Ali təhsili onlar üçün əlçatan edək ki...
Dövlət
İmtahan Mərkəzinin (DİM) fiziki məhdudiyyətli şəxslər üçün imtahanların təşkil
edilməsi, tətbiq olunan xüsusi vasitələr və onların, mərkəzin keçirdiyi
imtahanlarda istifadə olunması imkanlarını araşdıracağı ilə bağlı mətbuatda yayılan
xəbər şübhəsiz, bu istiqamətdə atılacaq addımların başlanğıcı kimi görünür. Elə bu günlərdə qəzetimizdə yer alan 1 saylı Sağlamlıq İmkanları
Məhdud Gənclərin Peşə Reabilitasiya Mərkəzində aldığı təhsildən danışan və məhz
ona dərs keçən müəllimlərin səyi və təcrübəsi sayəsində cəmiyyətin qaranlıq
zirzəmisindən işığa qovuşan Xanoğlan Sadiqin qəbul imtahanlarına çətin hazırlıq
prosesi bu məsələnin vacibliyini bir daha gündəmə gətirir. Belə ki, gənc Peşə
Reabilitasiya Mərkəzində fədakarlıq, təmənnasız sevgi öyrəndiyini və böyük
təcrübə, möhkəm dostlar qazandığını qeyd edir. Bütün bunları qazanmaq üçün isə az
qala bir ömür xərcləyib. Gəncin qəbul imtahanlarına hazırlaşmasında, instituta
qəbul olmasında ona kömək edən
insanların səbri və humanistliyi dəstək olub. O, DİM-in qəbul imtahanlarında fiziki
sağlamlığından asılı olmayaraq, sağlam insanlara şamil olunan qaydaları keçmək
üçün mücadilə aparıb. 428 bal toplayaraq Bakı Dövlət Universitetinin filologiya
fakültəsinə daxil olan gənc, 4 ay gecə-gündüz çalışaraq tələbə adını qazanıb.
Təcrübə ardınca gedənlər
Sağlamlıq imkanları məhdud gənclərə ali məktəblərə qəbul zamanı
güzəştlərin tətbiqi məsələsinin gündəmə gəlməsi, onların bu istiqamətdə
çətinliklərinin qismən də olsa azaldılmasından xəbər verir. Hazırda Böyük
Britaniyada Kembric Universiteti ilə birgə əməkdaşlıq çərçivəsində təlim
səfərində iştirak edən DİM əməkdaşlarının əldə edəcəyi təcrübə isə bu
istiqamətdə yaşıl işıq ola bilər. "Əməkdaşlarımız Birləşmiş Krallıq təcrübəsində
imtahanlarda fiziki məhdudiyyətli şəxslər üçün yaradılan şəraitlə tanış olacaq,
tətbiq olunan xüsusi vasitələr barəsində öyrənəcək və bu vasitələrin DİM-in
keçirdiyi imtahanlarda istifadə imkanlarını araşdıracaqlar”- deyə DİM-in mətbuat xidmətinin rəhbəri Xanlar Xanlarzadə "Kaspi” qəzetinə
açıqlamasında bildirdi: "Bilmək maraqlıdır ki, bu cür məsələlər Birləşmiş
Krallıqda necə tənzimlənir. Onların təcrübəsindən nələri DİM-in keçirdiyi
imtahanlarda tətbiq edə biləcəyimiz araşdırılacaq”. Bununla belə, DİM rəsmisi
bu günə qədər mərkəz tərəfindən sınaq və qəbul imtahanlarında iştirak etmək
istəyən sağlamlıq imkanları məhdud
şəxslər üçün imtahan zamanı müəyyən zəruri şəraitin yaradıldığını deyir.
Məsələn, fiziki məhdudiyyətli şəxslər üçün imtahan zamanı əlavə zallar ayrılır.
Onlara bir saat əlavə vaxt ayrılır və xüsusi nəzarətçilər təyin edilir: "Tutaq
ki, ali təhsil müəssisələrinə qəbul imtahanında fiziki məhdudiyyəti olmayan
abituriyentlərə 3 saat müddət verilirsə, fiziki məhdudiyyətli şəxslərə -
məsələn, gözdən əlildirsə, oxuya bilmirsə, onlara əlavə olaraq bir saat vaxt
verilir. Bunlar imtahan qaydalarında onlar üçün nəzərdə tutulmuş güzəştlərdir.
