Ağır zədələrdən böyük hədəflərə doğru gedən xanım - Portret
İdmanla məşğul olmaq ağır zəhmət tələb edir. Bu zəhmətə
qatlaşmaq, gərgin hazırlıqlarda səbirlə məşqçilərin tapşırıqları yerinə yetirmək,
məşqdən sonrakı ağrılara, gözlənilməz zədələrə sinə gərmək hər kişinin işi
deyil. Ancaq idman təkcə kişilərin də işi deyil. Artıq uzun illərdi qadınlar da
kişilər kimi bütün idman növlərində güclərini sınayır, mötəbər yarışlarda ölkələrinin
şərəfini qoruyur, bayrağını yüksəldir, himnini səsləndirirlər.
Azərbaycan idman ölkəsidir. Lakin təəssüf ki, ölkəmiz
qadın idmançıların uğurları sarıdan bir qədər korluq çəkir. Amma bu o demək
deyil ki, bu vəziyyət həmişə belə davam edəcək.
Artıq ölkəmizdə böyük uğurlar üçün böyük perspektiv vəd
edən xanım idmançılar yetişməkdədir. Elə son İslam Həmrəyliyi Oyunları da buna əyani
sübut oldu. Bu mötəbər yarışda ölkəmizin medal kolleksiyasını zənginləşdirən
idmançılar arasında yetərincə perspektiv vəd edən xanım idmançılar da oldu. Bu
cür idmançılarımızdan biri də ağır atletimiz Elnarə Abbasovadır. Bu yazıda sizə
İslam Həmrəyliyi Oyunlarında ölkəmizə bürünc medal qazandırmış gənc idmançımız
barədə söhbət açacağıq.
Bədii
gimnastikadan ağır atletikayadək
Elnarə Abbasova 1997-ci il avqust ayının 5-də Qazax
rayonunda dünyaya gəlib. O, uşaq vaxtı çox dəcəl olub. Həmişə dalaşmağı sevən
Elnarə, oğlan həmyaşıdlarının qəniminə çevrilmişdi. Nəhayət, anası qızının bu
enerjisini daha yararlı bir sahədə istifadə etməli olduğun düşünür və onu
idmana yazdırır. Balaca Elnarənin idmanla tanışlığı çox erkən, 6 yaşında olub.
Anası çox dəcəl olan qızını rayondakı bədii gimnastika qrupuna yazdırır. O, düz
iki il idmanın bu növü ilə məşğul olur. Lakin rayon yerində bu idman növündə
uğur qazanmağın bir qədər çətin olacağını görən Elnarə, bədii gimnastika ilə
vidalaşır. O, daha sonra güləş, karate və ən nəhayət voleybolla da məşğul olur.
Voleyboldan söz düşmüşkən, onun babası vaxtilə məhz bu
idman növü ilə məşğul olub. Bir müddət yerli voleybol qruplarında voleybolla məşğul
olan Elnarənin burdakı fəaliyyəti də uzun çəkmir. O, cəmi 8 ay sonra bu idman
növü ilə də vidalaşır. Elnarə idman növlərini əlcək kimi dəyişsə belə, heç vaxt
idmandan kənarda qalmayıb. O, həmişə evlərində, məktəbdə idmanla məşğul olurdu.
Sevimli məşğuliyyəti isə turnikdə dartınmaq idi. Elə onun əsl istedadını da məhz
bu fərdi məşqlər üzə çıxarır. Elnarənin istedadını üzə çıxaranlar isə vaxtilə
karate ilə məşğul olmuş Mətanət xanım və rayonun xalq pəhləvanı İsrafil Məmmədov
olur. Məhz onların məsləhəti ilə Elnarə özünü ağır atletikada sınamaq qərarına
gəlir. Əvvəlki idman növlərindən fərqli olaraq, o, bu dəfə qərarı anası ilə
birgə yox, özü verir. Elnarə ilk dəfə məşqə gedəndə ailədə heç kimin xəbəri yox
idi. O, bu barədə ailəsini iki gün sonra məlumatlandırır.
