Aİ-nin Tvinninq alətinin Azərbaycanda tətbiqinin 10 illiyinə həsr olunmuş Konfrans keçirilib
Bakıda
İqtisadiyyat Nazirliyinin təşkilatçılığı ilə Avropa Ittifaqının Tvinninq alətinin
Azərbaycanda tətbiqinin on illiyinə həsr olunmuş Konfrans keçirilib.
Tədbirdə Azərbaycanın aidiyyəti
dövlət qurumlarının, Avropa Komissiyasının, Avropa İttifaqının üzv dövlətlərinin
səfirliklərinin, həmçinin Ukrayna, Moldova, Gürcüstan və Türkiyənin müvafiq
dövlət qurumlarının ümumilikdə 100-dən çox nümayəndəsi iştirak edib.
Konfransda çıxış
edən İqtisadiyyat nazirinin müavini Sahil Babayev Azərbaycan və Avropa İttifaqı
arasında əməkdaşlığın həyata keçirildiyini vurğulayıb. Belə ki, Avropa
İttifaqının 23 üzv dövləti ilə Azərbaycan arasında ikiqat vergitutmanın aradan
qaldırılması, 18-i ilə sərmayələrin təşviqi
və qarşılıqlı qorunması haqqında sazişlər imzalanıb, 14 üzv dövlətlə Hökumətlərarası
Komissiya, 2 dövlətlə İşçi Qrupu fəaliyyət göstərir. Bildirilib ki, Azərbaycan
və Avropa İttifaqı arasında iqtisadi sahədə də əlaqələr inkişaf edir. Avropa
İttifaqı Azərbaycanın əsas ticarət tərəfdaşlarındandır, ölkəmizə yatırılan
xarici investisiyalarda Avropa İttifaqı ölkələrinin xüsusi çəkisi böyükdür.
Azərbaycan
Avropanın enerji təhlükəsizliyinin təmin edilməsində önəmli rol oynayır və Cənub
Qaz Dəhlizi layihəsi enerji sahəsində strateji əməkdaşlığın nümunəsidir.
Sahil Babayev benefisiar
qurumlara və digər konfrans iştirakçılarına ötən on ildə Azərbaycanda Tvinninq,
TAİEX, SİQMA və SOCİEUX kimi Avropa İttifaqının institusional quruculuq alətləri
və bu alətlərdən istifadə etməklə əldə
olunan uğurlar barədə məlumat verib və
tərəfdaşlıq əlaqələrinin müxtəlif sahələrdə daha da möhkəmləndirilməsi üçün
imkanları vurğulayıb. Bildirilib ki, bu günədək Azərbaycanda reallaşdırılan 45
Tvinninq layihəsindən 26-ı uğurla tamamlanıb, 12 layihə icra edilməkdədir, 7
layihə üzrə isə sənədlər hazırlanır. Azərbaycanın
dövlət qurumlarının təşəbbüsü ilə 162 TAİEX tədbiri həyata keçirilib, bununla
yanaşı dövlət qurumlarının nümayəndələri 73 TAİEX tədbirində iştirak edib. Azərbaycanda 15 SİQMA layihəsi həyata keçirilib, 2
SOCİEUX layihəsi icra mərhələsindədir.
Avropa İttifaqının
Azərbaycandakı Nümayəndəliyinin rəhbəri, səfir Malena Mard Avropa İttifaqı ilə
Azərbaycan arasında əlaqələrin inkişaf etdirilməsi üçün qarşılıqlı marağı qeyd
edib. Tvinninq layihələrinin sayına görə Azərbaycanın Cənub Qafqazda liderliyini
vurğulayan səfir Malena Mard əlaqələrin daha da genişləndirilməsi üçün
potensialı diqqətə çatdırıb.
İqtisadiyyat
Nazirliyinin Beynəlxalq təşkilatlarla əməkdaşlıq şöbəsinin müdiri, Azərbaycanda
Avropa İttifaqının institusional quruculuq alətləri üzrə Proqram İdarəetmə
Qurumunun direktoru Ruslan Rüstəmli Avropa İttifaqının institusional quruculuq
alətlərinin Azərbaycanda tətbiqinə dair təqdimatla çıxış edib.
Avropa Komissiyasının Qonşuluq
Siyasəti və Genişlənmə üzrə Baş Direktorluğunun nümayəndələri Klaus Lex və
İvana Petriçeviç Avropa İttifaqının institusional quruculuq alətləri olan
Tvinninq və TAİEX-in Şərq Tərəfdaşlığı ölkələrində tətbiqinə dair ümumi və ayrı-ayrı
ölkələr üzrə göstəriciləri tədbir iştirakçılarının diqqətinə çatdırıblar.
Çıxış edən Azərbaycan,
Ukrayna, Moldova, Gürcüstan və Türkiyə benefisiar qurumlarının nümayəndələri Avropa
İttifaqının institusional quruculuq alətlərinin tətbiqinə dair təcrübələrini
bölüşüb, instutisional quruculuq alətlərinin tətbiqinin əhəmiyyətini
vurğulayıblar.
Qeyd edək ki,
Tvinninq layihəsi dövlət qulluqçuları arasında texniki təcrübənin birbaşa
mübadiləsi yolu ilə benefisiarlara Avropa İttıfaqının standartlarına və təcrübələrinə
uyğunlaşdırma prosesində dəstək verir. TAİEX layihəsi
qısamüddətli texniki yardım, məsləhət və təlim xidmətlərinə, SİQMA layihəsi dövlət idarəçiliyi sistemlərinin və
dövlət idarəetmə orqanlarının potensialının gücləndirilməsinə,
SOCİEUX isə sosial müdafiə sisteminin təkmilləşdirilməsinə dəstək göstərir.