Belə abituriyentlər əvvəlcədən bizə müraciət edirlər və DİM onlar üçün imtahan
zallarında xüsusi şərait yaradır. Əgər ehtiyac varsa, sağlamlıq imkanlarının
məhdud olmasına görə, nəzarətçi ilə təmin olunurlar. Məsələn, gözdən əlillərə
ayrıca olaraq nəzarətçi təhkim olunur, onların sualları nəzarətçilər tərəfindən
oxunur və cavabları da nəzarətçilər tərəfindən kodlaşdırılır. Onların normal
şəkildə öz bilik və bacarıqlarını nümayiş etdirə bilmələri üçün DİM tərəfindən
şərait yaradılır”. X.Xanlarzadə Dövlət Proqramında da fiziki məhdudiyyətli
şəxslərin cəmiyyətə inteqrasiyasının tətbiq olunması, onların iş şəraitinin
təmin olunması ilə bağlı tapşırıqların yer aldığını bildirir. Qəbul
imtahanlarının test toplularında yer alan sualların sağlamlıq imkanları məhdud
abituriyentlər üçün azaldılmasına və asanlaşdırılmasına gəlincə, DİM rəsmisi
qeyd edir ki, bu cür güzəştlər magistraturaya qəbul imtahanlarında nəzərdə
tutulub: "Fiziki imkanları məhdud şəxslərin magistraturaya qəbul imtahanlarında
test suallarında müəyyən fərqliliklər var. Həlli, onların imkanlarının
xaricində olan tapşırıqlardan istifadə olunmur. Bakalavr üzrə qəbul
imtahanlarında isə hələlik hər hansı bir dəyişiklik yoxdur”.
Nəzərə alsaq ki, sağlamlıq imkanları məhdud gənclər normal fiziki
imkanları olan abituriyentlərlə eyni qaydada və eyni test üzrə imtahan verirlər,
onda belə abituriyentlər üçün qəbul imtahanlarında güzəştin nəzərdə
tutulmasının zəruriliyi meydana çıxır. Xüsusən də qabiliyyətlərinin
qiymətləndirilməsi zamanı yüksək bal almış fiziki qüsurlu abituriyentlərin
qəbul imtahanlarında problemlərlə qarşılaşması ayrıca bir mövzudur. Baxmayaraq
ki, bu tədris ilində ali və orta ixtisas məktəblərinə təkcə gözdən əlillərin
ali məktəblərə daxil olması haqqında statistikada maraqlı faktlar yer alıb.
Belə ki, 56 gözdən əlil abituriyent sənəd verib və onlardan 44-ü ali məktəbə
qəbul olunub. Onların arasında 555 bal toplayan abituriyent var ki, Bakı Dövlət
Universitetinin menecment fakültəsinə, 598 bal topalayan abituriyent isə
biologiya fakültəsinə daxil olub.
Vacib və stimullaşdırıcı
məsələ
Təhsil ekspertləri fiziki məhdudiyyətli şəxslər üçün imtahanların
təşkili prosesində xarici ölkə praktikasının öyrənilməsini bu istiqamətdə
müsbət addım kimi dəyərləndirir və belə gənclər üçün güzəştlərin nəzərdə
tutulmasını vacib hesab edirlər. Fiziki
qüsurlu gənclərin ali təhsil müəssisələrinə birbaşa qəbulunun həyata
keçirilməsi ilə bağlı təkliflər də
səslənir. O mənada ki, istedadı olanlar
cəmiyyətdən ayrı düşməsin, gələcəkdə işlə təmin oluna bilsinlər.
Təhsil eksperti Nadir
İsrafilov dünya təcrübəsində qəbul imtahanlarında fiziki qüsurlu insanlar üçün
müxtəlif güzəştlərin yer aldığını deyir: «Düzdür, bizdə fiziki qüsurlu insanlar
üçün nəzərdə tutulan məktəblər var. İnklüziv təhsil də həyata keçirilir. Ali
məktəb məsələsində isə onlara hər hansı güzəştlərin tətbiqi nəzərdə
tutulmayıb”. Təhsildə istənilən stimullaşdırıcı tədbirlərin tərəfdarı olduğunu
bildirən ekspert qeyd etdi ki, fiziki cəhətdən məhdud olan insanlar üçün bu tip
güzəştlərin tətbiq edilməsi ilə bağlı söhbətlər çoxdandır ki, davam edir. Əgər
bu istiqamətdə xarici təcrübənin öyrənilib tətbiq edilməsi baş tutarsa, bu,
təhsildə yeni baxış olacaq: "Elə məsələlər var ki, onları birbaşa həyata
keçirmək olmur və işlək mexanizmi hazırlamaq lazımdır. Eləcə də, qəbul
imtahanları məsələsində fiziki qüsurlu şəxslərə güzəşt olunmasının da işlək
mexanizmi olmalıdır. İlk növbədə, bu məsələ ilə bağlı müəyyən təcrübə əldə
edilməlidir. Bu, vacib və stimullaşdırıcı məsələdir”.