Bu "ağır yük”ün altına girmək barədə qərarında ailəsinin
xeyir-duası da əsas olur. Lakin ailədə heç də hamı onun bu cür ağır idman növü
ilə məşğul olmasını dəstəkləmirdi. "Qız nədir, ağır atletika nədir” fikri ilə Elnarəni bu yoldan çəkindirmək istəyən ailə
üzvləri də oldu. Ancaq bu yolda da onun əsas dəstəkçisi məhz anası olur. Ailəsinin
xeyir-duasını aldıqdan sonra bu idman növü ilə məşğul olmaq fikrini qətiləşdirən
Elnarə, "Zirvə” idman klubuna yazılır.
İlk uğurlar
İlk dəfə məşqə gedəndə, ağır yükdən çəkinmir, əskinə,
çox həvəsli idi. Onun bu həvəsi, məşqlərə can yandırması tezliklə öz bəhrəsini
verir. 2010-cu ilin yanvar ayında bu idmanla məşğul olmağa başlayan Elnarə, cəmi
iki ay sonra, Lənkəranda təşkil edilən yarışda 3-cü olur. Məşqlərə can yandıran
Elnarənin körpücük üzərində uğurları özünü çox gözlətmir. Bir müddət sonra Azərbaycan
çempionu olan Elnarə, daha sonra idman ustası adına da yiyələnir. 2012-ci ildə
isə onun uğurlu çıxışı yığmanın məşqçilərinin də diqqətindən yayınmır. O, məhz
bu ildə ağır atletika üzrə millimizə dəvət alır. Elnarə 2014-cü ildə
Qazaxıstanın Almatı şəhərində keçirilən ağır atletika üzrə dünya çempionatının
da iştirakçısı olur. Həmin dünya çempionatında ən gənc atlet olan (17 yaş)
Elnarənin burda uğur qazanmasına təcrübəsizliyi mane olur.
Zədələrin
"sındıra” bilmədiyi istedad
İdmançı həyatı şahmat lövhəsi kimidir. Burda ağ
xanalarla yanaşı, qara xanalar da var. Heç bir idmançı uğura doğru irəliləyərkən
bu "qara xana”lara toxunmadan keçə bilmir. İdmançının ən böyük düşməni zədələrdi.
Təəssüf ki, Elnarə qısa karyerası ərzində bir neçə dəfə bu "düşmən”lə üzləşməli
olub. 2012-ci ildə, karyerasının yüksəlişdə olduğu zaman belindən ağır zədə
alan Elnarə, uzun müddət idmandan kənarda qalmalı olur. Bu dövr onun həyatında ən
ağır anlarından idi. Bir idmançı üçün kənarda qalmaq, geri qayıdacağı günü səbirlə
gözləmək qədər ağır heç nə yoxdur. Bu, idmançılar üçün bəlkə də, ən çətin
sınaqdır.
Həmin ağır günləri xatırlayan Elnarə, "hər dəfə zala
gedəndə kövrəlirdim, öz-özümə nə vaxtsa ayağa qalxacağıma və bu yükü yenidən
qaldıracağıma söz verirdim” deyir.
O, bu sınaqdan da üzüağ ayrılır. Özünün sözlərinə görə,
bu ağır günləri geridə qoymaqda anası ilə yanaşı, məşqçisi Rafael İbrahimovun
çox böyük rolu olur.
Ağır zədədən qayıtdıqdan sonra ilk olaraq "Zirvə”
kubokuna qatılan Elnarə burda 3-cü olur. Yeni-yeni formasını bərpa edən gənc
idmançı yenə zədə maneəsi ilə üzləşir. 2015-ci ilin avqust ayında bu dəfə
çiynindən zədə alan Abbasova, 6 ay idmandan kənarda qalmalı olur. Artıq bir dəfə
bu çətinliyin öhdəsindən gəlmiş gənc idmançı, bu dəfə də bunu bacarır.
