılar)
uzun vaxt sərf etməyərək, darıxdırıcı növbələrdə dayanmadan əvvəlcədən istədiyi
malları sifariş etmək şansı əldə edəcəklər. Sifariş edilmiş məhsulların ən
yenisi və keyfiyyətlisi bizim əməkdaşlar tərəfindən toplanaraq xüsusi
kodlaşdırılmış dolablara yerləşdiriləcək. Layihəmizin təklif etdiyi növbəti özəllik
marketlərdə olan məhsulların müəyyən kriteriyalara görə ayrılmasıdır. Məsələn,
məhsulların halal, diabetik, vegeterian, yağsız və s. kriteriyalara bölünməsi
alıcıların işini xeyli asanlaşdırcaq. Bizim tətbiqetmə vasitəsilə alış-veriş
etməyin digər bir üstünlüyü ondan ibarətdir ki, alıcılarımız alış-veriş zamanı
bonuslar əldə edəcəklər. Bu bonusları isə sonradan müxtəlif hədiyyələrə, məhsullara,
endirimlərə çevirmə şansı qazanacaqlar”. Dünyaya
açılan fərqli pəncərə
Startap dünyasına
qoşulmağın yollarından danışan həmsöhbətimiz deyir ki, bu sahədə uğurlu olmaq
istəyirsənsə, dünyaya fərqli pəncərədən baxmalısan: "Mənə görə, startap
dünyasına qoşulmaq üçün müəyyən bir problemi aşkarlayıb tapmalı və onun həll
yolunu təklif etməlisən. Bu təklif isə innovativ və faydalı olmalıdır. Yəni bu bazara
var-dövlət qazanmaq məqsədi ilə gəlmək fikrimcə, düz deyil. Bu yolun yolçusu
olmaq üçün gərək hamı kimi deyil, dünyaya tamamilə yeni bucaqdan baxmalı ətrafında
olan resurslardan maksimum şəkildə istifadə etməli və daima risklərə getməyi bacarmalısan. Ətrafımızdakı
problemləri kəşf etmək nə qədər asan deyilsə, ona düzgün və məntiqi bir həll
yolu tapmaq bir o qədər çətin və xüsusi bacarıq tələb edən işdir. Bundan əlavə,
bu sahibkarları digər biznes qurucularından fərqləndirən əsas cəhət onların
tamamilə qəyri-müəyyənlik şəraitində işləmək bacarığı, qurduqları startapı tam
dərk edib onun gələcəyinin hansı ağır yollardan keçəcəyini öncədən görə bilməsi
və buna uyğun hərəkət etməsidir. Yəqin ki, mən də bu addımı atmışamsa, öz
bacarığımı və qarşılaşa biləcəyim bütün mümkün problemləri analiz etmişəm və irəliləməyə
tam hazıram”.
Yenilikçi
gənclik
"BazarDash”-ın hansı zərurətdən
meydana gəlməsinə gəldikdə isə, müsahibimiz deyir ki, zaman ən qiymətli məfhumdur
və bunu dəyərli işlərə xərcləmək lazımdır: "Hər bir insan il ərzində təqribən
zamanının 94 saatını supermarketlərə sərf edir. Halbuki insanlar bu
vaxtlarından daha dəyərli və vacib işlərdə istifadə edə bilərlər. Steve Jobsun
dediyi kimi, "Bu həyatda zaman bizim ən qiymətli resursumuzdur”. Bir innovativ
gənc kimi bu məsələ məni həmişə düşündürür və narahat edirdi. Elə bunun nəticəsi
olaraq özümlə həmfikir olan bir neçə yeniliçki gənci ətrafıma yığdım və bu problemlərin
həlli istiqamətində işləməyə başladıq. İnanırıq ki, bizim startap alış-veriş
zamanı insanların üzləşdiyi problemləri aradan qaldıracaq və bu prosesi daha da
rəngarəng, sərfəli edəcək”.
Sonda gələcək
planlarından danışan həmsöhbətimiz deyir ki, əsas məqsədi Azərbaycanda
insanları yeni texnologiyaya cəlb etmək və onların yerli məhsullara inamını
artırmaqdır: "Əsas məqsədim yüksək motivasiyalı komandamızın sayəsində Azərbaycanda
danışılan sahədə boşluqları aradan qaldırmaq, buraya yeni texnologiyaları cəlb
etmək və əvəzində, insanların bizim məhsullara olan sevgisini və inamını
qazanmaqdır”. Aygün ƏZİZ
Bakı 23°C