Kompleks işlər
aparılmalıdır
Əməkdar müəllim Almaz
Həsrətin fikrincə, sağlamlıq imkanları məhdud gənclərə fərdi yanaşmaq
lazımdır: "Çünki adi uşaqlardan fərqli olaraq, mənimsənilmiş proqramın məzmunun
cavablandırılmasının ayrıca metodla aparılması vacibdir. Milli Məclisdə
əlilliyi olan şəxslərin qəbul və digər test imtahanları ilə əlaqədar qanun
qəbul edilib. Sənədə görə, əngəlli şəxslərin praktik
imkanları nəzərə alınaraq, onlar üçün test imtahanları zamanı əlavə vaxtın
verilməsi nəzərdə tutulub. Son vaxtlar belə
uşaqların sağlam uşaqlarla birlikdə təhsil almalarına imkan yaradılıb.
Doğrudur, bu, bəzi məktəblərdə tətbiq olunub. Daha yüksək nəticə distant təhsildə
əldə olundu. Nəticədə orta təhsilini başa vurmuş sağlamlıq imkanları məhdud olan
uşaqlar Dövlət İmtahan Mərkəzinə müraciət edərək qəbulda iştirak ediblər”.
A.Həsrət də qəbul zamanı belə şəxslərə köməkçi adamın təyin olunduğunu,
həmçinin müəyyən əlavə vaxtın da verildiyini deyir: "Bu təcrübə bir çox xarici
ölkələrdə də mövcuddur. Misal üçün, Koreyada, Yaponiyada sağlamlıq imkanları
məhdud olan uşaqlar, adi uşaqlarla bərabər, eyni gündə müsabiqəyə qatılırlar.
Ancaq bizdəki prosedurdan fərqli olaraq, yardımçı sual və tapşırıqların
eşidilməsi və görməsinə görə deyil, fiziki fəaliyyətin idarə olunması üçün yardımçıları
olur. Üstəlik, verilən tapşırıqları hər birinin qavrayacağı səviyyədə tərtib
edirlər. Yəni görmədə problemi olanlar
üçün əllərin toxunulması ilə tapşırıqların hazırlanması əsasdır. Eşitməsində
problemi olanların tapşırıqları video görüntülü olur, barmaq işarələri ilə
əyani göstərilir. Ancaq bizdə təəssüf ki, hələ qəbul imtahanlarında bu
metodikalardan istifadə olunmur”. Ekspertin sözlərinə görə, Təhsil Nazirliyi son
zamanlar ayrıca diqqət ayıraraq, bu istiqamətdə bir çox işlər görməyə çalışır: "Sağlamlıq
imkanları məhdud olan uşaqlar üçün qəbul qaydalarında ayrıca metodika işlənib
hazırlanmalıdır. Qəbul zamanı həmin
uşaqların imtahanlarının uğurlu təşkil olunması üçün, öncə kompleks işlər
aparılmalıdır. İlk növbədə həmin uşaqların sosial reabilitasiyası və onların defektoloji hazırlığının istiqamətləri
üzrə metodik vəsaitlərin hazırlanması vacibdir. Həmçinin onların tədrisinin
təlim metodikasına dair sosial işçilərin, psixoloqların, loqopedlərin
hazırlanması işi gücləndirməlidirlər. Qəbul zamanı məhz həmin kadrlardan
istifadə olunmalıdır”.
DİM rəsmisinin ümidverən fikirləri onu deməyə əsas verir ki, yaxın
gələcəkdə sağlamlıq imkanları məhdud insanlar üçün nəzərdə tutulacaq güzəştlər,
onların sırasında nəinki ali təhsillilərin sayını artıracaq, həmçinin cəmiyyətə
inteqrasiyasını gücləndirəcək. Əlbəttə, Birləşmiş Krallığa ezam olunan
əməkdaşların özləri il birlikdə gətirəcəkləri təcrübəni bizim cəmiyyətə
transfer etmək mümkün olarsa...
Təranə
Məhərrəmova