Karyerasının
zirvəsində
Bu ili Elnarənin qısa karyerasının hələ ki, zirvəsi
saya bilərik. İlin əvvəlində ilk dəfə böyüklər arasında ölkə çempionu olan
Elnarə, mayda Bakıda təşkil edilən İslam Həmrəyliyi Oyunlarında da uğur
qazanmağa nail olur. 63 kq çəki dərəcəsində çıxış edən gənc idmançı
paytaxtımızda keçirilən yarışda birdən qaldırma hərəkətində 82 kq, təkanla
qaldırma hərəkətində isə 102 kq-ı ram edir. Ümumilikdə 184 kq (82+102) nəticə
göstərən Elnarə, bu çəkidə bürünc medal qazanır. Bu, hələ ki, onun beynəlxalq
arenada qazandığı yeganə ciddi uğurdur.
"Anama söz
vermişəm, medal qazanacağam”
Hazırda Elnarə onu kəşf edən ilk məşqçisi İsrafil Məmmədov
və Rayət Abdalovun rəhbərliyi altında çalışır. Yığma ilə birgə Moldovada təlim-məşq
toplanışında olan gənc idmançı, bir neçə gün öncə bu ölkədə keçirilən turniri
üçüncü pillədə başa vurdu. Onun əsas hədəfi isə gələn ay keçiriləcək Avropa
çempionatında medal qazanmaqdı. O, "anama söz vermişəm, medal qazanacağam”
deyir. Lakin Elnarənin ən böyük hədəfi olimpiya çempionluğudur:"İdmanla yeni məşğul olmağa başladığım zaman London
Olimpiadası gedirdi. Həmin vaxt mən də yarışı izləyirdim. Kim olduğu yadımda
deyil, ancaq fəxri kürsüyə çıxan idmançını görəndə özümü bir anlıq onun yerində
təsəvvür etdim. Həmin gündən əsas məqsədim olimpiya çempionu olmaqdı”.
Ən böyük dəstək
Hər bir idmançının, xüsusilə xanım idmançıların bu sahədə
uğur qazanması üçün ailənin rolu əvəzsizdi. İdmançının mübarizəsi təkcə
meydanda yox, həm də ondan kənarda olur. Bu mübarizədə isə ona ailənin,
yaxınların, dostların dəstəyi əsasdır. Elnarənin bu cəhətdən bəxti gətirib.
Onun anası Afət xanımın qızının uğurlarında əvəzsiz rolu var. Elnarə idmanla məşğul
olmağa başlayandan, idmana böyük həvəsi
olan anasının dəstəyini həmişə hiss edib. Onun üçün ilk yarışında da, sonrakı
yarışlarında da anasının "sənə güvənirəm” sözləri həmişə ilham mənbəyi olub.
Elnarə "həmişə anamı idman zalında görəndə, mənə əlavə güc gəlir” deyir. Hər
bir uğurundan sonra isə ilk növbədə anasının ümidlərini doğrultduğuna görə
sevinir.
İdmanda uğur gərgin məşqlərdən çox asılıdır. Buna görə,
sıx qrafikdə çalışan idmançıların asudə vaxtı çox az olur. Elnarədə də həmçinin.
Gənc idmançı asudə vaxtını əsasən, anası və ya dostları ilə gəzintidə keçirməyə üstünlük verir. O,
pop musiqisini daha çox sevir. Ən sevdiyi müğənni isə Miri Yusifdir. Uşaq
vaxtından döyüş idman növlərinə marağı olan Elnarə, vaxt tapdıqca bu cür
yarışları yaxından izləyir.
Portret
İdman ağır zəhmət tələb edir. Bu sahədə uğur qazanmaq
üçün ağır məşqlərə dözməli, gözlənilməz zədələrə, uzun müddət çəkən bərpa
prosesinə səbirlə yanaşmalısan. Çox gənc olmasına baxmayaraq, Elnarə artıq bu
sınaqların bir çoxundan keçib. Onun bu sınaqlardan üzüağ ayrılmasında
dözümlülüyü, səbri və ən əsası əzmkarlığı əsas rol oynayıb. Karyerasında hələ
ki, İslam Həmrəyliyi Oyunlarındakı "bürünc” ən böyük zirvədir. Lakin ondakı
potensial daha yüksək zirvələri fəth etmək üçün ümid vəd edir. Elnarə isə bu
günə kimi ümidləri doğrultmağı bacarıb.
Elnur