• cümə, 29 Mart, 12:29
  • Baku Bakı 14°C

Alimlərin mətbuatda ekspert qismində çıxış etməsi vacib hesab olunur

19.12.18 14:23 657
Alimlərin mətbuatda ekspert qismində çıxış etməsi vacib hesab olunur
Bu gün Azərbaycan Milli Elmlər Akademiyası (AMEA) Rəyasət Heyəti Aparatının Mətbuat və informasiya idarəsinin təşkilatçılığı və akademiyanın Azad Həmkarlar İttifaqının dəstəyi ilə "Elmin populyarlaşdırılmasında KİV-i rolu" mövzusunda dəyirmi masa keçirilib.
Trend-in məlumatına görə, AMEA Rəyasət Heyəti Aparatı Mətbuat və informasiya idarəsinin rəisi Zülfüqar Fərzəliyev elmin vəziyyəti haqqında etibarlı, obyektiv informasiyanın cəmiyyətə çatdırılmasında, elm və elmi biliklərin populyarlaşdırılmasında jurnalistlərin üzərinə böyük məsuliyyət düşdüyünü bildiririb.
İdarə rəisi jurnalistlərin bir və ya bir neçə elm sahəsi üzrə ixtisaslaşması sahəsində mövcud problemlərin həllinin və elmi-populyar üslubun tələblərinə cavab verən məqalələrin hazırlanmasının önəmliliyini bildirərək bu gün KİV-də işıqlandırılan elmi informasiyaların keyfiyyət və kəmiyyət göstəricilərinin istənilən səviyyədə olmadığını vurğulayıb.
AMEA-nın Mətbuat və informasiya idarəsinin rəis müavini Ülviyyə Rzayeva ölkənin 20-dən artıq aparıcı qəzet və xəbər saytında aparılan monitorinqlərin nəticələrini açıqlayıb.
O, qəzet və informasiya resurslarında işıqlandırılan müxtəlif səpkili elmi materiallarda tədqiqatların mahiyyəti ilə bağlı fikirlərin elmi üslubda kənara çıxmadığını qeyd edərək, elmi-populyar üslubun tələblərinə cavab verən məqalələrin hazırlanması sahəsində mövcud problemlərdən bəhs edib.
"Yeni Azərbaycan" qəzetinin baş redaktoru, millət vəkili Hikmət Babaoğlu alimlərin ekspert kimi mətbuatda çıxış etməsini vacib sayıb: "Biz nə elm xadimindən jurnalist, nə də jurnalistdən elm xadimi düzəldə bilərik. Bəzi hallarda bizim üçün ümummilli əhəmiyyət kəsb edən məsələlərlə bağlı alimlərdən cavab almağa çətinlik çəkirik. Bu baxımdan jurnalistlə alim arasında sıx əlaqə yaratmaq çox çətin olur. Biz bunun üçün səylərimizi birləşdirməli, informasiya boşluğunu doldurmalıyıq".
"Şərq" qəzetinin baş redaktoru Akif Aşırlı əlavə edib ki, elmin mətbuatda populyarlaşdırılması üçün kadrlar ixtisaslaşmalıdır, lakin bunun üçün zaman tələb olunur: "Hesab edirəm ki, ilk növbədə, elm xadimlərini Avropa üçün deyil, Azərbaycan üçün yetişdirməliyik. Alimlərin elmi məqalələri yalnız elmi jurnallarda deyil, qəzet və saytlarda dərc edilməlidir. AMEA-nın cəmiyyətdəki rolu alimlərin dilindən göstərməlidir. Ekspert qismində onlar müəyyən fikirlərin formalaşmasında iştirak etməlidirlər. Alimlərimiz informasiya verməkdə aktiv iştirak etmirlər. Qeyri-hökumət təşkilatlarının ekspertləri alimlərimizdən daha fəaldırlar".
"İki Sahil" qəzetinin baş redaktoru Vüqar Rəhimzadə qeyd edib ki, Akademiyanın İctimaiyyətlə əlaqələr şöbəsi KİV-lə münasibət qurmaqda maraqlı olmalı, alimlər öz məqalələrini dərc etdirməkdə aktiv olmalıdırlar.
AMEA-nın müxbir üzvü Misir Mərdanov isə vurğulayıb ki, Azərbaycanın bugünkü və gələcək inkişafında elmin öz yeri var: "Bu gün elmin populyarlaşdırılması ilə bağlı problemlərdə günahkar axtarmamalıyıq. Bu gün müxtəlif səbəblərdən Azərbaycandan kənarda minlərlə alimlərimiz çalışır. Azərbaycandan uzaqda fəaliyyət göstərən alimlərimizi də unutmamalıyıq. Onların Azərbaycanda tanınması ilə bağlı birgə fəaliyyət göstərməliyik".
Tədbirdə elmin təbliğindəki xidmətlərinə görə bəzi jurnalistlərə təşəkkürnamə təqdim edilib.
banner

Oxşar Xəbərlər